Marcos 7–8

Sa dili pa magklase, hatagi ang tulo ka mga estudyante sa mosunod nga mga instruksyon. Estudyante 1: “Kon sugoon, paglakaw libut sa klase nga walay kupo ug pagpakaaron-ingnon nga nagkurog.” Estudyante 2: “Kon sugoon, lakaw libut sa kwarto ug pangutana kon aduna bay nakakita sa nawala nga binuhi sa inyong pamilya.” Estudyante 3: “Kon sugoon, ablihi ang imong backpack aron ang mga butang mangatagak samtang ikaw maglakaw.” (Mahimo nimong ipahiangay kini nga kalihokan pinaagi sa paggamit og ubang mga sitwasyon nga nagpakita og mga estudyante nga nanginahanglan, apan pagmatngon nga dili mogamit og taas ra kaayo nga oras.)

Sa pagsugod sa klase, sugoa ang mga estudyante nga itagsa-tagsa pagkompleto kini nga mga instruksyon. Hangyoa ang klase sa pagpangita kon unsay komon niining tulo ka mga sitwasyon.

• Unsay komon niining tulo ka mga sitwasyon? (Ang matag usa niini nga mga sitwasyon nagrepresentar og usa ka tawo nga nanginahanglan.)

• Kapila kita adunay mga oportunidad sa pagtabang sa uban nga nanginahanglan? Unsa ang pipila ka mga oportunidad nga inyong nakita bag-ohay lang?

Awhaga ang mga estudyante samtang sila nagtuon sa Marcos 7–8 nga mangita kon unsa ang gitudlo sa Manluluwas nga atong buhaton kon makamatikod kita og tawo nga nanginahanglan.

I-summarize ang Marcos 7:1–30 pinaagi sa pagpasabut nga ang Manlulwas mibadlong sa mga Pariseo tungod sa pagsunod sa sayop nga mga tradisyon. Siya usab miayo sa giyawaan nga anak nga babaye sa usa ka Gresyanhon nga babaye. Pahinumdumi ang mga estudyante nga niining panahona, ang misyon sa Manluluwas mao ang balay sa Israel, dili sa mga Hentil, apan Siya maloloy-ong mitabang niining Hentil nga babaye kinsa mihangyo og maayo Kaniya.

Dapita ang mga estudyante sa pagpangita sa mga dakbayan sa Tiro ug Sidon ug sa Dagat sa Galilea sa Mga Mapa sa Biblia, nu. 11, “Ang Balaan nga Yuta sa Kapanahonan sa Bag-ong Tugon.” Ipasabut nga human mibiya ang Manluluwas sa Tiro ug Sidon, mibiyahe Siya ngadto sa silangan nga bahin sa Dagat sa Galilea, sa rehiyon sa Decapolis.

Ipares-pares ang mga estudyante. Dapita sila sa pagbasa og kusog sa Marcos 7:31–37 nga magdungan, nga mangita kon giunsa pagpakita sa Manluluwas og kalooy ngadto sa usa ka tawo sa Decapolis. Human sa igong panahon, hangyoa ang mga estudyante sa paghisgot sa mosunod nga mga pangutana uban sa ilang mga kauban:

• Sa unsang mga kahimtang gusto nga mamaayo niini nga tawo?

• Unsay gibuhat sa Manluluwas sa wala pa Niya giayo ang tawo?

Aron sa pagtabang sa mga estudyante nga makasabut sa mga binuhatan sa Manluluwas, ipabasa og kusog sa usa ka estudyante ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

Imahe

Elder Bruce R. McConkie

“Ang Ginoo nag-atubang og usa ka matuohon nga kalag kinsa dili makadungog sa iyang mga pulong o makahatag og klarong tubag niini. Ug busa unsa man ang mas natural pa kay sa paggamit sa komon nga mga sinyas, nasayran ug nasabtan sa bungol ug may pagkaamang nga tawo, aron mapakita kon unsa ang mabuhat ug buhaton sa Agalon … ?” (Doctrinal New Testament Commentary, 3 vols. [1965–73], 1:373).

