Marcos 1

Pipila ka adlaw sa wala pa ang klase, hangyoa ang duha ka mga estudyante nga daklit nga mopakigbahin sa ilang mga pagpamatuod kabahin ni Jesukristo diha sa klase. Human sa debosyonal, dapita ang duha ka mga estudyante sa pagpakigbahin sa ilang mga pagpamatuod sa Manluluwas. Pagkahuman, pangutan-a ang klase:

• Unsay bililhon sa pagpaminaw og mga pagpamatuod gikan sa pipila ka mga indibidwal kay sa gikan lang sa usa ka tawo?

• Sa inyong hunahuna unsa kaha ang bililhon mahitungod sa pagtuon sa pagpamatuod ni Marcos karon nga inyo na nga natun-an ang pagpamatuod ni Mateo?

Pagdapit og mga estudyante sa pagbasa og paspas sa Marcos 1:1–4, 9–11 sa hilum nga paagi, nga mangita sa panghitabo diin gisugdan ni Marcos ang iyang istorya sa kinabuhi sa Manluluwas.

• Sa unsa nga panghitabo gisugdan ni Marcos ang iyang istorya?

Ipasabut nga ang asoy ni Marcos sa kinabuhi sa Manluluwas lahi kay sa kang Mateo. Kalit kini nga nagsugod ug paspas, gihatagan og gibug-aton ang kabalaan sa Manluluwas pinaagi sa pagtutok diha sa Iyang mga buhat ug mga milagro. Si Marcos tingali misulat sa iyang asoy basi sa unsay iyang nakat-unan gikan ni Apostol Pedro.

I-summarize ang Marcos 1:12–20 pinaagi sa pagpasabut nga human si Jesus nagpuasa sulod sa 40 ka adlaw, Siya gitintal sa yawa. Siya usab misangyaw og paghinulsol sa Galilea ug mitawag og mga disipulo nga mosunod Kaniya. (Pahinumdom: Kini nga mga asoy gitudlo og maayo diha sa mga leksyon sa Mateo 4.)

Isulat ang mga pulong nga Teritoryo sa Kaaway diha sa pisara ug pangutan-a ang mga estudyante unsa nga mga kakuyaw ang atubangon sa usa ka sundalo diha sa teritoryo sa kaaway.

Dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

Imahe

Presidente Boyd K. Packer

“Kamong mga batan-on nagdako sa teritoryo sa kaaway.

“Atong nasayran gikan sa mga kasulatan nga may gubat sa langit ug nga si Lucifer nakigbatok ug, uban sa iyang mga sumusunod, ‘gitambog ngadto sa yuta’ [Pinadayag 12:9]. Determinado siya sa pagbalda sa plano sa atong Langitnong Amahan ug nagtinguha sa pagkontrolar sa mga hunahuna ug lihok sa tanan” (“ Tambag ngadto sa mga Kabatan-onan, ” Ensign o Liahona, Nob. 2011, 16).

• Sa unsang mga paagi nga ang atong kinabuhi dinhi sa yuta sama nga anaa sa teritoryo sa kaaway?

Hangyoa ang mga estudyante sa pag-isa sa ilang mga kamot kon sila mibati na ba nga nabug-atan tungod sa dautang mga impluwensya ug mga tintasyon nga naglibut kanila. Samtang ang mga estudyante nagtuon sa Marcos 1:21–39, dapita sila sa pagpangita og usa ka kamatuoran nga motabang kanila kon sila mag-atubang sa dautang mga impluwensya ug mga tintasyon.

Dapita ang usa ka estudyante sa pagbasa og kusog sa Marcos 1:21–22. Hangyoa ang klase sa pagsunod, nga mangita kon unsay gibuhat ni Jesus sa Capernaum ug giunsa pagtubag sa mga Judeo.

• Nganong nahibulong man ang mga Judeo sa mga pagtulun-an sa Manluluwas?

