Pasiuna sa Sulat ni Pablo ngadto sa mga Taga-Filipos

Sa iyang sulat ngadto sa mga Santos sa Filipos, mihatag si Pablo og pagdasig sa mga Santos sa Filipos ug giawhag sila nga maghiusa ug magtinabangay sa pagpanalipud sa tinuohan. Tingali usa sa pinakaimportanting baruganan nga gitudlo ni Pablo sa mga Taga-Filipos mao nga ang pag-ampo ug pagsalig Kaniya magdala og “kalinaw sa Dios, nga lapaw sa tanang pagsabut” (Mga Taga-Filipos 4:7). Ang pagtuon sa mga pagdasig nga mensahe ni Pablo niini nga sulat makatabang sa mga estudyante sa ilang paningkamot aron makalahutay sa katapusan sa matinud-anong paagi. Samtang ang mga estudyante maningkamot sa pagsunod ni Kristo, sila usab makabaton og pagsalig ug, sama kang Pablo, mipahayag nga, “Mahimo ko ang tanang butang pinaagi kang Kristo nga nagapalig-on kanako” (Mga Taga-Filipos 4:13).

Bisan og si Timoteo gihisgutan kauban ni Pablo diha sa pagpangumusta (tan-awa sa Mga Taga-Filipos 1:1), si Pablo ang mihimo sa Sulat ngadto sa mga Taga-Filipos. Gisuportahan kini sa paggamit og singular nga pronoun nga ako sa tibuok sulat ug nag-refer kang Timoteo diha sa Mga Taga-Filipos 2:19. Si Timoteo mahimo nga maoy tigsulat ni Pablo, nga mihimo sa sulat ubos sa direksyon ni Pablo.

Maingon og gisulat ni Pablo ang Mga Taga-Filipos sa tuig mga A.D. 60 ug 62, samtang gibilanggo siya sa Roma (tan-awa sa Mga Taga-Filipos 1:7, 13, 17; tan-awa usab sa Mga Buhat 28:16–31; Giya ngadto sa mga Kasulatan, “Mga Taga-Filipos,” scriptures.lds.org).

Ang Filipos mao ang unang dapit sa Uropa diin pormal si Pablo nga misangyaw sa ebanghelyo ug miestablisar og branch sa Simbahan (tan-awa sa Mga Buhat 16:11–40; Giya ngadto sa mga Kasulatan, “Epistola ni Pablo, Mga”). Usa sa mga katuyoan ni Pablo sa paghimo niini nga sulat mao ang pagpahayag sa pasalamat tungod sa pagbati ug pinansyal nga tabang nga gihatag sa mga Santos sa Filipos ngadto niya atol sa iyang ikaduhang misyonaryo nga panaw ug sa iyang pagkabilanggo sa Roma (tan-awa sa Mga Taga-Filipos 1:3–11; 4:10–19; tan-awa usab sa Giya ngadto sa mga Kasulatan, “Epistola ni Pablo, Mga”).

Gidayeg usab ni Pablo ang mga miyembro sa Filipos tungod sa ilang hugot nga pagtuo kang Jesukristo ug gitambagan sila base sa impormasyon mahitungod kanila nga iyang nadawat gikan sa usa ka disipulo nga Taga-Filipos nga ginganlan og Epafrodito (tan-awa sa Mga Taga-Filipos 4:18). Ang tambag ni Pablo naglakip sa pag-awhag nga magmapainubsanon ug maghiusa (tan-awa sa Mga Taga-Filipos 2:1–18; 4:2–3). Gitambagan usab ni Pablo ang mga Taga-Filipos nga magbantay sa kurap nga mga Kristiyanos, sama niadtong nanudlo nga ang pagpatuli gikinahanglan para sa pagkakabig. Ang maong mga indibidwal (sagad nga gitawag nga mga Judaizer) sayop nga nangangkon nga ang bag-ong mga kinabig kinahanglang mopaubos sa kanhing balaod sa Daang Tugon sa pagpatuli sa dili pa mahimong Kristiyano (tan-awa sa Mga Taga-Filipos 3:2–3).