• Unsay matudlo kanato sa mga gibuhat sa Manluluwas niini nga sitwasyon kabahin sa Iyang kinaiya?

Ipasabut nga bisan pa sa pahimangno sa Manluluwas ngadto sa Iyang mga giayo nga dili ipublikar ang Iyang mga milagro, ang katawhan sa rehiyon sa Decapolis nakadungog gihapon sa talagsaong mga butang nga nabuhat sa Manluluwas, ug ang dakong panon sa mga katawhan nanagpunduk ngadto Kaniya (tan-awa sa Marcos 7:36–37).

Dapita ang mga estudyante sa pagtubag sa mosunod nga pangutana diha sa ilang mga notebook sa klase o mga scripture study journal:

• Kanus-a man nga adunay tawo nga nakamatikod nga nagkinahanglan kamo og tabang ug adunay gihimo sa pagtabang kaninyo?

Ipasabut nga sa dili madugay niini nga leksyon ang mga estudyante nga gustong mopaambit sa ilang mga kasinatian hatagan og oportunidad sa pagbuhat niini.

Dapita ang usa ka estudyante sa pagbasa og kusog sa Marcos 8:1–3. Hangyoa ang mga estudyante sa pagsunod ug sa pagpangita sa problema nga mitunga tungod sa pundok sa katawhan nga misunod kang Jesus.

• Unsa nga problema ang mitunga ngadto sa pundok sa katawhan? Kinsay nakakita sa panginahanglan sa pundok sa katawhan?

• Unsay gikabalak-an sa Manluluwas nga mahitabo kon ang mga tawo misulay sa pagpamauli ngadto sa ilang mga panimalay nga wala pa una makakaon?

• Sumala sa bersikulo 2, unsay gibati sa Manluluwas ngadto sa pundok sa katawhan? (Mahimo nimong isugyot nga markahan sa mga estudyante ang mga pulong “Naluoy ako sa katawhan” nga nagpasabut nga ang Manluluwas mibati og simpatiya ug pagpakabana alang sa katawhan.)

Dapita ang duha ka estudyante sa pagpuli-puli sa pagbasa og kusog gikan sa Marcos 8:4–9. Hangyoa ang klase sa pagsunod, nga mangita kon unsay resulta sa kalooy sa Manluluwas.

• Unsay gihimo sa Manluluwas alang sa pundok sa katawhan?

• Pila ka mga tawo ang napakaon?

• Unsa ang atong makat-unan gikan sa ehemplo sa Manluluwas niini nga asoy? (Tabangi ang mga estudyante nga mahibaloan ang mosunod nga baruganan: Kita makasunod sa ehemplo sa Manluluwas pinaagi sa pagtan-aw sa mga panginahanglan sa uban ug dayon motabang sa pagtubag niadto nga mga panginahanglan. Isulat kini nga baruganan diha sa pisara.)

Aron sa pagtabang sa mga estudyante nga makasabut niini nga baruganan, ipasabut nga si Sister Linda K. Burton, kinatibuk-ang presidente sa Relief Society, mitudlo nga aron makasunod sa ehemplo sa Manluluwas sa pagserbisyo sa mga anak sa Dios, kita kinahanglan nga “maniid una, dayon serbisyo” (“Paniid Una, Dayon Serbisyo,” Ensign o Liahona, Nob. 2012, 78). Isulat kini nga mga pulong diha sa pisara ubos sa baruganan.

• Unsaon nato pagkat-on nga mas mapanumbalingon sa mga panginahanglan sa uban? (Ikonsiderar ang pagpasabut nga ang ubang mga panginahanglan mahimong dili dayon makita. Hinoon, kita makaampo ug makapangayo og tabang nga makamatikod sa mga panginahanglan sa uban ug itutok ang atong mga hunahuna ngadto sa uban kay sa atong kaugalingon.)

