Materyal sa Pagpangandam alang sa Magtutudlo sa Home-Study
Summary sa mga Leksyon sa Daily Home-Study
Ang mosunod nga summary sa mga panghitabo, doktrina, ug mga baruganan nga nakat-unan sa mga estudyante samtang sila nagtuon sa Lucas 5:1–10:37 (unit 10) wala gitumong nga itudlo isip kabahin sa inyong leksyon. Ang leksyon nga imong gitudlo nakatutok sa pipila lamang niini nga mga doktrina ug mga baruganan. Sunda ang mga aghat sa Espiritu Santo samtang ikonsiderar nimo ang mga panginahanglan sa imong mga estudyante.
Gikan sa istorya sa Manluluwas nga nagdapit ni Pedro, Santiago, ug Juan nga mahimong mga mangingisdag tawo, ang mga estudyante nakakat-on nga kon atong buhaton unsay gisugo sa Ginoo bisan kon kita wala makasabut kon ngano, makahatag Siya og mas dagkong panalangin kay sa atong gilauman. Ug gikan sa pag-ayo sa sanlahon ug paralitiko nga tawo, ang mga estudyante nakakat-on nga samtang kita mogamit sa hugot nga pagtuo ug mopaduol ngadto sa Manluluwas, Siya makaayo kanato ug nga kita makatabang sa uban sa pagduol sa Manluluwas aron sila mamaayo. Ang mga estudyante usab nakat-on nga aron modawat sa Manluluwas ug sa Iyang ebanghelyo, kita kinahanglang magmapainubsanon ug andam nga mousab.
Ang mga estudyante nakadiskubre nga kon kita mobuhat og maayo ngadto sa uban nga dili magpaabut og bisan unsa nga balos, dako ang atong ganti ug mamahimo kitang mga anak sa Labing Halangdon ug nga ang Langitnong Amahan nagpanalangin kanato og ubay-ubay samtang kita mohatag og ubay-ubay ngadto sa uban.) Nakakat-on usab sila sa mosunod nga mga kamatuoran: Pinaagi sa paggamit og hugot nga pagtuo diha ni Jesukristo, kita makatabang sa pagdala og mga panalangin ngadto sa mga kinabuhi sa uban. Kita makasunod sa ehemplo ni Jesukristo pinaagi sa pagpakita og kalooy ngadto sa uban ug sa pagpangalagad sa ilang gihilum nga mga panginahanglan.
Dinhi niini nga leksyon ang mga estudyante nakat-on nga si Juan Bautista mao ang propeta nga gi-orden nang daan aron moandam sa agianan alang sa Anak sa Dios ug mobunyag Kaniya. Gikan sa istorya sa babaye kinsa mihugas sa mga tiil sa Manluluwas pinaagi sa iyang mga luha, ang mga estudyante nakakat-on sa mosunod: Samtang atong gamiton ang atong hugot nga pagtuo pinaagi sa pagpakita sa atong gugma ug debosyon ngadto sa Ginoo, atong masinati ang Iyang pagpasaylo. Samtang atong madawat ang kapasayloan gikan sa Ginoo, kita mapuno sa tinguha nga mas mohigugma ug moserbisyo Kaniya.
Gikan niini nga leksyon ang mga estudyante giawhag sa pagsunod sa ehemplo sa Manluluwas pinaagi sa pagpili sa pagtubag sa mga makainsulto o makasilo nga mga sitwasyon uban sa kamapailubon ug kamainantuson. Dugang pa, sila nakakat-on nga aron mahimong tinuod nga disipulo ni Jesukristo, kita kinahanglan dili motugot sa bisan unsa nga mas molabaw og prayoridad sa pagsunod Kaniya ug nga aron maangkon ang kinabuhing dayon kita kinahanglan nga mohigugma sa Dios ug mohigugma sa atong silingan sama sa atong kaugalingon.
