Samtang ang Manluluwas didto sa Jerusalem alang sa Fiesta sa mga Payag, ang pipila ka mga escriba ug mga Pariseo nagdala og usa ka babaye ngadto Kaniya kinsa sad-an sa pagpanapaw, ug nangutana sila kon kinahanglan ba siyang batoon. Iyang gipakyas ang mga tigpasangil ug mipakita og kalooy ngadto sa babaye. Si Jesus mitudlo usab nga ang Amahan nagpamatuod Kaniya.
Ang babaye nga giakusahan nga nanapaw gidala ngadto sa Manluluwas
Dapita ang mga estudyante sa paghunahuna og mga panahon dihang nakasugat sila o nakipag-uban sila og mga tawo kansang panagway o kinaiya wala mahiuyon sa mga sumbanan sa Ginoo.
Unsa nga mga hagit ang tingali atong sagubangon kon kauban kita sa uban kansang panagway o kinaiya wala mahiuyon sa mga sumbanan sa Ginoo? (Mahimo nga motubag ang mga estudyante nga tingali matintal kita nga hukman ang ingon niana nga mga tawo sa dili matarung nga paagi o tagdon sila sa walay kalooy.)
Isulat sa pisara ang mosunod nga pangutana:
Unsa ang angay natong buhaton sa mga sitwasyon kon kauban ta sa uban kansang panagway o kinaiya wala mahiuyon sa mga sumbanan sa Ginoo?
Awhaga ang mga estudyante nga mangita sa mga kamatuoran samtang magtuon sila sa Juan 8:1–11 nga makatabang sa pagtubag niini nga pangutana.
Ipasabut nga human sa Fiesta sa mga Payag, nagpabilin si Jesukristo sa Jerusalem sa mubo nga panahon ug nanudlo sa mga tawo didto sa templo (tan-awa sa Juan 8:1–2).
Dapita ang usa ka estudyante sa pagbasa og kusog sa Juan 8:3–6 . Hangyoa ang klase sa pagsunod, nga mangita kon unsay nahitabo dihang gitudloan ni Jesus ang mga tawo.
Unsa ang nahitabo dihang gitudloan ni Jesus ang mga tawo?
Unsa ang pangutana sa mga escriba ug mga Pariseo kang Jesus?
Sumala sa bersikulo 6, unsa ang tuyo sa mga esciba ug sa mga Pariseo? (Tinguha nila nga dauton si Jesus atubangan sa mga tawo ug nangitag lig-on nga rason aron maakusahan Siya tungod kay gusto silang makakuha og ikapasangil aron madakop Siya ug mahukman Siya nga patyon [tan-awa sa Juan 7:1, 32].)
Ipasabut nga kon moingon si Jesus nga batoon ang babaye, nagpasiugda Siya og usa ka silot nga dili komon sa mga Judeo ug silot nga gidili sa pamalaod sa Romano. Kon moingon si Jesus nga dili batoon ang babaye, akusahan Siya nga nagpasagad lang sa balaod ni Moises o wala motahud sa giuyunan nga mga naandang buhat kaniadto. (Tan-awa sa Bruce R. McConkie, Doctrinal New Testament Commentary, 3 vols. [1965–73], 1:450–51.)
Dapita ang usa ka estudyante sa pagbasa og kusog sa Juan 8:7–8 . Hangyoa ang klase sa pagsunod, nga mangita sa unsang paagi mitubag ang Manluluwas.
Sa inyong hunahuna unsa kaha ang gusto sa Manluluwas nga masayran niining mga tawhana dihang miingon Siya, “Kinsa kaninyo ang walay sala maoy paunahag labay kaniyag bato”? (bersikulo 7).
Dapita ang usa ka estudyante sa pagbasa og kusog sa Juan 8:9 . Hangyoa ang klase sa pagsunod, nga mangita kon unsay nahitabo dihang ang mga Pariseo ug mga escriba mihunahuna sa gipahayag sa Manluluwas.
Sa inyong hunahuna unsa ang ipasabut sa mga pulong nga “gikonbikto sa kaugalingon nilang mga tanlag”?
Unsa man ang giila niining mga tawhana dihang gipili nila nga manglakaw palayo?
Unsa nga kamatuoran ang atong makat-unan gikan niini nga istorya kon unsaon sa paglikay nga makapanghukom sa uban? (Ang mga estudyante mahimong mogamit og lain-laing mga pulong, apan kinahanglang mahibaloan nila ang mosunod nga baruganan: Ang pag-ila sa kaugalingon natong mga imperpeksyon makatabang kanato nga makalikay sa pagpanghukom sa uban. Isulat sa pisara kini nga baruganan ubos sa pangutana.)
