Si Pablo mihusay sa panagbangi tali sa mga Santos nga taga Corinto kalabut sa mga relihiyusong mga kustombre. Mihatag siya og importansya nga ang lalaki ug babaye adunay mahangturon ug balaanon nga tahas ug mahinungdanon sa usag usa diha sa plano sa Ginoo. Mitudlo usab siya sa mga miyembro sa Simbahan mahitungod sa tukma nga pagpangandam alang sa pag-ambit sa sakrament.
Si Pablo misulat sa panaglalis mahitungod sa mga kustombre sa iyang panahon
Imahe
bridal couple, Laie Hawaii Temple
Ipakita ang litrato sa usa ka nagminyo nga magtiayon (sama sa Batan-ong Magtiayon Paingon sa Templo, Libro sa mga Hulagway sa Ebanghelyo [2009], nu. 120; tan-awa usab sa LDS.org). Basaha og kusog ang mosunod nga mga pamahayag nga nagpakita kon unsa ang mahimong bation sa pipila ka indibidwal mahitungod sa kaminyoon:
“Ang pagkamalampuson sa akong panarbaho dako kaayong butang alang nako. Dili ko gusto nga mabahin ang akong pagtagad tali sa akong panarbaho ug sa akong kaminyoon.”
“Dili ko gusto mo-commit sa usa ka dugay nga pakigrelasyon. Mabalaka ko mahitungod sa paghimo og usa ka desisyon nga akong pagabasolan sa dili madugay.”
“Ang kaminyoon mogapos kanako. Dili nako makahimo sa bisan unsa nga akong gusto.”
“Nasayud ko nga ang kaminyoon mao ang labing importanting desisyon nga akong himoon, ug naglantaw ako niini.”
Dapita ang mga estudyante sa pagpamalandong kon unsa ang ilang gibati mahitungod sa kaminyoon. Hangyoa sila sa pagpangita sa kamatuoran samtang ilang tun-an ang 1 Mga Taga-Corinto 11:1–16 nga makatabang kanila ug sa uban nga masabtan ang kaimportante sa kaminyoon.
Dapita ang estudyante sa pagbasa og kusog sa 1 Mga Taga-Corinto 11:3. Hangyoa ang klase sa pagsunod, nga mangita sa unsa ang gitudlo ni Pablo mahitungod sa mga responsibilidad sa usa ka bana. Tingali imong mapasabut nga dinhi niining bersikulo ang pulong nga gihubad isip “lalake” mahubad usab isip “bana” ug ang pulong nga nahubad isip “babaye” mahubad usab isip “asawa”.
Unsa ang tahas sa usa ka bana? (Mahimong gikinahanglan nimong ipasabut nga ang mga pulong “ang ulo sa babaye mao ang lalaki” nagpasabut nga ang bana adunay sagradong responsibilidad sa pagdumala diha sa panimalay. Ang pagdumala nangahulugan nga mangulo sa matarung ug mogiya sa uban diha sa espirituhanon ug temporal nga mga butang.)
Kinsa ang modumala ug mogiya sa bana samtang siya magdumala sa iyang pamilya?
I-summarize ang 1 Mga Taga-Corinto 11:4–16 pinaagi sa pagpasabut nga si Pablo mitubag sa mga pangutana mahitungod sa kustombre sa mga lalaki ug babaye kon sila mag-ampo ug managna atol sa ilang mga serbisyo sa pagsimba.
Tabangi ang mga estudyante nga masabtan nga ang tigbasa sa Bag-ong Tugon usahay masayop sa pagsabut sa pagtulun-an ni Pablo sa pasabut nga ang katungdanan sa lalaki mas importante kay sa katungdanan sa babaye o nga ang lalaki mas labaw o mas dako ang bili kay sa babaye. Basaha og kusog ang mosunod nga mga pamahayag ni Elder M. Russell Ballard sa Korum sa Napulog Duha ka mga Apostoles:
Imahe
Elder M. Russell Ballard
“Ang mga kalalakin-an ug kababayen-an patas sa mata sa Dios ug sa mata sa Simbahan, apan ang managsama dili pasabut nga parehas sila. Ang mga responsibilidad ug balaang mga gasa sa kalalakin-an ug kababayen-an molahi sa ilang kinaiyahan apan dili ang ilang kaimportante o impluwensya. Ang doktrina sa atong Simbahan nagbutang sa mga babaye nga patas apan lahi sa mga lalaki. Ang Dios dili motamud sa bisan hain nga gender isip mas maayo o mas importante kay sa uban” (“Men and Women in the Work of the Lord,” New Era, Abr. 2014, 4).
