Pinadayag 14–16

Isulat ang mosunod nga mga pangutana diha sa pisara: Posible ba nga matagamtam ang kalinaw bisan og ang kalibutan puno sa kadautan, sa kalamidad, ug kabayolente?

Dapita ang pipila ka mga estudyante sa pagtubag niini nga pangutana ug sa pagpasabut sa ilang mga tubag.

Dapita ang mga estudyante sa pagpangita sa mga kamatuoran samtang sila nagtuon sa Pinadayag 14–16 nga makahatag kanila og kalinaw samtang magpakabuhi sa dautan ug samok nga kalibutan sa dili pa moabut ang Ikaduhang Pag-anhi ni Jesukristo.

Ipasabut nga sumala sa narekord sa Pinadayag 14:1-13, nakita ni Apostol Juan ang usa ka panan-awon sa ulahing mga adlaw. Sa iyang panan-awon iyang nakita ang mga kalamidad nga moabut sa mga dautan. Nakita usab niya kon unsay magdala og kalinaw sa mga matarung.

Dapita ang usa ka estudyante sa pagbasa og kusog sa Pinadayag 14:1-5. Hangyoa ang klase sa pagsunod, nga mangita kon unsay nakita ni Juan nga nanghitabo sa ulahing mga adlaw.

• Unsa ang nakita ni Juan nga nanghitabo sa ulahing mga adlaw?

Pahinumdumi ang mga estudyante nga ang 144,000 mao ang mga high priest sa dose ka tribu sa Israel kinsa i-orden gikan sa matag nasud aron mangalagad sa ebanghelyo ug modala sa mga tawo ngadto sa Simbahan (tan-awa sa Pinadayag 7:4–8; D&P 77:11).

• Sumala sa mga bersikulo 4–5, giunsa sa paghulagway ni Juan ang 144,000 ka mga high priest kinsa mangalagad sa ebanghelyo sa tibuok kalibutan? (Ipasabut nga ang pulong nga “wala mahugawi tungod sa mga babaye” [bersikulo 4] nagpasabut nga mga putli sila, ang mga pulong nga “sa ilang mga baba walay hingkaplagang bakak” [bersikulo 5] nagpasabut nga mga matinuoron sila ug sinsero, ug ang mga pulong nga “walay lama” [bersikulo 5] nagpasabut nga limpyo sila gikan sa sala.)

• Ngano kaha nga ang pagkaputli, pagkamatinuoron, ug pagkalimpyo gikan sa sala makatabang man sa 144,000 ka mga high priest sa pagdala sa ebanghelyo ngadto sa uban?

Ipasabut nga atol sa panan-awon ni Juan mahitungod sa ulahing mga adlaw nakakita siya og tulo ka anghel. Dapita ang tulo ka mga estudyante sa pagrepresentar sa tulo ka anghel (kining mga estudyanteha mahimo nga magpabilin ra sa ilang lingkuranan). Dapita ang usa ka estudyante kinsa nagrepresentar sa unang anghel sa pagbasa og kusog sa Pinadayag 14:6. Hangyoa ang klase sa pagsunod, nga mangita kon unsay anaa sa anghel.

• Unsa may anaa sa anghel?

Dapita ang estudyante nga nagrepresentar sa unang anghel sa pagbasa og kusog sa Doktrina ug mga Pakigsaad 133:36–37. Hangyoa ang klase sa pagsunod, nga mangita kon unsay gihimo sa anghel sa walay katapusang ebanghelyo.

• Unsa ang gihimo sa anghel sa walay katapusang ebanghelyo?

Imahe

Si Moroni Nagpakita ni Joseph Smith didto sa Iyang Lawak

Ipakita ang litrato nga Moroni Nagpakita ni Joseph Smith didto sa Iyang Lawak (Libro sa mga Hulagway sa Ebanghelyo [2009], nu. 91; tan-awa usab sa LDS.org). Dapita ang usa ka estudyante sa pag-istorya og balik kon unsay nahitabo atol sa unang pagbisita ni Moroni kang Joseph Smith. (Kon ang mga estudyante kinahanglan pang pahinumduman niini nga mga hitabo, mahimo kang magdapit og usa ka estudyante sa pagbasa og kusog sa Joseph Smith—Kasaysayan 1:29–35.)

