Mitambag si Santiago sa mga Santos nga mosalikway sa yawa, moduol sa Dios, ug mapailubong mosagubang sa kasakit samtang nagpaabot sa Ikaduhang Pag-anhi sa Manluluwas. Mitudlo siya nga ang mga masakiton kinahanglang “mopakuha sa mga anciano sa simbahan” (Santiago 5:14) aron moalagad kanila. Mitudlo usab si Santiago mahitungod sa kamahinungdanon sa pagtabang sa mga makasasala nga maghinulsol.
Nagtambag si Santiago sa mga Santos nga moduol sa Dios ug mosalikway sa yawa
Dapita ang mga estudyante sa paghunahuna og usa ka miyembro sa pamilya o higala nga suod nila.
Kinsay inyong gihunahuna? Nganong suod man mo niining tawhana?
Giunsa ninyo pagkahimong suod niining tawhana?
Hangyoa ang mga estudyante sa pagpamalandong sa ilang pagbati kon unsa sila kasuod sa Dios.
Sa unsang paagi ang atong kinabuhi mapanalanginan pinaagi sa usa ka lig-on nga relasyon uban sa Dios?
Dapita ang mga estudyante samtang sila nagtuon sa Santiago 4 nga mangita sa mga kamatuoran nga makatabang nila sa pagpalig-on sa ilang relasyon uban sa Dios.
I-summarize ang Santiago 4:1–3 pinaagi sa pagpasabut nga gibadlong ni Santiago ang mga Santos tungod sa pagnunot sa kalibutanon nga mga tinguha.
Dapita ang usa ka estudyante sa pagbasa og kusog sa Santiago 4:4. Hangyoa ang klase sa pagsunod, nga mangita sa matang sa panaghigalaay nga gipasidaan ni Santiago ngadto sa mga Santos. Ipasabut nga ang pakig-away nagpasabut nga pagkamasupakon o pagdumot.
Unsa nga matang sa panaghigalaay ang gipasidaan ni Santiago sa mga Santos?
Unsa kaha ang gipasabut sa “mahigala sa kalibutan”? (Kon gikinahanglan, ipasabut nga ang tambag ni Santiago diha sa bersikulo 4 wala nagpasabut nga dili ta makighigala sa uban kinsa dili mga miyembro sa Simbahan. Hinoon, kinahanglang maglikay kita sa pagdawat ug pagsunod sa sayop nga mga pagtulun-an ug sa dili matarung nga mga tinguha, mga sumbanan, ug mga kalihokan sa kalibutan.)
Sumala ni Santiago, unsay mahitabo sa usa ka tawo nga makighigala sa kalibutan?
Dapita ang mga estudyante sa pagbasa sa Santiago 4:6–8 sa hilum nga paagi, nga mangita kon unsay gitambag ni Santiago nga buhaton sa mga Santos.
Unsa man ang gitambag ni Santiago nga buhaton sa mga Santos?
Sa unsang paagi ang pagtugyan sa atong kaugalingon ngadto sa Dios makatabang nato sa pagsalikway sa yawa?
Sumala sa bersikulo 8, unsay kinahanglan natong buhaton kon gusto natong moduol sa Dios? (Human makatubag ang mga estudyante, isulat sa pisara ang mosunod nga baruganan: Samtang moduol kita sa Dios, moduol Siya kanato.)
Unsay mahimo natong buhaton aron mahiduol sa Dios? (Ilista sa pisara ang tubag sa mga estudyante.)
Aron sa pagtabang sa mga estudyante nga makasabut sa usa ka paagi diin kita mahiduol sa Dios, ipasabut ang panudlo ni Pablo nga “hugasi ang inyong mga kamot” ug “putlia ang inyong mga kasingkasing” (Santiago 4:8). Ipasabut nga sama sa paggamit diha sa mga kasulatan, ang mga kamot mahimong nagrepresentar sa atong binuhatan ug ang kasingkasing mahimong nagrepresentar sa atong mga tinguha.
Sa unsang paagi ang adunay limpyo nga mga kamot ug usa ka putli nga kasingkasing makatabang nato nga mahiduol sa Dios?
Dapita ang usa ka estudyante sa pagbasa og kusog sa Santiago 4:9–12, 17. Hangyoa ang klase sa pagsunod, nga mangita sa dugang nga tambag nga gihatag ni Santiago ngadto sa mga Santos aron sa pagtabang kanila nga mas mahiduol sa Dios. Ipasabut nga ang mga pulong “inyong katawa himoa nga pagbangutan” (bersikulo 9) nagpasabut nga adunay diosnon nga kasubo alang sa sala.
Unsa ang dugang nga tambag ang gihatag ni Santiago nga makatabang sa usa ka tawo nga mahiduol sa Dios?