Hangyoa ang usa ka estudyante sa pagbasa og kusog sa 1 Mga Taga-Corinto 11:11. Hangyoa ang klase sa pagsunod, nga mangita sa unsa ang gitudlo ni Pablo mahitungod sa mga responsibilidad tali sa usa ka bana ug usa ka asawa.
Unsa ang gitudlo ni Pablo mahitungod sa relasyon tali sa usa ka bana ug sa asawa?
Ipasabut ang mga pulong “diha sa Ginoo.” Ipasabut nga kini nga mga pulong nagpasabut ngadto sa plano sa Ginoo aron matabangan kita nga mahimong sama Kaniya ug makaangkon og kinabuhing dayon.
Unsa nga doktrina ang gitudlo niini nga bersikulo mahitungod sa lalaki ug babaye sa plano sa Ginoo? (Gamit ang mga pulong sa estudyante, isulat ang mga kamatuoran sa pisara: Sa plano sa kaluwasan sa Ginoo, ang mga lalaki ug babaye dili mahimong makaangkon og mahangturon nga kinabuhi kon wala ang usag usa. [Tan-awa sa D&P 131:1–4.])
Aron matabangan ang mga estudyante nga masabtan ang kamatuoran nga naila sa ibabaw, ipataas ang usa ka pares sa gunting ug sugdi sa paggunting ang usa ka pirasong papel. Hangyoa ang mga estuyante sa paghunahuna nga ang duha ka bahin sa gunting nabuwag.
Unsaon man sa usa ka tawo nga molampos kon iyang sulayan sa paggunting ang usa ka pirasong papel sa katunga sa gunting? Sa unsang paagi nga sama sa gunting ang bana ug asawa sa pagtambayayong?
Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles:
Imahe
Elder David A. Bednar
“Sa balaanong tuyo, ang lalaki ug babaye gituyo nga mouswag og dungan ngadto sa pagkahingpit ug kahingpitan sa himaya. Tungod sa ilang kalainan sa mga taras ug mga kapasidad, ang mga lalaki ug babaye tagsa-tagsa nagdala ngadto sa relasyon sa kaminyoon og mga talagsaong panan-aw ug mga kasinatian. Ang lalaki ug babaye nagtampo og lahi apan parehas ngadto sa pagkausa ug panaghiusa nga dili mahimo sa laing paagi. Ang lalaki mokompleto ug mohingpit sa babaye ug ang babaye mokompleto ug mohingpit sa lalaki samtang sila nagkat-on ug naglig-on ug nagpanalangin sa usag usa” (“Ang Kaminyoon Mahinungdanon sa Iyang Mahangturong Plano,” Ensign, Hunyo 2006, 50).
Sa unsang paagi nga ang kalahi sa kinaiya ug mga responsibilidad sa lalaki ug babaye mokompleto sa usag usa diha sa pamilya?
Pahinumdumi ang mga estudyante sa lahi nga mga kinaiya mahitungod sa kaminyoon nga gihulagway diha sa mga pamahayag nga inyong mabasa sa sinugdanan sa leksyon. Dapita ang pipila ka mga estudyante sa pagpakigbahin sa ilang mga hunahuna ug mga pagpamatuod kalabut sa kaimportante sa kaminyoon sa plano sa Ginoo. Mahimo usab nimong ipakigbahin ang imong pagpamatuod.
Si Pablo nagtudlo sa mga Santos sa Corinto nga dili isayon-sayon ang pagtratar sa sakrament
Isulat ang mosunod nga mga pulong diha sa pisara: ang tinuoray nga espirituhanon nga kasinatian, usa ka pag-bag-o alang sa kalag, ang labing importante sa akong adlaw nga Igpapahulay.