• Sa inyong hunahuna unsa kaha ang gipasabut nga si Jesus nagtudlo “ingon nga may kagahum”? (Marcos 1:22).

Ipasabut nga ang mga escriba gikonsiderar nga mga eksperto sa balaod ni Moises. Sa ilang pagsangyaw kanunay silang mikutlo sa kanhi mga kadagkoan sa balaod (tan-awa sa New Testament Student Manual [manwal sa Church Educational System, 2014], 103). Agig pagkumparar, si Jesus namulong uban sa gahum ug awtoridad sa Iyang Amahan ug isip ang bantugang Jehova kinsa mihatag sa balaod ni Moises (tan-awa sa Joseph Smith Translation, Matthew 7:37 ).

• Unsay nahibaloan sa hugaw nga espiritu mahitungod ni Jesus?

• Giunsa man pagkahibalo sa hugaw nga espiritu kon kinsa si Jesus? (Ang dautang mga espiritu nga nagtinguha sa pag-angkon og pisikal nga mga lawas mao ang mga sumusunod ni Lucifer. Sila nagpuyo sa presensya sa Langitnong Amahan ug ni Jesukristo sa wala pa gisalikway gikan sa langit.)

• Kon kamo diha sa sinagoga kaniadto, unsa kaha ang inyong hunahuna mahitungod ni Jesus?

Hangyoa ang usa ka estudyante sa pagbasa og kusog sa Marcos 1:27–28. Hangyoa ang klase sa pagsunod, nga mangita kon unsay reaksyon sa mga tawo human makakita ni Jesus nga mipagula sa hugaw nga espiritu gikan sa tawo.

• Unsa man ang reaksyon sa mga tawo?

• Unsa man ang gitudlo niini nga asoy kanato mahitungod sa gahum sa Manluluwas? (Ang mga estudyante kinahanglang moila og kamatuoran sama sa mosunod: Ang Manluluwas adunay gahum batok sa yawa ug sa iyang mga sumusunod.)

• Sa unsang paagi nga ang pagkasayud niini nga kamatuoran nagtabang kanato kon kita nabug-atan tungod sa dautang mga impluwensya ug mga tintasyon nga naglibut kanato?

Dapita ang usa ka estudyante sa pagbasa og kusog sa mosunod nga pamahayag ni Presidente James E. Faust sa Unang Kapangulohan:

Imahe

Presidente James E. Faust

“Si [Joseph Smith] mipahayag, ‘Ang dautan nga mga espiritu adunay ilang mga utlanan, mga kinutuban, ug mga balaod pinaagi diin sila gidumala” (sa History of the Church, 4:576). Busa si Satanas ug ang iyang mga anghel dili gamhanan sa tanan. …

“… Ang mga paningkamot ni Satanas mahimong masanta sa tanan nga moduol ngadto kang Kristo pinaagi sa pagsunod sa mga pakigsaad ug mga ordinansa sa ebanghelyo”(“Serving the Lord and Resisting the Devil,” Ensign, Sept. 1995, 6, 7).

• Sumala ni Presidente Faust, unsay atong mabuhat aron sa pagdawat sa mas dako nga gahum sa pagpakigbatok sa yawa?

• Sumala sa bersikulo 28, unsay nahitabo human ang Manluluwas mipapahawa sa dautan nga espiritu?

I-summarize ang Marcos 1:29–39 pinaagi sa pagpasabut nga ang Manluluwas miayo sa ugangan nga babaye ni Simon Pedro nga gihilantan, miayo sa daghan pang uban nga masakiton, ug mipapahawa sa daghang mga yawa. Si Jesus mipadayon sa pagsangyaw sa Galilea.

Dapita ang mga estudyante sa pagbasa og paspas sa Marcos 1:40 sa hilum nga paagi, nga mangita kon kinsa ang miduol sa Manluluwas samtang Siya nagpadayon sa pagsangyaw sa Galilea. Hangyoa ang mga estudyante nga moreport sa unsay ilang nakat-unan. Pagdapit og estudyante sa pag-adto sa atubangan. Hangyoa ang mga estudyante sa paghunahuna nga ang estudyante sa atubangan sa kwarto adunay sanla.