Sumala sa bersikulo 17, unsay gitudlo ni Santiago nga maoy usa ka sala? (Human makatubag ang mga estudyante, isulat sa pisara ang mosunod nga baruganan: Kon nahibalo kita sa pagbuhat sa maayo apan mopili nga dili mobuhat niini, makahimo kita og sala.)
Nganong sala man ang masayud sa mga maayong butang nga angay natong buhaton apan mopili nga dili kini buhaton?
Dapita ang usa ka estudyante sa pagbasa og kusog sa mosunod nga pamahayag ni Presidente Santiago E. Faust, kinsa mialagad diha sa Unang Kapangulohan:
Imahe
Presidente James E. Faust
“Nabalaka ko nga ang pipila sa atong dagko nga mga sala mao ang sala sa dili pagbuhat sa angay buhaton. Mao kini ang pipila sa mas bug-at nga mga butang sa balaod nga giingon sa Manluluwas nga dili nato pasagdan nga dili mahimo [tan-awa sa Mateo 23:23]. Mao kini ang mahunahunaon, maamumahon nga mga buhat nga mapakyas kita sa pagbuhat ug mobati nga sad-an tungod kay ato kining napasagdan.
“Sa dihang bata pa ko didto sa umahan atol sa grabeng kainit sa summer, nahinumdom ko sa akong lola nga si Mary Finlinson nagluto og lami nga pagkaon diha sa init nga sug-angan nga naggamit og kahoy isip sugnod. Kon ang kahon nga sudlanan og kahoy tupad sa sug-angan wala nay sulod, si Lola hilum nga mopunit sa kahon, mogawas aron sudlan kini sa nagtumpi nga kahoy nga cedar sa gawas, ug modala sa bug-at nga kahon balik sa sulod sa balay. Wala gyud koy pagbati ug interesado kaayo sa panag-istoryahanay didto sa kusina, naglingkod lang ko didto ug gipasagdan ang akong hinigugmang lola nga mopuno sa kahon nga sudlanan og kahoy didto sa kusina. Naulaw ko sa akong kaugalingon ug nagmahay sa akong pagpasagad sa tibuok nakong kinabuhi. Nanghinaut ko nga puhon mangayo sa iyang pagpasaylo” (“The Weightier Matters of the Law: Judgment, Mercy, and Faith,” Ensign, Nob. 1997, 59).
Unsa nga maayong buhat ang napakyas ni Presidente Faust sa pagbuhat sa dihang bata pa siya? Isip resulta unsay iyang gibati?
Unsay mga ehemplo sa mga sala sa dili pagbuhat nga makapugong nato nga mahiduol sa Dios?
Unsay makapugong nato sa pagbuhat sa maayong binuhatan nga gitudlo sa ebanghelyo ni Jesukristo nga atong buhaton?
Kanus-a kamo nahiduol sa Dios tungod sa pagbuhat sa maayong mga butang nga kamo gitudloan sa pagbuhat?
Dapita ang mga estudyante nga isulat sa ilang mga class notebook o mga scripture study journal kon unsay ilang buhaton aron mahiduol sa Dios. Awhaga sila sa pagbuhat sa bisan unsang mga pag-aghat nga ilang madawat.
Nagtudlo si Santiago sa mga Santos nga mapailubon nga mosagubang sa mga kasakit ug nagsugo sa mga masakiton nga manawag alang sa mga anciano
I-summarize ang Santiago 5:1–6 pinaagi sa pagpasabut nga misaway si Santiago sa mga dato kinsa wala nagtarung og gamit sa ilang mga bahandi ug midaug-daug sa mga matarung. Mipasidaan siya nga ang pagkaalaot ug paghukom nagpaabut nila.
Dapita ang pipila ka mga estudyante nga magpuli-puli sa pagbasa og kusog sa Santiago 5:7-11. Hangyoa ang klase sa pagsunod, nga mangita sa unsay gisugo ni Santiago nga buhaton sa mga Santos sa ilang pagsagubang sa kalisud samtang nagpaabot sa Ikaduhang Pag-anhi ni Jesukristo.
Sumala sa bersikulo 7–8, unsay gitambag ni Santiago nga buhaton sa mga Santos samtang nagpaabot sila sa Ikaduhang Pag-anhi sa Manluluwas?
Sumala sa bersikulo 10, kinsay mahimong lantawon sa mga Santos alang sa ehemplo sa mga tawo kinsa mapailubong misagubang sa kasakit?
Unsay mga ehemplo gikan sa mga kasulatan sa mga propeta kinsa mapailubong misagubang sa mga kasakit?
Ipasabut nga ang Santiago 5:13–16 nag-rekord sa tambag ni Santiago ngadto sa mga masakiton ug nagkalisud. Dapita ang usa ka estudyante sa pagbasa og kusog sa mosunod nga sitwasyon:
Ang usa ka higala nag-ingon: “Dili maayo ang akong gibati. Labaw sa usa ka semana na kong nagkasakit. Mibisita na ko og doktor ug nagtumar na og tambal, apan wala gihapon miarang-arang ang akong gibati. Wala ko kahibalo unsa pay akong mahimo.”
