Materyal sa Pagpangandam alang sa Home-Study Teacher
Summary sa mga Leksyon sa Daily Home-Study
Ang mosunod nga summary sa mga panghitabo, doktrina, ug mga baruganan nga nakat-unan sa mga estudyante samtang sila nagtuon sa Marcos 10–Lucas 4 (unit 9) wala gitumong nga itudlo isip kabahin sa imong leksyon. Ang leksyon nga imong gitudlo nakatutok lamang sa pipila niini nga mga doktrina ug mga baruganan. Sunda ang mga aghat sa Espiritu Santo samtang ikonsiderar nimo ang mga panginahanglan sa imong mga estudyante.
Samtang ang mga estudyante nagtuon kabahin sa pagdapit sa Manluluwas ngadto sa gagmay nga mga bata sa pagduol Kaniya, sila nakakat-on nga samtang kita modawat sa ebanghelyo sama sa gagmayng mga bata, mamahimo kitang andam sa pagsulod sa gingharian sa Dios. Samtang nagbasa sila mahitungod sa pahimangno ni Jesukristo ngadto sa dato nga batan-ong punoan, sila nakakat-on nga tungod kay Siya nahigugma kanato, ang Ginoo motabang kanato nga masayud kon unsay kulang sa atong mga paningkamot sa pagsunod Kaniya, ug kon kita mangayo sa Ginoo, Siya motudlo kanato kon unsay gikinahanglan natong buhaton aron makapanunod sa kinabuhing dayon. Ang mga istorya sa biyuda nga naghatag sa iyang mga diyot ug ni Maria nga nagdihug sa Manluluwas nakatabang sa mga estudyante nga makat-on nga kon kita andam nga mohatag sa tanan nga anaa kanato ngadto sa Ginoo, Siya modawat sa atong mga halad bisan kon kini makita nga gamay kon itandi ngadto sa uban ug nga ang Manluluwas mahimuot kon kita mohatag Kaniya sa atong pinakamaayo.
Niini nga leksyon ang mga estudyante nagtuon mahitungod sa saad ni anghel Gabriel nga si Zacarias ug Elisabet makabaton og anak nga lalaki. Sila usab nakakat-on nga si Gabriel miingon kang Maria nga siya mahimong inahan sa Anak sa Dios. Gikan niini nga mga kasulatan ang mga estudyante nakakat-on sa mosunod nga mga kamatuoran: Ang mga pulong sa Ginoo nga gipamulong pinaagi sa Iyang mga sulugoon matuman sa ilang tagal nga panahon. Si Jesukristo mao ang Anak sa Dios nga Amahan. Sa Dios, walay butang nga dili mahimo. Kon kita matinud-anong maningkamot sa pagtuman sa buluhaton nga gisangon sa Ginoo ngari kanato, Siya makahimo og dagkong mga butang sa atong kinabuhi.
Samtang ang mga estudyante nagtuon kabahin sa pagkatawo ni Jesukristo, sila nakakat-on nga tungod kay ang Manluluwas natawo dinhi sa yuta, kita makasinati og hingpit nga kalipay. Sila usab nakakat-on nga samtang mosunod kita sa balaang mga panudlo, makadawat kita sa atong kaugalingong pagpamatuod kang Jesukristo, ug kon kita makadawat og atong kaugalingong pagpamatuod kang Jesukristo, gustohon nato nga makigbahin sa atong pagpamatuod sa uban. Samtang ang mga estudyante nagtuon kabahin sa kabatan-onan ni Jesus, sila nakakat-on nga makasunod kita sa ehemplo ni Jesus pinaagi sa pag-angkon og kaalam ug sa paglambo sa pisikal, espiritwal ug sosyal nga paagi.
Dinhi niini nga leksyon ang mga estudyante nakat-on mahitungod ni Juan Bautista ug mahitungod sa bunyag ni Jesukristo. Sila usab nakakat-on kabahin sa pamahayag ni Jesus didto sa Nazaret nga Siya mao ang Mesiyas. Gikan niini nga mga istorya ang mga estudyante nakat-on sa mosunod nga mga kamatuoran: Si Jesukristo mobulag sa mga matarung gikan sa mga dautan. Si Jesus mao ang Mesiyas kinsa gipadala sa pag-ayo sa mga masulub-on ug pagluwas niadtong espirituhanong nangabihag. Kon atong ipakita ang atong hugot nga pagtuo diha ni Jesukristo, atong makita nga mahitabo ang mga milagro.
