Lucas 6:1–7:18

(Pahinumdom: Kadaghanan sa sulod sa Lucas 6 gihisgutan na sa mga leksyon alang sa Mateo 5–7; 10:1–4; ug sa Marcos 3:1–6. Kini nga bahin sa leksyon motutok sa Lucas 6:31–38.)

Hangyoa ang mga estudyante sa paghunahuna nga sa ilang pagsimba sa Dominggo sila nakadungog sa pahibalo mahitungod sa usa ka proyekto sa pagserbisyo sa pamilya nga nagpuyo sa duol. Human gihimo ang pahibalo, nakadungog sila og upat ka lain-laing mga reaksyon. Pagdapit og upat ka estudyante sa pagbasa og kusog sa mosunod nga gihimo-himo nga mga reaksyon:

1. “Daghan og giagian kanang pamilyaha karong panahona. Malipay ko nga motabang sa bisan unsang paagi nga akong mahimo.”

2. “Maayo unta nga naay meryenda pagkahuman, tungod kay kon wala, dili ko moadto.”

3. “Dili gyud ko ganahang moadto, apan magkinahanglan ko og tabang sa sunod semana sa usa ka proyekto nga ako ang nag-organisar, mao nga angay tingali nga motabang ko karon.”

4. “Kon moadto ang akong higala, moadto pud ko.”

• Unsa ang gisugyot niini nga mga ehemplo kabahin sa mga rason nganong ang mga tawo usahay moserbisyo?

Hangyoa ang mga estudyante sa pagkonsiderar sa mga oportunidad nga sila kinahanglang moserbisyo ug unsay ilang gibati mahitungod sa pagserbisyo. Dapita sila sa pagpangita og mga baruganan samtang sila nagtuon sa Lucas 6–7 nga makatabang kanila sa pagserbisyo sa mas makahuluganong mga paagi.

I-summarize ang Lucas 6 pinaagi sa pagpasabut nga samtang si Jesus anaa sa Galilea sa sayo nga bahin sa Iyang pangalagad, Iyang giayo sa Igpapahulay ang mikuyos nga kamot sa usa ka tawo, migahin og usa ka gabii sa pag-ampo, ug mitawag sa Napulog Duha ka mga Apostoles. Si Jesus dayon misugod sa pagtudlo kanila ug sa “hilabihan kadaghang mga tawo” (bersikulo 17) kon unsaon sa pagdawat sa langitnong mga ganti.

Ipabasa sa mga estudyante ang Lucas 6:19 sa hilum nga paagi, nga mangita kon unsay gibuhat ni Jesus alang sa mga tawo sa wala pa Siya motudlo kanila. Hangyoa ang mga estudyante nga moreport sa unsay ilang nakat-unan.

Dapita ang pipila ka estudyante nga magpuli-puli sa pagbasa og kusog gikan sa Lucas 6:31–35. Hangyoa ang klase sa pagsunod, nga mangita sa tambag nga gihatag ni Jesus ngadto sa Iyang mga disipulo.

• Unsa nga tambag ang gihatag ni Jesus sa Iyang mga disipulo?

• Sumala sa bersikulo 35, unsay atong lauman agi og balos sa pagbuhat og maayo ngadto sa uban? (Mahimo nimong pamarkahan sa mga estudyante ang mga pulong nga “sa walay pagpaabot og bisan unsa.”)

• Unsa nga temporal nga mga ganti ang tingali lauman sa mga tawo kon sila moserbisyo?

• Kon kita mobuhat og maayo ngadto sa uban nga dili magpaabut og bisan unsa nga balos, unsa ang gisaad sa Ginoo nga mahitabo? (Ang mga estudyante kinahanglang moila og baruganan sama sa mosunod: Kon kita mobuhat og maayo ngadto sa uban nga dili magpaabut og bisan unsa nga balos, dako ang atong ganti ug mamahimo kitang mga anak sa Labing Halangdon.)

