Human ang mga lider sa mga Judeo midakop ug misukit-sukit ni Jesus, ila Siyang gihatud ngadto ni Pilato aron mataral ug mahukman. Miuyon si Pilato nga Ilansang sa krus si Jesus, bisan og nakombinser siya sa kainosente ni Jesus. Samtang didto sa krus, gibilin sa Manluluwas ang pag-atiman sa Iyang inahan ngadto ni Apostol Juan. Human sa pagkalansang ni Jesus, ang Iyang lawas gibutang sa usa ka lubnganan.
Gidakop si Jesus ug gisukit-sukit sa mga lider sa mga Judeo, kinsa midala Kaniya sa atubangan ni Pilato
Isulat sa pisara ang mosunod nga pangutana:
Kanus-a ang pinakalisud nga panahon sa paghunahuna sa kaayohan sa uban?
Dapita ang pipila ka estudyante nga mopasabut kon unsaon nila sa pagtubag ang pangutana nga naa sa pisara.
Ipasabut nga si Jesukristo ug ang gobernador sa mga Romano nga si Pilato mipili nga i-prayoridad, o hatagan og bili, ang lahi nga mga butang atol sa mga panghitabo nga gihulagway sa Juan 18–19. Isulat ang mga gikabalak-an ni Jesus ug ang mga gikabalak-an ni Pilato sa pikas nga dapit sa pisara. Dapita ang mga estudyante sa pagpangita sa kamatuoran samtang magtuon sila sa Juan 18–19 nga makatabang nilang mahibalo kon unsa nga mga kabalaka ang angayan nilang i-prayoridad sa ilang kinabuhi.
I-summarize ang Juan 18:1–3 pinaagi sa pagpasabut nga human nag-antus si Jesus sa Tanaman sa Getsemani, miabut si Judas Iscariote kauban ang mga opisyal gikan sa punoang mga pari ug mga Pariseo aron sa pagdakop ni Jesus.
Kon nahibalo mo nga ang usa ka grupo sa armadong mga opisyal nagsingabut aron dakpon mo ug sa katapusan mopatay ninyo, unsa kaha ang inyong reaksyon?
Dapita ang pipila ka estudyante nga magpuli-puli sa pagbasa og kusog sa Juan 18:4–11 ug Lucas 22:50–51 . Hangyoa ang klase sa pagsunod, nga mangita kon giunsa sa pagtubag ni Jesus dihang nangabut kini nga grupo.
Unsa ang gisulti ni Jesus ngadto sa mga midakop Kaniya? (Mahimo nimong ipasabut nga ang mga pulong nga kining diha sa Juan 18:8 ug ang [kanila] diha sa Juan 18:9 nag-refer sa mga Apostoles nga mga kauban ni Jesus.)
Sumala niini nga mga bersikulo, unsa man ang gikabalak-an ni Jesukristo? (Samtang motubag ang mga estudyante, isulat sa pisara ang mosunod nga mga pulong ubos sa “mga gikabalak-an ni Jesukristo”: pagpanalipud sa Iyang mga Apostoles; pag-ayo sa dalunggan sa sulugoon; pagbuhat sa kabubut-on sa Langitnong Amahan.)
Dapita ang usa ka estudyante sa pagbasa og kusog sa summary sa Juan 18:12–32 .
Mitugot si Jesus nga dakpon Siya sa mga opisyal. Gidala Siya ngadto ni Anas, usa sa mga lider sa mga Judeo, ug dayon ngadto ni Caifas, ang labaw nga pari [sacerdote] kinsa nagtinguha nga mahukman nga patyon si Jesus. Si Pedro ug lain pa nga disipulo misunod ni Jesus. Dihang tulo ka managlahi nga tawo ang nangutana kang Pedro kon usa ba siya sa mga disipulo ni Jesus, gilimud ni Pedro ang matag pangutana nga siya nakaila Kaniya. Human mapangutana ni Caifas si Jesus, ang mga lider sa mga Judeo midala ni Jesus ngadto ni Pilato, ang gobernador nga Romano sa probinsya sa Judea, aron itaral ug hukman. Ang mga Romano lamang ang dunay awtoridad sa paghukom og kamatayon didto sa Jerusalem.