Hangyoa ang mga estudyante sa pagpamalandong sa ilang labing bag-ong kasinatian sa pag-ambit sa sakrament ug aron sa pagkonsiderar kon ilaha bang gamiton ang bisan hain sa mga pulong sa pisara aron mahulagway ang ilang mga kasinatian. Hangyoa ang mga estudyante nga mangita sa mga kamatuoran samtang ilang tun-an ang 1 Mga Taga-Corinto 11:17–34 nga makatabang nila sa pag-ambit sa sakrament sa mas espirituhanon ug makahuluganon nga kasinatian.
Ipasabut nga sa panahon ni Pablo, ang mga miyembro sa Simbahan nagpadayon sa paghimo sa mahinungdanon nga katapusang panihapon. Dungan silang mangaon ug dayon moambit sa sakrament. I-summarize ang 1 Mga Taga-Corinto 11:17–22 pinaagi sa pagpasabut nga si Pablo misulat nga nadawat niya ang balita nga kon ang mga Santos sa Corinto magkatigom aron sa pag-ambit sa sakrament, adunay mga panagbangi, o panag-away, tali kanila. Gihukman ni Pablo ang mga Santos gumikan sa paghimo niining panagtigom ngadto sa naandan nga pagpangaon imbis ipabilin ang kasagrado sa sakrament.
Dapita ang usa ka estudyante sa pagbasa og kusog sa 1 Mga Taga-Corinto 11:23–26. Hangyoa ang klase sa pagsunod, nga mangita kon unsa ang giawhag ni Pablo sa mga miyembro sa Simbahan aron sa paghinumdom mahitungod sa sakrament. Mahimo nimong ipasabut nga ang pulong shew sa bersikulo 26 nagpasabut sa pagpamahayag, pagpahibalo, o pagpamatuod (tan-awa sa 1 Mga Taga-Corinto 11:26).
Pagpakita og litrato sa The Last Supper (Libro sa mga Hulagway sa Ebanghelyo [2009], nu. 54; tan-awa usab sa LDS.org).
Imahe
Ang Katapusang Panihapon
Unsa ang gipamulong ni Pablo nga gitudlo sa Manluluwas sa Iyang mga disipulo nga katuyoan samtang miambit sila sa sakrament?
Sa unsang paagi nga ang paghinumdom sa lawas ug dugo sa Manluluwas atol sa sakrament nakatabang niadtong mga miyembro sa Simbahan kinsa nanlimbasug sa pakigbatok?
Dapita ang mga estudyante sa pagbasa og kusog sa 1 Mga Taga-Corinto 11:27–30. Hangyoa ang klase sa pagsunod, nga mangita sa pasidaan nga gihatag ni Pablo sa mga Santos sa Corinto mahitungod sa sakrament.
Sumala sa bersikulo 27 ug 29, mahitungod sa unsa ang gipasidaan ni Pablo sa mga Santos sa Corinto?
Unsa nga kamatuoran ang atong makat-unan gikan niini nga mga bersikulo mahitungod sa unsay mahitabo kon moambit kita sa sakrament nga dili takus? (Ang mga estudyante mahimong mogamit og laing mga pulong, apan siguraduha nga ilang mailhan ang mosunod nga kamatuoran: Kadtong kinsa moambit sa sakrament nga dili takus naghatud og paghukom ug tunglo ngadto sa ilang kaugalingon.)
Ipasabut nga kita “wala gikinahanglan nga mahimong hingpit aron moambit sa sakrament, apan [kita] kinahanglan nga makabaton sa diwa sa kamapainubsanon ug paghinulsol diha sa [atong] kasingkasing” (Matinud-anon sa Tinuhoan: Usa ka Pakisayran sa Ebanghelyo [2004], 148). Kon miambit kita sa sakrament samtang naghimo og bug-at nga sala o uban sa dili mahinulsulon nga kasingkasing, nga walay tinguha sa paghinumdom ug pagsunod sa Manluluwas, miambit kita sa sakrament nga dili takus. Dasiga ang mga estudyante sa pag-ampo ngadto sa ilang Langitnong Amahan ug makigsulti sa ilang mga bishop (tan-awa sa 3 Nephi 18:26–29) kon aduna silay mga pangutana mahitungod sa katakus sa pag-ambit sa sakrament.
