Materyal sa Pagpangandam alang sa Home-Study Teacher
Summary sa mga Leksyon sa Daily Home-Study
Ang mosunod nga summary sa mga panghitabo, mga doktrina, ug mga baruganan nga nakat-unan sa imong mga estudyante dihang gitun-an nila ang Santiago 2–1 Pedro 5 (unit 29) dili tuyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.
Gikan sa mga pagtulun-an ni Santiago niini nga mga kapitulo, ang mga estudyante nakat-on nga ang matinud-anon nga mga disipulo ni Jesukristo naghigugma sa tanang tawo nga walay pagpanumbaling sa ilang mga kahimtang ug nga kon kita makabuhat og bisan usa ka sala, mahimo kitang sad-an sa atubangan sa Dios. Nakat-on usab sila nga ang tinuod nga pagtuo kang Jesukristo mapakita sa atong matarung nga mga buhat. Sa dihang nagtuon sila sa mga pagtulun-an mahitungod sa pagpugong sa atong mga pulong, nadiskubrehan sa mga estudyante nga ang pagkat-on sa pagpugong sa unsay atong isulti adunay dakong epekto sa atong mga kinabuhi ug nga ang mga sumusunod sa Dios nagtinguha nga mogamit sa ilang pinulongan alang sa matarung nga mga katuyoan, dili sa pagpakaylap sa dautan.
Sa dihang nagtuon ang mga estudyante niini nga mga kapitulo sa Santiago, nakat-on sila sa mosunod nga mga kamatuoran: Samtang moduol kita sa Dios, moduol Siya nato. Kon nasayud kita sa pagbuhat sa maayo apan mopili nga dili mobuhat niini, nakasala kita. Pinaagi sa pag-ampo sa hugot nga pagtuo ug sa gahum sa priesthood, ang masakiton mahimong maayo.
Sa ilang pagtuon sa mga pagtulun-an ni Pedro, ang mga estudyante nakat-on sa mosunod nga mga kamatuoran: Bisan og makasinati kita og mga pagsulay, mahimo kitang magmaya sa Pag-ula ni Jesukristo ug sa umaabot nga mga panalangin nga gisaad sa Dios nga ihatag kanato. Ang atong hugot nga pagtuo kang Jesukristo masulayan ug malunsay samtang matinud-anon kitang naglahutay sa mga pagsulay. Natubos kita pinaagi sa bililhon nga dugo ni Jesukristo. Tungod kay si Jesukristo nagpakabuhi nga walay sala, makatugyan Siya sa Iyang kaugalingon isip usa ka hingpit nga sakripisyo alang kanato. Si Jesukristo gi-orden nang daan nga mahimo natong Manunubos. Ang Dios nagtawag sa Iyang mga Santos nga mahimong bulag ug lahi sa kalibutan aron ang uban makakita sa ilang ehemplo ug mohimaya Kaniya. Makasunod kita sa ehemplo sa Manluluwas sa mapailubon nga paglahutay sa mga pagsulay.
Gikan sa pag-awhag ni Pedro sa mga Santos sa iyang panahon, ang mga estudyante nakat-on nga isip mga sumusunod ni Jesukristo, kinahanglan kitang maningkamot nga kanunayng andam sa pagpakigbahin ug pagpanalipod sa atong mga tinuohan uban ang kaaghup ug pagtahud. Nakat-on usab ang mga estudyante nga ang ebanghelyo gisangyaw niadtong namatay na aron aduna silay samang kahigayunan niadtong nakadungog sa ebanghelyo sa mortalidad. Mitudlo si Pedro nga ang mga lider sa Simbahan adunay responsibilidad sa pag-amuma ug pagbantay sa panon sa Dios uban ang gugma ug pinaagi sa ehemplo.
Pasiuna
Si Apostol Santiago miklaro sa pipila ka panagbangi taliwala sa mga Santos mahitungod sa unsa ang tinuod nga hugot nga pagtuo. Mitudlo usab siya mahitungod sa relasyon tali sa hugot nga pagtuo ug sa binuhatan.
