Lucas 10:1–37

Pagdala sa klase og usa ka sudlanan nga puno sa mga butang (sama sa mga bola nga lain-lain og gidak-on). Pagdapit og estudyante ngadto sa atubangan sa classroom. Hangyoa ang estudyante sa paggunit sa mga butang nga imong ihatag kaniya nga walay mahulog o ibutang bisan usa niini. Hatagi ang estudyante og mga butang hangtud nga siya dili na makagunit sa tanan ug magsugod na ang uban sa pagpangahulog. Dayon pangutan-a ang estudyante:

• Unsay imong mabuhat aron malikayan ang pagpanghulog sa mga butang?

Kon gikinahanglan, isugyot nga ang estudyante mangayo og tabang gikan sa uban diha sa klase. Ipadayon ang paghatag og mga butang ngadto sa estudyante, ug tuguti siya nga ipasa ang pipila niini ngadto sa ubang mga estudyante. Dayon palingkura ang mga estudyante.

• Sa unsang paagi ninyo makumparar kini nga kalihokan ngadto sa paagi sa mga lider sa Simbahan sa pagdala sa ilang mga responsibilidad?

Pahinumdumi ang mga estudyante nga ang Manluluwas mitawag sa Napulog Duha ka mga Apostoles ug mipadala kanila aron sa pagtabang sa Iyang buhat. Hinoon, ang mga Apostoles nagkinahanglan sa uban nga motabang kanila sa pagtudlo ug pagpangalagad aron ang mga panalangin sa ebanghelyo madala ngadto sa tanang katawhan.

Dapita ang usa ka estudyante sa pagbasa og kusog sa Lucas 10:1–2. Hangyoa ang klase sa pagsunod, nga mangita kon kinsa ang gitudlo sa Ginoo nga motabang sa mga Apostoles sa pagpahigayon sa Iyang buhat.

• Kinsa ang gitudlo sa Ginoo nga motabang Kaniya sa Iyang buhat? Unsa ang ilang mga tahas?

Ipasabut nga ang pulong kapitoan diha sa Lucas 10:1 nagpasabut sa usa ka katungdanan sa Melchizedek Priesthood. Kini nga samang katungdanan anaa sa gipahiuli nga Simbahan karon. (Kon mahimo, ipakita ang mga pahina nga giulohan og “Ang mga General Authority ug Kinatibuk-ang mga Opisyales sa Ang Simbahan ni Jesukristo sa mga Santos sa Ulahing mga Adlaw” sa pinakabag-o nga isyu sa komperensya sa Ensign o Liahona.) Aduna na karon lain-laing mga korum sa Seventy, bisan kon ang mga sakop lamang sa unang duha ka mga korum ang gitawag isip mga General Authority. Ang matag korum mahimo nga adunay 70 ka mga miyembro. Ang ilang buluhaton sa pagsangyaw sa ebanghelyo ug sa pagtabang sa pagdumala sa Simbahan gidumala pinaagi sa Korum sa Napulog Duha ka mga Apostoles ug mga Kapangulohan sa Seventy (tan-awa sa D&P 107: 25–26, 34; Giya ngadto sa mga Kasulatan, “Kapitoan,” scriptures.lds.org).

• Sumala sa bersikulo 2, unsa ang gisulti sa Ginoo nga diyutay ra alang sa pag-ani sa mga kalag?

• Unsa nga kamatuoran ang atong makat-unan mahitungod sa buhat sa Ginoo gikan niini nga mga bersikulo? (Ang mga estudyante kinahanglang moila og kamatuoran sama sa mosunod: Ang Ginoo mitawag og mga mamumuo agig dugang sa mga Apostoles sa pagrepresentar Kaniya ug sa pagtabang Kaniya sa Iyang buhat.)

• Agig dugang sa mga Apostoles ug Kapitoan, kinsa pa ang adunay responsibilidad sa pagtabang sa Ginoo sa Iyang buhat karon? (Tanang miyembro sa Simbahan.)

