Pasuna sa Ikaduhang Sulat ni Pablo ngadto sa mga Taga-Tesalonica

Niining Ikaduha nga Sulat ngadto sa mga Taga-Tesalonica, misulat si Pablo og mga tambag nga pulong ug pagpatin-aw sa wala masabti nga mga aspeto sa mga miyembro sa Simbahan kalabut sa Ikaduhang Pag-anhi ni Jesukristo. Ang pagtuon sa iyang mga pagtulun-an makatabang sa mga estudyante nga masabtan ang kahimtang sa Apostasiya ug unsaon nga makaandam sa tukmang paagi para sa pagbalik sa Ginoo.

Si Pablo ang misulat sa 2 Mga Taga-Tesalonica (tan-awa sa 2 Mga Taga-Tesalonica 1:1; tan-awa usab sa 2 Mga Taga-Tesalonica 2:5; 3:17). Ang sinugdanan sa sulat naglakip sa usa ka pagtimbaya gikan ni Silas ug Timoteo (2 Mga Tesalonica 1:1).

“Gihimo ni Pablo kini nga sulat ngadto sa Mga Taga-Tesalonica didto sa Corinto panahon sa iyang ikaduhang misyonaryo nga panaw” sa tuig mga A.D. 50–51 (tan-awa sa Giya ngadto sa mga Kasulatan, “Epistola ni Pablo, Mga,” scriptures.lds.org).

Gisulat ni Pablo ang 2 Mga Taga-Tesalonica para sa mga miyembro sa Simbahan sa Tesalonica. Ang mga tema sa 1 Mga Taga-Tesalonica ug 2 Mga Taga-Tesalonica magkaparehas, nagsugyot nga gisulat ni Pablo ang 2 Mga Taga-Tesalonica aron sa pagpatin-aw ug pagdugang sa unang sulat. Makita nga ang Mga Taga-Tesalonica nakadawat og sayop nga sulat nga nangangkon nga gikan kini ni Pablo ug kini nga sulat nagpatuo sa uban nga ang Ikaduhang Pag-anhi nahitabo na (tan-awa sa 2 Mga Taga-Tesalonica 2:2).

“Sa mubo nga gintang tali sa duha ka sulat ang Simbahan nagsagubang og mga pagpanglutos (2 Mga Taga-Tes. 1:4); ang gipatuo nga moabut na ang Ginoo diha dayon mipalambo og kahingawa (2:2)” (Giya ngadto sa mga Kasulatan, “Epistola ni Pablo, Mga”). Gisulat ni Pablo ang 2 Mga Taga-Tesalonica aron malig-on ang pagtuo niini nga mga miyembro ug sa pagkorihir sa sayop nga pagsabut sa mga doktrina.

Ang Ikaduhang Sulat ngadto sa mga taga Tesalonica naghatag og makahuluganong mga detalye mahitungod sa Ikaduhang Pag-anhi ni Jesukristo. Ang ubang ehemplo naglakip sa mga ideya nga ang Ginoo mobalik nga siya “magapahamtang og panimalos” ug ang dautan makadawat og “silot sa pagkalaglag nga walay katapusan ug ang pagkahininginlan gikan sa atubangan sa Ginoo” (2 Mga Taga-Tesalonica 1:8–9).

Niini nga sulat atong mabasa nga gipanagna usab ni Pablo ang Dakong Apostasiya, nagtudlo nga masinati sa Simbahan ang “pagsupil” gikan sa ebanghelyo sa dili pa moabut ang Ikaduhang Pag-anhi sa Ginoo (tan-awa sa 2 Mga Taga-Tesalonica 2:2–12). Ang mga pagtulun-an ni Pablo mahitungod sa Apostasiya nagpahinumdom sa mga miyembro sa Simbahan nganong gikinahanglan ang ulahing adlaw nga Pagpahiuli sa ebanghelyo.

2 Mga Taga-Tesalonica 1 Gitimbaya ug gipasalamatan ni Pablo ang mga Santos sa Tesalonica. Gitudlo niya nga ang mga dili diosnon makasinati sa panimalos sa Ginoo sa Ikaduhang Pag-anhi.

2 Mga Taga-Tesalonica 2 Gikorihian ni Pablo ang sayop nga mga ideya nga ang Ikaduhang Pag-anhi nahitabo na ug nanagna nga dunay apostasiya nga mahitabo sa dili pa mobalik ang Ginoo. Giawhag niya ang mga Santos sa Tesalonica nga magpabiling matinud-anon.

2 Mga Taga-Tesalonica 3 Gitambagan ni Pablo ang mga miyembro sa Simbahan sa pagtrabaho aron makasangkap sa ilang panginahanglang temporal ug dili maluya [pagkataka] sa pagbuhat og maayo.