1. He pono taku e mea atu nei ki a koutou ki te hunga kua whakamine mai nei kia mohio ki toku whakaaro mo runga mo te whakaputanga i taku iwi e pehia nei e nga whiu.

2. Nana, ko taku kupu tenei ki a koutou, me he mea kahore nga hara o taku iwi, e korero ana tenei ahau mo te Hahi, e hara i te mea mo te tangata kotahi, penei kua whakaputaina noatia atu ratou;

3. Otira, nana, kahore ano ratou kia mohio ki te ngohengohe ki nga mea e hiahiatia ana e ahau i a ratou, engari e ki tonu ana i nga ahua katoa o te whakarihariha, kahore ano e hoatu i a ratou taonga ki te hunga rawa-kore, ki te hunga hoki e pangia ana e te mate, kia rite ai ki ta te Hunga Tapu tikanga,

4. Kahore ano ratou i te kotahi, i rite ki te kotahitanga o te ture o Tikitiki-o-rangi (celestial);

5. No te mea e kore a Hiona e taea te whakaara ake ma te ngohengohe anake ki te ture o Tikitiki-o-rangi (celestial), ki te kore, e kore ahau e manako ki a ia,

6. He mea tika kia pakia toku iwi, kia mohio ra ano ratou ki te ngohengohe; a, me he mea e tika ana, ma nga mea e whakawhiua nei ratou e papaki.

7. Na, e hara tenei kupu aku mo te hunga kua whakaritea nei hei kai arahi mo toku iwi, ko ratou nei hoki nga kaumatua tuatahi o taku Hahi, no te mea kahore ratou katoa i te taka ki raro i tenei whakaheanga.

8. Engari e korero ana ahau mo aku peka i nga wahi pamamao—he maha hoki o ratou taihoa ka mea, kei hea to ratou Atua ? Nana, ka whakaora ianei ia i a ratou i te wa o te raru, ki te kahore, e kore matou e haere ki Hiona kahore ano e hoatu i a matou moni.

9. No reira, na runga na te haranga o toku iwi, e tika ana i roto i a au, kia tatari roa aku kaumatua mo te hokonga o Hiona,

10. Ma reira hoki ratou (nga kaumatua) e rite pai ai mo a ratou mahi, taku iwi hoki e ata whakaakona ai, e whiwhi ai ki te matauranga, me te mohio ki nga mahi ma ratou, me nga mahi e hiahitia ana e ahau i a ratou.

11. A e kore enei mea e puta mai kia homai ra ano he kaha ki a ratou i runga;

12. No te mea, nana, kua rite i a au tetahi hoatutanga nui, me tetahi manaakitanga meake ka ringihia ki runga i a ratou, ki te mea ka mau tonu to ratou whakapono, mo to ratou whakaiti i mua i toku aroaro;

13. No reira, he mea tika i roto i a au kia manawanui aku kaumatua mo tetahi wa iti mo te hokonga o Hiona;

14. No te mea kahore oku whakaaro kia whakaara pakanga ratou mo Hiona; engari me waiho kia rite ki taku i whakahau ai i mua, maku e whakatutuki. Maku e whawhai a koutou pakanga.

15. Nana, kua unga atu e ahau te kai whakamate ki te, whakamoti i oku hoa riri: a, e kore e maha nga tau e tu mai nei ka hatepea atu ratou kei whakanoa ratou i toku whenua, hei kohukohu ki toku ingoa, ki runga i nga whenua, i whakatapua e ahau hei kohikohinga mai mo aku Hunga Tapu.

16. Nana, kua whakahau ahau ki taku pononga, ki a Pauraka Ere (Hohepa Mete, tamaiti), kia mea atu ki te marohirohitanga o toku whare, ara ki aku toa-taua, ki aku taitama, me nga mea ahua pakeke, kia huihui mai ratou ki te whakaora i taku iwi, me te whakahoro ano i nga pourewa o oku hoa riri, me te whakamarara i o ratou heteri;

17. Heoi, kihai te marohirohitanga o toku whare i whakarongo ki aku kupu.

18. He ahakoa ra, ko te hunga o ratou i whakarongo ki aku kupu, kua rite i a au tetahi hoatutanga mo ratou, ki te mau tonu to ratou u.

19. Kua rongo hoki ahau i a ratou inoi, a maku e whakamanamana; he mea tika hoki i roto i a au kia penatia ratou hei whakamatautau i to ratou whakapono.

20. He pono taku e mea atu nei ki a koutou, ka hoatu e ahau tenei whakahaunga ki a koutou, ara ko te hunga katoa kua tae mai ki tenei wahi, ki te kaha ratou ki te noho i enei wahi, me waiho kia noho;

21. A, ko te hunga o ratou e kore e ahei ki te noho, he tamariki nei a ratou kei te tai rawhiti, tukua ratou kia noho mo tetahi wa iti, kia rite ki ta taku pononga ki ta Hohepa e whakarite ai;

22. Maku hoki ia e tohutohu mo runga i tenei mea, a ko nga mea katoa e whakarite ai ia mo ratou, ka whakamanaia.

23. A ko toku iwi katoa e noho ana i nga whenua katoa e patata mai ana kia mau ta ratou whakapono, kia mau ki te inoi, me te whakaiti ano i a ratou i toku aroaro, a kaua ratou e whakaatu i nga mea kua whakaaturia e ahau ki a ratou, kia mohio ra ano i a au he mea pai kia whakaaturia.

