Marcos 9:1–29

Dapita ang pipila ka mga boluntaryo sa pag-anha sa atubangan sa klase ug ipakita sa daklit ang usa ka kalihokan nga makadugang og pisikal nga kalig-on.

• Nganong gusto o kinahanglan sa tawo nga mopalambo sa iyang pisikal nga kalig-on?

• Sa unsang paagi nga ang pisikal nga kalig-on ikapahisama sa espirituhanong kalig-on, o hugot nga pagtuo kang Jesukristo?

• Unsa ang pipila ka sitwasyon nga ang atong hugot nga pagtuo kang Jesukristo mahimong masulayan ug adunay espesyal nga panginahanglan nga malig-on? (Isulat sa pisara ang mga tubag sa mga estudyante.)

Dapita ang mga estudyante samtang sila nagtuon sa Marcos 9:1–29 nga mangita sa mga kamatuoran nga makatabang kanila sa paglig-on sa ilang hugot nga pagtuo kang Jesukristo.

I-summarize ang Marcos 9:1–13 pinaagi sa pagpasabut nga kini naglakip sa asoy sa pagkausab sa panagway [transpigurasyon] ni Jesus diha sa atubangan ni Pedro, Santiago, ug Juan sa Bukid sa Transpigurasyon. Kini nga tudling nag-asoy usab nga si Jesus mitudlo niini nga mga Apostoles nga si Juan Bautista nakatuman sa gipanagna nga tahas sa usa ka Elias, o usa ka tawo kinsa nag-andam sa agianan alang sa pag-anhi sa Manluluwas (tan-awa sa Joseph Smith Translation, Mark 9:10).

Dapita ang usa ka estudyante sa pagbasa og kusog sa Marcos 9:14–15. Hangyoa ang klase sa pagsunod, nga mangita sa sitwasyon nga nasugatan sa Manluluwas samtang mibalik Siya gikan sa bukid padulong sa uban Niyang mga disipulo. Hangyoa ang mga estudyante nga moreport sa unsay ilang nakat-unan.

Dapita ang usa ka estudyante sa pagbasa sa mga pulong sa Manluluwas ug ipabasa sa laing estudyante ang mga pulong sa amahan diha sa asoy nga nagsunod sa Marcos 9:16–24 (mahimo ka nga mo-assign niini nga mga bahin sa dili pa magklase ug ipapangita sa mga estudyante ang ilang tagsa-tagsa ka mga linya). Ikonsiderar ang pagbuhat sa tahas sa narrator o dapita ang laing estudyante sa pagbuhat niini. Hangyoa ang na-assign nga mga estudyante sa pagbasa og kusog sa ilang mga bahin diha sa Marcos 9:16-18. Hangyoa ang klase sa pagsunod, nga mangita kon unsa ang gitinguha sa amahan gikan sa mga disipulo sa Manluluwas.

• Unsa man ang gitinguha niini nga amahan alang sa iyang anak? (Tingali kinahanglan nimong ipasabut nga ang anak nasudlan og dautang espiritu, nga maoy hinungdan sa pagkaamang, pagkabungol [tan-awa sa Marcos 9:17, 25], ug uban pa nga mga balatian. Matag higayon nga ang dautang espiritu mokontrolar sa anak, ang anak nga lalaki mokurog, mobula ang ba-ba, mokagot ang ngipon, ug mogahi ang kalawasan.)

Hangyoa ang mga estudyante sa paghunahuna nga sila kini nga amahan ug sa pagpamalandong kon sa unsang paagi nga ang ilang hugot nga pagtuo sa Manluluwas ug sa Iyang gahum maapektuhan sa dihang ang mga disipulo dili makaayo sa ilang anak nga lalaki.

Dapita ang gi-assign nga mga estudyante sa pagpadayon sa pagbasa og kusog sa ilang mga bahin diha sa Marcos 9:19–22. Hangyoa ang klase sa pagsunod, nga maghunahuna kon unsa kaha ang gibati niini nga amahan samtang nakigsulti siya sa Manluluwas.

• Sa inyong hunahuna unsa kaha ang gibati niini nga amahan samtang nakigsulti siya sa Manluluwas?

Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. Hangyoa ang klase sa pagpaminaw sa unsay gidugang ni Elder Holland sa atong pagsabut sa mga pagbati ug pangamuyo niini nga amahan.

Imahe

Elder Jeffrey R. Holland

“Wala nay laing paglaum, kini nga amahan nangamuyo sa Manluluwas sa kalibutan, ‘Kon aduna may arang mo nga mahimo alang kanamo, kaloy-i intawon kami, ug tabangi kami’ [Marcos 9:22; italics gidugang]. Dili ko makabasa niini nga mga pulong nga dili makahilak. Ang plural nga pronoun nga kami gituyo gyud sa paggamit. Kini nga tawo nag-ingon, ‘Ang among tibuok pamilya nangamuyo. Wala gayud mahunong ang among paningkamot. Luya na kami. Ang among anak nahulog sa tubig. Nahulog siya sa kalayo. Padayon siya nga namiligro, ug padayon kami nga nahadlok. Wala na kami masayud asa padulong. Makatabang ka ba kanamo? Magpasalamat kami sa bisan unsa—sa parsyal nga panalangin, bisag tipik lang sa paglaum, gamay nga pagkahupay sa kabug-at nga gipas-an sa inahan niining bataa kada adlaw sa iyang kinabuhi’” (“Nagatuo Ako,” Ensign o Liahona, Mayo 2013, 93).