Ipasabut nga kini nga pagtaral mahimong ipahigayon didto sa Antonia Fortress duol sa templo. (Mahimo nimong ikonsiderar nga ipaabli sa mga estudyante ang Mapa 12, diha sa “Ang Jerusalem sa Panahon ni Jesus,” sa Ang Giya ngadto sa mga Kasulatan ug pangitaa ang Kota sa Antonia [feature 3 sa mapa].)
Dapita ang duha ka mga sa pagbasa og kusog nga magtinagsa sa mga pulong sa Manluluwas ug ni Pilato, nga narekord sa Juan 18:33–37 . (Mahimo nimong ipapangita daan niining mga estudyante ang mga tudling nga ilang basahon sa dili pa magsugod ang klase.) Ikonsiderar nga ikaw ang narrator, o pagdapti og laing estudyante nga maoy mag-narrate. Samtang nagbasa kini nga mga estudyante sa ilang bahin, hangyoa ang klase sa pagsunod, nga mangita kon unsay gustong mahibaloan ni Pilato mahitungod ni Jesus.
Sumala sa Juan 18:33, unsay gustong mahibaloan ni Pilato mahitungod ni Jesus?
Ipasabut nga ang mga lider sa mga Judeo mipasangil kang Jesus nga nangangkon nga mao ang hari sa mga Judeo tungod kay kon si Jesus mangangkon nga mao ang hari, mapasakaan Siya og kasong rebelyon, o pagbudhi, batok sa panggobyerno sa Roma (tan-awa sa Juan 19:12), usa ka sala nga ang silot kamatayon.
Unsa ang gipasabut ni Jesus ngadto kang Pilato? (Ang Iyang pagkahari “dili iya niining kalibutana” [Juan 18:36], ug Siya mianhi sa yuta aron “magapanghimatuod sa kamatuoran” [Juan 18:37].)
Hangyoa ang mga estudyante sa pagbasa og hilum sa Juan 18:38–40, nga mangita kon unsay nakita ni Pilato mahitungod ni Jesus.
Unsa ang nakita ni Pilato mahitungod ni Jesus? (Miingon siya nga “wala akoy nakitang ikasumbong batok kaniya” [bersikulo 38].)
Sumala sa bersikulo 39, unsay gisulayan sa paghimo ni Pilato aron mabuhian si Jesus?
I-summarize ang Juan 19:1–5 pinaagi sa pagpasabut nga ang mga Romanong kasundaluhan mibunal ug mibugal-bugal ni Jesus. Dayon gipresentar ni Pilato si Jesus sa atubangan sa mga tawo.
Dapita ang mga estudyante sa pagbasa og hilum sa Juan 19:4, 6, nga mangita sa gibalik-balik og sulti ni Pilato ngadto sa mga Judeo (“wala akoy nakitang ikasumbong batok kaniya”).
Basi sa pag-insister ni Pilato nga wala siyay nakitang ikasumbong batok ni Jesus, unsay gituohan ni Pilato nga maoy husto niyang buhaton?
Dapita ang usa ka estudyante sa pagbasa og kusog sa Juan 19:7 . Hangyoa ang klase sa pagsunod, nga mangita kon unsay gisulti sa mga lider sa mga Judeo kang Pilato mahitungod ni Jesus.
Dapita ang mga estudyante kinsa mibasa sa mga pulong ni Pilato, Jesus, ug sa narrator nga ipadayon ang ilang mga role ug basahon og kusog ang Juan 19:8–11 . Hangyoa ang klase sa pagsunod, nga mangita sa tubag ni Pilato dihang iyang nadungog si Jesus nga miingon nga Siya ang Anak sa Dios.
Giunsa ni Pilato sa pagtubag human siya giingnan sa mga lider sa mga Judeo nga miingon si Jesus nga Siya ang Anak sa Dios?
Kon kamo pa ang naa sa posisyon ni Pilato, unsa kaha ang inyong bation human makadungog sa gisulti ni Jesus mahitungod sa inyong gahum isip gobernador? Ngano?
Ipasabut nga ang pahayag ni Jesus nga narekord sa bersikulo 11 mahitungod sa mga lider sa mga Judeo nga “labaw ka dakog sala” nagpakita nga kon uyunan ni Pilato ang hangyo sa mga katawhan ug misugo nga ilansang sa krus si Jesus, si Pilato makasala, apan dili ingon kadako sama niadtong nagtinguha gayud sa pagpatay kang Jesus.