Pasiuna
Usa ka abogado nangutana sa Manluluwas, “Unsa bay buhaton ko aron makapanunod sa kinabuhi nga dayon?” (Lucas 10:25). Ang mosunod nga mga ideya sa pagtudlo makatabang sa mga estudyante nga makakat-on kon unsay ipasabut sa paghigugma sa Dios ug sa paghigugma sa atong silingan sama sa atong kaugalingon.
Nagtudlo si Jesus sa sambingay sa maayo nga Samarianhon
Hangyoa ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan:
Imahe
President Dieter F. Uchtdorf
“Ang mga tawo sa atong palibut dili perpekto. Ang mga tawo naghimo og mga butang nga makasamok, makasagmuyo, ug makapasuko. Niining mortal nga kinabuhi kini kanunay ingon niana” (“Ang Maloloy-on Magadawat og Kalooy,” Ensign o Liahona, Mayo 2012, 77).
Dapita ang klase sa pagpamalandong kon nakaila ba sila og tawo nga nagbuhat og mga butang nga nakasamok, nakasagmuyo, o nakapasuko kanila.
Ngano kaha nga lisud ang paghigugma sa tawo nga nagbuhat niini nga mga butang?
Dapita ang mga estudyante sa pagpangita og mga kamatuoran samtang sila nagtuon sa Lucas 10:25–37 nga makagiya kanila samtang sila makig-istorya sa mga indibidwal nga daw lisud mahalon.
Pahinumdumi ang mga estudyante nga sa ilang personal nga pagtuon sa Lucas 10, nakakat-on sila sa usa ka abogado kinsa nangutana sa Manluluwas unsaon nga makapanunod sa kinabuhing dayon.
Dapita ang usa ka estudyante sa pagbasa og kusog sa Lucas 10:26–28. Hangyoa ang klase sa pagsunod, nga mangita sa tubag sa Manluluwas. Dayon hangyoa ang mga estudyante nga moreport sa unsay ilang nakat-unan.
Unsa nga baruganan ang atong makat-unan gikan niini nga mga bersikulo mahitungod sa unsay angay natong buhaton aron makaangkon og kinabuhing dayon? (Ang mga estudyante mahimong mogamit og lain-laing mga pulong apan kinahanglang mahibalo og baruganan sama sa mosunod: Aron makaangkon og kinabuhing dayon kinahanglan gayud nga kita mohigugma sa Dios ug mohigugma sa atong silingan sama sa atong kaugalingon. Isulat kini nga baruganan diha sa pisara.)
Unsay gipasabut sa paghigugma sa Dios sa tibuok ninyong kasingkasing, kalag, kusog, ug hunahuna?
Itudlo ang mga pulong nga “mohigugma sa atong silingan sama sa atong kaugalingon” diha sa pisara. Aron sa pagtabang sa mga estudyante nga makasabut kon unsay ipasabut sa paghigugma sa atong silingan sama sa atong kaugalingon, dapita sila sa paglista diha sa pisara sa mga butang nga ilang buhaton sa kasagaran nga adlaw. (Kini mahimong maglakip sa pagpangandam alang sa adlaw, pagkaon, pagkatulog, paghimo sa homework, ug uban pa.)
Human makatigum og lista sa pisara, dapita ang mga estudyante sa pagpamalandong kon pila sa ilang mga kalihokan nakatutok sa ilang mga kaugalingon. (Mahimo ka nga mohangyo kanila sa pag-ila kon ang matag item sa lista alang ba sa ilang kaugalingon, alang sa uban, o alang sa Dios.)
Unsay atong makat-unan gikan niini nga kalihokan?
Unsa ang pipila ka paagi nga mas pirmi kitang makatutok sa kaayohan sa uban ug magtinguha sa paghigugma kanila sama sa atong paghigugma sa atong kaugalingon?
