Ang Tahas sa Tigkat-on

Dapita ang usa ka estudyante sa pagbasa og kusog sa mosunod nga mga senaryo:

Usa ka batan-ong babaye nadasig ug nabayaw samtang nagtambong siya sa seminary. Iyang gibati ang impluwensya sa Espiritu Santo didto ug mapasalamaton sa mga butang nga iyang nakat-unan. Laing batan-ong babaye nga anaa sa samang klase sa seminary. Hinoon, laayan siya pirme ug mobati nga wala siyay nakat-unan sa klase.

• Unsa ang posible nga mga rason ngano nga kining duha ka batan-ong babaye dunay lahi nga mga kasinatian samtang nagtambong sa samang klase sa seminary? (Posible nga mga tubag mahimong maglakip sa mosunod: ang unang batan-ong babaye tingali mas aktibong moapil sa leksyon; ang unang batan-ong babaye tingali adunay mas daghang espirituhanong mga kasinatian kaniadto diin ang iyang pagkat-on karon mapalig-on; ug ang ikaduhang batan-ong babaye tingali nabalda sa ubang mga butang.)

Dapita ang mga estudyante sa pagpangita sa mga doktrina ug mga baruganan sa leksyon karon nga makatabang nila sa pagtuman sa ilang tahas sa seminary ug pagpalig-on sa ilang pagpamatuod sa ebanghelyo ni Jesukristo.

Ipasabut nga tulo ka mga indibidwal adunay importante nga mga tahas sa pagkat-on sa ebanghelyo sama sa seminary: ang Espiritu Santo, ang magtutudlo, ug ang estudyante.

Hangyoa ang mga estudyante sa pagbasa og kusog sa Juan 14:26 ug laing estudyante sa pagbasa sa Juan 16:13. Hangyoa ang klase sa pagsunod, mangita sa pipila ka mga tahas sa Espiritu Santo.

• Unsa nga mga kamatuoran ang atong makat-unan gikan niini nga mga bersikulo mahitungod sa mga tahas sa Espiritu Santo? (Mahimong mohatag ang mga estudyante og lain-laing mga tubag, apan siguroha nga ilang makita ang mosunod nga doktrina: Ang Espiritu Santo nagtudlo sa kamatuoran.)

• Unsaon nato sa pagkahibalo kon ang Espiritu Santo nagtudlo nato sa kamatuoran? (Mahimo ninyong pabasahon ang mga estudyante sa Doktrina ug mga Pakigsaad 8:2–3.)

Hangyoa ang usa ka estudyante sa pagbasa og kusog sa Doktrina ug mga Pakigsaad 50:13-14. Dapita ang klase sa pagsunod, mangita sa tahas sa magtutudlo sa ebanghelyo. Sa dili pa basahon sa mga estudyante, ipasabut nga kini nga mga bersikulo gihatag sa unang mga miyembro sa Simbahan kinsa naordinahan sa pagtudlo sa ebanghelyo.

• Unsa ang tahas sa usa ka magtutudlo sa ebanghelyo? (Tan-awa usab sa D&P 42:14.)

Dapita ang usa ka estudyante sa pagbasa og kusog sa 2 Nephi 33:1. Hangyoa ang klase sa pagsunod, mangita kon unsay buhaton sa Espiritu Santo kon ang kamatuoran gitudlo pinaagi sa Iyang gahum.

• Sumala niini nga bersikulo, unsay mabuhat sa Espiritu Santo kanato?

Sa pagtabang sa mga estudyante nga makasabut unsaon sa pagdapit ang Espiritu Santo sa pagdala sa kamatuoran ngadto sa ilang mga kasingkasing, dapita ang usa ka estudyante sa pagbasa og kusog sa Doktrina ug mga Pakigsaad 88:118. Hangyoa ang klase sa pagsunod ug mangita kon unsaon nato nga makat-on.

• Unsaon nato nga makat-on? (Pinaagi sa pagtuon ug pinaagi sa hugot nga pagtuo.)

Dapita ang usa ka estudyante sa pagbasa og kusog sa mosunod nga pahayag ni Elder David A. Bednar sa Korum sa Napulog Duha ka mga Apostoles. Hangyoa ang klase sa pagpaminaw kon unsay mahimong mahitabo nato kon kita maningkamot sa pagkat-on pinaagi sa hugot nga pagtuo:

Imahe

Elder David A. Bednar

“Ang usa ka magtutudlo makapasabut, makapakita, makadani, ug makapamatuod, ug makabuhat og daghang espirituhanong gahum ug sa pagkaepektibo. Sa kaulahian, hinoon, ang sulod sa usa ka mensahe ug ang saksi sa Espiritu Santo mosulod lamang ngadto sa kasingkasing kon ang nagdawat motugot niini nga mosulod. Ang pagkat-on pinaagi sa hugot nga pagtuo moabli sa agianan pasulod sa kasingkasing” (“Seek Learning by Faith,” Ensign, Sept. 2007, 17).