Ipasabut nga ang sanla usa ka malungtaron nga sakit nga moataki sa panit, mga ugat, mga mata, mga bukog, ug ubang bahin sa lawas. Kon dili matambalan, moresulta kini ngadto sa usa ka masakit nga kamatayon. Sa karaang panahon, gituohan nga si bisan kinsa nga makahikap og sanlahon matakdan sa sakit. Itudlo ang estudyante sa atubangan sa kwarto ug pangutana:

• Kon si (pangalan sa estudyante) usa ka sanlahon nga nagpuyo sa karaang panahon, unsaon kaha siya sa pagtratar?

Ipasabut nga aron sa pagpanalipod sa panglawas ug kaayohan sa komunidad, ang mga sanlahon pugson nga papuy-on sa gawas sa lungsod. Ang balaod nagkinahanglan nga sila mosinggit og “Hugaw!” sa pagpasidaan ni bisan kinsa nga nagpaduol kanila (tan-awa sa Bible Dictionary, “Leper”; Levitico 13:44–46). Hangyoa ang pipila ka mga estudyante sa pagdrama-drama niini nga talan-awon pinaagi sa paglakaw nga molabay sa estudyante kinsa nagrepresentar sa sanlahon. Sa ilang pag-agi, hangyoa ang estudyante nga nagrepresentar sa sanlahon nga mosinggit og “Hugaw! Hugaw!” Pangutan-a ang mga estudyante nga nanglakaw unsay ilang buhaton niini nga sitwasyon. Dayon palingkura ang mga estudyante.

• Sa unsang paagi nga ang pagkaadunay sanla makaapekto sa inyong kinabuhi?

Dapita ang mga estudyante sa paghunahuna nga mga sanlahon sila sa panahon ni Jesukristo. Pangutan-a sila kon unsay ilang buhaton kon sila nakakita sa Manluluwas nga nagsingabut.

• Sumala sa Marcos 1:40, unsa man ang gibuhat sa sanlahon sa dihang iyang nakita ang Manluluwas? (Ipasabut nga ang pulong nangamuyo nagpasabut nga nagpakilooy o naghangyo.)

• Giunsa sa sanlahon sa pagpakita sa iyang hugot nga pagtuo ni Jesukristo? Sa unsang paagi nga ang mga pulong “kon buot ka” nagpasabut sa hugot nga pagtuo sa sanlahon?

Dapita ang mga estudyante sa pagbasa sa Marcos 1:41–42 sa hilum nga paagi, nga mangita kon unsay gibuhat sa Manluluwas sa hangyo sa tawo .

• Unsay nakapainteres kaninyo mahitungod sa gibuhat sa Manluluwas sa paghangyo sa tawo?

• Kon kamo kadto ang sanlahon, unsay kahulugan niana kaninyo nga hikapon sa Manluluwas? Ngano man?

• Sa unsang paagi nga mausab ang inyong kinabuhi kon si Jesukristo miayo sa inyong sanla?

Isulat ang mosunod nga pahayag diha sa pisara: Sa unsang paagi nga ang sanla makumpara sa sala?

Aron sa pagtabang sa mga estudyante nga makasabut kon sa unsang paagi ang sanla ikapahisama sa pagpakasala (tan-awa sa Levitico 14), dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

Imahe

Elder Bruce R. McConkie

“Ang sanla sa kapanahonan sa biblia, agig dugang sa makapaalaut nga pisikal nga mga epekto niini, gitan-aw nga simbolo sa sala ug pagkahugaw, nagpasabut nga sama nga kining dautan nga sakit mokutkut ug modaut sa pisikal nga panglawas, mao usab ang sala nagkutkut ug nagdaut sa espiritwal nga bahin sa tawo” (The Mortal Messiah, 4 vols. [1979–81], 2:45).