Sa inyong hunahuna sa unsang paagi ang pag-ila sa kaugalingon natong mga imperpeksyon makatabang nato nga malikay nga makapanghukom sa uban?
Pahinumdumi ang mga estudyante nga kining babayhana sad-an sa pagpanapaw, nga usa ka labihan ka seryuso nga sala (tan-awa sa Alma 39:3–5).
Sa inyong hunahuna unsa kaha ang mga gibati niining babayhana dihang ang iyang sala gibandilyo ngadto ni Jesus ug atubangan sa daghang tawo?
Dapita ang usa ka estudyante sa pagbasa og kusog sa Juan 8:10–11 . Hangyoa usab ang estudyante sa pagbasa og kusog sa mosunod gikan sa Joseph Smith Translation sa bersikulo 11: “Ug gihimaya sa babaye ang Dios gikan nianang taknaa, ug mituo sa iyang ngalan.” Hangyoa ang klase sa pagsunod, nga mangita kon giunsa sa pagtubag sa Manluluwas kini nga babaye.
Sa unsang paagi ang Manluluwas mipakita sa gugma ug kalooy niini nga babaye?
Unsa nga mga instruksyon ang gihatag sa Manluluwas ngadto sa babaye?
Aron matabangan ang mga estudyante nga makasabut nga ang Manluluwas wala mobaliwala sa sala niini nga babaye, hangyoa ang usa ka estudyante sa pagbasa og kusog sa mosunod nga pamahayag ni Presidente Spencer W. Kimball:
Imahe
Presidente Spencer W. Kimball
“Ang iyang sugo ngadto kaniya mao, ‘Lumakaw ka ug ayaw na pagpakasala.’ Gitudloan niya ang babayeng makasasala sa paglakaw, pagbiya sa dautan niyang kinabuhi, sa dili na pagpakasala, sa pag-usab sa iyang kinabuhi. Miingon Siya, Lakaw, babaye, ug sugdi ang imong paghinulsol; ug ang buot niyang ipasabut kaniya mao ang pagsugod sa proseso—sa pagbiya sa iyang mga sala” (The Miracle of Forgiveness [1969], 165).
Unsa nga kamatuoran ang atong makat-unan mahitungod sa Manluluwas gikan sa mga bersikulo 10–11? (Ang mga estudyante mahimong mogamit og kaugalingon nilang mga pulong apan kinahanglang mahibaloan nila ang mosunod nga kamatuoran: Ang Manluluwas mipakita kanato sa kalooy pinaagi sa paghatag kanato og oportunidad nga makahinusol. Isulat sa pisara kini nga kamatuoran.)
Sa unsang paagi nga ang pagsabut niini nga kamatuoran makatabang nato kon kita makasala?
Sa unsang paagi ang duha ka kamatuoran nga atong nahibaloan makatabang sa atong pag-atubang sa mga sitwasyon kon kauban ta sa uban kansang panagway o kinaiya wala mahiuyon sa mga sumbanan sa Ginoo?
Sumala sa Joseph Smith Translation sa bersikulo 11, unsay epekto sa kalooy sa Manluluwas diha niana nga babaye?
Hangyoa ang mga estudyante sa pagsulat diha sa ilang mga class notebook o mga scripture study journal sa ilang mga pagbati alang sa Manluluwas tungod sa Iyang kaandam nga mopakita og kalooy ug mohatag kanato og oportunidad nga makahinulsol.
Si Jesus mitudlo nga ang Iyang Amahan mipamatuod bahin Kaniya
Dapita ang mga estudyante sa pagpiyong ug pasulaya sa pagdrowing og usa ka yano nga litrato o piho nga butang. Dayon ipabuka ang ilang mga mata ug ikumpara ang ilang drowing ngadto sa drowing sa ilang mga katapad.
Unsa ang ubang butang nga inyong mabuhat nga mas maayo kon dunay kahayag?
Dapita ang usa ka estudyante sa pagbasa og kusog sa Juan 8:12 . Hangyoa ang klase sa pagsunod, nga mangita kon unsay gipahayag ni Jesus mahitungod sa Iyang kaugalingon.
Unsay tawag ni Jesus sa Iyang kaugalingon? (Isulat sa pisara ang mosunod nga doktrina: Si Jesukristo ang Kahayag sa Kalibutan.)
