2 Pedro–Judas (Unit 30)

Materyal sa Pagpangandam alang sa Magtutudlo sa Home-Study

Summary sa mga Leksyon sa Daily Home-Study

Ang mosunod nga mga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang 2 Pedro–Judas (unit 30) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.

Day 1 (2 Pedro)

Gisulat ni Apostol Pedro kini nga epistola ngadto sa mga Santos aron matabangan sila sa naglibut nga pagpanglutos, pagsulay, ug apostasiya sulod sa Simbahan. Samtang gitun-an sa mga estudyante ang mga pulong ni Pedro, ilang nakat-unan nga ang mga propeta makadawat og kasulatan pinaagi sa Espiritu Santo ug nga ang mini nga mga magtutudlo nagtinguha sa paglingla og paglimbong kanato sa pagpatuo nga ang sala maghatag og labaw nga kagawasan. Nakat-unan usab sa mga estudyante nga makapangandam kita sa Ikaduhang Pag-anhi sa Manluluwas pinaagi sa pagpasiugda og diosnong pagpakabuhi ug matinguhaong magbantay sa Iyang pag-anhi.

Day 2 (1 Juan)

Gikan sa 1 Juan, nakat-unan sa mga estudyante nga kon dawaton nato ug sundon ang mga pagtulun-an sa mga propeta ug mga apostoles, maangkon nato ang kahiusahan uban sa Amahan ug sa Anak. Agig dugang, nakat-unan nila nga kon gihigugma nato ang Dios, higugmaon nato ang uban.

Day 3 (2 Juan–3 Juan)

Diha sa duha ka mga sulat ni Apostol Juan ngadto sa mga Santos, padayon niyang gipahayag ang kabalaka bahin sa mga impluwensya sa mga miapostasiya sa Simbahan. Gikan niini nga mga sulat nakat-unan sa mga estudyante nga kon magkat-on kita og motuman sa mga sugo ug magmabinantayon, padayon natong matagamtam ang mga panalangin sa ebanghelyo nga atong nadawat, ug kon magsunod kita sa doktrina ni Kristo, maanaa kanato ang Amahan ug ang Anak. Nakat-unan usab sa mga estudyante nga ang pagsunod sa ebanghelyo magdala og kalipay dili lang sa atong kaugalingon apan sa uban usab ug nga ang mga miyembro sa Simbahan angay nga modawat ug mosuporta sa tanang mga sulugoon sa Ginoo.

Day 4 (Judas)

Samtang gitun-an sa mga estudyante ang sulat ni Judas ngadto sa mga Santos kinsa nagsinati og grabing oposisyon, ilang nakat-unan nga ang mga disipulo ni Jesukristo kinahanglang makigbisog sa pagpanalipud sa ebanghelyo ni Jesukristo batok sa sayop nga mga pagtulun-an ug dautang mga binuhatan. Nakat-unan usab sa mga estudyante nga ang mga apostoles ug mga propeta mipasidaan kanato ug mitabang aron kita makaila niadtong nagtinguha sa pagpahuyang sa atong pagtuo ug kamasulundon ug nga mahimo kitang magmatinud-anon sa tinuohan pinaagi sa pagtukod sa atong kinabuhi diha sa ebanghelyo ni Jesukristo.

Pasiuna

Giawhag ni Apostol Pedro ang mga Santos nga palambuon ang ilang kahibalo bahin ni Jesukristo pinaagi sa pagpaningkamot nga mahimong sama Kaniya. Iyang gipaniguro kanila nga kining espirituhanong kalamboan makatabang nga “masiguro ang [ilang] pagkatinawag ug pagkapinili” (2 Pedro 1:10).

Mga Sugyot alang sa Pagtudlo

2 Pedro 1:1–11

Gitudlo ni Pedro kon unsaon sa pag-ambit ang diosnong kinaiya ni Jesukristo

Pahinumdom: Sa paghisgot sa mosunod nga baruganan ug sa mga tudling sa kasulatan, pagmatngon nga dili mahisgutan ang mga butang nga may kalabutan sa mga ordinansa sa templo ug mga doktrina.

Sa dili pa magsugod ang klase, isulat ang mosunod nga pamahayag diha sa pisara (gikan sa “The Will Within,” Ensign, Mayo 1987, 68):

“Ang atong tahas mao ang pagkahimong pinakamaayo sa atong kaugalingon” (Presidente Thomas S. Monson).

Ipares-pares ang mga estudyante. Dapita sila sa pagbasa sa pamahayag nga naa sa pisara ug hisgutan ang mosunod nga mga pangutana uban sa ilang mga kapares:

Unsa kaha ang buot ipasabut ni Presidente Monson sa pagkahimong “pinakamaayo sa atong kaugalingon”?
Ngano kaha nga importante man ang pagkahimong pinakamaayo sa atong kaugalingon?
Unsa ang makapugong kanato sa pagkahimong pinakamaayo sa atong kaugalingon?

Dapita ang mga estudyante sa pagpangita og kamatuoran samtang nagtuon sila sa 2 Pedro 1 nga makatabang nilang mahibalo kon unsaon nila sa pagkahimong pinakamaayo sa ilang kaugalingon.

I-summarize ang 2 Pedro 1:1–2 pinaagi sa pagpasabut nga misulat si Pedro ngadto sa mga miyembro sa Simbahan kinsa nakabaton og pagtuo kang Jesukristo apan siguro natintal nga mobalik sa masalaypong mga binuhatan sa kalibutan.

