1. Kua tata tetahi mahi nui whakamiharo te puta mai ki waenganui i nga tamariki a te tangata.

2. Nana, ko te Atua ahau, kia whai-whakaaro ki taku kupu e tere nei, e kaha nei, koi atu i te hoari matarua, a wehea noatia nga ponapona me te hinu wheua, no reira whakarangona taku kupu,

3. Titiro, kua ma te maara, kua rite mo te kotinga, no reira ko ia e hiahia ana ki te kokoti, tukua ia kia aki iho i tana toronaihi i runga i tona kaha, kokoti ai, i te roanga o te ra, kia purangatia ai mo tona wairua he oranga mutunga kore i roto i te kingitanga a te Atua;

4. Ae ra, ko ia e aki iho ai i tana toronaihi kokoti ai, kua karangatia nga pera e te Atua;

5. No reira e, ka inoi mai koe ki a au ka whiwhi koe, e, ka patuki koe ka uakina ki a koe.

6. Na, i te mea kua inoi mai koe, nana, ko taku tenei ki a koe, puritia aku whakahaunga, a me tohe ki te whakaputa, ki te whakapumau hoki i nga mahi mo Hiona.

7. Erangi te matauranga kia rapua, kaua te taonga, a nana, ka hurahia nga mea ngaro a te Atua ki a koe, a ko reira koe whai-taonga ai; ina ko te tangata he oranga-tonutanga tona e whai-taonga ana ia.

8. He pono, he pono taku e mea atu nei ki a koe, ka rite ki tau e hiahia nei i a au, te meatanga atu ki a koe: a, me he mea e hiahia ana koe, ka ai koe hei mea e meatia ai nga painga nunui i roto i tenei whakatupuranga.

9. Kati ano te kupu atu ki tenei whakatupuranga he ripenetatanga anake. Puritia aku whakahaunga, awhinatia hoki te whakaputanga mai o taku mahi, kia rite ki oku whakahaunga, ka manaakitia ai koe.

10. Na, kei a koe he homaitanga, ara, ki te hiahia koe i a au i runga i te whakapono, me te ngakau pono, e whakapono ana ki te kaha o te Karaiti, ara, ki toku kaha e korero atu nei ki a koe, ka riro atu i a koe he homaitanga;

11. No te mea, nana, ko ahau tenei e korero nei, nana, ko ahau te maramatanga e tiaho ana i roto i te pouritanga, a i runga i toku mana ka hoatu e ahau enei kupu ki a koe.

12. A tena, he pono he pono taku e mea atu nei ki a koe, whakawhirinaki atu ki taua Wairua e arahi nei kia mea i te pai: ae ra, kia mahi i te tika, kia mahaki te haere, kia tika hoki te whakarite whakawa, a ko taku Wairua tena.

13. He pono, he pono taku e mea atu nei ki a koe, ka tukua atu taku Wairua ki a koe; mana tou hinengaro e whakamarama, mana hoki e whakaki tou wairua ki te koa.

14. A hei reira koe mohio ai, ara, ma tenei e mohio ai koe ki nga mea katoa e pa ana ki nga mea o te tika, ahakoa tau e hiahia ai i a au i runga i te whakapono, me te whakapono ano ki a au tera koe e whiwhi.

15. Nana, ka whakahaua koe e ahau, kaua koe e mea kua karangatia koe ki te kauwhau, kia karangatia ra ano koe:

16. Me tatari poto ake, kia riro ra ano i a koe taku mahi, taku kamaka, taku Hahi me taku Rongo-pai kia tino mohio ai koe ki taku akoranga;

17. A ko reira nana, ka rite ki ou hiahia, ae ra, ka rite ki tou whakapono te meatanga atu ki a koe.

18. Puritia aku whakahaunga, noho marie koe, tono atu ki taku Wairua;

19. Ae ra, whakapaua tou ngakau kia piri mai ki a au, kia awhina ai koe i te whakaputanga mai ki te maramatanga i aua mea kua oti te korero; ae ra i te whakamaoritanga o taku mahi: (tuhituhinga) kia manawanui kia oti ra ano taua mahi i a koe

20. Nana, ko tau mahi tenei; ko te pupuri i aku whakahaunga, ae ra, i runga i tou uaua i tou hinengaro, i tou kaha katoa;

21. Kaua e whai ki te whakapuaki i taku kupu, erangi matua whai kia whiwhi ki taku kupu, katahi ka whakangawaritia tou arero; ko reira, ki te hiahia koe, ka riro i a koe taku Wairua me taku kupu, ae ra, me te mana hoki o te Atua tae atu ki te meatanga i nga tangata kia whakapono;

22. Heoi i tenei wa me noho puku koe, akona taku kupu kua puaki atu nei ki waenganui i nga tamariki a te tangata, a, akona hoki taku kupu era e puta atu ki waenganui i nga tamariki a te tangata; ara, tera e whakamaoritia ana inaianei, ae ra, tae noa ki te rironga i a koe o te katoa e tuku atu ai ahau ki nga tamariki a te tangata i tenei whakatupuranga, a ko reira ka tapiritia atu nga mea katoa.

23. Nana, ko Hairama koe, ko taku tama, rapua te kingitanga o te Atua, a ka apititia nga mea katoa e rite ana ki te mea e tika ana.

24. Me hanga ki runga ki taku kamaka, koia nei te Rongo-pai.

25. Kaua e whakakahore i te Wairua o te whakakitenga, i te Wairua ranei o te poropititanga; aue hoki te mate mo te tangata e whakakahore ana ki enei mea.

26. No reira, tiakina ki roto i tou ngakau tae noa ki te wa e whakaaro ai ahau i runga i toku whai-whakaaro, hei haerenga atu mou.

27. Nana, e korero atu ana ahau ki te katoa he hiahia pai nei o ratou, kua aki iho nei hoki i a ratou toronaihi hei kokoti.

28. Nana, ko Ihu Karaiti ahau, ko te Tama a te Atua, ko ahau te ora me te maramatanga o te ao.

29. Ko ahau ano tera i haere atu ki aku ake, a kihai aku ake i manako mai ki a au;

30. Ko tenei, he pono, he pono taku e mea nei ki a koe, ko te hunga katoa e manako mai ana ki a au, ka tukua e ahau ki a ratou nga tikanga e meinga ai ratou hei tamariki ma te Atua, ae ra, ki te hunga hoki e whakapono ana ki toku ingoa. Amine.