Mga Taga-Roma 1–3

Basaha og kusog ang mosunod nga pamahayag ni Elder Larry Echo Hawk sa Seventy. Ipasabut nga isip usa ka batan-ong lalaki, si Elder Larry Echo Hawk sakop sa Marine Corps sa Estados Unidos.

Imahe

Elder Larry Echo Hawk

“Nailhan nako ang akong instruktor sa drill, usa ka bantugang beterano sa giyera, sa dihang iyang gipatiran ang pultahan sa barracks ug misulod nga namalikas.

“Human ining makahadlok nga pagpaila, misugod siya sa usa ka tumoy sa barracks ug gipangutana og tagsa-tagsa ang mga recruit. Walay gisal-angan, ang instruktor sa drill makabiaybiay gyud sa kada recruit, sa lanog, nga bulgar nga pinulongan. Hangtud sa katapusan sa linya napasinggit niya ang kada marine sa tubag ingon sa gisugo: ‘Oo’ o ‘Dili, Sarhentong Instruktor.’ … Sa dihang turno na nako, akong namatikdan nga iyang gikuha ang akong bag ug giyabo ang mga sulod sa akong higdaanan sa akong luyo. Gitan-aw niya ang akong mga butang, ug mibalik sa pag-atubang kanako. Nangandam ko sa iyang atake. Iyang gigunitan ang akong Basahon ni Mormon” (“Duol Ngari Kanako, O Balay ni Israel,” Ensign o Liahona, Nob. 2012, 32).

• Unsay inyong bation kon kamo pa ang anaa sa sitwasyon ni Elder Echo Hawk?

• Unsay inyong hunahuna nga buhaton sa instruktor sa drill?

• Nasulayan na ba ninyo nga mabutang sa sitwasyon diin nabalaka kamo nga ang inyong pagtuo gisaway? (Ikonsiderar ang pagdapit og pipila ka mga estudyante sa pagpakigbahin sa ilang mga kasinatian uban sa klase.)

Dapita ang mga estudyante sa pagpangita og mga kamatuoran samtang sila nagtuon sa Mga Taga-Roma 1 nga makatabang kanila kon mag-atubang sila og pagpanaway o pagpanggukod sa ilang mga pagtuo ug mga sumbanan.

Ipaila og kadali ang basahon sa Mga Taga-Roma pinaagi sa pagdapit og usa ka estudyante sa pagbasa og kusog sa mosunod nga mga pulong:

Ang basahon sa Mga Taga-Roma mao ang usa ka epistola nga gisulat ni Pablo ngadto sa mga Santos didto sa Roma sa hapit nang motapos ang iyang mga panaw sa pagka misyonaryo. Misulat siya sa mga Santos nga mga Romano alang sa iyang pag-abut, aron sa pagpatin-aw ug pagdepensa sa iyang mga pagtulun-an, ug sa pagdasig og paghiusa tali sa mga Hudeo ug mga Hentil nga mga miyembro sa Simbahan. Roma—ang kapital sa Kagamhanan sa Roma—napuno sa kalibutanon nga mga pilosopiya ug nahimong usa ka lisud nga dapit sa pagsangyaw sa ebanghelyo ni Jesukristo.

I-summarize ang Mga Taga-Roma 1:1–14 pinaagi sa pagpasabut nga si Pablo misugod sa iyang sulat pinaagi sa pagpamatuod kang Jesukristo ug pagsulti sa iyang tinguha sa pagbisita sa mga Santos sa Roma.

Dapita ang usa ka estudyante sa pagbasa og kusog sa Mga Taga-Roma 1:15–17. Hangyoa ang klase sa pagsunod, nga mangita kon unsay gitudlo ni Pablo sa mga Santos sa Roma mahitungod sa ebanghelyo ni Jesukristo.