• Unsay makababag sa atong abilidad nga makamatikod sa mga panginahanglan sa uban ug sa pagtabang nga matubag kini?

Pagdapit og pipila ka mga estudyante sa pagpakigbahin sa mga kasinatian nga ilang gisulat kabahin sa panahon nga adunay tawo nga nakamatikod nga sila nanginahanglan ug mihatag og tabang.

Dapita ang usa ka estudyante sa pagbasa og kusog sa mosunod nga pamahayag ni Presidente Thomas S. Monson:

Imahe

Presidente Thomas S. Monson

“Pila na ba ka higayon nga ang inyong kasingkasing natandog samtang nakasaksi kamo sa panginahanglan sa uban? Kapila na ba kamo nagtinguha nga maoy motabang? Ug sa gihapon, kapila na ba ang inadlaw-adlaw nga pagpakabuhi mibalda, ug inyo rang gipasagdan ang uban nga maoy motabang, mibati nga, ‘a, sigurado nga may tawo nga moatiman niana nga panginahanglan.’

“Nahimo kita nga hilabihan ka nabalaka sa pagkabisi sa atong mga kinabuhi. Kon mohunong lang kita, hinoon, ug motan-aw og maayo sa unsay atong gibuhat, mahimo natong makita nga atong gisubsub ang atong mga kaugalingon diha sa ‘gamay ra kaayo og bili nga mga butang.’ Sa ato pa, kasagaran gayud atong gigahin ang kadaghanan sa atong panahon sa pag-atiman sa mga butang nga dili gayud kaayo mahinungdanon sa kinatibuk-ang plano sa kinabuhi, napasagdan kadtong mas importante nga mga kawsa”(“Unsa may Akong Nabuhat alang sa Usa ka Tawo Karon?” Ensign o Liahona, Nob. 2009, 85.

Hangyoa ang mga estudyante sa paghulagway diha sa ilang mga hunahuna sa mga panghitabo sa ilang kasagaran nga adlaw. Dapita sila sa paghunahuna og mga tawo nga ilang masugatan nga tingali nagkinahanglan sa ilang tabang, sama sa mga ginikanan, mga igsoon, ug mga kaedad. Awhaga ang mga estudyante nga mopasalig sa pagsunod sa ehemplo sa Manluluwas pinaagi sa paghatag og tabang kon makamatikod sila og tawo nga nanginahanglan.

I-summarize ang Marcos 8:10–21 pinaagi sa pagpasabut nga human sa milagrusong pagpakaon sa 4,000, si Jesus ug ang Iyang mga disipulo milawig ngadto sa dapit nga gitawag og Dalmanuta. Didto ang mga Pariseo mihangyo Kaniya sa pagpakita kanila og usa ka timailhan. Si Jesus mibalibad ug mitudlo sa Iyang mga disipulo sa pagbantay sa doktrina sa mga Pariseo, kansang doktrina miresulta sa espirituhanong pagkabuta.

Ipasabut nga si Jesus ug ang Iyang mga disipulo mibiya sa lugar sa Decapolis ug miadto sa dapit nga gitawag og Betsaida. Sa dihang miabut sila didto, usa ka tawo nga buta gidala ngadto sa Manluluwas aron mamaayo.

Dapita ang pipila ka mga estudyante sa pagpuli-puli sa pagbasa og kusog gikan sa Marcos 8:22–26. Hangyoa ang klase sa pagsunod, nga mangita kon giunsa pag-ayo sa Manluluwas ang buta nga tawo.

• Unsay nahitabo human sa unang higayon nga ang Manluluwas mitapion sa Iyang mga kamot ngadto sa buta nga tawo? (Tingali kinahanglan nimong ipasabut nga ang mga pulong, “Nakakita akog mga tawo, apan nakita ko sila nga morag mga kahoy nga naglakawlakaw” [bersikulo 24] nagpasabut nga ang buta nga tawo makakita, apan dili klaro.)