Nagtudlo si Santiago sa tahas sa hugot nga pagtuo ug binuhatan diha sa atong kaluwasan
Dapita ang mga estudyante sa paghunahuna nga ang usa ka batan-ong lalaki miangkon nga nakasala siya. Nagtuo siya sa Pag-ula ni Jesukristo ug sa kasarang sa Manluluwas nga moluwas kaniya. Nag-ingon siya nga ang bugtong lamang niyang buhaton mao nga motuo ug ang Ginoo mopasaylo niya, nga wala nay laing buhaton sa iyang bahin.
Hangyoa ang mga estudyante sa paghunahuna kon ang bugtong pagtuo niining batan-on nga lalaki igo na ba alang kaniya aron mapasaylo alang sa iyang mga sala.
Dapita ang usa ka estudyante sa pagbasa og kusog sa Santiago 2:14. Hangyoa ang klase sa pagsunod, nga mangita kon unsay gipangutana ni Santiago sa mga Santos mahitungod sa hugot nga pagtuo.
Unsay gipangutana ni Santiago sa mga Santos mahitungod sa hugot nga pagtuo?
Unsa kaha nga matang sa mga binuhatan ang gipasabut ni Santiago?
Pahinumdumi ang mga estudyante nga samtang nagtuon sila sa leksyon sa Santiago 2 nakat-on sila nga si Apostol Santiago mikorihir sa sayop nga ideya mahitungod sa hugot nga pagtuo. Ang pipila ka mga tawo nasayop pagsabut nga ang hugot nga pagtuo usa lamang ka sinulti nga pagpahayag sa tinuohan. Sa kinatibuk-ang kahulugan sa Santiago 2:14, migamit si Santiago sa pulong binuhatan nga lahi kay sa paggamit ni Apostol Pablo. Sa paggamit ni Pablo sa pulong binuhatan, mipasabut siya sa mga buhat sa balaod ni Moises. Sa paggamit ni Santiago sa pulong binuhatan, mipasabut siya sa mga buhat sa paghalad o mga buhat sa pagkamatarung.
Ipasabut nga migamit si Santiago og pasumbingay sa paghulagway sa tubag sa iyang pangutana sa bersikulo 14.
Pagdapit og duha ka estudyante sa pagduol sa atubangan sa klase. Hangyoa ang usa sa mga estudyante nga molihok isip usa ka manlilimos kinsa nangamuyo alang sa pagkaon, saput, ug kapuy-an nga iyang gikinahanglan aron mabuhi. Dapita ang ikaduha nga estudyante sa paglihok isip usa ka tawo kinsa makatabang sa manlilimos. Pagdapit og ikatulo nga estudyante sa pagbasa og kusog sa Santiago 2:15–16 samtang ang duha ka estudyante naglihok sa unsay gihulagway niini nga mga bersikulo.
Unsay sayop sa tubag nga gihatag ngadto sa manlilimos nga estudyante?
Igo na ba ang tubag sa laing estudyante nga makatabang sa manlilimos?
Dapita ang klase sa pagbasa og kusog o pag-recite sa Santiago 2:17–18 nga magdungan, nga mangita kon unsay gitudlo ni Santiago mahitungod sa hugot nga pagtuo. Pahinumdumi sila nga ang Santiago 2:17–18 usa ka scripture mastery passage.
Unsa kaha ang gipasabut sa mga pulong “ang pagtoo patay kon kini walay binuhatan” (bersikulo 17)?
Sa unsang paagi ang pasumbingay ni Santiago sa manlilimos makatabang nato nga makasabut niini nga mga pulong?
Sumala sa bersikulo 17, unsa nga kamatuoran ang gitudlo ni Santiago mahitungod sa tinuod nga hugot nga pagtuo kang Jesukristo? (Ang mga estudyante mahimong mogamit og lain-laing mga pulong apan kinahanglang mahibalo og usa ka kamatuoran nga susama sa mosunod: Ang tinuod nga hugot nga pagtuo kang Jesukristo makita pinaagi sa atong matarung nga binuhatan. Isulat sa pisara kini nga kamatuoran.)