• Unsa ang giingon ni Pablo sa ebanghelyo ni Jesukristo? (Kinahanglang mahibaloan sa mga estudyante ang kamatuoran nga susama sa mosunod: Ang ebanghelyo ni Jesukristo mao ang gahum sa Dios ngadto sa kaluwasan sa tanan kinsa mogamit sa hugot nga pagtuo ni Jesukristo. Isulat kini nga kamatuoran diha sa pisara. Mahimo kang mosugyot nga markahan sa mga estudyante diha sa ilang mga kasulatan ang mga pulong o mga pulong nga nagtudlo niining kamatuoran.

• Unsay gitugot sa ebanghelyo ni Jesukristo nga kita maluwas? (Sa pisikal ug espirituhanon nga kamatayon.)

• Nganong gikinahanglan nga mogamit kita sa hugot nga pagtuo ni Jesukristo aron makadawat sa mga panalangin sa kaluwasan pinaagi sa ebanghelyo? (Si Jesukristo mihimo sa Pag-ula, diin nakapahimong posible sa atong kaluwasan.)

Dapita ang usa ka estudyante sa pagbasa sa mosunod nga pagpasabut sa unsa ang kahulugan sa hugot nga pagtuo ni Jesukristo ug paggamit sa hugot nga pagtuo diha Kaniya:

Sama sa gigamit ni Pablo, ang mga pulong tinuohan ug hugot nga pagtuo nagpasabut nga dili lang panag-uyon sa hunahuna nga si Jesukristo mao ang Anak sa Dios, apan sa tibuok nga kasingkasing nga pagdawat ug pagsalig diha Kaniya isip ang Usa kinsa mihalad sa Iyang kaugalingon agig Pag-ula sa atong mga sala. Kining lawom nga pagsalig maggiya ngadto sa usa ka kinabuhi sa pagkamatinud-anon, makita pinaagi sa paghinulsol sa mga sala, pagpabunyag, ug maninguha nga magpuyo sama sa gitudlo ni Jesukristo (tan-awa sa Mga Buhat 16:30–33; Mga Taga-Roma 6:1–11; 1 Mga Taga-Corinto 6:9–11). “Hugot nga pagtuo diha ni Jesukristo … mao ang makita sa usa ka kinabuhi nga nagmasulundon sa mga balaud ug mga ordinansa sa ebanghelyo ug pagserbisyo ngadto ni Kristo” (Giya ngadto sa mga Kasulatan, “Kaluwasan,” scriptures.lds.org).

• Tungod kay si Pablo nasayud nga ang ebanghelyo ni Jesukristo mao ang gahum sa Dios ngadto sa kaluwasan alang sa tanan kinsa motuo, unsa ang iyang gibati mahitungod sa pagsangyaw niini? (Siya wala maulaw [tan-awa sa Mga Taga-Roma 1:16].)

• Sa unsang paagi nga ang pagbaton og usa ka pagpamatuod sa gahum sa ebanghelyo makaimpluwensya sa inyong tinguha sa pagpakigbahin sa ebanghelyo ngadto sa uban? (Human motubag ang mga estudyante, isulat ang mosunod nga mga baruganan sa pisara: Samtang nag-angkon kita og usa ka pagpamatuod nga ang ebanghelyo ni Jesukristo adunay gahum sa pagluwas kanato, nan dili kita maulaw sa pagpakigbahin niini ngadto sa uban.)

• Sa unsa nga paagi nga kining barunganan makatabang ninyo sa pag-atubang sa pagpanggukod o pagpanaway sa inyong mga pagtuo?

Dapita ang usa ka estudyante sa pagbasa og kusog sa sunod nga bahin sa istorya ni Elder Echo Hawk, ug hangyoa ang klase sa pagpaminaw kon giunsa niya pagtubag kadto nga drill sa sarhento.

Imahe

Elder Larry Echo Hawk

“Nagpaabut ko nga iya kong singgitan, hinoon, mipaduol siya nako ug mihunghong, ‘Mormon ka ba?’

“Ingon sa gisugo, misinggit ako, ‘Oo, Sarhentong Instruktor.’

“Nagpaabut ako sa pinakangil-ad. Hinoon, mihunong ug mipataas sa iyang kamot nga naggunit sa akong Basahon ni Mormon, ug sa hinay kaayo nga tingog miingon siya, ‘Mituo ka ba niini nga libro?’