• Sa unsang mga paagi nga ang sanla makumpara sa sala? (Sa pagkumpara sa sanla ngadto sa sala, siguroa nga ang mga estudyante makasabut nga ang mga sakit dili kinahanglan nga tungod dayon sa sala.)

Dapita ang usa ka estudyante sa pag-usab og basa og kusog sa Marcos 1:40–42, niining higayuna ipuli ang makasasala ngadto sa sanlahon ug ang sala ngadto sa sanla. Hangyoa ang klase sa pagsunod, nga mangita kon sa unsang paagi atong maikumpara ang pagkaayo niini nga sanlahon ngadto sa pagkalimpyo gikan sa sala.

• Samtang imong gibasa ang mga bersikulo niini nga paagi, unsa nga mga pulong ang nagsugyot sa ideya nga mapasaylo?

• Sa unsang paagi nga atong maikumpara ang gibuhat sa sanlahon aron malimpyohan sa sanla ngadto sa unsay kinahanglan natong buhaton aron malimpyohan sa sala?

• Unsa nga baruganan ang atong makat-unan pinaagi sa pagkumpara sa pagkaayo sa sanlahon ngadto sa pagkalimpyo gikan sa sala? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga baruganan: Samtang kita mogamit sa hugot nga pagtuo ug moduol sa Manluluwas, Siya malooy kanato ug molimpyo kanato gikan sa sala. Gamit ang mga pulong sa mga estudyante, isulat kini nga baruganan diha sa pisara.)

• Sa unsang mga paagi nga kita kinahanglang mogamit sa hugot nga pagtuo ug moduol ngadto sa Manluluwas aron Siya makapasaylo kanato sa atong mga sala?

Dapita ang mga estudyante sa pagkonsiderar pag-usab kon unsa ang kinabuhi sa sanlahon sa wala pa ug sa human na siya naayo.

• Sa unsang paagi ang pagduol kang Jesukristo aron malimpyohan gikan sa sala makausab sa kinabuhi sa usa ka tawo?

• Kanus-a ka nakakita nga nausab ang kinabuhi sa usa ka tawo human malimpyohan sa sala pinaagi sa Pag-ula ni Kristo? (Pasidan-i ang mga estudyante batok sa paghingalan sa mga indibidwal o paghisgut sa ilang mga sala kaniadto.)

Hangyoa ang mga estudyante sa pagpamalandong kon unsa nga mga sala sila kinahanglan nga malimpyohan. Dapita ang mga estudyante sa pagduol ngadto sa Manluluwas pinaagi sa paggamit og hugot nga pagtuo diha Kaniya pinaagi sa pag-ampo, paghinulsol, ug pagkamasulundon aron Siya makahimo kanila nga limpyo. Ikonsiderar ang pagpakigbahin sa imong pagpamatuod sa makalimpyo nga gahum sa Pag-ula sa Manluluwas.

Dapita ang pipila ka estudyante nga magpuli-puli sa pagbasa og kusog sa Marcos 1:43–45. Hangyoa ang klase sa pagpangita sa mga instruksyon nga gihatag sa Manluluwas ngadto sa naayong sanlahon. Hangyoa ang mga estudyante nga moreport sa unsay ilang nakat-unan.

Ipasabut nga ang balaod ni Moises nagkinahanglan nga kadtong naayo sa sanla mopakita sa ilang kaugalingon ngadto sa usa ka sacerdote [pari] sa templo ug mohalad og sakripisyo.

• Unsa man ang gibuhat sa tawo human siya gipasidan-an sa Manluluwas nga dili manugid sa uban?

• Unsa ang nahitabo tungod sa pagpakatap sa tawo sa balita sa iyang pagkaayo?

Ikonsiderar ang pagtapos sa leksyon pinaagi sa pagpangutana sa mga estudyante unsa ang nakaipainteres kaayo kanila sa mga buhat ni Jesukristo nga narekord diha sa Marcos 1.