Dapita ang usa ka estudyante sa pagbasa og kusog sa Santiago 2:19–20. Ipasabut nga ang Joseph Smith Translation sa Santiago 2:19 nag-ingon, “Ikaw nagatoo nga ang Dios usa ra; husto ka niana. Ngani bisan pa ang mga yawa nagatoo man usab--ug nagapangurog sa kalisang; gihimo nimo ang imong kaugalingon nga sama kanila, nga wala gihatagan og katarungan.” Hangyoa ang klase sa pagsunod, nga mangita sa ehemplo nga gigamit ni Santiago aron sa pagpakita nga ang pagtuo sa Dios wala dayon maglakip og pagbaton og hugot nga pagtuo diha sa Dios.
Unsa nga ehemplo ang gigamit ni Santiago sa pagpakita nga ang pagtuo diha sa Dios wala dayon maglakip og hugot nga pagtuo diha sa Dios?
Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles:
Imahe
Elder David A. Bednar
“Tinuod nga hugot nga pagtuo nagtumong diha ni Ginoong Jesukristo ug sa kanunay mosangpot sa matarung nga aksyon. … Ang aksyon lamang dili matawag og pagtuo diha sa Manluluwas, apan ang pagbuhat sumala sa husto nga mga baruganan mao ang importante nga bahin sa hugot nga pagtuo. Sa ingon, ‘walay kapuslanan ang pagtuo nga bulag sa binuhatan’ (Santiago 2:20)” (“Pangayo pinaagi sa Hugot nga Pagtuo,” Ensign o Liahona, Mayo 2008, 95).
Sumala ni Elder Bednar, unsa ang “importante nga bahin sa hugot nga pagtuo”?
Nganong importante man nga makasabut nga ang hugot nga pagtuo diha kang Jesukristo nagpasabut sa pagtuo diha Kaniya ug sa paglihok sumala sa husto nga mga baruganan?
Pahinumdumi ang mga estudyante sa batan-ong lalaki sa sitwasyon diha sa sinugdanan sa leksyon.
Sa unsa kaha nga paagi nga ang pagsabut nga ang hugot nga pagtuo naglakip sa pagtuo ug buhat makatabang sa usa ka tawo nga nagtinguha og kapasayloan sa iyang mga sala?
I-summarize ang Santiago 2:21–26 pinaagi sa pagpasabut nga si Santiago naghisgot ni Abraham ug Rahab isip duha ka ehemplo sa mga tawo kansang hugot nga pagtuo diha ni Jesukristo napakita pinaagi sa ilang binuhatan. (Ang istorya sa maisugong babaye nga si Rahab makita diha sa Josue 2:1–22.)
Dapita ang mga estudyante sa paggamit sa ilang mga class notebook o scripture study journal sa pagsulat mahitungod sa usa ka panahon diin mipakita sila og hugot nga pagtuo kang Jesukristo pinaagi sa ilang binuhatan ug sa unsang paagi sila napanalanginan sa pagbuhat sa ingon. Awhaga ang mga estudyante nga ilakip ang ilang mga pagpamatuod sa Manluluwas ug sa unsang paagi sila mopakita niana nga pagtuo pinaagi sa ilang mga buhat. Hangyo ang pipila ka mga estudyante sa pagpakigbahin uban sa klase kon unsay ilang gisulat.
Dapita ang mga estudyante sa pagkonsiderar sa mainampuong paagi kon sa unsang paagi sila mas hingpit nga makapakita og hugot nga pagtuo kang Jesukristo pinaagi sa pagsunod Kaniya. Awhaga sila sa pagsunod sa bisan unsang mga aghat nga ilang madawat.
Pangutan-a ang mga estudyante kon ngano kaha nga ang mga tawo mopili sa pagpakasala bisan nasayud sila nga kini sayop. Dapita sila sa pagpangita sa mga kamatuoran, samtang sila nagtuon sa 2 Pedro lahus sa Judas sulod sa sunod nga semana, nga makatabang kanila sa pagtubag sa mosunod nga mga pangutana: Unsaon man nato nga makalikay nga malingla pinaagi sa bakak nga doktrina? Unsay gisulti ni Juan nga mohingilin sa kahadlok? Sa unsang paagi kita mopakita sa atong gugma sa Dios? Unsa nga diosnon nga mga kinaiya ang kinahanglan natong palambuon aron makapanunod sa kinabuhing dayon? Unsa nga pasidaan ang gihatag mahitungod niadtong atong pilion nga makauban?