Hangyoa ang mga estudyante sa pagpamalandong kon unsay ilang isulti niini nga higala. Dapita ang usa ka estudyante sa pagbasa og kusog sa Santiago 5:13–16. Hangyoa ang klase sa pagsunod, nga mangita kon unsay gitambag ni Santiago nga buhaton sa mga masakiton ug nagkalisud.
Unsay gitambag ni Santiago nga buhaton sa mga masakiton ug nagkalisud?
Unsay gisugo ni Santiago nga buhaton sa mga anciano alang sa mga masakiton? (Mangalagad sa mga masakiton pinaagi sa awtoridad sa priesthood ug sa pagdihog kanila gamit ang lana.)
Ipasabut nga si Elder Dallin H. Oaks sa Korum sa Napulog Duha ka mga Apostoles mitudlo nga “kon ang mga elder nagdihog og tawo nga masakiton ug nagsilyo sa gidihog, nag-abli sila sa mga bintana sa langit aron ibu-bu sa Ginoo ang mga panalangin nga buot Niya alang sa tawo nga masakiton” (“Pag-ayo sa Masakiton,” Ensign o Liahona, Mayo 2010, 48).
Dugang sa gahum sa priesthood, unsa pay laing gisulti ni Santiago nga makaluwas o makaayo sa masakiton? (“Ang pag-ampo nga inubanag pagtoo” [Santiago 5:15].)
Unsa nga kamatuoran ang atong makat-unan gikan ni Santiago mahitungod sa unsang paagi ang masakiton maayo? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Pinaagi sa pag-ampo nga inubanan og pagtuo ug sa gahum sa priesthood, ang masakiton mahimong maayo. Isulat sa pisara kini nga kamatuoran.)
Aron matabangan ang mga estudyante nga makasabut niini nga kamatuoran, ihatag ang mosunod nga pamahayag ni Elder Dallin H. Oaks isip usa ka handout. Ipares-pares ang mga estudyante, ug dapita ang matag pares sa pagbasa og kusog sa pamahayag nga dungan. Hangyoa sila nga mangita sa unsay gitudlo ni Elder Oaks mahitungod sa pag-ampo nga inubanag pagtoo ug sa makaayo nga gahum sa priesthood.
Imahe
Elder Dallin H. Oaks
“Samtang atong gamiton ang dili madudahan nga gahum sa priesthood sa Dios ug samtang atong gihatagan og bili ang Iyang saad nga Siya maminaw ug motubag sa pag-ampo inubanan sa hugot nga pagtuo, hinumduman gayud nato kanunay nga ang hugot nga pagtuo ug ang gahum sa pagpang-ayo sa priesthood dili makahimo og resulta nga sukwahi sa Iyang kabubut-on kansang priesthood Iyaha. …
“… Bisan ang mga sulugoon sa Ginoo, nga naggamit sa Iyang balaanong gahum sa usa ka kahimtang diin adunay igo nga pagtuo nga pagaayohon, dili makahatag og panalangin sa priesthood nga makapaayo sa tawo kon kana nga pag-ayo dili mao ang kabubut-on sa Ginoo.
“Isip mga anak sa Dios, nga nasayud sa Iyang dakong gugma ug sa Iyang dili masukod nga kahibalo kon unsay labing maayo alang sa atong mahangturon nga kaayohan, mosalig kita Kaniya. Ang unang baruganan sa ebanghelyo mao ang hugot nga pagtuo diha ni Ginoong Jesukristo, ug ang hugot nga pagtuo nagkahulugan og pagsalig. … Akong gibati kanang sama nga pagsalig diha sa mga pulong sa amahan sa usa ka laing pinili nga batang babaye kansang kinabuhi gikuha tungod sa kanser sa iyang batan-on nga pangidaron. Siya mipahayag, ‘Ang hugot nga pagtuo sa among pamilya anaa kang Jesukristo, ug wala magdepende sa mga resulta.’ Kadto nga mga pagtulun-an mga tinuod gayud alang kanako. Atong himoon kutob sa atong mahimo aron ayohon ang usa ka minahal, ug dayon mosalig kita sa Ginoo alang sa resulta” (“Pag-ayo sa Masakiton,” 50).
Sa unsang paagi ang mga pagtulun-an ni Elder Oaks makatabang nato nga makasabut sa makaayo nga gahum sa priesthood?
Nganong mahinungdanon man nga ang atong hugot nga pagtuo kang Jesukristo dili mag-agad sa resulta sa usa ka priesthood blessing?