Pahinumdumi ang mga estudyante nga gihimo ni Jesus kini nga pahayag atol sa Fiesta sa mga Payag. Sa matag gabii sa walo ka adlaw nga fiesta, daghang gipabarug nga mga lampara, o mga menorahs, dagkutan diha sa mga nataran sa templo, naghatag og kasanag sa daghang tawo nga naa sa Jerusalem para sa kasaulugan.
Sa unsang paagi si Jesukristo mihatag og kahayag sa babaye nga giakusahang nanapaw ug sa mga tawo nga miakusar kaniya?
Unsa nga baruganan ang atong makat-unan gikan sa mga pulong sa Manluluwas diha sa bersikulo 12? (Ang mga estudyante mahimong mogamit og lain-laing mga pulong, apan siguroha nga ilang mahibaloan ang mosunod nga baruganan: Kon sundon nato ang Manluluwas, atong malikayan ang espirituhanong kangitngit ug mapuno sa Iyang kahayag.)
Unsay inyong pagbati nga ang Manluluwas motabang ninyo nga malikay nga maglakaw sa espirituhanong kangitngit?
Ipasabut nga daghang panagna sa Daang Tugon nagpasabut nga ang Mesiyas mao ang kahayag sa tanang nasud (tan-awa sa Isaias 49:6; 60:1–3). Busa, sa pagpahayag sa Iyang kaugalingon nga mao ang Kahayag sa Kalibutan, gisangyaw ni Jesus nga Siya ang Mesiyas.
Dapita ang usa ka estudyante sa pagbasa og kusog sa Juan 8:13 . Hangyoa ang klase sa pagsunod, nga mangita kon giunsa sa pagtubag sa mga Pariseo ang pahayag sa Manluluwas.
Giunsa sa pagsanong sa mga Pariseo ang pamahayag sa Manluluwas?
Nganong miingon man sila nga ang rekord ni Jesus o ang iyang pagpamatuod dili tinuod? (Kay Siya mipamatuod sa Iyang kaugalingon.)
Ipasabut nga gipahinumduman ni Jesus ang mga Pariseo nga ang balaod ni Moises nagkinahanglan sa pagpamatuod sa pinakaminus duha ka tawo aron maestablisar ang kamatuoran (tan-awa sa Juan 8:17; Deuteronomio 17:6). Dapita ang usa ka estudyante sa pagbasa og kusog sa Juan 18:18 . Hangyoa ang klase sa pagsunod, nga mangita kon si kinsa pa ang nagpamatuod nga si Jesus mao ang gisaad nga Mesiyas.
Sumala sa bersikulo 18, kinsa ang giingon sa Manluluwas nga maoy ikaduha nga saksi sa Iyang kabalaan? (Mahimo nimong ipasabut nga pinaagi niini nga pamahayag gipamatud-an ni Jesus nga Siya ug ang Iyang Amahan duha ka managlahi nga binuhat.)
Dapita ang usa ka estudyante sa pagbasa og kusog sa Juan 18:19 . Hangyoa ang klase sa pagpangita sa unsay wala masabti sa mga Pariseo mahitungod kang Jesus ug sa Iyang Amahan.
Sumala sa bersikulo 19, ngano nga ang mga Pariseo wala man makaila sa Amahan? (Ang mga Pariseo wala makaila sa Amahan tungod kay wala sila makaila ni Jesus ug kon si kinsa gayud Siya.)
Basi sa unsay gisulti sa Manluluwas ngadto sa mga Pariseo, unsa man ang atong buhaton aron makaila sa Langitnong Amahan? (Ang mga estudyante mahimong mogamit og lainlaing mga pulong, apan siguroha nga maklaro nga samtang magkat-on kita bahin ni Jesukristo, atong mailhan ang Amahan. Gamit ang mga pulong sa mga estudyante, isulat sa pisara kini nga baruganan.)