• Ubos sa direksyon sa Dios, unsa ang gihatag ni Moroni ngadto kang Joseph Smith nga nakatabang sa pagpahiuli sa ebanghelyo dinhi sa kalibutan? (Ang rekord diin anaa ang Basahon ni Mormon.)

Imahe

Salt Lake Temple

Pag-display og litrato sa templo nga dunay estatuwa ni anghel Moroni sa ibabaw, sama sa litrato sa Templo sa Salt Lake nga anaa sa Libro sa mga Hulagway sa Ebanghelyo (nu. 119; tan-awa usab sa LDS.org).

• Ngano kaha nga ang estatuwa ni anghel Moroni gibutang man sa ibabaw sa daghan sa atong mga templo?

Ipasabut nga sa pakigpulong sa komperensya, si Presidente Gordon B. Hinckley mikutlo sa Pinadayag 14:6 ug dayon mipahayag, “Kana nga anghel miabut. Ang iyang ngalan si Moroni” (“Stay the Course—Keep the Faith,” Ensign, Nob. 1995, 70). Ang anghel nagrepresentar usab sa daghan nga langitnong mga mensahero, lakip kang Moroni, kinsa mitabang sa ulahing adlaw nga Pagpahiuli sa ebanghelyo ni Jesukristo (tan-awa sa Bruce R. McConkie, Doctrinal New Testament Commentary, 3 vols. [1965–73], 3:529–31; tan-awa usab sa D&P 13; 110:11–16; 128:20–21).

Dapita ang estudyante nga nagrepresentar sa unang anghel sa pagbasa og kusog sa Pinadayag 14:7. Hangyoa ang klase sa pagsunod, nga mangita kon unsay gisulti sa anghel.

• Unsa man ang gisulti sa anghel?

• Unsa ang buot ipasabut sa mga pulong nga “nahiabut na ang takna sa iyang paghukom”? (Moabut ang panahon nga si Jesukristo mohukom sa tanang katawhan sa yuta. Ang Iyang mga paghukom mahitabo atol sa Ikaduhang Pag-anhi [tan-awa sa Malachi 3:1–5] ug sa Katapusang Paghukom [tan-awa sa 2 Nephi 9:15].)

• Base sa atong nakat-unan, unsa ang usa ka rason nga gipahiuli sa Dios ang ebanghelyo ni Jesukristo? (Kinahanglang mahibaloan sa mga estudyante ang mosunod nga kamatuoran: Gipahiuli sa Dios ang ebanghleyo ni Jesukristo aron maandam ang mga lumulupyo sa yuta sa Ikaduhang Pag-anhi ni Jesukristo.)

• Sa unsang mga paagi nga ang ebanghelyo ni Jesukristo mag-andam sa mga tawo alang sa Iyang Ikaduha nga Pag-anhi?

Dapita ang mga estudyante sa pagpamalandong kon sa unsang paagi ang ebanghelyo ni Jesukristo nakatabang nga mahatagan sila og kalinaw samtang nagpuyo sa dautan ug samok nga kalibutan. Hangyoa ang pipila ka mga estudyante sa pagpakigbahin sa ilang mga hunahuna diha sa klase.

Dapita ang estudyante nga nagrepresentar sa ikaduhang anghel sa pagbasa og kusog sa Pinadayag 14:8 ug ang estudyante nga nagrepresentar sa ikatulong anghel nga mobasa og kusog sa Pinadayag 14:9–11. Hangyoa ang klase sa pagsunod, nga mangita kon unsay gisulti sa mga anghel.

• Sumala sa bersikulo 8, unsa ang gisulti sa ikaduha nga anghel? (Ipasabut nga ang usa ka kahulugan sa mga pulong nga “nagun-ob na ang bantugang Babelonia” mao nga moabut ang adlaw nga ang kadautan sa kalibutan matapos.)

• Sa unsang paagi maghatag kanato og kalinaw ang pagkahibalo nga ang pagkadautan sa kalibutan matapos na?

