Materyal sa Pagpangandam alang sa Magtutudlo sa Home-Study
Summary sa mga Leksyon sa Daily Home-Study
Ang mosunod nga mga summary sa panghitabo, mga doktrina, ug mga baruganan nga nakat-unan sa mga estudyante dihang gitun-an nila ang Juan 7-10 (unit 14) dili tuyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.
Gikan sa mga pagtulun-an ni Jesus didto sa Jerusalem atol sa Fiesta sa mga mga Payag [Tabernacles], nakat-unan sa mga estudyante nga kon buhaton nato ang kabubut-on sa Amahan, niana makadawat kita og pagpamatuod sa Iyang doktrina. Nahibaloan usab nila ang baruganan nga kon moduol kita kang Jesukristo ug motuo Kaniya, niana mapuno kita sa Espiritu Santo.
Gikan sa istorya bahin sa babaye nga naabtan nga nanapaw, nakat-unan sa mga estudyante nga ang pag-ila sa kaugalingon natong mga imperpeksyon makatabang nga kita malikay sa pagpanghukom sa uban ug nga ang Manluluwas mopakita kanato og kalooy pinaagi sa paghatag nato og mga oportunidad sa paghinulsol. Dayon nakat-unan sa mga estudyante nga si Jesukristo mao ang Kahayag sa Kalibutan ug kon sundon nato ang Manluluwas, atong malikayan ang espirituhanong kangitngit ug mapuno kita sa Iyang kahayag. Nakat-unan usab nila ang mosunod nga mga baruganan: Samtang nagkat-on kita bahin ni Jesukristo, makabaton kita og pagpamatuod bahin sa Amahan. Kon magpadayon kita sa pagsunod sa pulong ni Jesukristo, niana kita mamahimong Iya nga mga disipulo ug mahibalo sa kamatuoran, nga maghimo natong gawasnon. Kon kita makasala ug dili maghinulsol, niana mamahimo kitang mga alagad sa sala. Si Jesukristo mao si Jehova, ang Dios sa Daang Tugon.
Sa Juan 9 gibasa sa mga estudyante ang mahitungod ni Jesus nga miayo og tawo nga gipakatawo nga buta. Gikan niini nga istorya ilang nakat-unan ang mosunod nga mga kamatuoran: Mahimong gamiton sa Dios ang atong mga kalisdanan aron ikapakita ang Iyang mga buhat ug gahum. Kon magpabilin kitang matinuoron sa unsay atong nahibaloan bisan sa oposisyon, ang atong mga pagpamatuod malig-on. Samtang gamiton nato ang atong pagtuo kang Jesukristo, ang atong espirituhanong panan-aw ug panabut magkatin-aw.
Niini nga leksyon nakat-unan sa mga estudyante nga isip Maayong Magbalantay sa karnero, si Jesukristo nakaila sa matag usa kanato ug mihalad sa Iyang kinabuhi sa pagpakamatay alang kanato. Isip literal nga Anak sa Dios, si Jesukristo dunay gahum sa paghalad sa Iyang kinabuhi sa pagpakamatay ug sa pagbuhi niini og balik. Nahibaloan usab sa mga estudyante ang baruganan nga kon kita makaila sa tingog sa Maayong Magbalantay ug mosunod Kaniya, Siya mogiya kanato ngadto sa kinabuhing dayon.
Pasiuna
Samtang ang Manluluwas didto sa Jerusalem alang sa Fiesta sa mga Payag, ang pipila ka mga escriba nagdala og usa ka babaye ngadto Kaniya kinsa sad-an sa pagpanapaw, ug sila nangutana kon siya ila bang batoon. Iyang gipakyas ang mga tigpasangil ug mipakita og kalooy ngadto sa babaye.
Ang babaye nga naabtan nga nanapaw gidala ngadto sa Manluluwas
Dapita ang mga estudyante sa paghunahuna og mga panahon dihang nakasugat sila o nakipag-uban sila og mga tawo kansang panagway o kinaiya wala mahiuyon sa mga sumbanan sa Ginoo.