Ipasabut nga sama nga ang Manluluwas mipahayag sa panginahanglan og dugang nga mamumuo aron sa pagpahinabo sa pag-ani sa kaluwasan, ang mga propeta sa ulahing mga adlaw kanunay nanawagan alang sa dugang nga mga misyonaryo. Dapita ang usa ka estudyante sa pagbasa og kusog sa mosunod nga pamahayag ni Presidente Thomas S. Monson:

Imahe

Presidente Thomas S. Monson

“Akong balikon ang dugay nang gitudlo sa mga propeta—nga ang matag takus, makahimo nga batan-ong lalaki kinahanglan nga mangandam sa pagserbisyo og misyon. Ang misyonaryo nga pagserbisyo usa ka katungdanan sa priesthood—usa ka obligasyon nga gipaabut sa Ginoo kanato kinsa gihatagan og hilabihan ka daghan. Batan-ong mga lalaki, gi-awhag ko kamo sa pagpangandam alang sa pagserbisyo isip misyonaryo. …

“Usa ka tambag alang kaninyo batan-ong mga sister: ingon nga kamo wala sa samang responsibilidad sa priesthood sama sa batan-ong mga lalaki sa pagserbisyo isip full-time nga mga misyonaryo, makahimo usab kamo og bililhong kontribusyon isip mga misyonaryo, ug among gihangup ang inyong pagserbisyo” (“Samtang Kita Nagkatigum Pag-usab,” Ensign o Liahona, Nob. 2010, 5–6).

• Gawas sa pagserbisyo og full-time nga misyon, sa unsa pa nga paagi nga makatabang kita sa Ginoo sa Iyang buhat?

• Unsa nga mga kasinatian nga kamo o inyong kaila nakatagamtam pinaagi sa pagtabang sa Ginoo sa Iyang buhat?

I-summarize ang Lucas 10:3–24 pinaagi sa pagpasabut nga ang Ginoo mihatag sa Kapitoan og mga instruksyon kon unsaon sa pagtuman sa ilang mga responsibilidad. Siya usab nasuko sa mga katawhan sa nagkalain-laing mga siyudad kinsa misalikway sa Iyang mga buhat. Ang Kapitoan sa wala madugay mireport sa ilang mga paghago ngadto ni Jesus, ug Siya mihatag kanila og dugang instruksyon ug nagmaya uban kanila.

Hangyoa ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan:

Imahe

Presidente Dieter F. Uchtdorf

“Ang mga tawo sa atong palibut dili perpekto. Ang mga tawo naghimo og mga butang nga makasamok, makasagmuyo, ug makapasuko. Niining mortal nga kinabuhi kini kanunay ingon niana” (“Ang Maloloy-on Magadawat og Kalooy,” Ensign o Liahona, Mayo 2012, 77).

Dapita ang klase sa pagpamalandong kon nakaila ba sila og tawo nga nagbuhat og mga butang nga nakasamok, nakasagmuyo, o nakapasuko kanila.

• Ngano kaha nga lisud ang paghigugma sa tawo nga nagbuhat niini nga mga butang?

Dapita ang mga estudyante sa pagpangita og mga kamatuoran samtang sila nagtuon sa Lucas 10:25–37 nga makagiya kanila samtang sila makig-istorya sa mga indibidwal nga daw lisud mahalon.

Dapita ang usa ka estudyante sa pagbasa og kusog sa Lucas 10:25. Hangyoa ang klase sa pagsunod, nga mangita kon unsay gipangutana sa usa ka abogado ngadto sa Manluluwas.

• Unsay gipangutana sa abogado sa Manluluwas?

Dapita ang usa ka estudyante sa pagbasa og kusog sa Lucas 10:26–28. Hangyoa ang klase sa pagsunod, nga mangita sa tubag sa Manluluwas. Dayon hangyoa ang mga estudyante nga moreport sa unsay ilang nakat-unan.

• Unsa nga baruganan ang atong makat-unan gikan niini nga mga bersikulo mahitungod sa unsay angay natong buhaton aron makaangkon og kinabuhing dayon? (Ang mga estudyante mahimong mogamit og lain-laing mga pulong apan kinahanglang mahibalo og baruganan sama sa mosunod: Aron makaangkon og kinabuhing dayon kinahanglan gayud nga kita mohigugma sa Dios ug mohigugma sa atong silingan sama sa atong kaugalingon. Isulat kini nga baruganan diha sa pisara.)