Ang Mga Taga-Filipos sagad nga gitawag og usa ka Sulat sa Binilanggo, uban sa Mga Taga-Efeso, Mga Taga-Colosas, ug Filemon. Gawas sa pagsulat niini gikan sa bilanggoan, ang sulat ni Pablo ngadto sa mga Taga-Filipos gihulagway sa mga eskolar nga pinakamalipayon sa iyang mga sulat. Gipahayag ni Pablo ang pasalamat, gugma ug kamasaligon sa mga miyembro sa Simbahan; mihulagway sa mga sakripisyo nga iyang gihimo sa pagsunod ni Jesukristo; ug gitudloan ang mga Santos sa Filipos sa mga baruganan sa matarung nga pagpakabuhi. Mahimong mabantayan sa mga estudyante diha sa Mga Taga-Filipos 4:8 ang pipila ka mga pinulongan nga gigamit sa ika-trese nga artikulo sa hugot nga pagtuo, nga gisulat ni Propeta Joseph Smith.

Si Pablo balaknon nga mihulagway sa pagpaubos sa Manluluwas gikan sa premortal nga kabalaan ngadto sa mortal nga kinabuhi, diin Iyang giantus ang “kamatayon diha sa krus” (tan-awa sa Mga Taga-Filipos 2:3–8). Human natuman ang Iyang balaang misyon, si Jesukristo karon nagbarug nga nahimaya, ug ang adlaw moabut nga “tanang tuhod magapiko” sa Iyang atubangan ug “ang tanang dila … magasugid nga Ginoo si Jesukristo” (Mga Taga-Filipos 2:10–11). Gipadayag ni Pablo nga ang iyang tinubdan sa kahiladman nga kamasaligon ug kusog naggikan ni Jesukristo (tan-awa sa Mga Taga-Filipos 4:13).

Mga Taga-Filipos 1 Gipahayag ni Pablo ang pasalamat gumikan sa kamaabi-abihon sa mga Santos sa Filipos. Gitudlo niya nga ang oposisyon nga iyang nasinati sa pag-alagad sa Ginoo, lakip ang iyang pagkabilanggo, naghimo nga mapadayon ang kawsa sa ebanghelyo. Giawhag niya ang mga miyembro sa Simbahan nga magmalig-on sa kahiusahan sa pagpanalipud sa tinuohan.

Mga Taga-Filipos 2 Gidugangan pa ni Pablo sa pag-awhag ang mga miyembro sa Simbahan nga maghiusa ug tutukan ang mga ehemplo ni Jesukristo, kinsa mikunsad dinhi sa mortalidad, isip usa ka ehemplo sa paghigugma, kamasulundon, ug pagpaubos. Moabut ang adlaw nga ang tanan moila nga si Jesukristo ang Ginoo. Gitudloan ni Pablo ang mga miyembro sa Simbahan nga lihukon ang kaugalingon nilang kaluwasan.

Mga Taga-Filipos 3 Nagpahimangno si Pablo kalabut sa mga Judaizer. Gihulagway niya ang nag-una niyang kinabuhi isip usa ka Pariseo ug sa iyang kaandam sa pagbiya niini aron sa pagsunod ni Jesukristo. Giawhag niya ang mga Santos sa pagsunod sa iyang ehemplo sa pagpadayon padulong sa kaluwasan. Gipasabut sab ni Pablo nga si Jesukristo mousab sa atong mortal nga mga lawas ngadto sa pagkamahimayaon nga lawas sama Kaniya.

Mga Taga-Filipos 4 giawhag ni Pablo ang mga Santos nga maglipay sa kanunay diha sa Ginoo. Giawhag niya nga pulihan nila ang ilang kabalaka ngadto sa pag-ampo ug pagpasalamat, misaad nga matagamtam nila ang kalinaw sa Dios, nga lapas sa tanang panabut. Gipahimangnoan ni Pablo ang mga Santos nga hunahunaon ang mga butang nga matinud-anon, makiangayon, tinuod, putli, matahum, o maayo og dungog, ug mahiyason. Iyang giila nga makahimo siya sa tanang mga butang pinaagi ni Kristo, kinsa molig-on kaniya.