Unsa nga mga hagit ang tingali atong sagubangon kon kauban kita sa uban kansang panagway o kinaiya wala mahiuyon sa mga sumbanan sa Ginoo? (Mahimong motubag ang mga estudyante nga tingali og tintalon kita nga hukman ang ingon niana nga tawo sa dili matarung nga paagi o dili sila matratar og tarung.)
Isulat sa pisara ang mosunod nga pangutana:
Unsa ang angay natong buhaton sa mga sitwasyon kon kauban ta sa uban kansang panagway o kinaiya wala mahiuyon sa mga sumbanan sa Ginoo?
Awhaga ang mga estudyante nga mangita sa mga kamatuoran samtang magtuon sila sa Juan 8:1–11 nga makatabang sa pagtubag niini nga pangutana.
Ipasabut nga human sa Fiesta sa mga Payag, nagpabilin si Jesukristo sa Jerusalem sa mubo nga panahon ug nanudlo sa mga tawo didto sa templo (tan-awa sa Juan 8:1–2).
Dapita ang usa ka estudyante sa pagbasa og kusog sa Juan 8:3–6 . Hangyoa ang klase sa pagsunod, nga mangita kon unsay nahitabo dihang gitudloan ni Jesus ang mga tawo.
Unsa ang nahitabo dihang gitudloan ni Jesus ang mga tawo?
Unsa ang pangutana sa mga escriba ug mga Pariseo sa Manluluwas?
Sumala sa bersikulo 6, unsa ang tuyo sa mga escriba ug sa mga Pariseo? (Tinguha nila nga dauton si Jesus atubangan sa mga tawo ug nangitag kalig-unan aron maakusahan Siya tungod kay gusto silang makakuha og ikapasangil nga madakop Siya ug mahukman Siya sa kamatayon [tan-awa sa Juan 7:1, 32].)
Ipasabut nga kon moingon si Jesus nga batoon ang babaye, nagpasiugda Siya og usa ka silot nga wala magustohi sa mga Judeo ug gidili sa pamalaod sa Romano. Kon moingon si Jesus nga dili batoon ang babaye, akusahan Siya nga nagbaliwala sa balaod ni Moises o wala motahud sa giuyunan nga mga naandang buhat. (Tan-awa sa Bruce R. McConkie, Doctrinal New Testament Commentary, 3 vols. [1965–73], 1:450–51.)
Dapita ang usa ka estudyante sa pagbasa og kusog sa Juan 8:7–8 . Hangyoa ang klase sa pagsunod, nga mangita sa unsang paagi mitubag ang Manluluwas.
Sa inyong hunahuna unsa kaha ang gusto sa Manluluwas nga masayran sa mga tawo dihang miingon Siya, “Kinsa kaninyo ang walay sala maoy paunahag labay kaniyag bato”? (Juan 8:7).
Dapita ang usa ka estudyante sa pagbasa og kusog sa Juan 8:9 . Hangyoa ang klase sa pagsunod, nga mangita kon unsay nahitabo dihang ang mga Pariseo ug mga escriba mikonsiderar sa gipahayag sa Manluluwas.
Sa inyong hunahuna unsa ang ipasabut sa mga pulong nga “gikonbikto sa kaugalingon nilang mga tanlag”?
Unsa man ang giangkon niining mga tawhana dihang gipili nila nga manglakaw palayo?
Unsa nga kamatuoran ang atong makat-unan gikan niini nga istorya kon unsaon nga malikay ta nga makapanghukom sa uban? (Ang mga estudyante mahimong mogamit og lain-laing mga pulong, apan siguroha nga ilang mahibaloan ang mosunod nga baruganan: Ang pag-ila sa kaugalingon natong mga imperpeksyon makatabang nga malikay ta nga makapanghukom sa uban. Isulat sa pisara kini nga baruganan ubos sa pangutana.)
Sa inyong hunahuna sa unsang paagi ang pag-ila sa kaugalingon natong mga imperpeksyon makatabang nato nga malikay nga makapanghukom sa uban?