Dapita ang mga estudyante sa pagbasa og hilum sa Mateo 27:19, nga mangita kon unsay tambag sa asawa ni Pilato nga iyang buhaton. Hangyoa ang mga estudyante sa pagreport sa ilang nakit-an.
Dapita ang usa ka estudyante sa pagbasa og kusog sa Juan 19:12–15 . Hangyoa ang klase sa pagsunod, nga mangita kon unsay gitinguha ni Pilato nga buhaton ngadto ni Jesus ug sa unsang paagi misanong ang mga Judeo.
Sumala sa bersikulo 12, unsa ang tinguha ni Pilato nga buhaton?
Unsa ang giingon sa mga lider sa mga Judeo ngadto ni Pilato dihang nahibaloan nila nga gusto niyang buhian si Jesus?
Pahinumdumi ang mga estudyante nga si Caesar mao ang emperador sa Roma kinsa mihatag ni Pilato sa iyang posisyon isip gobernador sa Judea. Sa pipila ka nangaging okasyon, gimandoan ni Pilato ang mga sundalong Romano nga pamatyon ang mga Judeo, ug gihugawan niya ang pipila sa sagrado nilang relihiyuso nga mga tradisyon. Ang mga gibuhat ni Pilato gireport ngadto ni Caesar, ug gibadlong ni Caesar si Pilato (tan-awa sa kap. 34, note 7, sa James E. Talmage, Jesus the Christ, 3rd ed. [1916], 648–49).
Unsa kaha unta ang nahitabo kang Pilato kon ang mga Judeo mireport nga siya dili “higala” ni Caesar (bersikulo 12)? (Kon si Caesar nagsuspetsa pa nga si Pilato dili na loyal kaniya, basin gipalagpot na ni Caesar si Pilato sa iyang posisyon ug sa gahum sa pagkagobernador.)
Ipasabut nga kinahanglang mopili si Pilato tali sa pagpanalipud sa kaugalingon niyang interes ug pagbuhi sa Manluluwas, kinsa nahibaloan niya nga inosente.
Dapita ang usa ka estudyante sa pagbasa og kusog sa Juan 19:16 . Hangyoa ang klase sa pagsunod, nga mangita kon unsay gipili ni Pilato nga buhaton.
Unsa ang gipili ni Pilato nga buhaton?
Unsa ang buot ipakita niini nga pagpili bahin sa kon unsa ang mas gikabalak-an ni Pilato? (Samtang motubag ang mga estudyante, isulat sa pisara ang mosunod nga mga pulong ubos sa “mga gikabalak-an ni Pilato”: iyang kaugalingon; iyang posisyon ug gahum.)
Unsa nga baruganan ang atong makat-unan gikan sa desisyon ni Pilato nga giuna ang kaugalingon niyang interes kay sa pagbuhi sa Manluluwas, kinsa nahibaloan niya nga inosente? (Human makatubag ang mga estudyante, isulat sa pisara ang mosunod nga baruganan: Ang pag-una sa kaugalingon natong interes kay sa paghimo sa unsay husto modala nato sa pagpakasala.)
Unsa ang pipila ka mga sitwasyon diin mahimo kitang matintal sa pag-una sa kaugalingon natong interes kay sa paghimo sa unsay husto?
Unsay atong mahimo sa pagbuntog sa tintasyon nga mauna ang kaugalingon natong interes kay sa paghimo sa unsay husto?
Dapita ang mga estudyante sa pagpangita kon unsay ilang makat-unan mahitungod sa kinaiya ni Kristo ikumpara sa kinaiya ni Pilato samtang tun-an nila ang katapusang mga gutlo sa mortal nga kinabuhi ni Jesukristo.
Si Jesus gilansang sa krus, ug ang Iyang lawas gibutang sa lubnganan
I-summarize ang Juan 19:17–24 pinaagi sa pagpasabut nga gipas-an ni Jesus ang Iyang krus ngadto sa Golgota, diin siya gilansang sa krus.
Dapita ang usa ka estudyante sa pagbasa og kusog sa Juan 19:25–27 . Hangyoa ang klase sa pagsunod, nga mangita kon kinsa ang didto dihang gilansang si Jesus.
Kinsa ang nagbarug duol sa krus dihang gilansang si Jesus? (Human makatubag ang mga estudyante, ipasabut nga ang mga pulong nga ang “tinun-an … kinsa hinigugma ni [Jesus]” [bersikulo 26] nag-refer ngadto ni Apostol Juan, nailhan usab nga si Juan nga Hinigugma.)