Unsa ang pipila ka mga paagi nga makabuhat kita niini bisan sa mga kalihokan nga atong buhaton para sa atong kaugalingon? (Ang mga ehemplo mahimong maglakip sa pagkaon og paniudto uban niadtong daw nag-inusara o pagdayeg sa uban panahon sa atong mga kalihokan sa eskwelahan.)
Sa unsang paagi nga ang paghigugma sa Dios ug sa atong silingan sama sa atong paghigugma sa atong kaugalingon makatabang kanato sa paglambo padulong sa kinabuhing dayon?
Dapita ang usa ka estudyante sa pagbasa og kusog sa Lucas 10:29. Hangyoa ang klase sa pagsunod, nga mangita sa ikaduhang pangutana sa abogado ngadto ni Jesus.
Unsa ang ikaduhang pangutana sa abogado?
Andama ang pipila ka mga estudyante nga idrama-drama ang sambingay sa maayong Samarianhon sa Lucas 10:30–35. Dapita ang usa ka estudyante nga maoy tigsaysay ug ang uban sa pagdula sa mga papel sa samaran nga Judeo, ang duha ka kawatan, ang sacerdote, ang Levita, ug ang Samarianhon. (Kon pipila lang ang mga estudyante sa imong klase, mahimo silang makadula og daghang papel.) Mahimo kang mohatag og pipila ka mga props, nga maglakip og name tag, sobra nga sinina nga kuhaon gikan sa Judeo nga lalaki, duha ka mga sudlanan nga nagrepresentar sa lana ug bino, usa ka may ligid nga lingkuranan nga morepresentar sa mananap, ug duha ka mga sinsilyo sa pagrepresentar sa duha ka denario. (Pahinumdom: Mahimo nimong pilion ang mga partisipante ug hatagan sila og piho nga mga instruksyon sa dili pa magklase sa pagsiguro nga ang role play epektibo, angay, ug luwas.)
Dapita ang tigsaysay sa pagbasa og kusog sa Lucas 10:30–35, ug hangyoa ang nangapil nga i-drama ang sambingay. Hangyoa ang nahibilin sa klase sa pagsunod, nga mangita kon unsay gitudlo sa Manluluwas kon kinsa ang atong silingan. Human sa role play, dapita ang mga estudyante sa pagbalik ngadto sa ilang mga lingkuranan.
Asa nga mga buhat sa Samarianhon ang labing dalaygon alang nimo?
Aron sa pagtabang sa klase nga mas makasabut unsa ang gilauman gikan sa usa ka sacerdote, Levita, ug Samarianhon, dapita ang usa ka estudyante sa pagbasa og kusog sa mosunod nga pagpasabut:
Sa nahisulat nga balaod ni Moises, ang mga sacerdote ug mga Levita gi-assign [ug obligado] sa pagserbisyo sa Dios ug sa ilang isigkatawo, diha sa templo ug isip mga magtutudlo ug mga ehemplo sa balaod sa Dios. Kini nga mga naghupot sa priesthood nahibalo gayud sa sugo nga “higugmaon mo ang imong isigkatawo ingon sa imong kaugalingon” (Levitico 19:18). Gani, ang mga Levita gisangunan sa piho sa pagtabang sa mga biyahidor sa ekonomikanhon ug ubang paagi (tan-awa sa Levitico 25:35–36). Agig pagkumparar, “ang mga Samarianhon may pagka-Israelite ug may pagka-Hentil. Ang ilang relihiyon mao ang usa ka sinagulan sa tinuohan nga Judeo ug mga tinuohan ug mga batasan nga pagano. … may [pagdumot] nga gihambin ang mga Judeo alang sa mga Samarianhon tungod kay ang mga Samarianhon mibiya sa hingpit gikan sa relihiyon nga Israelite” (Giya ngadto sa mga Kasulatan, “Samarianhon,” scriptures.lds.org). Ang mga Judeo ug mga Samarianhon sa kasagaran maningkamot sa paglikay sa usag usa.
Sa sambingay, nganong makapatingala man ang mga lihok sa sacerdote, Levita, ug Samarianhon?