Pasiuna
Kini nga leksyon makatabang sa mga estudyante nga makasabut sa pipila sa unsay giantus ni Jesukristo isip kabahin sa Iyang Pag-ula. Dugang pa, ang mga estudyante makasabut sa pipila sa mga rason nganong ang Manluluwas nag-antus alang kanato.
Si Jesus nagsugod sa Iyang Pag-ula samtang siya nag-antus sa Getsemani alang sa atong mga sala; Siya gibudhian ni Judas Iscarioti ug gidala atubangan sa mga lider sa Judeo
Hangyoa ang mga estudyante nga mamalandong sa hilum sa mosunod nga mga pangutana:
Gibati na ba ninyo nga walay usa nga nakasabut kaninyo o sa unsay inyong gisinati karon?
Gibati na ba ninyo nga dili kamo mapasaylo sa inyong nangaging mga sala?
Dapita ang mga estudyante sa pagpangita og mga kamatuoran samtang sila nagtuon sa Marcos 14 nga makatabang sa tawo nga tingali aduna niini nga mga pagbati.
Dapita ang usa ka estudyante sa pagbasa og kusog sa Marcos 14:32–34. Hangyoa ang klase sa pagsunod, nga mangita kon unsa ang gibati sa Manluluwas diha sa Tanaman sa Getsemani.
Unsa ang gibati sa Manluluwas didto sa Tanaman sa Getsemani?
Human makatubag ang mga estudyante, isulat sa pisara ang mosunod nga mga pulong: pagbati sa kakulba, pag-antus, natugob sa kasubo.
Ipasabut nga kini nga mga pulong nagpasabut sa pag-antus nga nasinati ni Jesukristo isip kabahin sa Iyang Pag-ula.
Unsa ang gitudlo niini nga mga pulong ngari kanato mahitungod sa Pag-ula ni Jesukristo? (Human makatubag ang mga estudyante, isulat sa pisara ang mosunod nga kamatuoran: Isip kabahin sa Iyang Pag-ula, si Jesukristo nag-antus ug nasubo didto sa Tanaman sa Getsemani.)
Aron sa pagtabang sa mga estudyante nga makasabut niini nga doktrina, dapita ang usa ka estudyante sa pagbasa og kusog sa mosunod nga pamahayag ni Elder Neal A. Maxwell sa Korum sa Napulog Duha ka mga Apostoles:
Imahe
Elder Neal A. Maxwell
“Sa Getsemani, ang nag-antus nga si Jesus misugod na sa ‘pagbati sa kakulba’ (Marcos 14:33), o, sa Gresyanhon, ‘makahadlok’ ug ‘makahingangha.’
“Hunahunaa, si Jehova, ang Tiglalang niini nga kalibutan ug sa uban pa, nga ‘nahingangha’! … Wala pa gayud Siya sukad masayud sa grabeng kasakit ug higpit nga proseso sa pag-ula. Sa ingon, sa diha nga ang paghingutas miabut diha sa kahingpitan niini, kini sobra pa, sobra pa gayud kaayo kay sa nahunahuna Niya bisan pa sa Iyang talagsaon nga salabutan! Dili ikatingala nga usa ka anghel mipakita sa paglig-on kaniya! (Tan-awa sa Lucas 22:43.)
“Ang nahiusa nga gibug-aton sa tanang mortal nga kasal-anan—nangagi, karon, ug sa umaabut—midat-ug nianang hingpit, walay sala, ug sensitibo nga Kalag! Ang tanan natong mga kahuyang ug mga sakit nahimo, usab, nga parte sa makalilisang nga kwentada sa Pag-ula. (Tan-awa sa Alma 7:11–12; Isa. 53:3–5; Mat. 8:17.) …
“Diha niining tumang kalisud, Siya, kaha, naglaum og makaluwas nga laki nga karnero sa kasampinitan? Wala ko kahibalo. Ang Iyang pag-antus—sa ingon niini, ang kagrabehon gipilo-pilo sa walay kinutuban—miresulta sa wala madugay sa Iyang pagtuaw diha sa krus, ug kini usa ka pagtuaw sa pagkatinalikdan. (Tan-awa sa Mat. 27:46.) …
“Ang talagsaon ug mahimayaon nga Pag-ula mao ang labing importanteng buhat sa tibuok tawhanong kasaysayan. Kini ang bisagra nga maoy nagpalihok sa tanang importanteng mga butang. Apan kini naglihok diha sa espirituhanong pagkamanunuton ni Jesus!” (“Willing to Submit,” Ensign, Mayo 1985, 72–73).
Dapita ang pipila ka mga estudyante nga magpuli-puli sa pagbasa og kusog gikan sa Marcos 14:35–42. Hangyoa ang klase sa pagsunod, nga mangita kon unsay gibuhat sa Manluluwas tungod sa Iyang grabe nga pag-antus.