• Sumala sa bersikulo 27, unsaon man nato paghigugma ang Dios?

• Unsay gipasabut sa paghigugma sa Dios sa tibuok ninyong kasingkasing, kalag, kusog, ug hunahuna?

Itudlo ang mga pulong nga “mohigugma sa atong silingan sama sa atong kaugalingon” diha sa pisara. Aron sa pagtabang sa mga estudyante nga makasabut kon unsa tingali ipasabut sa paghigugma sa atong silingan sama sa atong kaugalingon, dapita sila sa paglista diha sa pisara sa mga butang nga ilang buhaton sa kasagaran nga adlaw. (Kini mahimong maglakip sa pagpangandam alang sa adlaw, pagkaon, pagkatulog, paghimo sa homework, ug uban pa.)

Human makatigum og lista sa pisara, dapita ang mga estudyante sa pagpamalandong kon pila sa ilang mga kalihokan nakatutok sa ilang mga kaugalingon.

• Unsay atong makat-unan gikan niini nga kalihokan?

• Unsa ang pipila ka mga paagi nga mas permi kitang makatutok sa kaayohan sa uban ug magtinguha sa paghigugma kanila sama sa atong paghigugma sa atong kaugalingon?

• Unsa ang pipila ka mga paagi nga makabuhat kita niini bisan sa mga kalihokan nga atong buhaton para sa atong kaugalingon? (Ang mga ehemplo mahimong maglakip sa pagkaon og paniudto uban niadtong daw nag-inusara o pagdayeg sa uban panahon sa atong mga kalihokan sa eskwelahan.)

• Sa unsang paagi nga ang paghigugma sa Dios ug sa atong silingan sama sa atong paghigugma sa atong kaugalingon makatabang kanato sa paglambo padulong sa kinabuhing dayon?

Dapita ang usa ka estudyante sa pagbasa og kusog sa Lucas 10:29. Hangyoa ang klase sa pagsunod, nga mangita sa ikaduhang pangutana sa abogado ngadto ni Jesus.

• Unsa ang ikaduhang pangutana sa abogado?

Andama ang pipila ka mga estudyante nga idrama-drama ang sambingay sa maayong Samarianhon sa Lucas 10:30–35. Dapita ang usa ka estudyante nga maoy tigsaysay ug ang uban sa pagdula sa mga papel sa samaran nga Judeo, duha ka kawatan, ang sacerdote, ang Levita, ug ang Samarianhon. (Kon pipila lang ang mga estudyante sa imong klase, mahimo silang makadula og daghang papel.) Mahimo kang mohatag og pipila ka mga props, nga maglakip og mga name tag, sobra nga sinina nga kuhaon gikan sa Judeo nga lalaki, duha ka mga sudlanan nga nagrepresentar sa lana ug bino, usa ka may ligid nga lingkuranan nga morepresentar sa mananap, ug duha ka mga sinsilyo sa pagrepresentar sa duha ka denario. (Pahinumdom: Mahimo nimong pilion ang mga partisipante ug hatagan sila og piho nga mga instruksyon sa dili pa magklase sa pagsiguro nga ang role play epektibo, angay, ug luwas.)

Dapita ang tigsaysay sa pagbasa og kusog sa Lucas 10:30–35, ug hangyoa ang nangapil nga i-drama ang sambingay. Hangyoa ang nahibilin sa klase sa pagsunod, nga mangita kon unsay gitudlo sa Manluluwas kon kinsa ang atong silingan. Human sa role play, dapita ang mga estudyante sa pagbalik ngadto sa ilang mga lingkuranan.

• Asa nga mga buhat sa Samarianhon ang labing dalaygon alang nimo?