“Pag-usab misinggit ako, ‘Oo, Sarhentong Instruktor’” (“Duol ngari Kanako, O Balay ni Israel,” 32).

• Sa unsa nga paagi nga ang tubag ni Elder Echo Hawk usa ka maayong ehemplo sa baruganan nga gitudlo diha sa Mga Taga-Roma 1:16?

Ipasabut nga imbis manaway ni Elder Echo Hawk, ang instruktor sa dril maampingong mibutang sa Basahon ni Mormon ug mipadayon sa naglinya nga mga recruit. Basaha og kusog ang nahabilin nga pamahayag ni Elder Echo Hawk:

Imahe

Elder Larry Echo Hawk

“Kanunay akong nahibulong nganong wala ako apila sa isug nga Marine Corps nga sarhento nianang adlawa. Apan ako mapasalamaton sa pag-ingon nga walay pag-ukon-ukon, ‘Oo, ako miyembro sa Ang Simbahan ni Jesukristo sa mga Santos sa Ulahing mga Adlaw’ ug ‘Oo, ako nasayud nga ang Basahon ni Mormon tinuod.’ Kini nga pagpamatuod usa ka mahal nga gasa nga gihatag ngari nako pinaagi sa Espiritu Santo” (“Duol ngari Kanako, O Balay ni Israel,” 32).

• Kanus-a nga kamo (o ang usa ka tawo nga imong kaila) nakapakita nga ikaw wala naulaw sa pagpakigbahin sa ebanghelyo ni Jesukristo?

Dapita ang mga estudyante sa pagpamalandong kon unsa ka lig-on ang ilang gibati sa ilang mga pagpamatuod sa ebanghelyo ni Jesukristo ug unsa ang ilang mahimo sa pagpalig-on niadtong mga pagpamatuod. Awhaga sila sa paghimo og usa ka tumong sa pagbuhat sa ingon.

Ipasabut nga sa panahon ni Pablo, ang ubang Kristiyano nga Hentil nangita og katarungan sa imoral o masalaypon nga kinaiya pinaagi sa pagpasabut sa kalooy sa Dios ug gibaliwala ang Iyang hingpit nga hustisya. Usab, ang ubang mga Kristiyano nga Hudeo mituo nga ang pagsunod sa balaud ni Moises gikinahanglan alang sa ilang kaluwasan. Si Pablo mikorihir niining duha ka sayop nga mga pagtuo.

Pagdapit og pipila ka mga estudyante sa pagpuli-pulig basa og kusog gikan sa Mga Taga-Roma 1:18–32. Hangyoa ang klase sa pagsunod, nga mangita sa mga sala nga giingon ni Pablo nga komon sa iyang panahon. Mahimo nimong tabangan ang mga estudyante sa paghulagway sa mga pulong o hugpong sa mga pulong sa mga bersikulo 18–32 aron sa pagtabang nila nga masabtan ang mga pasidaan nga gihatag ni Pablo ngadto sa mga Santos sa Roma. Sama pananglit, ikonsiderar ang pagpangutana sa mosunod:

• Sa bersikulo 25, unsa sa imong hunahuna ang ipasabut sa “gisimba ug gialagaran ang binuhat mas labaw pa kaysa Magbubuhat”?

Ipasabut nga gikan sa Mga Taga-Romans 1:18–32, atong makat-unan nga ang mga propeta ug mga apostoles nagtudlo kanato mahitungod sa mga kinaiya ug pamatasan nga makasilo sa Dios.

Ipasabut nga ang mga pulong “nanag-usab sa kagamitan nga tiunay sa ilang pagkababaye ngadto sa kagamitan nga supak sa kinaiya” sa bersikulo 26 ug “nanagbiya sa ilang tiunayng kalabutan ngadto sa babaye” sa bersikulo 27 nagpasabut ngadto sa homosexual nga kinaiya. Mahimo nimong ipasabut nga gikan sa sinugdanan, ug sa makanunayon sa kinatibuk-an sa mga kasulatan, ang Ginoo mihimaraut sa mga kalapasan sa balaod sa kaputli, lakip na sa homosekswal nga kinaiya.