• Sumala sa bersikulo 9–11, unsa ang gisulti sa ikatulo nga anghel nga mahitabo niadtong mopili nga mosunod ”sa mananap (bersikulo 9), o Satanas?

Dapita ang usa ka estudyante sa pagbasa og kusog sa mosunod nga mga pamahayag ni Propeta Joseph Smith. Hangyoa ang klase sa pagpaminaw kon sa unsang paagi gipasabut sa Propeta ang pag-antus nga masinati sa mga dautan human sila mamatay.

Imahe

Prophet Joseph Smith

“Ang hilabihan nga pag-antus sa mipanaw na nga mga espiritu ngadto sa kalibutan sa mga espiritu, diin sila moadto human sa kamatayon, mao ang pagkaamgo nga napakyas sila sa pagkab-ot sa himaya nga naangkon sa uban ug nga unta maangkon usab nila, ug sila ang motulisok sa ilang mga kaugalingon” (Mga Pagtulun-an sa mga Presidente sa Simbahan: Joseph Smith [2007], 268).

“Ang tawo maoy mopaantos sa iyang kaugalingon ug mosilot sa kaugalingon. Sigun sa panultihon, Sila adto padulong sa linaw sa nagdilaab nga kalayo ug asupre’ [tan-awa sa Pinadayag 21:8]. Ang pag-antus sa pagkapakyas nga anaa sulod sa hunahuna sa tawo ingon kapait sa linaw sa nagdilaab nga kalayo ug asupre” (Mga Pagtulun-an sa mga Presidente sa Simbahan: Joseph Smith, 268).

• Sumala ni Propeta Joseph Smith, unsa man nga bahin sa pag-antus ang masinati sa mga dautan human sila mamatay?

Ipasabut nga human makakat-on kon unsay masinati sa mga dautan human sila mamatay, nakadungog si Juan og tingog gikan sa langit nga naghulagway kon unsay masinati sa mga matarung human sila mamatay.

Dapita ang usa ka estudyante sa pagbasa og kusog sa Pinadayag 4:12–13. Hangyoa ang klase sa pagsunod, nga mangita kon unsay masinati sa mga matarung human sila mamatay.

• Unsa ang masinati sa mga matarung human sila mamatay?

• Unsa kaha ang gipasabut sa “makapahulay na sila gikan sa ilang mga paghago”? (bersikulo 13).

• Unsaon ninyo sa pag-summarize ang mga pagtulun-an ni Juan nga naa sa mga bersikulo 12–13 isip usa ka baruganan? (Ang mga estudyante mahimong mogamit og lain-laing mga pulong, apan siguroa nga ilang mahibaloan ang usa ka baruganan nga susama sa mosunod: Kon magpakabuhi kitang matarung, nan mapanalanginan kita sa atong mga buhat ug makapahulay gikan sa atong mga kahago human kita mamatay.)

• Sa unsang paagi kaha kini nga baruganan makahatag kanato og kalinaw bisan pa kon gilibutan kita sa kadautan?

Ikonsiderar ang pagpakigbahin sa imong pagpamatuod mahitungod sa kaimportante sa pagpili nga magpakabuhing matarung niining dautan nga kalibutan. Dapita ang mga estudyante sa pagpamalandong kon unsay ilang mahimo sa ilang kinabuhi sa pagsiguro nga dili sila mag-antus sa alantuson sa mga dautan apan hinoon motagamtam sa kalinaw sa mga matarung. Dapita sila nga lihukon ang bisan unsa nga pag-aghat nga ilang madawat.

I-summarize ang Pinadayag 14: 14–20 pinaagi sa pagpasabut nga gihulagway ni Juan ang duha ka mga pag-ani. Sa iyang panan-awon, nakita ni Juan atol sa unang pag-ani nga ang mga matarung pundukon gikan sa mga dautan (tan-awa sa mga bersikulo 14–16) ug nga atol unya sa ikaduhang pag-anhi ang mga dautan pundukon ug laglagon sa kaulahian (tan-awa sa mga bersikulo 17–20).