Aron matabangan ang mga estudyante nga makasabut niini nga baruganan, dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
“Kini mao ang mahinungdanong kamatuoran nga sa tanang gisulti ug gibuhat ni Jesus, lakip na ug ilabi na sa Iyang matubsanong pag-antus ug sakripisyo, Siya nagpakita kanato kung kinsa ug unsa gayud ang Dios nga atong mahangturong Amahan, unsa ka hingpit ang Iyang pagkamaunungon ngadto sa Iyang mga anak sa tanang dispensasyon ug nasud. Sa pulong ug sa buhat si Jesus naninguha sa pagpadayag ug sa paghimong personal ngari kanato sa tinuod nga kinaiya sa Iyang Amahan, ang atong Amahan sa Langit. …
Busa ang pagpakaon sa gigutom, pag-ayo sa masakiton, pagpanton sa pagkahipokrito, pagpangamuyo alang sa hugot nga pagtuo—kini mao ang Kristo nga nagpakita kanato sa agianan ngadto sa Amahan, Siya kinsa ‘maloloy-on ug mapuangoron, dili dali masuko, mainantuson ug puno sa kaayo.’ Sa Iyang kinabuhi ilabi na sa Iyang kamatayon, si Kristo mipahayag, ‘Kini ang kapuangod sa Dios nga akong gipakita kaninyo, ingon man sa akong kaugalingon’” (“Ang Kahalangdon sa Dios,” Ensign o Liahona, Nob. 2003, 70, 72).
Sumala ni Elder Holland, unsa ang atong makat-unan mahitungod sa atong Langitnong Amahan samtang nagkat-on kita mahitungod ni Jesukristo?
I-summarize ang Juan 8:21–24 pinaagi sa pagpasabut nga ang Manluluwas mipahimangno sa mga Pariseo nga kon dili sila motuo Kaniya mamatay sila sa ilang mga kasal-anan.
Dapita ang usa ka estudyante sa pagbasa og kusog sa Juan 8:25–30 . Hangyoa ang klase sa pagpangita og dugang pa nga mga kamatuoran nga gitudlo ni Jesus sa mga Pariseo mahitungod sa Iyang kaugalingon ug sa Langitnong Amahan. Mahimo nimong pamarkahan sa mga estudyante ang ilang nakit-an.
Unsa ang dugang nga mga kamatuoran nga gitudlo ni Jesukristo mahitungod sa Iyang kaugalingon ug sa Langitnong Amahan?
Sa unsang paagi ang mga pagtulun-an sa Manluluwas niini nga mga bersikulo makatabang nato nga makasabut sa relasyon tali sa Manluluwas ug sa Langitnong Amahan?
Dapita ang mga estudyante sa paggahin og pipila ka minutos sa pagribyu ug pagpamalandong sa mga istorya nga ilang natun-an diha sa Bag-ong Tugon karong tuiga (lakip ang, sama pananglit, ang istorya bahin sa babaye nga giakusahan nga nanapaw). Mahimo kang mag-display og mga litrato gikan sa Libro sa mga Hulagway sa Ebanghelyo ([2009]; tan-awa usab sa LDS.org) nga nagpakita sa mga panghitabo gikan sa mortal nga pagpangalagad sa Manluluwas. Dapita ang pipila ka estudyante sa pag-summarize sa istorya nga nahunahunaan sa matag usa ug ipasabut sa klase kon unsay natudlo niini mahitungod sa atong Amahan sa Langit.
Tapusa pinaagi sa pagpakigbahin sa imong pagpamatuod bahin sa Langitnong Amahan ug ni Jesukristo.
Komentaryo ug Background nga Impormasyon
Juan 8:7. “Kinsa kaninyo ang walay sala maoy paunahag labay kaniyag bato”
Si Presidente Dieter F. Uchtdorf sa Unang Kapangulohan mihatag sa mosunod nga pagtesting sa kaugalingon sa pagsuta kon usahay sad-an ba ta sa paglabay og bato:
“Minahal nga mga kaigsoonan, hunahunaa ang mosunod nga mga pangutana isip usa ka pagtesting sa kaugalingon:
“Naghambin ba kamo og pagdumot batok sa usa ka tawo?
“Nanglibak ba kamo, bisan og tingali tinuod ang inyong gisulti?
“Inyo bang gipasagdan, gisalikway, o gisilutan ang uban tungod sa usa ka butang nga ilang nabuhat?
“Sa tago nasina ba kamo sa uban?
Nangandoy ba kamo nga mopasakit sa uban?
“Kon mitubag kamo og oo sa bisan hain niini nga mga pangutana, mahimo ninyong gamiton ang duha ka pulong nga sermon kaganina: hununga kini!
“Sa mapasanginlon ug dili mahigalaong kalibutan, dali ra ang pagpangdaut sa uban. Apan sa dili pa nato ni himoon, atong hinumduman ang mga pulong sa Usa kinsa mao atong Agalon ug modelo: ‘Kinsa kaninyo ang walay sala maoy paunahag labay kaniyag bato.’