Dapita ang estudyante nga na-assign sa bahin sa Manluluwas sa pagbasa og kusog sa Marcos 9:23. Hangyoa ang klase sa pagsunod, nga mangita kon unsay gitudlo sa Manluluwas niini nga amahan.

• Kinsa man ang kinahanglang tuohan niini nga amahan?

• Unsa nga baruganan ang gitudlo sa Manluluwas niini nga amahan? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Kon kita nagatuo ni Jesukristo, ang tanang butang posible kanato. Mahimo nimong isugyot nga markahan sa mga estudyante ang mga pulong sa bersikulo 23 nga nagtudlo niini nga baruganan.)

Ipasabut nga ang “tanan nga mga butang” may kalabutan sa tanang matarung nga mga panalangin sumala sa kabubut-on, katuyoan, ug panahon sa Dios.

• Sa unsang paagi ang pagtuo niini nga baruganan makatabang sa usa ka tawo nga nag-atubang og mga kalisdanan nga daw imposibleng mabuntog?

Dapita ang estudyante nga na-assign sa bahin sa amahan sa pagbasa og kusog sa Marcos 9:24. Hangyoa ang klase sa pagsunod, nga mangita kon unsay tubag sa amahan sa baruganan nga gitudlo sa Manluluwas.

• Unsaon ninyo paghulagway ang hugot nga pagtuo sa amahan nianang higayona?

Hangyoa ang mga estudyante nga timan-an ang duha ka bahin sa tubag niini nga amahan. Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland. Hangyoa ang klase sa pagpaminaw kon unsay gihulagway sa pamahayag sa amahan mahitungod sa unsay atong mabuhat sa mga panahon sa “pagkawalay pagtuo,” o sa mga panahon sa pagduha-duha o kahadlok.

Imahe

Elder Jeffrey R. Holland

“Kon mag-atubang og hagit sa pagtuo, ang amahan mopahayag pag-una sa iyang kalig-on ug dayon moila sa iyang limitasyon. Ang iyang inisyal nga deklarasyon positibo ug walay pagduha-duha: ‘Nagatuo ako.’ Moingon ko sa tanan nga nangandoy og mas lig-on nga pagtuo, hinumdumi kining tawhana! Sa mga higayon sa kahadlok o pagduha-duha o sa malisud nga mga panahon, gamita ang hugot nga pagtuo nga napalambo na ninyo, bisan og limitado kini. Sa paglambo nga atong masinati sa pagka-mortal, ang susama nga espirituhanong kasakit sa bata o kadesperado sa amahan mahitabo usab kanatong tanan. Kon kini nga mga higayon moabut ug mogawas ang mga problema, ang kasulbaran dili dayon moabut, panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo” (“Nagatuo Ako,” 93–94).

• Unsa man ang atong makat-unan gikan niini nga amahan kabahin sa unsay atong mabuhat sa mga panahon sa kawalay pagtuo? (Human makatubag ang mga estudyante, isulat sa pisara ang mosunod nga dili kompleto nga pamahayag: Kon kita mopadayon sa unsay atong gituohan …)

• Unsay atong makat-unan mahitungod sa pag-atubang sa pagkawalay pagtuo gikan sa laing bahin sa pamahayag sa amahan diha sa bersikulo 24? (Human makatubag ang mga estudyante, idugang ang mosunod nga mga pulong sa pamahayag sa pisara: ug magtinguha sa tabang sa Ginoo, …)

Dapita ang usa ka estudyante sa pagbasa og kusog sa Marcos 9:25–27. Hangyoa ang klase sa pagsunod, nga mangita kon unsay gibuhat ni Jesus agig tubag sa pangamuyo sa amahan.

• Unsa man ang gibuhat sa Manluluwas agi og tubag sa mga pangamuyo sa amahan?

• Unsaon ninyo pagkompleto ang pamahayag sa pisara, gibasi sa unsay inyong nakat-unan gikan niini nga asoy? (Human makatubag ang mga estudyante, kompletuha ang tudling sa pisara aron mapasabut niini ang mosunod nga baruganan: Kon kita mopadayon sa unsay atong gituohan ug magtinguha sa tabang sa Ginoo, Siya motabang kanato sa paglig-on sa atong hugot nga pagtuo.)

I-refer ngadto sa mga sitwasyon nga nalista sa pisara, nga imong gihisgutan sa pagsugod sa leksyon.

• Sa unsang paagi kini nga baruganan magamit sa ingon nga mga sitwasyon?

• Kanus-a man nga kamo o inyong kaila nakadawat sa tabang sa Ginoo sa panahon sa pagkawalay pagtuo pinaagi sa pagpadayon sa pagtuo ug pagtinguha sa Iyang tabang? (Mahimo ka usab nga mopakigbahin og usa ka kasinatian.)