Dapita ang usa ka estudyante sa pagbasa og kusog sa Pinadayag 15:1. Hangyoa ang klase sa pagsunod, nga mangita kon unsay laing nakita ni Juan nga manghitabo sa katapusang mga adlaw. Dapita ang mga estudyante sa pagreport sa unsay ilang nakit-an.

Ipasabut nga sumala sa narekord sa Pinadayag 15-16, gihulagway ni Juan ang pito ka mga hampak o kasakitan nga mopaantus sa mga dautan sa katapusang mga adlaw. Hinoon, sa wala pa niya ihulagway kini nga mga hampak, mihunong si Juan aron sa pagpasabut sa mga panalangin nga madawat sa mga matarung. I-summarize ang Pinadayag 15:2–4 pinaagi sa pagpasabut nga nakakita si Juan og panan-awon niadtong mga makabuntog ni Satanas ug midayeg sa Dios sa celestial nga gingharian.

Pagdrowing og pito ka sudlanan o panaksan diha sa pisara, ug butangi og numero gikan sa 1 hangtud sa 7 (o isulat lang ang mga numero sa pisara). Ipasabut nga sa iyang panan-awon nakita ni Juan ang pito ka sudlanan, o mga panaksan, nga may sulod nga pito ka hampak o kasakitan.

Dapita ang pipila ka estudyante nga magpuli-puli sa pagbasa og kusog sa Pinadayag 16:2–4, 8–12, 16–21. Hangyoa ang klase sa pagsunod, nga mangita sa unsang paagi gihulagway ni Juan ang pito ka mga kasakitan. Hunong human mahulagway ang matag usa ka kasakitan, ug dapita ang usa ka estudyante sa pagsulat sa kasakitan diha sa pisara ubos sa tukma nga sudlanan (o numero) diha sa pisara.

Human mabasa sa usa ka estudyante ang deskripsyon ni Juan sa ikatulo nga kasakitan, dapita ang usa ka estudyante sa pagbasa og kusog sa Pinadayag 16:6. Hangyoa ang klase sa pagpangita og usa ka rason nganong mag-antus ang mga tawo niiini nga kasakitan sa katapusang mga adlaw.

• Unsa ang usa ka rason nga ang mga tawo mag-antus niini nga kasakitan?

Human mabasa sa usa ka estudyante ang deskripsyon sa ikaunom nga kasakitan, ipasabut nga atol niini nga hampak o kasakitan ang Suba sa Eufrates mohubas aron maandam sa panagpundok sa mga hari sa kalibutan alang sa gubat sa Armagedon (tan-awa sa Pinadayag 16:12–16; tan-awa usab sa Zacarias 12:11). Sa katapusan niini nga gubat, mopakita ang Manluluwas ngadto sa mga tawo sa Jerusalem (tan-awa sa D&P 45:47–53) ug sa tanang katawhan sa yuta (tan-awa sa Mateo 24:30; D&P 101:23).

Dapita ang usa ka estudyante sa pagbasa og kusog sa Pinadayag 16:15, ug hangyoa ang klase sa pagpangita kon unsay atong mahimo aron maandam alang sa Ikaduhang Pag-anhi ni Jesukristo. Ipasabut nga ang mga pulong nga “magabantay sa iyang mga bisti, aron dili siya magalakaw nga hubo” nagpasabut sa pagkaandam sa espirituhanong paagi.

• Sumala sa bersikulo 15, unsay atong mahimo aron maandam sa Ikaduhang Pag-anhi ni Jesukristo? (Kinahanglang mahibaloan sa mga estudyante ang mosunod nga mga baruganan: Kon magmabinantayon kita ug espirituhanong andam, niana maandam kita alang sa Ikaduhang Pag-anhi ni Jesukristo.)

• Unsa ang pipila ka paagi aron maandam kita sa espirituhanong paagi?

Ipamatuod nga ang Ginoo nahigugma sa Iyang mga katawhan ug nagtinguha nga maandam kita alang sa Iyang Ikaduha nga Pag-anhi. Awhaga ang mga estudyante nga magmabinantayon ug mag-andam sa espirituhanong paagi aron madawat nila ang mga panalangin sa Ginoo.