1. He pono ko te kupu tenei a te Ariki ki taku pononga ki a Wiremu Maaka, ki taku pononga hoki ki a N. K. Witini, kia hohoro ta korua whakaoti i a korua whakararu, ka puta atu ai i te whenua o Katarana i mua atu i taku, i ta te Ariki tukunga iho ano i te huka ki te mata o te whenua;

2. Na, kia oho ake ratou, kia maranga ake hoki, kia puta mai kaua e turi no te mea, naku, na te Ariki tenei i whakahau;

3. No reira ki te turi ratou, ka kino te tukunga iho ki a ratou,

4. Na, me ripeneta ratou mo a ratou hara katoa, mo a ratou whakaaro apo hoki i mua i toku aroaro, e ai ta te Ariki, he aha koia te whenua ki a au e ai ta te Ariki.

5. Ko nga whenua i Katarana me tuku mo nga nama, e ai ta te Ariki. Me tuku ratou e ai ta te Ariki, a ko te toenga iho, ki roto tonu i o koutou ringaringa, e ai ta te Ariki;

6. Kahore ianei i a au nga manu o te rangi, te ika o te moana, me nga kararehe e haere ana i runga i nga maunga ? E hara ianei i a au i hanga te whenua ? Kahore ianei i roto i te kapu o toku ringa nga taua a nga iwi o te ao ?

7. E kore ianei ahau e whakapuawai i nga wahi mokemoke, e mea hoki kia whai hua ina tona tini, e ai ta te Ariki ?

8. Kahore ianei i te watea he nohoanga i runga i nga maunga o Arama-onatai-Amana, i nga mania hoki o Oraha Hineha, i te whenua i nohoia nei e Arama, a kia apo rawa o koutou ngakau ki te whenua iti rawa, na tona rite na ano he maturutanga wai, whai rawa koutou ki tena i nga mea nunui ake ?

9. No reira haere ake koutou ki te whenua o toku iwi, ara ki Hiona.

10. Na, kia pono taku pononga a Wiremu Maaka, ki nga mea torutoru, a ka meinga ia hei rangatira mo nga mea maha. Me tu ia hei kai whakahaere i waenganui o toku iwi i te pa o Wha Weta, a kia tau ki a ia nga manaakitanga o toku iwi.

11. Na, kia whakama taku pononga a N. K. Witini, mo nga mahi a te ropu Nikorataina me a ratou mahi whakarihariha ngaro mo ona whakaaro horihori hoki i mua i a au, e ai ta te Ariki, a me haere ake ia ki te whenua o Arama-onatai-Amana, hei pihopa mo toku iwi, e ai ta te Ariki, e hara i te mea hei noho noa, engari hei tino pihopa, e ai ta te Ariki.

12. Me tenei ano, ko taku kupu tenei ki a koutou, kei te mahara tonu ahau ki taku pononga ki a Oriwa Kerenetia, nana, he pono taku e mea atu nei ki a ia, ka maharatia tona ingoa i nga whakatupuranga katoa, ake, ake, ake, e ai ta te Ariki.

13. No reira, ko ia hei mangai mo te Tumuakitanga Tuatahi o toku Hahi, hei whakaputa i a ratou e ai ta te Ariki, a ina hinga ia ka ara ake ano ia, ko ana patunga tapu hoki ka tino tapu rawa ki a au, ka nui atu i ana manaakitanga e ai ta te Ariki;

14. No reira kia hohoro tana haere ake ki te whenua o Hiona, a ina taka te wa ka meinga ia hei kai hokohoko taonga ki toku ingoa, hei painga mo toku iwi e ai ta te Ariki;

15. No reira, kaua tetahi tangata e whakahawea ki taku pononga ki a Oriwa Kerenetia, engari kia tau nga manaakitanga o toku iwi ki runga ki a ia ake, ake, ake.

16. Me tenei ano he pono taku e mea atu nei ki a koutou, kia mahara aku pononga katoa i te whenua o Katarana ki te Ariki, ki to ratou Atua, ki toku whare ano hoki, kia puritia kia tapu, a ina taka toku wa ka whakahoroa nga kai whakawhitiwhiti moni e ai ta te Ariki. Koia ano. Amine.