• Gikan niini nga pamahayag, unsa nga baruganan ang atong makat-unan mahitungod unsay mahitabo kon kita magtinguha sa pagkat-on pinaagi sa hugot nga pagtuo? (Tabangi ang mga estudyante nga makaila sa mosunod nga baruganan: Kon kita maningkamot sa pagkat-on pinaagi sa hugot nga pagtuo, dayon atong imbitaron ang Espiritu Santo diha sa atong mga kasingkasing sa pagtudlo ug sa pagpamatuod sa kamatuoran. Ikonsiderar ang pagsulat niini nga kamatuoran diha sa pisara.)

Itudlo nga ang hugot nga pagtuo mas labaw pa kay sa pagtuo nga walay gibuhat. Atong mapadayag ang atong hugot nga pagtuo pinaagi sa lihok.

• Sa imong hunahuna unsa ang gipasabut sa pagkat-on pinaagi sa hugot nga pagtuo?

Sa paghulagway unsay gipasabut sa pagkat-on pinaagi sa hugot nga pagtuo, paghangyo og usa ka boluntaryo nga wala sukad makadula og soccer. (Mahimo ninyong ipahaum kini nga kalihokan aron maapil ang usa ka estudyante nga wala sukad makadula og basketball, makaptukar og instrumento, juggled, paghigot og higot, ug uban pa.) Pahibaloa ang boluntaryo nga tumong nimo ang pagtudlo kaniya unsaon nga maayong makadula og soccer aron makadula sa soccer team. Pangutan-a ang boluntaryo kon siya duna bay hugot nga pagtuo sa inyong abilidad sa pagtudlo ug sa iyang abilidad sa pagkat-on. Dayon ipasabut ug ipakita unsaon sa pagpauntol sa bola sa soccer, pero wala kamo niya pasulayi niini sa inyong kaugalingon. Ipasabut unsaon sa pagpasa sa bola sa soccer. Dayon ipakita pinaagi sa pagpasa sa bola ngadto sa bolunter, apan kuhaa ang bola imbis pasulayon ang bolunter sa pagpasa niini balik nganha nimo. Buhata usab alang sa paglabay sa bola sa soccer sa pagpabalik human kini maitsa sa layo. Dayon pangutan-a ang bolunter:

• Unsa kamo ka andam nga mo-try out alang sa usa ka soccer team? Ngano?

• Bisan tuod nga ang pagkat-on ug pagtan-aw sa uban nga modula og soccer makatabang, kon kamo gusto nga mopalambo sa gikinahanglan nga mga kahanas aron molampos sa soccer, unsay kinahanglan ninyong buhaton?

• Sa unsa nga paagi kini may kalabutan sa pagkat-on pinaagi sa hugot nga pagtuo? (Ang pagtuo lamang ug pagsalig niana nga Espiritu nga makatudlo nato dili pa igo. Aron makaangkon sa kahibalo sa kamatuoran sa Dios, kinahanglan usab nga maningkamot sa pagkat-on ug paggamit unsay atong nakat-unan.)

Pagdapit og estudyante sa pagbasa og kusog sa mosunod nga pamahayag ni Elder Bednar. Hangyoa ang klase sa pagpaminaw unsay iyang gitudlo mahitungod sa pagkat-on pinaagi sa hugot nga pagtuo (mahimo kang mokonsiderar sa paghimo og mga kopya niini nga pamahayag alang sa mga estudyante ug modapit kanila sa pagmarka unsay ilang nakit-an):

Imahe

Elder David A. Bednar

“Ang usa ka nagkat-on nga naggamit sa kabubut-on pinaagi sa paglihok sumala sa sakto nga mga baruganan mibukas sa iyang kasingkasing ngadto sa Espiritu Santo ug nagdapit sa Iyang pagtudlo, gahum sa pagpamatuod, ug panghimatuod nga saksi. Ang pagkat-on pinaagi sa hugot nga pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. Ang kinasingkasing ug pagkamakanunayon sa atong paglihok nga dinasig sa hugot nga pagtuo nga atong gipakita ngadto sa atong Amahan sa Langit ug sa Iyang Anak, nga si Jesukristo, sa atong pagkaandam nga makat-on ug pagdawat og panudlo gikan sa Espiritu Santo. …

“… Ang pagkat-on pinaagi sa hugot nga pagtuo dili mabalhin gikan sa magtutudlo ngadto sa estudyante pinaagi sa pagtudlo, sa pagpakita, o sa pag-eksperimento, hinoon, ang usa ka estudyante kinahanglang mopakita og pagtuo ug molihok aron makaangkon og kahibalo alang sa iyang kaugalingon.(“Paningkamot sa Pagkat-on pinaagi sa Hugot nga Pagtuo,” 64).

• Unsa ang pipila ka espirituhanon, mental, o pisikal nga mga paningkamot nga atong mahimo sa pagdapit sa Espiritu sa pagtudlo ug pagpamatuod ngari nato sa kamatuoran?

Pahinumdom: Tingali sakto kini nga panahon sa pagbasa sa Doktrina ug mga Pakigsaad 88:122 ug hisgutan ang kaimportante sa kahusay ug pagtahud diha sa klase.