Sumala sa mga bersikulo 26–27, kinsa man ang gikabalak-an ni Jesus dihang nagbitay na Siya sa krus? Unsa ang Iyang gisugo nga buhaton ni Juan? (Pag-atiman sa Iyang inahan sama nga siya ang kaugalingong inahan ni Juan. Sa pisara ubos sa “mga gikabalak-an ni Jesukristo,” isulat ang kaayohan para sa Iyang inahan.)
Kon mahimo, hatagi ang mga estudyante og mga kopya sa mosunod nga pamahayag ni Elder David A. Bednar sa Korum sa Napulog Duha ka mga Apostoles. Hangyoa ang usa ka estudyante nga basahon og kusog ang pamahayag.
Imahe
Elder David A. Bednar
“Ang kinaiya mapadayag … pinaagi sa gahum sa pag-ila sa pag-antus sa ubang tawo samtang kita mismo anaa sa pag-antus; sa katakus nga mahibaloan ang kagutom sa uban samtang kita gigutom; ug pinaagi sa gahum sa pagtabang ug pagpakita og kalooy sa espirituhanong pag-antus sa uban samtang kita mismo naa taliwala sa atong kaugalingong espirituhanon nga pag-antus. Sa ingon, ang kinaiya ikapakita pinaagi sa pagpakita og kabalaka ug pagtabang sa uban samtang ang kinaiyanhon ug natural natong panglihok nagtutok lamang sa kaugalingon natong mga problema ug kalisdanan. Kon kana nga kapasidad mao gayud ang sukod sa moral nga kinaiya, nan ang Manluluwas maoy hingpit nga ehemplo sa ingon nga pagkamakanunayon ug pagkamanggiloy-ong kinaiya” (“The Character of Christ” [Brigham Young University–Idaho Religion Symposium, Jan. 25, 2003], 2–3).
Basi sa unsay atong nakat-unan sa Juan 18–19 mahitungod sa kinaiya sa Manluluwas, unsa ang atong mahimo aron masunod ang Iyang ehemplo? (Human makatubag ang mga estudyante, isulat sa pisara ang mosunod nga kamatuoran: Atong masunod ang ehemplo sa Manluluwas pinaagi sa pagpili nga motabang sa uban bisan og kita mismo anaa sa panginahanglan.)
Unsaon man nato nga mabuntog ang tinguha sa pagkabalaka og una sa atong kaugalingon ug pilion ang pagtabang sa uban samtang kita mismo anaa sa panginahanglan?
Kanus-a kamo nakakita og tawo nga misunod sa ehemplo sa Manluluwas pinaagi sa pagpili nga motabang sa uban bisan og siya anaa sa panginahanglan?
Mahimo nimong ipakigbahin ang imong pagpamatuod bahin ni Jesukristo ug sa hingpit nga ehemplo nga Iyang gihimo sa pag-una sa panginahanglan sa uban kay sa Iyang kaugalingon. Dapita ang mga estudyante nga isulat sa ilang mga class notebook o mga scripture study journal kon unsay ilang buhaton aron masunod ang ehemplo sa Manluluwas.
I-summarize ang Juan 19:28–42 pinaagi sa pagpasabut nga human sa pagkamatay ni Jesus, gipangayo ni Jose nga taga Arimatea kang Pilato ang lawas ni Jesus. Si Jose ug si Nicodemo dayon miandam sa lawas sa Manluluwas ug gibutang kini sa lubnganan, nga gidonar ni Jose.
“Kining mga pulonga [‘Mao ako’] gihubad gikan sa Gresyanhon nga mga pulong egō eimi, gigamit sa daghang dapit sa Juan agig reference sa kabalaan ni Jesukristo. … Human sa paglitok sa Manluluwas niining mga pulonga, ang mga tawo ug mga opisyal ‘misibug ug nangatumba sa yuta’ (Juan 18:6), ‘tataw nga wala sila makagamit sa gahum batok ni Jesus gawas kon sila tugutan’ (Bruce R. McConkie, Doctrinal New Testament Commentary, 1:780). ‘Ang yano nga dignidad ug malumo gani kusog nga pwersa sa presensya ni Kristo nakita nga mas gamhanan kay sa lig-ong mga armas ug hinagiban nga igpapatay’ (James E. Talmage, Jesus the Christ, 3rd ed. [1916], 615). Kini nga detalye nagpakita nga ang Manluluwas dunay katakus sa pagbuntog sa mga midakop kaniya apan boluntaryo siyang mitugyan aron dakpon ug ilansang sa krus” (New Testament Student Manual [manwal sa Church Educational System, 2014], 256).