Aron sa pagtabang sa klase nga mas makasabut unsa ang gilauman gikan sa usa ka sacerdote, Levita, ug Samarianhon, dapita ang usa ka estudyante sa pagbasa og kusog sa mosunod nga pagpasabut:

Ang mga sacerdote ug mga Levita naghupot sa Aaronic priesthood ug gi-assign sa pagserbisyo sa Dios ug sa ilang isigkatawo, sa templo ug isip mga magtutudlo ug mga ehemplo sa balaod sa Dios. Kini nga mga naghupot sa priesthood nahibalo gayud sa sugo nga “higugmaon mo ang imong isigtawo ka tawo ingon sa imong kaugalingon” (Levitico 19:18) ug sa pag-atiman sa mga langyaw ug mga dumuloong (tan-awa sa Levitico 19:34; 25:35). Agig pagkumparar, “ang mga Samarianhon may pagka-Israelite ug may pagka-Hentil. Ang ilang relihiyon mao ang usa ka sinagulan sa tinuohan nga Judeo ug mga tinuohan ug mga batasan nga pagano. … [May] pagdumot nga gihambin ang mga Judeo alang sa mga Samarianhon tungod kay ang mga Samarianhon mibiya sa hingpit gikan sa relihiyon nga Israelite” (Giya ngadto sa mga Kasulatan, “Samarianhon, Mga,” scriptures.lds.org). Ang mga Judeo ug mga Samarianhon sa kasagaran maningkamot sa paglikay sa usag usa.

• Sa sambingay, nganong makapatingala man ang mga lihok sa sacerdote, Levita, ug Samarianhon?

• Unsa kaha ang posibleng mga rason nga dili tabangan sa Samarianhon ang samaran nga Judeo?

• Sumala sa bersikulo 33, unsa ang nakaaghat sa Samarianhon sa pagtabang sa pagkakita niya sa tawo nga samaran?

Ipasabut nga ang pagka-adunay kalooy nagpasabut nga nakamatikod sa mga panginahanglan ug mga hagit sa laing tawo ug mobati sa tinguha sa paghimo sa bisan unsay atong mahimo sa pagtabang niana nga tawo.

Dapita ang usa ka estudyante sa pagbasa og kusog sa Lucas 10:36–37. Hangyoa ang klase sa pagsunod, nga mangita kon unsay sunod nga gitudlo sa Manluluwas ngadto sa abogado.

• Sa unsang paagi kini nga sambingay nagtubag sa pangutana diha sa bersikulo 29, “Kinsa man ang akong silingan?”

Tabangi ang mga estudyante nga makasabut nga ang paggamit sa Manluluwas sa Samarianhon niini nga sambingay nagsugyot nga ang atong silingan dili lamang kadtong nagpuyo duol kanato apan si bisan kinsa nga anak sa Langitnong Amahan—lakip niadtong labing lisud alang kanato nga higugmaon.

Hangyoa ang usa ka estudyante sa pagbasa og kusog sa mosunod nga pamahayag ni Presidente Howard W. Hunter:

Imahe

President Howard W. Hunter

“Kinahanglan natong hinumduman nga bisan og makapili ta sa atong mahigala, ang Dios mipili sa atong masilingan—bisan asa. Ang gugma kinahanglan nga walay utlanan. … Si Kristo miingon, ‘Kay kon mao ray inyong higugmaon ang mga nahigugma kaninyo, unsa may balus nga madawat ninyo? Dili ba ang mga maniningil sa buhis nagabuhat man sa ingon?’ (Mateo 5:46)” (“The Lord’s Touchstone,” Ensign, Nob. 1986, 35).

• Sumala sa bersikulo 37, unsay gitudlo sa Manluluwas ngadto sa abogado?

Dapita ang mga estudyante sa pagkonsiderar pag-usab sa mga indibidwal nga ilang gihunahuna nga mahimong lisud higugmaon alang kanila.

• Unsa ang atong mabuhat aron sa paghigugma ug pagbaton og kalooy niadtong kinsa lisud higugmaon alang kanato?

• Pagpamalandong og usa ka panahon nga kamo o inyong kaila misunod sa tambag sa Manluluwas nga “higugmaa … ang imong silingan sama sa imong kaugalingon” (Lucas 10:27). Unsa ang resulta?

Pagpamatuod sa mga kamatuoran nga gitudlo sa leksyon karon. Isulat sa pisara ang mosunod nga dili kompleto nga pamahayag ug ipakompleto kini sa mga estudyante diha sa ilang mga notebook sa klase o mga scripture study journal: Akong sundon ang ehemplo sa maayo nga Samarianhon pinaagi sa …