Sa imong hunahuna ngano kaha nga ang pag-ambit sa sakrament nga dili takus makadala man og tunglo sa atong mga kalag?
Sumala sa 1 Mga Taga-Corinto 11:28, unsa nga tambag ang gihatag ni Pablo ngadto sa mga miyembro sa Simbahan? (Gamit ang mga pulong sa estudyante, isulat ang mga kamatuoran sa pisara: Kinahanglan atong sutaon ang atong mga kinabuhi samtang moambit kita sa sakrament.)
Ipasabut nga ang katuyoan sa pagsuta sa atong mga kinabuhi dili lang mao ang pagkonsiderar kon takus ba kita nga moambit apan ikonsiderar usab kon unsa kita ka maayo nga naghupot sa atong mga pakigsaad uban sa Ginoo ug sa unsang paagi nga kita mahimong nagtinguha sa paghinulsol ug kalamboan.
Dapita ang usa ka estudyante sa pagbasa og kusog sa mosunod nga pamahayag ni Presidente Huward W. Hunter:
Imahe
Presidente Howard W. Hunter
“Gipangutana nako ang akong kaugalingon niini: ‘Ako bang giuna ang Dios labaw sa tanang butang ug naghupot sa tanan Niya nga mga kasuguan?’ Dayon miabut ang pagpamalandong ug kasulbaran. Ang paghimo og pakigsaad ngadto sa Ginoo nga kanunayng maghupot sa Iyang mga sugo usa ka seryuso nga obligasyon, ug ang pagbag-o niana nga pakigsaad pinaagi sa pag-ambit sa sakrament ingon usab ka seryuso. Ang sagrado nga mga higayon sa paghunahuna samtang gidalit ang sakrament importante kaayo. Mao kini ang mga higayon sa pagsusi sa kaugalingon, pagpamalandong, pagsabut sa kaugalingon—usa ka panahon sa pagpamalandong ug sa pagsulbad” (“Thoughts on the Sacrament,” Ensign, Mayo 1977, 25).
Aron sa pagtabang sa mga estudyante sa pagkonsiderar kon unsaon nila paggamit ang kamatuoran nga ilang nakita sa 1 Mga Taga-Corinto 11:28, dapita sila sa paghunahuna og mga pangutana nga ilang gikonsiderar samtang mangandam sila sa pag-ambit sa sakrament. Sama pananglit, mangutana sila, “Sa unsang paagi nga mahimo ako nga mas maayong disipulo ni Jesukristo?” Hangyoa ang mga estudyante sa pagpakigbahin sa ubang mga pangutana nga mahimo nilang ipangutana sa ilang kaugalingon. Mahimo usab nimong isugyot ang pipila ka mga pangutana sa imong kaugalingon. Dapita ang mga estudyante sa paglista diha sa ilang mga class notebook o scripture study journals sa mga pangutana nga ilang ikapangutana sa ilang mga kaugalingon atol sa sakrament samtang sila nagsuta sa ilang katakus.
Ipamatuod nga samtang ang mga estudyante magsuta sa ilang katakus sa dili pa ug atol sa pag-ambit sa sakrament, ang Ginoo makatabang kanila nga masayran kon sa unsang paagi nga mas maayo nilang matuman ang ilang mga pakigsaad ug mokwalipay sa pagdawat sa mga panalangin nga Iyang gitinguha nga ihatag ngadto kanila. Kini nga mga panalangin naglakip sa pagkalimpyo gikan sa ilang mga sala ug pagdawat sa usa ka mas dakong kantidad sa gahum sa Espiritu Santo sa ilang mga kinabuhi. Dapita ang mga estudyante sa paghimo og tumong kalabut sa unsang paagi nga sila mas maandam alang sa ilang sunod nga oportunidad sa pag-ambit sa sakrament.