• Unsay nahitabo human ang Manluluwas mitapion sa Iyang mga kamot diha sa tawo sa ikaduhang higayon?

Hatagi ang mga estudyante og mga kopya sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles, ug ipabasa kini og kusog sa usa ka estudyante. Awhaga ang mga estudyante sa pagsunod, nga mangita sa mga rason nganong si Jesus miayo sa tawo sa hinay-hinay, o anam-anam, nga mga paagi.

Imahe

Ni Elder Bruce R. McConkie

“Kini nga milagro walay kapareha; mao lamang kini ang hitabo nga narekord diin anam-anam nga giayo ni Jesus ang usa ka tawo. Tingali gisunod kini sa Ginoo nga pamaagi aron sa paglig-on sa huyang apan nagtubo nga pagtuo sa tawo nga buta. Makita nga ang sunod-sunod nga mga higayon sa pisikal nga kasuod uban kang Jesus nakadugang og paglaum, kasiguroan, ug hugot nga pagtuo sa tawo nga dili makakita. Si Jesus personal nga (1) migunit sa kamot sa buta nga tawo para paggiya kaniya pagawas sa balangay, (2) mitalithi sa mga mata sa buta, (3) mipahigayon sa ordinansa sa pagpandong sa mga kamot, ug (4) mitapion pag-usab sa iyang mga kamot ngadto sa mga mata sa tawo.

“Sigurado nga ang pamaagi sa paghimo niini nga pagpang-ayo nagtudlo nga ang tawo kinahanglang magtinguha sa makaayo nga grasya sa Ginoo sa tibuok nilang kusog ug hugot nga pagtuo, bisan og ang ingon paigo alang sa anam-anam lamang nga pagkaayo , hinoon, human kini madawat, sila mahimong makadawat og dugang nga kasiguroan ug hugot nga pagtuo nga hingpit nga mamaayo. Ang mga tawo usab sa kasagaran mamaayo sa espirituhanon nilang mga kalisdanan sa anam-anam nga paagi, lakang sa usa ka lakang samtang gipasubay nila ang ilang kinabuhi uyon sa mga plano ug mga katuyoan sa Dios” (Doctrinal New Testament Commentary, 1:379–80).

• Sa unsang paagi nga ang anam-anam nga pagkaayo makadugang sa hugot nga pagtuo sa usa ka tawo diha ni Jesukristo?

• Nganong importante man nga masabtan nga ang pipila ka mga panalangin, sama sa pagkaangkon og pagpamatuod sa ebanghelyo o pagdawat og pisikal o espiritwal nga pag-ayo, kasagaran moabut sa hinay-hinay o anam-anam, kay sa diha-diha dayon o kausahon ra?

Dapita ang usa ka estudyante sa pagbasa og kusog sa Marcos 8:27. Hangyoa ang klase sa pagsunod ug pagpangita kon unsay pangutana sa Manluluwas ngadto sa Iyang mga disipulo. Dapita ang mga estudyante nga moreport sa unsay ilang nakat-unan. Hangyoa ang klase sa paghinumdom kon giunsa pagtubag ni Pedro kini nga pangutana, sumala sa narekord sa Mateo 16:16 (kini nga bersikulo kabahin sa usa ka scripture mastery passage). Kon dili sila makahinumdom, ipabasa og kusog sa usa ka estudyante ang Marcos 8:29 (kini nga bersikulo naglakip sa tubag ni Pedro).

I-summarize ang Marcos 8:30–38 pinaagi sa pagpasabut nga ang Manluluwas misulti sa Iyang mga disipulo nga dili una ibutyag ang Iyang pagkatawo isip ang Kristo, o ang Mesiyas. Misugod usab Siya sa pagtudlo kanila mahitungod sa Iyang umaabut nga pag-antus ug kamatayon.

Tapusa ang leksyon pinaagi sa pagdapit sa mga estudyante sa pagpamatuod sa mga kamatuoran nga ilang nakat-unan gikan sa mga kasulatan nga ilang gitun-an panahon sa leksyon.