24. Kaua e korero mo nga whakawakanga, kaua ano e whakamanamana mo nga mahi nunui, engari me ata whakamine mai, a ki te rite nga whakaaro o te iwi, kia tokomaha koutou ki te wahi kotahi;

25. Nana, ka meinga koutou e ahau kia whakaaroa paitia e ratou, kia noho ai koutou i roto i te rangimarie i te pai, i a koutou e mea ana ki te iwi, kia tika te whakawa i a matou, kia rite ki ta te ture te meatanga mai ki a matou, a rapua hoki he utu mo o matou rarunga.

26. Nana, ko taku kupu tenei ki a koutou ki oku hoa, ki te penei ta koutou ahua, ka tirohia paitia koutou e tenei iwi, tae noa ki te wa e tino nui ai te taua o Iharaira;

27. Maku ano e whakangawari nga ngakau o te iwi i tenei wa, i tenei wa, pera ano me taku whakangawaritanga i te ngakau o Parao, he mea e whai taima ai taku pononga a Pauraka Ere (Hohepa Mete, tamaiti) me Panimi (aku kaumatua), naku hoki ratou i whiriwhiri, ki te whakawhaiti mai i te kaha o toku whare,

28. Kia whai taima ai ano hoki hei tononga atu i etahi tangata whai whakaaro, hei whakatutuki i taku i ki ai kia hokona mai nga whenua katoa o te Takiwa Tiakihana, e taea ana te hoko, tae atu ki nga whenua i roto i nga Takiwa e patata ana;

29. Ko taku hoki e pai ai ko enei whenua katoa me hoko mai, a i muri mai i te hokonga me riro aua whenua i aku Hunga Tapu kia rite ki nga ture o te whakatapunga kua hoatu na e ahau;

30. I muri i te hokonga mai o enei whenua, na e kore ahau e whakatau i te he ki nga taua o Iharaira me he mea ratou ki te hoki ano ratou ki o ratou whenua, i hokona mai nei e ratou ki te moni i mua, me he mea ranei whakahoroa e ratou nga pourewa o oku hoa-riri kei runga nei i aua whenua, me he mea ranei whakamararatia o ratou heteri, me te rapu utu i oku hoa-riri, a te toru te wha ranei o nga whakatupuranga o te hunga e kino ana ki a au.

31. Otira i te tuatahi, tukua taku taua kia tupu, kia nui, tukua hoki kia tapu i mua i a au, kia rite ai te ataahua ki te ra, te marama ki te marama, me ona haki kia wehingia e nga iwi;

32. Kia whakaae ai nga kingitanga o te ao, ae, he pono, ko te kingitanga o Hiona te kingitanga o te Atua raua ko tona Karaiti; no reira, haere tatou i raro i ona ture.

33. He pono ko taku kupu tenei ki a koutou, he mea tika ki a au kia tukua nga kaumatua tuatahi o taku Hahi kia whiwhi ki nga manaakitanga mo ratou, he mea no runga i roto i toku whare, kua whakahaua na e ahau kia hanga ake ki toku ingoa i roto i te whenua o Katarana;

34. I muri i te hokonga mai o Hiona, ko nga whakahaunga katoa i hoatu e ahau mo Hiona, me to reira ture me mahi, me whakatutuki.

35. Kua hipa tenei te ra o te karangatanga, ko te ra tenei o te whiriwhiringa, na, me whiriwhiri te hunga e tika ana;

36. A, ma te reo o toku Wairua e whakaatu ki taku pononga te hunga e whiriwhiria ana, a e whakatapua hoki ratou;

37. A, me he mea ratou ki te whakarongo ki te tohutohu e hoatu ana ki a ratou, ka whiwhi ratou ki te kaha i muri i nga ra maha, e taea ai e ratou te mahi nga mea maha mo Hiona.

38. Na, ka mea atu ano ahau ki a koutou, matea nuitia te rangimarie, e hara i te mea ki te hunga anake i tukino i a koutou, engari ki nga iwi katoa;

39. Me te whakaara ano i te haki o te maunga-a-rongo, me te karanga ano kia tau te rangimarie ki nga pito o te ao;

40. A me nonoke koutou kia mau te rongo ki te hunga i tukino i a koutou, kia rite ki te reo o te Wairua i roto na i a koutou, a ka mahi nga mea katoa i te pai mo koutou.

41. No reira, kia u, nana, titiro, kei a koutou ahau tae noa ki te mutunga. Koia ano. Amine.