Juan 19:12, 16. Nganong gihimo man ni Pilato ang usa ka desisyon nga nahibaloan niyang sayop?
Si Elder James E. Talmage sa Korum sa Napulog Duha ka mga Apostoles mihatag niining mapuslanong panabut nganong gihimo ni Pilato ang desisyon nga nahibaloan niyang sayop:
“Unsa man ang hinungdan sa kahuyang ni Pilato? Siya ang representante sa emperador, ang awtoridad nga representante sa balaod nga dunay gahum sa pagpalansang o pagluwas; siya ang tawo nga nagbaton og walay limit nga awtoridad. Ang iyang kombiksyon sa pagkawalay sala ni Kristo ug ang iyang tinguha sa pagluwas Kaniya gikan sa pagkalansang sa krus usa ka butang nga dili na ikapangutana. Nganong naglisud man si Pilato sa paghukom, ug sa kadugayan mihatag og hukom nga sukwahi sa iyang konsensya ug kabubut-on? Tungod kay, human sa tanan, dili siya gawasnon nga mohimo og hukom nga maoy iyang gusto. Ang mga nangagi niyang mga desisyon dako og impluwensya sa paghimo karon og desisyon. Nahibalo siya nga kon may reklamo man batok niya nga ipasaka sa Roma, ang iyang katikasan ug kabangis, mga pagpamugos ug walay kaangayang nga pagpamatay ihan-ok batok kaniya. Siya ang tigmando sa Roma, apan ang mga tawo ubos sa iyang pagdumala nahimuot nga makita siyang nahadlok sa hulga nga ireport siya sa taas nga awtoridad sa Roma, sa Tiberius” (Jesus the Christ, 3rd ed. [1916], 641).
Nabantayan ni Elder Talmage nga “si Pilato nahibalo unsay husto apan kulang sa moral nga kaisug sa paghimo niini” (kap. 34, note 7, sa James E. Talmage, Jesus the Christ, 648).
Juan 19:31–36. “Ang mga Judeo mihangyo … kang Pilato nga balibalion ang mga bitiis”
Ang mga tawo nga ilansang sa krus usahay paantuson sulod sa pipila ka adlaw sa dili pa mamatay. Human mamatay ang tawo nga gilansang, kustombre sa mga Romano nga pasagdan ang mga lawas diha sa krus isip sanglitanan para sa mga tawo nga gustong mahimong mga kriminal. Ang balaod ni Moises, hinoon, nagdili nga magpabilin sa tibuok gabii ang lawas sa mga kriminal nga nagbitay (tan-awa sa Deuteronomio 21:22–23). Usab, bahin sa pagkalansang ni Jesus, ang sunod nga adlaw mao ang Igpapahulay. Mao nga ang mga lider sa mga Judeo, nga gustong makuha ang mga lawas gikan sa krus sa dili pa moabut ang Igpapahulay nga sugdan sa pagsalop sa adlaw, nagtinguha nga madali ang pagkamatay sa tulo ka tawo diha sa krus pinaagi sa paghangyo nga balibalion ang ilang mga bitiis. Gumikan niini mobikog ang dughan sa mga biktima ug maglisud sa pagginhawa tungod kay dili na nila magamit ang ilang mga bitiis sa pagsuporta sa ilang gibug-aton. Human mabalibali ang mga bitiis sa duha ka tawo nga gilansang, nakita sa mga sundalong Romano nga patay na si Jesus mao nga wala na kinahanglana nga balibalian siya sa Iyang mga bitiis.
Kining importante nga gutlo diha sa krus nagtuman sa panagna sa Daang Tugon: “Siya nagabantay sa tanan niyang mga bukog: walay usa kanila nga madugmok” (Salmo 34:20). Dugang pa, misugo ang Ginoo kang Israel nga ang ilang mga nating karnero sa Pagpalabay, diin naghulagway sa sakripisyo isip Kordero sa Dios, dili dugmukon ang ilang mga bukog (tan-awa sa Exodo 12:46).