Ipasabut nga bisan og kitang tanan mga anak sa Dios, kadtong nagbuhat og maayo ngadto sa uban nagtuman sa ilang balaan nga potensyal pinaagi sa pagkahimong sama sa Langitnong Amahan.

• Ngano nga kini nga saad mao ang labing maayo nga ganti alang sa paghigugma ug pagbuhat og maayo ngadto sa uban?

Ipabasa og kusog sa usa ka estudyante ang Lucas 6:36–38. Hangyoa ang klase sa pagsunod, nga mangita og mga ehemplo nga gihatag ni Jesus sa mga paagi nga kita makabuhat og maayo ngadto sa uban.

• Sumala sa mga bersikulo 36–37, unsa nga mga ehemplo ang gihatag ni Jesus sa mga paagi nga kita makabuhat og maayo ngadto sa uban. (Mahimo nimong ipasabut nga kadtong nagbuhat og maayo niining mga paagiha makadawat og kalooy ug pagpasaylo sa Dios.)

Aron sa pagtabang sa mga estudyante nga makasabut sa bersikulo 38, pagdala sa klase og usa ka baldi, basket, o kahon ug uban pang mga butang, sama sa sinina, pagkaon, ug mga binotelyang tubig. Siguroha nga modala og mas daghan nga mga butang kay sa masulod sa sudlanan nga imong gidala. Pagdapit og usa ka estudyante sa pag-adto sa atubangan sa klase, ug hangyoa siya nga isulod sa sudlanan ang labing daghang butang nga iyang mahimo. Kon mahuman na ang estudyante, pangutan-a siya:

• Sa unsang paagi ang mga pulong nga “takus nga pinaugdo, dinasok, ug tinantan, ug magaawas” (bersikulo 38) naghulagway sa imong mga paningkamot sa pagpuno niini nga sudlanan? (Pasalamati ang estudyante, ug dapita siya sa paglingkod.)

• Sa unsang paagi kini nga mga pulong naghulagway sa paagi nga ang Langitnong Amahan moganti kanato samtang kita mohatag ngadto sa uban? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga kamatuoran: Samtang abunda kita nga mohatag ngadto sa uban, ang Langitnong Amahan mas abunda nga mopanalangin kanato.)

• Sa unsang mga paagi nga abunda kita nga mohatag ngadto sa uban?

Dapita ang mga estudyante sa pagpamalandong og usa ka panahon sa dihang sila o usa ka tawo nga ilang kaila abunda nga mihatag ngadto sa uban. Ipakita ang mosunod nga mga pangutana (o hatagi ang mga estudyante og mga kopya niini), ug dapita ang mga estudyante sa pagtubag niini diha sa ilang mga notebook sa klase o scripture study journal (o diha sa handout nga imong gihatag):

• Sa unsang paagi nga kamo o ang inyong kaila napanalanginan sa Ginoo tungod sa abunda nga paghatag?

• Unsa man ang inyong buhaton aron mahimong mas manggihatagon ngadto sa uban?

Human sa igo nga panahon, ikonsiderar ang pagdapit sa bisan kinsa nga mga estudyante kinsa andam nga mopakigbahin kon unsay ilang gisulat. Awhaga ang mga estudyante sa pag-ampo alang sa panabang sa Ginoo samtang sila maningkamot nga mas manggihatagon ngadto sa uban.

Ipasabut nga human sa pagtudlo sa pundok sa mga katawhan, si Jesus misulod sa usa ka lungsod nga gitawag og Capernaum.

Dapita ang pipila ka estudyante nga magpuli-puli sa pagbasa og kusog gikan sa Lucas 7:2–5. Hangyoa ang klase sa pagsunod, nga mangita kon kinsa ang nagtinguha sa tabang ni Jesus human makadungog nga misulod Siya sa lungsod.

• Kinsay nagtinguha sa tabang ni Jesus?

