1. He pono taku e mea atu nei ki a koutou, e oku hoa, nana ka hoatu e ahau he whakakitenga, me te whakahaunga ki a koutou, kia matatau ai koutou ki, nga mahi ma koutou hei whakaora, hei whakaputa mai i o koutou teina, kua oti na te whakamarara ki nga wahi katoa o te whenua o Hiona;

2. Ka oti hoki ratou te whiu atu, te patupatu e nga ringa o oku hoa riri, heoi kia taka toku wa e kore e hopohopo taku riringa i taku riri ki runga i a ratou.

3. Naku ano i a ratou mahi tutu i tuku, a mohoa noa nei, kia ki ai te mehua o a ratou mahi tutu, ma reira hoki e purena ai to ratou kapa;

4. Hei mea ano hoki e pakia ai te hunga ka oti te karanga ki toku ingoa, ki tetahi pakinga nanakia rawa, mo tetahi wa poto, mo ratou kihai i whakarongo ki nga akoranga, ki nga ture i hoatu e ahau ki a ratou.

5. He pono taku e mea atu nei ki a koutou, kua whakapumau ahau i tetahi oati hei painga mo toku iwi, ara ki te whakarongo ratou i tenei haora pu ano ki te kupu tera e hoatu e ahau, e te Ariki ki a ratou.

6. Nana, ki te pera ratou ka timata to ratou kake haere ki runga i oku hoa riri i tenei haora pu ano; naku tenei i oati,

7. A, ma to ratou ngohengohe ki te pupuri i nga kupu katoa e korerotia atu e ahau, e te Ariki, e to ratou Atua ki a ratou, ka kore rawa e mutu to ratou kake haere, kia meinga ra ano nga kingitanga o te ao ki raro i oku waewae, kia riro hoki te whenua i te Hunga Tapu hei kainga mo ratou a ake, ake, ake.

8. Otira, ki te kahore ratou e pupuri i aku ture, e ngohengohe ranei ki aku kupu katoa katahi ratou ka taea e nga kingitanga o te ao,

9. No te mea i whakaturia ratou hei maramatanga ki te ao, hei kai-whakaora hoki mo nga tangata;

10. A, ki te kahore ratou e tu hei kai-whakaora mo nga tangata, ka rite ratou ki te tote kua ngaro tona ha, heoi ano tona painga kia akiritia ki waho kia takahia ki raro i nga waewae o ona tangata.

11. Nana, he pono taku e mea atu nei ki a koutou, kua puta taku kupu, ka whakahokihokia mai ano o koutou teina kua oti nei te whakamarara ki o ratou kainga tupu, ka timata hoki te hanga i nga wahi uruurua o Hiona;

12. Hei muri hoki i te whakapawera puta mai ai te manaakitanga, ko taku ano ia i mea ai ki a koutou i mua.

13. Nana, ko te manaakitanga tenei i whakaaria e ahau e puta mai i muri i o koutou whakapaweratanga, i te whakapaweratanga ano hoki o o koutou teina; ko to koutou hokonga, me te hokonga i o koutou teina, ara ko te whakahokinga i a ratou ki te whenua o Hiona, meake whakaturia, kore ake hoki ona hinganga i muri atu.

14. Otiia, ki te whakapokea e ratou o ratou wahi ka tukua ki a ratou, ka whakataka iho ratou e kore hoki ahau e tohu i a ratou, ki te whakapokea e ratou nga wahi mo ratou.

15. Nana, ko taku kupu tenei ki a koutou, ko te hokonga i Hiona e puta mai i roto i te kaha;

16. No reira, ka ara ake i a au he tangata ki toku iwi, a ka arahina ratou, ka rite ki a Mohi i arataki nei i te whanau o Iharaira,

17. No te whanau hoki koutou o Iharaira, no te uri o Aperahama, no reira ma te kaha ka puta ai koutou i te whare pononga, ma te ringa ano kua oti te whakamaro:

18. Pera me o koutou matua, he mea arahi mai ratou i mua, waihoki ka pera ano te hokonga o Hiona.

19. No reira, kei pouri o koutou ngakau, e kore hoki taku ki, ki a koutou e pera me taku i mea ai ki a koutou matua; ko taku anahera ka haere i mua i a koutou, ko taku mata ia, kahore;

20. Engari, ka penei taku ki a koutou, ka haere toku anahera i mua i a koutou me toku mata ano, a ina taka te wa ka riro i a koutou te whenua pai rawa.

21. He pono, he pono taku e mea atu nei ki a koutou, ko taku pononga, ko Pauraka Ere (Hohepa Mete, tamaiti), te tangata i whakaritea ra e ahau ki te pononga i mea atu ra te Ariki o te maara-waina ki a ia i roto i te kupu whakarite i hoatu na ki a koutou.

