Pasiuna sa Ikatulong Sulat ni Juan

Niining mubo nga sulat, gidayeg ni Juan si Gayo, usa ka miyembro sa Simbahan kinsa maunungon atol sa panahon sa rebelyon batok sa mga lider sa Simbahan. Ang mga pagtulun-an ni Juan makatabang sa mga estudyante nga mas masabtan ang apostasiya nga nahitabo sa Simbahan sa Bag-ong Tugon ug makadasig nila sa pagpabiling matinud-anon sa mga lider sa Simbahan bisan pa sa oposisyon.

Ang tagsulat mipaila sa iyang kaugalingon isip “ang anciano o elder” (3 Juan 1:1) ug sa tradisyunal nga paagi masabut nga si Apostol Juan.

Wala gayud mahibaloi sa tukma kon kanus-a ug diin ang 3 Juan gisulat.

Kon ang tradisyon sa dugay nga pagpuyo ni Juan sa Efeso husto, ang epistola tingali gisulat gikan niadtong lugara sa tunga-tunga sa mga A.D. 70 ug 100.

Ang Ikatulong Sulat ni Juan gisulat para kang Gayo, usa ka matinud-anong miyembro sa Simbahan kinsa gidayeg ni Juan tungod sa pagpakita og dili hinakog nga debosyon sa kawsa ni Kristo pinaagi sa paghatag og mga akomodasyon alang sa mga nagbiyahian nga mga sulugoon sa Dios (tan-awa sa 3 Juan 1:5–8).

Gipasidan-an usab ni Juan si Gayo mahitungod sa usa ka tawo nga ginganlan og Diotrefes, nga tingali dunay gihuptan nga posisyon sa pagkalider sa Simbahan. Si Diotrefes dayag nga misupak ni Juan ug sa ubang mga opisyales sa Simbahan ug gani gipugngan ang ubang mga miyembro sa Simbahan kinsa buot nga modawat kanila sa pagtambong sa mga miting sa Simbahan (tan-awa sa 3 Juan 1:9–10). Giawhag ni Juan si Gayo nga ipadayon ang pagkamaayo ug miingon nga naglaum siya nga makabisita ni Gayo sa dili madugay (tan-awa sa 3 Juan 1:11–14).

Sa 3 Juan atong makita ang kabalaka ni Juan mahitungod sa impluwensya sa mga miapostasiya sa Simbahan. Usab atong makita ang gugma ni Juan sa uban ug ang kalipay nga iyang gibati alang niadtong kinsa mipili nga magpakabuhing masulundon (tan-awa sa 3 Juan 1:4).

3 Juan 1 Gidayeg ni Juan si Gayo tungod sa iyang kamatinud-anon ug gipasidan-an batok sa usa ka lider kinsa misupak ni Juan ug sa ubang mga lider sa Simbahan.