Dapita ang mga estudyante nga mamalandong sa mga kasinatian diin sila o ang ilang mga kaila napanalanginan pinaagi sa mga pag-ampo nga inubanan sa hugot nga pagtuo ug sa gahum sa priesthood. Hangyoa ang mga estudyante sa pagpakigbahin sa unsang paagi kini nga mga kasinatian mipalig-on sa ilang hugot nga pagtuo ug mga pagpamatuod. (Pahinumdumi sila nga dili ipakigbahin ang bisan unsa nga hilabihan ka personal o sagrado.)
Ipasabut diha sa bersikulo 15 ang relasyon tali sa pagpang-ayo sa masakiton ug sa kapasayloan sa sala. Ang matang sa pagkamapainubsanon ug hugot nga pagtuo nga gikinahanglan aron kita pisikal nga maayo sama ra sa matang sa pagkamapainubsanon ug hugot nga pagtuo nga gikinahanglan aron kita makadawat og kapasayloan (tan-awa sa Bruce R. McConkie, Mormon Doctrine, 2nd ed. [1966], 297–98).
I-summarize ang Santiago 5:17–20 pinaagi sa pagpasabut nga mitudlo si Santiago kang propeta Elias isip usa ka ehemplo sa usa ka tawo kinsa migamit sa gahum sa kinasingkasing nga pag-ampo. Mitambag usab siya sa mga Santos sa pagtabang sa mga makasasala nga maghinulsol.
Tapusa pinaagi sa pagpamatuod sa mga kamatuoran nga gitudlo niini nga leksyon.
Komentaryo ug Background nga Impormasyon
Santiago 4:8. “Hugasi ang inyong mga kamot … putlia ang inyong mga kasingkasing”
Si Elder David A. Bednar sa Korum sa Napulog Duha ka mga Apostoles mipasabut sa unsang paagi kita adunay limpyong mga kamot ug usa ka putli nga kasingkasing:
“Ang mga kamot malimpyohan pinaagi sa proseso sa pagsalikway sa kinaiyanhong pagkatawo ug sa pagbuntog sa sala ug sa mga dautan nga impluwensya sa atong mga kinabuhi pinaagi sa Pag-ula sa Manluluwas. Ang mga kasingkasing maputli inigkadawat nato sa Iyang makapalig-ong gahum sa pagbuhat og maayo ug pagkahimong mas maayo” (“Limpyo nga mga Kamot ug Putli nga Kasingkasing,” Ensign o Liahona, Nob. 2007, 82).
Santiago 5:15. “Kon siya nakasala man, siya pagapasayluon”
Si Elder Bruce R. McConkie sa Korum sa Napulog Duha ka mga Apostoles mipasabut sa koneksyon tali sa pagpang-ayo sa masakiton ug sa kapasayloan sa sala:
“Ang tawo kinsa pinaagi sa hugot nga pagtuo, debosyon, pagkamatarung, ug personal nga katakus, angayan nga maayo, angayan usab nga makaangkon sa pagtugot sa Espiritu alang sa direksyon sa iyang kinabuhi, ug ang iyang mga sala mapasaylo, nga gipakita sa kamatuoran nga nagdawat siya sa pakig-uban sa Espiritu, nga dili unta niya maangkon kon dili siya takus” (Mormon Doctrine, 2nd ed. [1966], 297–98).
“Si Santiago mitudlo nga kon ang usa ka makasasala makabig ug makadawat sa mga ordinansa sa kaluwasan, ang iyang mga sala ‘matabunan’—natabunan o napasaylo—pinaagi sa Pag-ula ni Jesukristo ug siya naluwas gikan sa espirituhanon nga kamatayon” (New Testament Student Manual [manwal sa Church Educational System, 2014], 499).
Sa ingon usab, ang tawo nga motabang sa laing tawo nga makabig sa ebanghelyo ni Jesukristo makadawat usab og dagkong mga panalangin. Si Presidente Spencer W. Kimball mitudlo sa mosunod:
“Pinaagi niining misyonaryo nga buhat sa pagluwas sa mga kalag sa uban, ang usa ka tawo moabut sa punto sa pagdala og kaluwasan ug pagkabalaan sa iyang kaugalingon. …
“Ang angayan nga kadasig alang sa misyonaryo nga buhat sa bisan usang matang, sama sa tanang pagserbisyo diha sa Simbahan, siyempre mao ang paghigugma sa isigkatawo, apan ang maong buhat kanunayng adunay epekto sa kinabuhi sa usa ka tawo. Busa samtang kita mahimong mga himan diha sa mga kamot sa Dios sa pag-usab sa mga kinabuhi sa uban, ang atong mga kinabuhi dili mapugngan nga mapauswag. Ang usa ka tawo dili makatabang sa laing tawo nga makakab-ot sa ibabaw sa bungtod kon siya mismo dili mosaka ngadto” (The Miracle of Forgiveness [1969], 205).