Dapita ang usa ka estudyante sa pagbasa og kusog sa 2 Pedro 1:3–4. Hangyoa ang klase sa pagsunod, nga mangita kon unsay gitudlo ni Pedro nga makatabang sa mga Santos nga magpabiling matinuoron sa ilang mga pagpamatuod sa Manluluwas.

Sumala niini nga mga bersikulo, unsa man ang gitudlo ni Pedro sa mga Santos?
Unsay buot ipasabut sa “mag-aambit sa diosnong kinaiya”? 2 Pedro 1:4.

Dapita ang mga estudyante sa pagbasa og hilum sa 2 Pedro 1:5–7, nga mangita sa mga kinaiya ni Jesukristo nga maoy gidapit ni Pedro nga palambuon sa mga Santos. Dayon hangyoa ang mga estudyante nga ilista diha sa pisara ang mga kinaiya nga ilang nakit-an. Hunahunaa ang pagdapit sa mga estudyante nga pangitaon sa diksyonaryo ang mga depinisyon sa bisan asa niining mga kinaiya nga gusto nilang mas masabtan.

Dapita ang mga estudyante sa paghunahuna mahitungod sa mga ehemplo kon kanus-a gipakita sa Manluluwas ang usa niining mga diosnong mga kinaiya. Hangyoa ang pipila ka mga estudyante sa pagreport sa ilang mga nahunahunaan diha sa klase.

Isulat sa pisara ang mosunod nga dili kompletong baruganan: Samtang magpalambo kita og diosnong mga kinaiya diha sa atong mga kaugalingon, kita …

Dapita ang usa ka estudyante sa pagbasa og kusog sa 2 Pedro 1:8–9. Hangyoa ang klase sa pagsunod, nga mangita sa panalangin nga atong madawat samtang magpalambo kita og diosnong mga kinaiya sa Manluluwas.

Unsa nga panalangin ang atong madawat samtang magpalambo kita og diosnong mga kinaiya? (Human makatubag ang mga estudyante, kompletuha ang pamahayag nga naa sa pisara aron mabasa kini nga sama sa mosunod: Samtang magpalambo kita og diosnong mga kinaiya sa atong mga kaugalingon, makaila kita ni Jesukristo.)
Ngano kaha nga ang pagpalambo og diosnong mga kinaiya makatabang man nato sa pagkaila ni Jesukristo?

Dapita ang usa ka estudyante sa pagbasa og kusog sa 2 Pedro 1:10–11. Hangyoa ang klase sa pagsunod, nga mangita sa ubang panalangin nga moabut niadtong magkugi sa pagpalambo og diosnong mga kinaiya.

Unsa nga panalangin ang moabut niadtong magkugi sa pagpalambo og diosnong mga kinaiya ni Jesukristo? (Ipasabut nga ang mga pulong nga “masiguro ang [ilang] pagkatinawag ug pagkapinili” [bersikulo 10] nagpasabut nga madawat niining kinabuhia ang kasiguroan gikan sa Dios nga ikaw makabaton og kinabuhing dayon. Si Pedro usab mi-refer niini isip “labing nahimatud-an nga pulong sa profesiya” [2 Pedro 1:19]. (Tan-awa usab sa D&P 131:5.)
Unsa nga baruganan ang atong makat-unan gikan niini nga mga bersikulo kon nganong kinahanglan kitang magkugi sa pagpalambo sa atong diosnong potensyal? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga baruganan: Kon magkugi kita sa pagpalambo sa atong diosnong potensyal samtang ania niining kinabuhia, madawat nato gikan sa Dios ang kasiguroan nga kinabuhing dayon. Isulat sa pisara kini nga baruganan.)

Dapita ang mga estudyante sa paghunahuna og mga tawo nga ilang nahibaloan kinsa nagkugi sa pagpalambo og Kristohanong mga kinaiya.

Asa nga Kristohanong mga kinaiya ang napalambo sa mga tawo nga imong nahunahunaan?
Sa unsa nga mga paagi ang ilang mga paningkamot nakatabang nila ug sa uban nga naa sa ilang palibut?

Mahimo kang mopakigbahin sa imong pagpamatuod nga ang pagpalambo og diosnong mga kinaiya makatabang nato nga makaila kang Jesukristo ug maandam kita sa pagdawat og kinabuhing dayon.

Dapita ang mga estudyante nga isulat diha sa ilang mga class notebook o mga scripture study journal ang usa ka diosnong kinaiya nga gusto kaayo nilang palamboon. Hangyoa sila sa pagsulat og piho nga butang nga ilang buhaton aron mapalambo kana nga kinaiya.

Sunod nga Unit (Pinadayag 1–11)

Pangutan-a ang mga estudyante kon nakadungog na ba sila bahin sa Apokalipsis. Ipasabut nga ang basahon sa Pinadayag sa kasagaran gi-refer nga Apokalipsis, Gresyanhong pinulongan nga ipasabut “pagbutyag o pagpadayag.” Sa basahon sa Pinadayag si Apostol Juan mihulagway sa usa sa iyang panan-awon nga naglakip sa daghang panagna o propesiya mahitungod sa atong panahon ug sa umaabut nga mga hitabo, lakip na sa Ikaduhang Pag-anhi ni Jesukristo ug sa katapusan sa kalibutan. Daghan sa mga panan-awon ni Juan naglakip og mga simbolo. Dapita ang mga estudyante sa pagpangita og mga simbolo nga nagpakita sa katapusang kadaugan sa maayo nga mibuntog sa kadautan samtang tun-an nila ang basahon sa Pinadayag.