22. No reira, ma taku pononga, ma Pauraka Ere (Hohepa Mete, tamaiti), te kupu ki te marohirohi o toku whare, ki nga tai-tama, ki te hunga ano kua waenganui o ratou tau, kia huihui mai ratou ki te whenua o Hiona, ki te whenua i hokona e ahau ki nga moni i motuhia mai ki a au;

23. Me tono mai e nga hahi (peka) katoa te hunga matau, me a ratou moni, ka hoko mai ai he whenua kia rite ki taku i whakahau atu ai ki a ratou;

24. Me he mea oku hoa-riri ka haere mai ki a koutou hei pei atu i a koutou i toku whenua ataahua ka oti nei te whakatapu e ahau hei whenua mo Hiona; ae ra ka pei i a koutou i runga i a koutou whenua ake i muri mai o enei mea katoa kua mauria mai nei e koutou ki toku aroaro hei whakaatu i to ratou he, na, me kanga ratou e koutou;

25. Ko ta koutou hoki e kanga ai, ka kanga e ahau, me rapu utu ano koutou i oku hoa-riri;

26. Ka noho tonu ki a koutou toku mata, i a koutou ka rapu utu i oku hoa-riri, te toru, te wha o nga whakatupuranga o te hunga e kino ana ki a au.

27. Kaua tetahi tangata e wehi ki te tuku i a ia ano kia mate mo te whakaaro ki a au, ko ia hoki e tuku ana i a ia kia mate hei whakaaro ki a au, ka kite i te ora;

28. Ko te tangata ia e kore e tuku i a ia kia mate he whakaaro ki a au, e hara i te akonga naku.

29. Ko taku e pai ai kia haere taku pononga a Hirini Rikitana, kia whakaarahia tona reo i roto i nga whakaminenga o te tai rawhiti, kia akona ai e ia nga hahi (peka) kia mau ki nga ture kua hoatu e ahau ki a ratou mo runga i te whakahokinga mo te hokonga o Hiona.

30. Ko taku e pai ai, kaua aku pononga a Paare P. Parata raua ko Raimana Waiti e hoki atu ki te whenua o o raua teina, kia ahei ra ano raua ki te whakahuihui tangata, kia haere ki te whenua o Hiona, ara kia tekau, kia rua tekau, kia rima tekau, kia kotahi rau ranei, tae noa ki te rima rau o te hunga marohirohi o toku whare.

31. Nana, ko taku tenei e pai ai; inoi, a ka hoatu ki a koutou, otira kahore nga tangata katoa i te mahi i taku i pai ai;

32. No reira, ki te kahore e riro mai i a korua e rima rau, ata rapua ano, me kore e riro mai i a korua te toru rau;

33. A, ki te kahore e riro mai i a korua te toru rau, ata rapua ano me kore e riro mai i a korua kotahi rau.

34. Na, he pono taku e mea atu nei ki a korua, ka hoatu e ahau tenei ture ki a korua, kaua rawa korua e haere ki te whenua o Hiona, kia riro mai ra ano i a korua kotahi rau o te hunga marohirohi o toku whare, hei haere tahi me korua ki te whenua o Hiona.

35. No reira, pera me taku i mea ai ki a koutou, inoi, a ka hoatu ki a koutou; kia tika te inoi me kore taku pononga a Pauraka Ere (Hohepa Mete, tamaiti), e haere tahi me korua, hei kai-whakahaere tikanga i waenganui o toku iwi, me te whakatu ano i toku kingitanga ki runga i te whenua kua whakatapua, me te whakau hoki i nga tamariki o Hiona ki runga ki nga ture, ki nga whakahaunga kua hoatu, tera hoki e hoatu ki a koutou.

36. Ko nga wikitoria katoa, ko nga kororia katoa e hoatu ana ki a koutou mo roto i to koutou mataara, i to koutou whakapono ma nga inoi whakapono hoki.

37. Tukua taku pononga a Paare P. Parata kia haere raua ko taku pononga ko Hohepa Mete, tamaiti.

38. Ko taku pononga, ko Raimana Waiti, tukua kia haere raua ko Hirini Rikitana.

39. Ko taku pononga ko Hairama Mete, tukua kia haere hei hoa mo Pererika G. Wiremu.

40. Ko taku pononga ia, ko Orihana Haiti, me haere hei hoa mo taku pononga, mo Orihana Parata ki nga wahi e tohutohutia ai e taku pononga, e Hohepa Mete, tamaiti, hei mea e tutuki ai enei ture e hoatu nei e ahau ki a koutou, a ko te toenga waiho mai i oku ringa. Koia ano. Amine.