Pahinumdom: Ang hilisgutan sa managsamang-sekso gikinahanglan ang dakong kasensitibo. Samtang hisgutan sa imong klase kini nga isyu, siguraduha nga kini buhaton uban sa kalumo, kapuangod, ug kamatinahuron.

Aron matabangan ang mga estudyante nga masabtan ang posisyon sa Simbahan sa homosexual nga kinaiya, basaha og kusog ang mosunod nga mga pamahayag:

“Ang kinaiya nga binayot [homosekswal] ug tinomboy usa ka grabe nga sala. Kon kamo makamatikod sa inyong kaugalingon nga nanlimbasug sa pagkaibog sa samang sekso o gidani sa pag-apil sa dili angay nga binuhatan, pangayo og tambag sa inyong mga ginikanan ug bishop. Sila motabang kaninyo.” (Alang sa Kalig-on sa mga Kabatan-onan [booklet, 2011], 36).

“Tataw ang posisyon sa doktrina sa Simbahan: Ang sekswal nga kalihokan kinahanglan mahitabo lang tali sa usa ka lalaki ug usa ka babaye kinsa minyo. Apan, kana dili gayud mahimong gamiton nga kapaangayan isip rason sa pagkadili mabination. Si Jesukristo, kinsa atong gisunod, nagklaro sa Iyang pagpanghimaraut sa sekswal nga imoralidad, apan dili gayud bangis. Sa kanunay Siya interesado sa pagbayaw sa indibidwal, dili gayud ang pagsaway. …

“Ang Simbahan miila tali sa kaibog sa managsamang sekso ug sa kinaiya. Samtang ang pagpabilin sa mga pagbati ug mga hilig ngadto sa mao gihapon nga sekso dili kinaiyanhong dautan, ang pakiglambigit sa kinaiya nga homosekswal mao ang nagsumpaki sa ‘baruganan sa doktrina, basi sa sagrado nga kasulatan … nga ang kaminyoon tali sa usa ka lalaki ug usa ka babaye mahinungdanon ngadto sa plano sa Tiglalang alang sa mahangturon nga padulngan sa Iyang mga anak’ [“First Presidency Statement on Same-Gender Marriage,” mormonnewsroom.org]” (“Same-Sex Attraction,” Gospel Topics, lds.org/topics).

• Nganong importante man alang kanato nga masabtan ang mga pagtulun-an sa mga propeta sa Ginoo ug mga apostoles kabahin sa kinaiya nga homosekswal?

• Unsaon nato sa pagpakita og kamabination ug kapuangod niadtong nakasinati og kaibug sa samang sekso samtang nagsuporta sa posisyon sa Simbahan bahin sa homosekswal nga kinaiya?

I-summarize ang Mga Taga-Roma 2:1–3:8 pinaagi sa pagpasabut nga si Pablo mitudlo nga tanang mga tawo pagahukman sumala sa ilang mga buhat, ug iyang gipakita ang pagkadili matarung sa mga Hudeo naggikan sa ilang pagsunod sa balaod ni Moises sa dayag apan dili sa hilom nga paagi.

Dapita ang usa ka estudyante sa pagbasa og kusog sa Mga Taga-Roma 3:9–12, 23 ug hangyoa ang klase sa pagpangita kon si kinsa ang giingon ni Pablo nga naapektuhan sa sala.

• Kinsa ang giingon ni Pablo nga naapektuhan sa sala? Unsay epekto nga nahimo sa atong mga sala ngari kanato? (Human makatubag ang mga estudyante, isulat ang mosunod nga kamatuoran sa pisara: Ang tanang tawo nga may tulubagon nakasala ug nagkinahanglan og kapasayloan sa Dios.)

• Sa unsa nga paagi nga kining kamatuoran makatabang nato nga mas masabtan nganong nagkinahanglan kita ni Jesukristo?

