Materyal sa Pagpangandam alang sa Home-Study Teacher
Summary sa mga Leksyon sa Daily Home-Study
Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante dihang gitun-an nila ang Mga Hebreohanon 5–Santiago 1 (unit 28) dili tuyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.
Gikan sa mga sulat ni Pablo mahitungod sa awtoridad sa priesthood, nakat-on ang mga estudyante nga kadtong na-ordinahan sa priesthood kinahanglang gitawag sa Dios pinaagi sa pagpadayag sa Iyang tinugyanan nga mga sulugoon. Nakat-on usab ang mga estudyante sa mosunod nga mga kamatuoran: Pinaagi sa kakugi hangtud sa katapusan, hugot nga pagtuo kang Jesukristo, ug pagpailub, makapanunod kita sa mga panalangin nga gisaad sa Dios. Ang atong paglaum sa mga saad sa Dios usa ka espirituhanon nga angkla alang sa atong mga kalag.
Samtang nagtuon ang mga estudyante sa Mga Hebreohanon 7–10, nakat-on sila nga si Jesukristo mitugyan sa Iyang kaugalingong kinabuhi isip usa ka sakripisyo alang sa atong mga sala ug nga tungod sa Pag-ula ni Jesukristo, makasulod kita sa celestial nga gingharian kon magmatinud-anon kita sa atong pagtuo diha Kaniya.
Sa ilang pagtuon sa pakigpulong ni Pablo mahitungod sa hugot nga pagtuo, nakat-on ang mga estudyante nga ang hugot nga pagtuo mao ang kasigurohan sa mga butang nga atong ginapaabut, ug ang panghimatuod sa pagkaanaa sa mga butang nga dili nato makita. Nakat-on usab sila sa mosunod: Sa pagpahimuot sa Dios kinahanglan natong gamiton ang atong hugot nga pagtuo pinaagi sa pagduol Kaniya, pagtuo Kaniya, ug pagtuo nga moganti Siya niadtong makugihon nga nagtinguha Kaniya. Samtang nagpakita kita og hugot nga pagtuo diha kang Jesukristo, makasugakod kita sa pag-antus, makabuhat og mga milagro, makadawat og balaan nga mga saad, makapalig-on sa atong pagpamatuod Kaniya, ug maka-uswag padulong sa kahingpitan.
Samtang ang mga estudyante nagtuon sa katapusan sa sulat ni Pablo ngadto sa mga Hebreohanon, nakat-on sila nga samtang kita nagtan-aw sa ehemplo ni Jesukristo, maka-angkon kita og kalig-on sa pagsalikway sa atong mga sala ug mapailubon nga mosagubang sa oposisyon. Nakat-on usab sila nga kon motugyan kita sa pamanton gikan sa Langitnong Amahan, kita mahimong mas susama Kaniya ug makabaton og kalinaw nga moabut gikan sa pagkamatarung. Sa ilang pagtuon sa Santiago 1, nakat-on ang mga estudyante nga ang Dios madagayaon nga mohatag og kaalam niadtong nangamuyo Kaniya diha sa hugot nga pagtuo.
Pasiuna
Si Apostol Santiago mitambag sa nagkatibulaag nga mga Israelite nga motuman sa pulong, mo-alagad sa uban, ug magpabilin nga limpyo sa espirituhanon nga paagi.
Mga Sugyot alang sa Pagtudlo
Pahinumdom: Nakat-on ang mga estudyante og duha ka mga scripture mastery passage dinhi niini nga unit—Mga Hebreohanon 12:9 ug Santiago 1:5–6. Mahimo ninyong basahon o i-recite kini nga mga tudling nga magdungan isip usa ka klase ug pagdapit og mga estudyante sa pagpasabut sa mga doktrina ug mga baruganan nga gitudlo sa mga tudling.
Nagdapit si Santiago sa iyang mga magbabasa nga maminaw ug motuman sa pulong ug mo-alagad sa uban
Dapita ang usa ka estudyante sa pagbasa og kusog sa mosunod nga istorya ni Elder Quentin L. Cook sa Korum sa Napulog Duha mga Apostoles:
Imahe
Elder Quentin L. Cook
“Bag-o lang nakahimamat ko og usa ka batan-ong lalaki. Tumong niya nga makamisyon, makaeskwela, magminyo sa templo, ug dunay malipayong pamilya. Nalipay kaayo ko sa iyang mga tumong. Apan sa among pag-istoryahay, naklaro nga ang iyang lihok ug mga pagpili dili haum sa iyang mga tumong. Nakita nakong tinuod siyang gusto nga magmisyon ug gilikayan ang seryusong mga sala nga makapugong niini, apan ang inadlaw niyang buhat wala mag-andam niya alang sa pisikal, emosyonal, sosyal, intelektwal, ug sa espirituhanong hagit nga iyang atubangon. Wala siya maningkamot. Wala niya seryusoha ang pag-eskwela o ang seminary. Mosimba tuod siya, apan wala niya mabasa ang Basahon ni Mormon. Migahin siyag dakong panahon sa video games ug social media. Nagtuo siya nga ang pag-adto sa misyon igo na” (“Maalamong Mopili,” Ensign o Liahona, Nob. 2014, 47).
Kon ikaw anaa sa sitwasyon ni Elder Cook, unsa kaha ang imong mga kabalaka sa kakulang sa pagpangandam sa misyon niining batan-ong lalaki?
Dapita ang usa ka estudyante sa pagbasa og kusog sa Santiago 1:22. Hangyoa ang klase sa pagsunod, nga mangita kon unsay gitudlo ni Santiago nga makatabang sa batan-ong lalaki nga gihulagway diha sa istorya ni Elder Cook.