Awhaga ang mga estudyante sa paggamit niini nga baruganan sa mga panahon sa pagkawalay pagtuo.

Pahinumdumi ang mga estudyante nga kini nga amahan sa sinugdanan midala sa iyang anak nga lalaki ngadto sa ubang mga disipulo ni Jesus aron mamaayo. Dapita ang mga estudyante sa paghunahuna nga sila kini nga mga disipulo.

• Unsa kaha ang inyong hunahunaon o bation human napakyas sa pagpagula sa dautang espiritu gikan sa batang lalaki?

Dapita ang usa ka estudyante sa pagbasa og kusog sa Marcos 9:28, ug hangyoa ang klase sa pagpangita sa pangutana sa mga disipulo ngadto kang Jesus.

• Unsa man ang gipangutana sa mga disipulo ngadto ni Jesus?

Hangyoa ang mga estudyante sa pagribyu sa Marcos 9:19, nga mangita kon sa unsang paagi ang Manluluwas mihulagway sa mga tawo, lakip sa Iyang mga disipulo, nga mitambong. (Sila “dili matinuohon.”) Ipasabut nga ang dili matinuohon dinhi nagpasabut sa kakulang sa hugot nga pagtuo diha ni Jesukristo. Ang hugot nga pagtuo diha ni Jesukristo gikinahanglan aron ang mga panalangin sa priesthood mahimong epektibo.

Dapita ang usa ka estudyante sa pagbasa og kusog sa Marcos 9:29. Hangyoa ang klase sa pagsunod, nga mangita kon unsay tubag ni Jesus sa pangutana sa Iyang mga disipulo.

• Unsa man ang gitudlo sa Manluluwas sa Iyang mga disipulo?

• Sa unsang paagi ang pag-ampo ug pagpuasa makaimpluwensya sa hugot nga pagtuo sa usa ka tawo? (Human makatubag ang mga estudyante, tabangi sila nga makasabut sa mosunod nga kamatuoran: Kita makapalambo sa atong hugot nga pagtuo kang Jesukristo pinaagi sa pag-ampo ug pagpuasa.)

Dapita ang usa ka estudyante sa pagbasa og kusog sa mosunod nga pamahayag gikan sa booklet nga Matinud-anon sa Tinuhoan. Hangyoa ang klase sa pagpaminaw sa lain-laing mga sitwasyon diin kini nga kamatuoran magamit:

“Kini nga asoy [ni Jesus nga nagpagula sa dautan nga espiritu gikan sa anak sa usa ka tawo] nagtudlo nga ang pag-ampo ug pagpuasa makahatag og dugang kalig-on niadtong naghatag ug nagdawat og mga panalangin sa priesthood. Ang asoy mahimo usab nga magamit sa imong personal nga mga paningkamot sa pagsunod sa ebanghelyo. Kon ikaw adunay kahuyang o sala nga imong gipanlimbasugan nga mabuntog, mahimong nagkinahanglan ka nga magpuasa ug mag-ampo aron makadawat sa panabang o kapasayloan nga imong gitinguha. Sama sa demonyo nga gipapahawa ni Kristo, ang imong kalisdanan tingali mao nga matang nga mogawas lamang pinaagi sa pag-ampo ug pagpuasa” (Matinud-anon sa Tinuhoan: Usa ka Pakisayran sa Ebanghelyo [2004], 209).

• Sumala niini nga pamahayag, unsa man ang pipila ka mga sitwasyon diin kini nga kamatuoran magamit?

• Kanus-a man nga ang pag-ampo ug pagpuasa nakatabang sa pagpalambo sa inyong hugot nga pagtuo diha kang Kristo ug mitugot kaninyo sa pagdawat sa matarung nga mga panalangin nga inyong gitinguha?

Hangyoa ang mga estudyante sa pagpamalandong sa mga panalangin nga ilang gitinguha alang sa ilang mga kaugalingon o sa uban nga mahimong makuha pinaagi sa pagpalambo sa ilang hugot nga pagtuo kang Jesukristo pinaagi sa pag-ampo ug pagpuasa. Dapita sila sa pagsulat og usa ka tumong sa pag-ampo ug pagpuasa alang niini nga mga panalangin sa sunod nga Dominggo sa puasa.

Ikonsiderar ang pagtan-aw daan sa pipila ka mga scripture mastery passage nga ang mga estudyante tingali dili pa pamilyar. Dapita sila sa pagbasa ug pagmarka niini. Mahimo ka nga mo-assign og usa ka bag-ong scripture mastery passage sa matag estudyante o paris sa mga estudyante ug hangyoa sila sa pagdrowing og mga hulagway diha sa mga piraso sa papel nga nagpakita sa kamatuoran nga gitudlo diha sa ilang mga tudling. Dapita sila sa pagpasabut sa ilang mga litrato nganha sa klase. Mahimo nimong i-display ang mga litrato isip pakisayran sa umaabut.

(Pahinumdom: Mahimo nimong gamiton kini nga kalihokan diha sa sinugdanan o katapusan sa bisan unsa nga leksyon, kon duna pay oras.)