Pahinumdumi ang mga estudyante nga kining babayhana sad-an sa pagpanapaw, nga usa ka labihan ka seryuso nga sala (tan-awa sa Alma 39:3–5).
Sa inyong hunahuna unsa kaha ang mga gibati niining babayhana dihang ang iyang sala gibandilyo ngadto ni Jesus ug atubangan sa daghang tawo?
Dapita ang usa ka estudyante sa pagbasa og kusog sa Juan 8:10–11 . Hangyoa ang klase sa pagsunod, nga mangita sa unsang paagi gitubag sa Manluluwas kini nga babaye.
Sa unsang paagi ang Manluluwas mipakita sa gugma ug kalooy niini nga babaye?
Unsa nga instruksyon ang gihatag sa Manluluwas ngadto sa babaye?
Aron matabangan ang mga estudyante nga makasabut nga ang Manluluwas wala mobaliwala sa sala niini nga babaye, dapita ang usa ka estudyante sa pagbasa og kusog sa mosunod nga pamahayag ni Presidente Spencer W. Kimball:
Imahe
Presidente Spencer W. Kimball
“Ang iyang sugo ngadto kaniya mao, ‘Lumakaw ka ug ayaw na pagpakasala.’ Gitudloan niya ang babayeng makasasala sa paglakaw, pagbiya sa dautan niyang kinabuhi, sa dili na pagpakasala, sa pag-usab sa iyang kinabuhi. Miingon Siya, Lakaw, babaye, ug sugdi ang imong paghinulsol; ug ang buot niyang ipasabut kaniya mao ang pagsugod sa proseso—sa pagbiya sa iyang mga sala” (The Miracle of Forgiveness [1969], 165).
Unsa nga kamatuoran ang atong makat-unan mahitungod sa Manluluwas gikan sa Juan 8:10–11? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga kamatuoran: Ang Manluluwas mipakita kanato sa kalooy pinaagi sa paghatag kanato og oportunidad nga makahinusol. Isulat sa pisara kini nga kamatuoran ubos sa pangutana.)
Sa unsang paagi nga ang pagsabut niini nga kamatuoran makatabang nato kon kita makasala?
Sa unsang paagi ang duha ka kamatuoran nga atong nahibaloan makatabang sa atong pag-atubang sa mga sitwasyon kon kauban ta sa uban kansang panagway o kinaiya wala mahiuyon sa mga sugo ug sumbanan sa Ginoo?
Ipakigbahin ang mosunod nga gipangdugang diha dapit sa katapusan sa Juan 8:11 gikan sa Joseph Smith Translation: “Ug gihimaya sa babaye ang Dios sukad niana, ug mituo sa iyang ngalan” (Joseph Smith Translation, Juan 8:11).
Sumala sa Joseph Smith Translation sa Juan 8:11, unsay epekto sa kalooy sa Manluluwas diha niana nga babaye?
Dapita ang mga estudyante nga isulat diha sa ilang mga class notebook o mga scripture study journal ang ilang mga pagbati para sa Manluluwas tungod sa Iyang kaandam nga mopakita og kalooy ug paghatag og oportunidad nga makahinulsol. Mahimo nimong hatagan og panahon ang mga estudyante nga mopakigbahin sa unsay ilang gisulat. Ikonsiderar usab ang pagpakigbahin sa imong pagpamatuod sa mga baruganan nga nahibaloan sa klase karon.
Awhaga ang mga estudyante sa pagpangita sa mga tubag sa mosunod nga mga pangutana samtang magtuon sila sa Juan 11–15. Unsa kaha ang pagbati nga makakita og tawo nga gibuhi gikan sa pagkamatay? Nganong girekord man sa kasulatan nga “si Jesus mihilak” (Juan 11:35)? Unsa ang gihimo ni Jesus para sa Iyang mga Apostoles nga kasagarang buhaton sa mga sulugoon? Unsa ang gisaad sa Manluluwas sa Iyang mga disipulo nga ilang madawat aron mohupay kanila human siya mobiya?