Unsay gitudlo ni Santiago nga makatabang nianang batan-ong lalaki?
Ipasabut nga, sama sa na-rekord sa Santiago 1:23–24, gipahisama ni Santiago ang tawo nga igo rang maminaw apan dili motuman ngadto sa usa ka tawo nga nagasud-ong sa iyang nawong diha sa salamin apan dihadiha mahikalimot lang dayon unsang pagkadagwaya siya inig lakaw niya.
Dapita ang usa ka estudyante sa pagbasa og kusog sa Santiago 1:25. Hangyoa ang klase sa pagsunod, nga mangita kon unsay mahitabo niadtong kinsa nagpili sa pagbuhat sumala sa mga kamatuoran nga ilang nadungog.
Unsay mahitabo niadtong dili lamang maminaw apan usab motuman? (Human makatubag ang mga estudyante, isulat sa pisara ang mosunod nga baruganan: Samtang kita maminaw ug motuman sa pulong sa Dios, panalanginan Niya kita sa atong mga buhat.)
Dapita ang mga estudyante sa pagtimbang-timbang sa ilang mga kaugalingon isip mga tigpaminaw ug tigtuman sa pulong sa Dios pinaagi sa pagpamalandong sa mosunod nga mga pangutana. Mahimo nimong basahon og kusog kining mga pangutana o isulat kini sa pisara.
Unsa ka hingpit ang akong pagtuo sa mga kamatuoran nga akong nakat-unan diha sa mga kasulatan, sa panimalay, sa simbahan, ug sa seminary?
Kapila ba ko naghimo og espirituhanon nga mga tumong sa paglihok sa mga kamatuoran nga akong nakat-unan? Kapila ba nako kini mahimo? Kapila ba nako kini makalimtan?
Unsa pa ba’y akong mahimo aron motuman sa pulong ug dili lamang maminaw?
Pagpamatuod sa mga panalangin nga moabut samtang molihok kita sa unsay atong nakat-unan.
Dapita ang usa ka estudyante sa pagbasa og kusog sa Santiago 1:26–27. Hangyoa ang klase sa pagsunod, nga mangita sa mga sugyot ni Santiago kon unsaon nato pagpakabuhi sa atong relihiyon.
Sumala ni Santiago, unsa’y pipila ka mga pamaagi nga magpakabuhi kita sa atong relihiyon, o magpakita sa atong pagkamatinud-anon ngadto sa Dios?
Ipasabut nga diha sa bersikulo 27 si Santiago migamit sa ideya sa “pagduaw sa mga ilo ug mga babayeng balo” nga may panginahanglan isip usa ka ehemplo sa pag-amuma alang sa uban ug nga ang “pag-amping sa kaugalingon nga dili mahugawan sa kalibutan” nagpasabut sa pagpabilin nga limpyo sa espirituhanon nga paagi, bisan diha sa usa ka kalibutan diin naglabi ang pagkadautan.
Unsa nga kamatuoran ang atong makat-unan gikan sa Santiago 1:27? (Ang mga estudyante mahimong mogamit og lain-laing nga mga pulong, apan siguroa nga mahibalo sila sa mosunod nga kamatuoran: Mapakita nato ang relihiyon nga putli kon nag-amuma kita sa uban ug nagpabiling limpyo sa espirtuhanong paagi. Isulat sa pisara kini nga kamatuoran.)
Sa unsa kaha nga mga pamaagi ang pag-amuma sa uban ug pagpabiling limpyo sa espirituhanong paagi mahimong mahinungdanong pagpahayag sa atong kamatinud-anon sa Dios?
Kinsa ang inyong nailhan nga usa ka maayong ehemplo sa pagpakita sa “relihiyon nga putli” sa iyang kinabuhi sa adlaw-adlaw? Unsa’y gibuhat niini nga tawo nga nagdasig kaninyo?
Dapita ang mga estudyante sa pagsulat sa usa ka piraso nga papel sa usa o duha ka mga butang nga ilang buhaton sa sunod nga semana sa pag-amuma sa usa ka tawo nga nanginahanlan o pagpabilin sa ilang kaugalingon nga “walay buling gikan sa kalibutan.” Dapita sila nga motuman sa mga pulong sa Dios pinaagi sa paggamit niini nga baruganan sa ilang mga kinabuhi.
Ipasabut sa mga estudyante nga samtang nagtuon sila sa Santiago 2–1 Pedro 5, makat-unan nila ang mga tubag sa mosunod nga mga pangutana: Unsay gitambag ni Santiago sa mga Santos nga buhaton kon makita nila ang usa ka igsoon nga lalaki o igsoon nga babaye kinsa “walay igong panapot ug nakabsan siyag makaon alang sa adlaw-adlaw”? (Santiago 2:15). Unsa kaha kon wala tay buhaton aron sa pagtabang sa nanginahanglan? Nganong niingon man si Santiago nga “patay ang pagtoo nga mahimulag sa binuhatan”? (Santiago 2:26). Unsa nga bahin sa lawas ang giingon ni Santiago nga “usa ka kalayo” ug “[nagahugaw] sa tibuok lawas”? (Santiago 3:6). Unsa nga panalangin ang nagpaabot niadtong nagtabang nga mapabalik ang usa ka makasasala “gikan sa pagkahisalaag niini sa iyang dalan”? (Santiago 5:20). Unsa nga mga katarungan ang gihatag ni Pedro alang sa pagsangyaw sa ebanghelyo ngadto sa mga patay? Dapita ang mga estudyante sa pagpangita sa mga tubag niini nga mga pangutana samtang nagtuon sila sa sunod nga scripture block.