Ipasabut nga ang kapitan usa ka opisyal sa kasundalohang Romano nga nagdumala og mga 50 hangtud sa 100 ka mga tawo.

• Unsay naghasol sa kapitan?

Ipasabut nga ang mga Judeo sa kasagaran dili ganahan sa mga kapitan tungod kay sila nagrepresentar sa politikanhon ug militar nga gahum sa mga Romano batok sa mga Judeo ug sa ilang yuta (tan-awa sa New Testament Student Manual [manwal sa Church Educational System, 2014], 153).

• Unsang klaseha sa tawo kini nga kapitan?

Dapita ang usa ka estudyante sa pagbasa og kusog sa Lucas 7:6–8. Hangyoa ang klase sa pagsunod, nga mangita kon giunsa pagpakita sa kapitan og dakong pagtuo kang Jesukristo.

• Giunsa sa kapitan pagpakita sa iyang dakong pagtuo kang Jesukristo?

Hangyoa ang usa ka estudyante sa pagbasa og kusog sa Lucas 7:9–10. Dapita ang klase sa pagsunod, nga mangita kon sa unsang paagi ang pagtuo niini nga kapitan gigantihan. Hangyoa ang mga estudyante nga moreport sa unsay ilang nakat-unan.

• Unsa nga mga baruganan ang atong makat-unan gikan niini nga istorya? (Ang mga estudyante mahimong moila og pipila ka mga baruganan, lakip ang mosunod: Pinaagi sa paggamit og hugot nga pagtuo diha ni Jesukristo, kita makatabang sa pagdala og mga panalangin ngadto sa mga kinabuhi sa uban.)

Ipasabut nga sa adlaw human ang Manluluwas miayo sa ulipon sa kapitan, mibuhat Siya og laing milagro.

Dapita ang usa ka estudyante sa pagbasa og kusog sa Lucas 7:11–12. Hangyoa ang klase sa pagsunod, nga mangita kon unsa ang nasugatan ni Jesus ug sa Iyang mga disipulo samtang nagkadauol sila sa siyudad nga gitawag og Nain.

• Unsa ang nakita ni Jesus ug sa Iyang mga disipulo samtang sila nagkaduol sa ganghaan sa dakbayan?

• Sumala sa bersikulo 12, nganong ang kamatayon niining batan-ong lalaki labing masulub-on alang niini nga babaye?

Ipasabut nga wala lamang namatyan sa iyang bugtong anak kini nga babaye, apan una na usab siyang namatyan sa iyang bana. Agig dugang sa dako nga kasubo nga siguradong iyang gibati, tingali wala nay tawo nga mosuporta kaniya sa pinansyal.

Hangyoa ang usa ka estudyante sa pagbasa og kusog sa Lucas 7:13–15, o ipasalida ang nahibilin sa video (0:45–2:23). Dapita ang klase sa pagpangita kon unsay gibuhat sa Manluluwas sa dihang Iyang nakita kini nga babaye nga nagbangutan. (Mahimo nimong ipasabut nga ang bier usa ka lungon o patunganan sa lungon.)

• Unsay gihimo sa Manluluwas alang niini nga babaye?

• Sumala sa bersikulo 13, nganong giayo man ni Jesus ang anak niini nga babaye? (Mahimo nimong ipasabut nga ang biyuda wala mohangyo Kaniya sa pag-ayo sa iyang anak nga lalaki apan Siya nakabantay sa iyang panginahanglan ug dayon mitabang nga matubag kini.)

• Unsa kaha ang inyong bation kon kamo ang anaa sa sitwasyon niini nga biyuda ug nakita ang Manluluwas nga mibuhi sa imong bugtong nga anak nga lalaki gikan sa patay?

• Unsa nga kamatuoran ang atong makat-unan gikan niini nga istorya mahitungod kon sa unsang paagi kita makasunod sa ehemplo ni Jesukristo? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Kita makasunod sa ehemplo ni Jesukristo pinaagi sa pagpakita og kalooy ngadto sa uban ug sa pagpangalagad sa ilang gihilum nga mga panginahanglan.)

