1. E Oriwa Kautere, he pono, he pono taku e mea nei ki a koe, he pono e ora ana te Ariki, ko ia nei tou Atua me tou Kai-hoko, waihoki he pono ka whiwhi koe ki tetahi matauranga ki nga mea e inoi ai koe i runga i te whakapono, ahakoa he aha, ahakoa he aha tau e inoi ai i runga i te ngakau pono, me te whakapono tonu tera koe e whiwhi ki tetahi matauranga ki nga whaonga o nga tuhituhinga tawhito, he mea no onamata, kei roto nei nga wahi o aku karaipiture kua oti te korero, he mea na te whakaaturanga o toku Wairua;

2. Ae ra, nana, maku e korero ki a koe ki roto ki tou hinengaro, ki roto hoki ki tou ngakau, he mea ma te Wairua Tapu, tera e tae ki runga ki a koe, noho ai hoki ki roto i tou ngakau.

3. Na, nana, ko te Wairua tenei a te whakakitenga; nana, ko te Wairua tenei i arahina ai e Mohi nga tamariki o Iharaira ma roto i te Moana Whero i runga i te whenua maroke;

4. Na reira ra, koia tenei tou homaitanga; tonoa ki a ia, a ka koa koe, no te mea mana koe e whakaputa ki waho i nga ringaringa o ou hoa-riri, i te mea, me i kahore te penei, ka patua koe e ratou, a ka kawea tou wairua ki te whakangaromanga.

5. E ! Maharatia enei kupu, a kia mau ki aku ture. Maharatia hoki koia tenei tou homaitanga.

6. Na, e hara tenei i te katoa o tou homaitanga; he homaitanga atu ano tou, koia nei ko te homaitanga o Arona: Nana, kua korerotia e ia nga mea maha ki a koe;

7. Nana, kahore atu he mana, ko te mana anake o te Atua, e whakanohoia ai koe ki te homaitanga o Arona;

8. Na reira, kaua e ruarua, ko te homaitanga hoki ia o te Atua; a ka puritia e koe ki roto i ou ringaringa, a ka mea i nga mahi whakamiharo; e kore hoki e taea e tetahi mana te tango atu i roto i ou ringa, no te mea ko te mahi ia a te Atua.

9. A, no reira, ahakoa he aha tau e inoi mai ai ki a au kia korerotia ki a koe, ma roto i taua ritenga, (taua homaitanga) ka tukua e ahau ki a koe, a ka whai matauranga koe ki taua mea:

10. Kia mahara, ki te kahore he whakapono e kore e taea e koe tetahi mea, na reira me inoi i runga i te whakapono. Kei takaro ki enei mea; kaua e inoia nga mea kahore nei e tika kia inoia e koe:

11. Inoi kia mohio koe ki nga mea ngaro a te Atua, kia whakamaori hoki koe, kia whiwhi matauranga i aua tuhituhinga onamata katoa i huna ra, ara, nga mea tapu, a ka rite ki tou whakapono te meatanga atu ki a koe.

12. Nana, ko ahau tenei kua korero nei i tenei; a ko ahau ano ia i korero ra ki a koe no te timatanga ra ano. Amine.