• Unsa ang pipila ka mga kinaiya o batasan nga makapugong sa Espiritu sa pagtudlo kanato sa kamatuoran diha sa klase sa seminary?

• Sa unsa nga paagi nga ang kasinatian sa seminary sa usa ka estudyante kinsa naningkamot sa pagkat-on pinaagi sa hugot nga pagtuo lahi gikan sa kasinatian sa usa ka tawo nga wala maningkamot?

Hangyoa ang mga estudyante sa pagpakli ngadto sa Mateo 4. Ipasabut nga sa kasinatian ni Apostol Pedro makita nato ang ehemplo kon sa unsa nga paagi nga ang pagkat-on pinaagi sa hugot nga pagtuo nagdapit sa Espiritu Santo diha sa atong mga kasingkasing sa pagtudlo ug sa pagpamatuod sa kamatuoran. Hangyoa ang usa ka estudyante sa pagbasa og kusog sa Mateo 4:18–20. Hangyoa ang klase sa pagsunod, mangita sa pagdapit sa Manluluwas ngadto ni Pedro ug Andres.

• Unsay gidapit sa Manluluwas nga buhaton ni Pedro ug Andres?

• Sa unsa nga paagi nga ang ilang mga tubag sa pagpaningkamot sa pagkat-on pinaagi sa hugot nga pagtuo usa ka ehemplo?

Ipasabut nga ang aksyon ni Pedro sa pagsunod ni Jesukristo nakapahimo niya nga makauban sa Manluluwas sa Iyang tibuok mortal nga pangalagad. Pinaagi sa pagpatalinghug sa tawag sa Manluluwas sa pagsunod Kaniya, si Pedro adunay pribilehiyo sa pagpaminaw sa Manluluwas nga nagtudlo sa kanunay ug nagsaksi og daghang mga milagro. Uban sa imbitasyon sa Manluluwas, si Pedro naglakaw ibabaw sa tubig (tan-awa sa Mateo 14:28–29).

Ipasabut sa mga estudyante nga usa ka okasyon, si Jesus nangutana sa Iyang mga tinun-an og pangutana. Dapita ang usa ka estudyante sa pagbasa og kusog sa Mateo 16:13–14. Hangyoa ang klase sa pagsunod, mangita kon unsay gisugo sa Manluluwas.

• Unsa ang gisugo sa Manluluwas sa Iyang mga tinun-an?

• Giunsa nila sa pagtubag?

Dapita ang usa ka estudyante sa pagbasa og kusog sa Mateo 16:15–17. Hangyoa ang klase sa pagsunod, mangita kon giunsa pagtubag ni Pedro ang sunod nga pangutana sa Manluluwas.

• Unsa ang tubag ni Pedro sa pangutana sa Manluluwas.

• Unsa ang gipasabut sa Manluluwas kon giunsa ni Pedro pagkadawat ang iyang kahibalo?

• Sa unsa nga paagi nga ang kasinatian ni Pedro naghulagway niini nga mga kamatuoran nga gitudlo niini nga leksyon?

Dapita ang mga estudyante sa pagtubag sa mosunod nga mga pangutana diha sa ilang mga notebook o scripture study journal (mahimo nimong isulat kini nga mga pangutana diha sa pisara):

• Kanus-a kamo nagtinguha sa pagkat-on pinaagi sa hugot nga pagtuo? Sa unsa nga paagi nga ang Espiritu Santo nakatuman sa Iyang tahas sa pagkat-on sa ebanghelyo sa dihang gihimo ninyo kini? (Mahimo nimong dapiton ang mga estudyante sa pagpamalandong sa nangaging mga kasinatian sa pagkat-on sa dihang sila naningkamot sa pagkat-on pa mahitungod ni Jesukristo.)

Kon komportable ang mga estudyante nga mopakigbahin, dapita ang ubay-ubay kanila sa paghulagway sa mga kasinatian nga ilang gisulat. Mahimo kang mopakigbahin og imong kaugalingong kasinatian ingon man usab sa imong pagpamatuod sa kamatuoran nga imong gihisgutan.

Hangyoa ang mga estudyante sa paghunahuna og usa o duha ka mga butang nga ilang himoon aron makat-on pinaagi sa hugot nga pagtuo ug sa pagapit sa Espiritu Santo diha sa ilang kasingkasing sa pagtudlo ug sa pagpamatuod sa kamatuoran. Dapita ang mga estudyante sa pagsulat kon unsay ilang buhaton.

Tapusa pinaagi sa pagpaambit sa mosunod nga pamahayag ni Presidente Thomas S. Monson:

Imahe

Presidente Thomas S. Monson

“Mga kabatan-onan, ako mohangyo kaninyo sa pag-apil sa seminary. Pagtuon sa inyong mga kasulatan kada adlaw. Paminaw sa inyong mga magtutudlo pag-ayo. Gamita sa mainampoon unsay inyong nakat-unan” (“Participate in Seminary,” Ago. 12, 2011, seminary.lds.org).