I-summarize ang 1 Mga Taga-Corinto 11:33–34 pinaagi sa pagpasabut nga si Pablo mihatag og dugang nga direksyon ngadto sa mga Santos sa Corinto kabahin sa ilang kalan-on nga inubanan sa pagpangalagad sa sakrament.
Tapusa ang leksyon pinaagi sa pagpamatuod sa mga kamatuoran nga nailhan sa 1 Mga Taga-Corinto 11.
Komentaryo ug Background nga Impormasyon
1 MgaTaga-Corinto 11:11. “Hinoon diha sa Ginoo ang babaye dili gawas sa lalaki ni ang lalaki gawas sa babaye”
Si Elder M. Russell Ballard sa Korum sa Napulog Duha ka mga Apostoles mipasabut nga ang mga lalaki ug mga babaye patas apan managlahi sa katungdanan:
“Sa plano sa atong Langitnong Amahan nga naghatag og gahum sa priesthood, ang kalalakin-an dunay talagsaong responsibilidad sa pagpangalagad sa priesthood, apan dili sila ang priesthood. Ang kalalakin-an ug kababayen-an dunay lainlain apan parehas nga bililhong tahas. Ingon nga ang babaye dili magsabak kon wala ang lalaki, ang lalaki dili hingpit nga makagamit sa gahum sa priesthood sa pagtukod og mahangturong pamilya kon wala ang babaye. … Sa mahangturong panglantaw, ang gahum sa pagpasanay ug ang gahum sa priesthood pagaambitan sa bana ug asawa” (“Kini Ang Akong Buhat ug Himaya,” Ensign o Liahona, Mayo 2013, 18).
“Ang Pamilya: Usa ka Pamahayag ngadto sa Kalibutan” naglatid sa mga responsibilidad nga hinatag sa Dios sa mga bana ug asawa:
“Pinaagi sa balaan nga plano, ang mga amahan mao ang mangulo sa ilang mga pamilya diha sa gugma ug sa pagkamatarung ug may kapangakohan sa pagsangkap sa mga kinahanglanon sa kinabuhi ug sa pagpanalipod sa ilang mga pamilya. Ang unang mga kapangakohan sa mga inahan mao ang pag-atiman sa ilang mga anak. Niining sagrado nga mga kapangakohan, ang mga amahan ug mga inahan adunay katungdanan sa pagtabang sa usag usa ingon nga magkauban” (“Ang Pamilya: Usa ka Pamahayag ngadto sa Kalibutan,” Ensign, Nob. 2010, 129).
Si Presidente Howard W. Hunter mitudlo sa importanteng leksyon kalabut sa pagpakigbahin sa responsibilidad sa lalaki ug babaye sa pagdumala sa pamilya:
“Ang usa ka lalaki kinsa naghupot sa priesthood modawat sa iyang asawa isip kauban sa pagpangulo sa panimalay ug pamilya nga may hingpit nga kahibalo ug hingpit nga pag-apil sa tanan nga mga desisyon kalabut ngadto niana. Gikinahanglan gayud nga aduna diha sa Simbahan ug sa panimalay ang usa ka opisyal nga tigdumala (tan-awa sa D&P 107:21). Pinaagi sa balaang pagtudlo, ang responsibilidad sa pagmando diha sa panimalay nahimutang diha sa tighupot sa priesthood (tan-awa sa Moises 4:22). Gituyo sa Ginoo nga ang asawa mahimong kaabag alang sa lalaki (kaabag nagpasabut nga managsama)—nga mao, usa ka kauban nga managsama ug gikinahanglan diha sa hingpit nga panag-uban. Ang pagdumala diha sa pagkamatarung nagkinahanglan sa gipakigbahin nga responsibilidad tali sa bana ug sa asawa; mag-uban kamong maglihok nga may kahibalo ug pagduyog sa tanang may kalabutan sa pamilya. Aron makalihok ang usa ka tawo nga dili nag-agad o walay pagptamud ngadto sa mga pagbati ug pagtambag sa iyang asawa sa pagdumala sa pamilya mao ang paggamit sa dili matarung nga kamandoan” (“Being a Righteous Husband and Father,” Ensign, Nob. 1994, 50–51.)