Unsa ang gibuhat sa Manluluwas tungod sa Iyang grabe nga pag-antus? (Tabangi ang mga estudyante nga makasabut nga ang pag-antus ni Jesus grabe kaayo nga Siya nangutana kon mahimo ba nga dili Niya kini masinati.)
Isulat ang mosunod nga mga pulong diha sa pisara: Si Jesukristo nag-antus … aron Siya …
Ipasabut nga ang ubang mga tudling sa kasulatan makatabang kanato nga makasabut sa pag-antus ni Jesukristo ug nganong Siya andam nga mag-antus alang kanato.
Isulat ang mosunod nga mga pakisayran diha sa pisara: Isaias 53:3–5 ug Alma 7:11–13. Ipares-pares ang mga estudyante, ug ipabasa kanila og dungan ang mga bersikulo, nga mangita kon unsa ang giantus sa Manluluwas ug nganong Siya nag-antus. Hangyoa ang mga estudyante sa pagsulat diha sa ilang mga notebook sa klase o scripture study journal kon unsaon nila pagkompleto ang mga pulong nga gisulat sa pisara gamit ang ilang nakat-unan sa Isaias 53:3–5 ug Alma 7:11–13. (Tingali kinahanglan nimong ipasabut nga ang pulong pagtabang sa Alma 7:12 nagpasabut nga magdali sa paghatag og kahupayan o tabang sa usa ka tawo.)
Human sa igong panahon, dapita ang pipila ka mga estudyante sa pagreport kon giunsa nila pagkompleto ang mga pulong. Ang ilang mga tubag kinahanglang susama sa mosunod: Si Jesukristo miantus sa atong mga kasakit, mga kalisdanan, mga tintasyon, mga sakit, mga balatian, ug mga kaguol aron Siya mahibalo unsaon sa pagtabang kanato. Si Jesukristo nag-antus alang sa atong mga sala aron Siya makapapas sa atong mga kalapasan. Pahinumdumi ang mga estudyante nga ang pag-antus sa Manluluwas alang sa mga sala sa katawhan nagsugod sa Getsemani ug nagpadayon ug gitapos diha sa Iyang Pagkalansang sa krus.
Sa unsang paagi ang pagkasayud kon unsa ang giantus sa Manluluwas ug nganong Siya nag-antus makatabang kaninyo samtang kamo nag-atubang sa mga pagsulay, mga kasakit, ug mga kalisdanan? (Tan-awa sa D&P 45:3–5.)
Kanus-a man ninyo gibati ang Manluluwas nga mitabang kaninyo sa panahon sa kasakit, balatian, o kasubo?
Unsa nga mga pagbati ang inyong nasinati samtang naghinulsol kamo ug mibati nga ang inyong mga sala giwagtang (o gipapas) pinaagi sa Pag-ula ni Jesukristo?
I-summarize ang Marcos 14:43–16:20 pinaagi sa pagpasabut nga si Jesus gidala ngadto sa usa ka ilegal nga pagtaral atubangan sa Sanhedrin (mga lider sa Judeo) ug gihukman nga patyon. Human ang Manluluwas namatay sa krus ug nabanhaw, Siya mipakita sa Iyang mga Apostoles ug mipadala kanila sa pagsangyaw, nagsaad kanila nga ang mga timailhan mosunod niadtong nanagtuo. (Pahinumdom: Ang kamatayon, paglubong, ug Pagkabanhaw ni Jesukristo nahisgutan na nga detalyado kaniadto sa dihang ang mga estudyante nagtuon sa Mateo 27–28.)
Hangyoa ang usa ka estudyante sa pagbasa og kusog sa Marcos 16:15. Hangyoa ang klase sa pagsunod, nga mangita sa sugo nga gihatag sa Ginoo ngadto sa Iyang mga Apostoles.
Unsaon ninyo pagtabang sa pagtuman sa sugo sa pagsangyaw sa ebanghelyo ngadto sa “tibuok kalibutan” sa karon ug sa umaabut?
Mahimo nimong tapuson pinaagi sa pagpamatuod sa mga kamatuoran nga imong nahisgutan karon.
Hangyoa ang mga estudyante sa pagpamalandong kon sila nakahunahuna ba kon mapasaylo ba sila sa ilang mga sala. Ipasabut nga samtang magtuon sila sa Lucas 5:1–10:37 sa umaabut nga semana, sila makakat-on kabahin sa kaandam sa Manluluwas nga mopasaylo sa ilang mga sala ug unsay ilang mabuhat aron mapasaylo.