• Sa unsang paagi kita makabantay sa mga panginahanglan sa uban kon wala nila kini gipakigbahin kanato?

Ipasabut nga samtang ang mga estudyante magtinguha sa pagpakig-uban sa Espiritu Santo, sila makadawat og mga pagdasig kon unsaon sa pagtubag sa nakatago nga mga panginahanglan sa uban. Dugang pa, ang mga estudyante mahimong mamalandong sa tambag nga nadawat ni Presidente Henry B. Eyring sa Unang Kapangulohan: “Kon kamo makahimamat og tawo, tagda sila ingon nga sila anaa sa grabeng kakuyaw, ug kamo mahimong husto sobra katunga sa tanang higayon” (“In the Strength of the Lord,” Ensign o Liahona, Mayo 2004, 16).

Aron sa pagtabang sa mga estudyante nga mobati sa kamatuoran ug kaimportante sa baruganan nga ilang nailhan, dapita ang usa ka estudyante sa pagbasa og kusog sa mosunod nga pamahayag ni Presidente Thomas S. Monson:

Imahe

Presidente Thomas S. Monson

“Pipila lang ka mga istorya sa pagpangalagad sa Manluluwas ang nakatandog nako nga labaw pa kay sa Iyang ehemplo sa kalooy nga gipakita ngadto sa nagsubo nga biyuda sa Nain. …

“Katalagsaon nga gahum, katalagsaon nga kalumo, katalagsaon nga kalooy ang gipakita sa atong Agalon! Kita usab, makapanalangin kon buhaton lamang nato ang pagsunod sa dungganon Niyang ehemplo. Ang mga oportunidad anaa bisan asa. Ang gikinahanglan mao ang mga mata nga makakita sa masulub-on nga panaw ug dalunggan nga makadungog sa hinay nga mga pangamuyo sa usa ka nasakitan nga kasingkasing. Oo, ug ang kalag nga puno sa kamanggiloy-on nga unta kita makapasabut dili lamang mata sa mata o sa tingog sa dalunggan, apan sa talagsaong estilo sa Manluluwas, gani kasingkasing ngadto sa kasingkasing” (“Meeting Life’s Challenges,” Ensign, Nob. 1993, 71).

• Kanus-a kamo o ang inyong pamilya nakadawat og kalooy o serbisyo gikan sa uban, bisan kon kamo wala mohangyo niini?

• Sa unsang paagi ang pagsunod sa ehemplo ni Kristo makatabang kanato nga mapalambo ang abilidad sa pag-ila sa nakatago nga mga panginahanglan sa uban?

Kon wala nimo gipakita ang video, dapita ang usa ka estudyante sa pagbasa og kusog sa Lucas 7:16–17. Hangyoa ang klase sa pagsunod, nga mangita kon unsa ang reaksyon sa mga tawo sa milagro nga nabuhi ang anak sa biyuda.

• Unsay reaksyon sa katawhan human gibuhi ni Jesus ang anak sa biyuda?

Ipasabut nga ang mga katawhan tingali mipahayag nga “usa ka dakong propeta nahitungha sa atong kinataliwad-an” (bersikulo 16) tungod sa mga pagkasusama tali sa pag-ayo sa anak sa biyuda sa Nain ug sa mga higayon dihang ang mga propeta sa Daang Tugon nga sila Elias ug Eliseo mipabuhi sa mga anak nga lalaki gikan sa patay (tan-awa sa 1 Mga Hari 17:17–24; 2 Mga Hari 4:17–22, 32–37; New Testament Student Manual,154).

Tapusa pinaagi sa pagdapit sa mga estudyante sa pagpangita og mga oportunidad sa pagtubag sa nakatago nga mga panginahanglan sa uban. Awhaga sila nga manggihatagong moserbisyo ug dili maghunahuna og balus.