Si Presidente Spencer W. Kimball mitudlo nga “kon kita wala magsunod sa mga sugo, kon anaa kita sa pagpakasala, kon aduna kitay mga kasuko ug mga kasilag, ug mga kapait, kinahanglan gayud nga ikonsiderar pag-ayo kon kinahanglan ta nga moambit sa sakrament” (The Teachings of Spencer W. Kimball, ed. Edward L. Kimball [1982], 225).
Si Elder John H. Groberg sa Seventy mipasabut nga ang atong mga kinaiya mao ang mahinungdanon nga kasangkapan sa atong katakus sa pag-ambit sa sakrament:
“Kon nagtinguha kita nga molambo (nga mao ang paghinulsol) ug dili ubos sa restriksyon sa priesthood, niana, sa akong hunahuna, kita takus. Kon, hinoon, wala kitay tinguha sa paglambo, kon wala kitay tumong sa pagsunod sa giya sa Espiritu, kinahanglan kita nga mangayo: Takus ba kita nga moambit, o naghimo lang kita og usa ka pagyama-yama sa labing katuyoan sa sakrament, diin mao ang buhat isip usa ka pagpasiugda sa personal nga paghinulsol ug kalamboan? Kon atong hinumduman ang Manluluwas ug ang tanan niyang nabuhat ug buhaton pa alang kanato, atong palamboon ang atong mga lihok ug mao nga maduol kita ngadto niya, nga magbutang kanato sa dalan padulong sa kinabuhing dayon.
“Kon, hinoon, kita modumili sa paghinulsol ug sa paglambo, kon kita dili mohinumdom kaniya ug mosunod sa iyang mga sugo, niana kita mihunong sa atong paglambo, ug kana mao ang kaalautan sa atong mga kalag” (“The Beauty and Importance of the Sacrament,” Ensign, Mayo 1989, 38).
Ang sakrament mao ang usa ka sagrado nga ordinansa nga dili gayud mahimong sayon-sayonon sa pagtratar. Si Elder Dallin H. Oaks sa Korum sa Napulog Duha ka mga Apostoles, mipasabut nga “ang ordinansa sa sakrament makapahimo sa miting sa sakrament nga labing sagrado ug importanting miting sa Simbahan” (“Ang Miting sa Sakrament ug ang Sakrament,” Ensign o Liahona, Nob. 2008, 17).
Si Presidente Russell M. Nelson sa Korum sa Napulog Duha ka mga Apostoles namahayag nga ang sakrament “mao ang labing importante sa atong pagsunod sa adlawng Igpapahulay” (“Worshiping at Sacrament Meeting,” Ensign, Ago 2004, 26).
Si Elder Melvin J. Ballard sa Korum sa Napulog Duha ka mga Apostoles mitudlo nga ang regular nga pag-ambit sa sakrament makahatag nato og espirituhanon nga kahilwasan:
“Gusto namo nga ang matag miyembro moduol sa lamesa sa sakrament tungod kay dapit kini alang sa pag-imbistiga sa kaugalingon, pagsusi sa kaugalingon, diin kita makakat-on sa paghusto sa atong dalan ug sa paghusto sa atong kinabuhi, pagdala sa atong kaugalingon nga uyon sa mga pagtulun-an sa Simbahan ug sa atong mga kaigsoonan. Mao kini ang dapit diin mahimo kitang maghuhukom sa atong kaugalingon. …
“… Usa ka butang nga makapahimo sa kada lalaki ug babaye nga luwas mao ang pagtungha diha sa lamesa sa sakrament sa kada adlawng Igpapahulay. Dili kaayo kita mahilayo sulod sa usa ka semana—dili ingon kalayo nga, pinaagi sa proseso sa pag-imbistigar sa kaugalingon, atong mahusto ang mga sayop nga atong nabuhat. … Ang dalan ngadto sa lamesa sa sakrament mao ang agianan sa kahilwasan alang sa mga Santos sa Ulahing mga Adlaw” (Bryant S. Hinckley, Sermons and Missionary Services of Melvin Joseph Ballard [1949], 150–51).