Unsa kaha ang posibleng mga rason nga dili tabangan sa Samarianhon ang samaran nga Judeo?
Sumala sa Lucas 10:33, unsa ang nakaaghat sa Samarianhon sa pagtabang sa pagkakita niya sa tawo nga samaran?
Ipasabut nga ang pagka-adunay kalooy nagpasabut nga nakamatikod sa mga panginahanglan ug mga hagit sa laing tawo ug mobati sa tinguha sa paghimo sa bisan unsay atong mahimo sa pagtabang niana nga tawo.
Dapita ang usa ka estudyante sa pagbasa og kusog sa Lucas 10:36–37. Hangyoa ang klase sa pagsunod, nga mangita kon unsay sunod nga gitudlo sa Manluluwas ngadto sa abogado.
Sa unsang paagi kini nga sambingay nagtubag sa pangutana diha sa bersikulo 29, “Kinsa man ang akong silingan?”
Tabangi ang mga estudyante nga makasabut nga ang paggamit sa Manluluwas sa Samarianhon niini nga sambingay nagsugyot nga ang atong silingan dili lamang kadtong nagpuyo duol kanato, apan si bisan kinsa nga anak sa Langitnong Amahan—lakip niadtong labing lisud alang kanato nga higugmaon.
Hangyoa ang usa ka estudyante sa pagbasa og kusog sa mosunod nga pamahayag ni Presidente Howard W. Hunter:
Imahe
President Howard W. Hunter
“Kinahanglan natong hinumduman nga bisan og makapili ta og atong mahigala, ang Dios mihimo sa atong mga silingan—nga bisan asa. Ang gugma kinahanglan nga walay utlanan. … Si Kristo miingon, ‘Kay kon mao ray inyong higugmaon ang mga nahigugma kaninyo, unsa may balus nga madawat ninyo? Dili ba ang mga maniningil sa buhis nagabuhat man sa ingon?’ (Mateo 5:46)” (“The Lord’s Touchstone,” Ensign, Nob. 1986, 35).
Sumala sa Lucas 10:37, unsay gitudlo sa Manluluwas ngadto sa abogado?
Dapita ang mga estudyante sa pagkonsiderar pag-usab sa mga indibidwal nga ilang gihunahuna nga mahimong lisud higugmaon alang kanila.
Unsa ang atong mabuhat aron sa paghigugma ug pagbaton og kalooy niadtong kinsa lisud alang kanato nga higugmaon?
Pagpamalandong og usa ka panahon nga kamo o inyong kaila misunod sa tambag sa Manluluwas nga “higugmaa … ang imong silingan sama sa imong kaugalingon” (Lucas 10:27). Unsa ang resulta?
Pagpamatuod sa mga kamatuoran nga gitudlo sa leksyon karon. Isulat sa pisara ang mosunod nga dili kompleto nga pamahayag ug ipakompleto kini sa mga estudyante diha sa ilang mga notebook sa klase o mga scripture study journal: Akong sundon ang ehemplo sa maayo nga Samarianhon pinaagi sa …
Pasabta ang mga estudyante nga sa umaabut nga unit ilang tun-an kon sa unsang paagi si Jesus mibalik-balik pagbadlong sa mga Pariseo kinsa nagtinguha nga makita nga matarung apan hakog ang pagkatawo. Hangyoa sila sa pagkonsiderar kon sa unsang paagi nga sila dili kaayo mahimong sama sa mga Pariseo ug mahimong mas sama sa mapainubsanon nga mga sumusunod ni Kristo. Sila usab magtuon sa pipila ka mga sambingay nga gihatag ni Jesus, lakip ang sambingay sa nawala nga anak. Hangyoa sila nga timan-an kon unsa ang nahitabo ngadto sa dato nga tawo kinsa mipahinungod sa iyang kinabuhi sa pag-angkon og bahandi ug nagsalikway sa mga kabus.