Ipasabut nga sa nahabilin nga mga bersikulo sa Mga Taga-Roma 3, si Pablo mitudlo kon giunsa ni Jesukristo sa pagbuntog ang problema nga atong giatubang—sa paghingalan, nga ang Dios dili makadawat sa sala ug nga ang matag tawo nga may tulubagon makasala. Aron masabtan kini nga mga bersikulo, ang mga estudyante nagkinahanglan nga makasabut sa kahulugan sa mosunod nga mga pulong: kapaangayan (isip “napasaylo gikan sa silot sa sala ug nadeklarar nga walay sala” [Giya ngadto sa mga Kasulatan, “Kapaangayan, Paghatag og Kaangayan” scriptures.lds.org]), propitiation (maulaon nga sakripisyo ug tinubdan sa kalooy), ug grasya (“balaan nga pamaagi sa pagtabang o pagpalig-on, gihatag pinaagi sa manggihatagon nga kalooy ug gugma ni Jesukristo” [Giya ngadto sa mga Kasulatan, “Grasya”]). Ikonsiderar ang pagsulat sa mga depinisyon niini nga mga pulong diha sa pisara ngadto sa klase o paghatag og handout niini nga mga termino ngadto sa matag estudyante.

Hangyoa ang usa ka estudyante sa pagbasa og kusog sa Mga Taga-Roma 3:24–26. Dapita ang klase sa pagsunod, nga mangita kon unsaon nato nga mahimong takus nga maanaa sa presensya sa Dios.

• Sumala sa Mga Taga-Roma 3:24, sa unsang paagi nga kita nahatagan og kaangayan, o gipamahayag nga takus nga maanaa sa presensya sa Dios?

Ipasabut nga sa Joseph Smith Translation sa Mga Taga-Roma 3:24 giusab ang pulong nga gawasnon ngadto sa lamang. Ipasabut nga bisan unsa pa kita kamaayo niining kinabuhia, dili nato maangkon o magantihan ang kaluwasan sa ato lang kaugalingon tungod kay, sumala sa gitudlo ni Pablo, kitang tanan nakasala ug busa nakabsan sa kaluwasan (tan-awa ang Mga Taga-Roma 3:23). Pinaagi lamang kini sa grasya sa Dios—sa Iyang balaan nga kalig-on ug sa maabagon nga gahum—nga kita naluwas (tan-awa usab sa Moroni 10:32–33).

• Sumala sa bersikulo 26, si kinsa ang mahatagan og kaangayan sa Dios pinaagi sa kalooy? (Kadtong kinsa nagtuo ni Jesus.)

Pahinumdumi ang mga estudyante kon giunsa sa paggamit ni Pablo ang mga pulong tinuohan ug hugot nga pagtuo sumala sa nahisgutan kaganina diha sa klase.

• Unsa nga baruganan ang gitudlo niini nga mga bersikulo mahitungod sa resulta sa kamatinud-anon nga pagdawat sa Pag-ula ni Jesukristo? (Ang mga estudyante mahimong moila og usa ka baruganan sama mosunod: Pinaagi sa matinud-anon nga pagdawat sa Pag-ula ni Jesukristo, ang tanang katawhan mahimong mahatagan og kaangayan ug makadawat og kaluwasan.)

• Unsaon nato sa pagpakita ang matinud-anon nga pagdawat sa Pag-ula sa Manluluwas?

Dapita ang mga estudyante sa pagpamalandong sa ilang panginahanglan alang sa Manluluwas nga si Jesukristo ug unsa ang ilang mahimo aron mas matinud-anong modawat sa Iyang Pag-ula. Dapita sila sa pagsulat sa ilang mga pagbati diha sa ilang mga notebook sa klase o scripture study journal. Hangyoa ang pipila ka mga estudyante sa pagpakigbahin mahitungod sa ilang mga pagbati ug mga pagpamatuod sa Manluluwas.

I-summarize ang Mga Taga-Roma 3:27–30 pinaagi sa pagpasabut nga si Pablo subling mipasabut nga ang indibidwal mahatagan og kaangayan pinaagi sa hugot nga pagtuo diha ni Jesukristo kay sa pinaagi sa iyang pagsunod sa balaod ni Moises.