1. Patai.—He aha te moana karaihe i korerotia ra e Hoani i te 4 o nga upoko, te 6 o nga rarangi o nga Whakakitenga ?

Whakahoki.—Ko te whenua nei tena i te mea ka oti ia te whakatapu, e kore hoki te mate e tae ki a ia, ko te ahua tuturu tena mona.

2. P.—He aha te tikanga o nga kararehe e wha i korerotia ra i roto i taua rarangi ano ?

Wha.—He kupu whakarite ena na Hoani te Kaiwhakakite i a ia e whakamarama ana i te ahua o te rangi, te Pararaiha o te Atua; i a ia e whakamarama ana i te hari o te tangata, o nga kararehe, o nga mea ngokingoki, o nga manu hoki o te rangi; ko te mea wairua, kei to te mea maori te ahua; a ko te mea maori, kei to te mea wairua te ahua, te wairua o te tangata rite tonu tona ahua ki te ahua o tona tinana; a pera ano te wairua o te kararehe, me era atu mea katoa i hanga e te Atua.

3. P.—Nga kararehe e wha na e whaiti ana ranei ta Hoani korero mo ratou ake, e tu ana ranei ratou hei whakakapi mo era atu ahua kararehe ?

Wha.—Ko te korero a Hoani e whaiti ana mo aua kararehe e wha, a i whakakitea ratou ki a Hoani, ko ratou hei whakaatu i te kororia o nga ahua mea ora, tena i tona turanga mai ano o te orokohanganga, i roto hoki i te hari mutunga-kore.

4. P.—He aha te tikanga o nga kanohi, o nga parirau o nga kararehe ?

Wha.—Ko o ratou kanohi hei kai-whakaatu kei a ratou te maramatanga me te matauranga, ara ki tonu ratou i te matauranga; a ko o ratou parirau hei kaiwhakaatu ena kei a ratou te kaha ki te haere ki te mahi, ki te pehea ranei.

5. P.—He aha te tikanga o nga kaumatua e rua tekau ma wha i korerotia nei e Hoani ?

Wha.—Ko te tikanga o enei kaumatua i kite nei a Hoani ko nga kaumatua era i u tonu ki roto ki te mahi minita a mate noa; ko ratou no nga Hahi e whitu,—a kei roto ratou i te Pararaiha o te Atua.

6. P.—He aha te tikanga o te pukapuka i kitea e Hoani kua oti a tua te hiiri ki nga hiiri e whitu ?

Wha.—Ko te tikanga o tena, kia mohio ai tatou kei roto i taua pukapuka ta te Atua whakaaro i pai ai kia whakakitea mai ki te tangata, tae atu ki ana mea ngaro me nga mahi a te Atua; kei reira ano ana whakaaro mo te whenua nei i roto i nga tau e whitu mano o tona turanga; ara o tona ahua maori.

7. P.—He aha te tikanga o nga hiiri e whitu i hiiritia ai te pukapuka ?

Wha.—Kia mohio tatou ko te tikanga o te hiiri tuatahi kei reira nga mea katoa mo te mano tau tuatahi; a kei te mea tuarua nga mea mo te mano tau tuarua; a pera ano mo nga mano tau o muri mai taea noatia te tuawhitu.

8. P.—He aha te tikanga o nga anahera e wha i korerotia ra i te 7 o nga upoko, te tahi o nga rarangi o nga Whakakitenga ?

Wha.—Kia mohio tatou ko tena he whakaatu ko ratou nga anahera tokowha i tonoa mai i te Atua, a kua oti ano te hoatu ki a ratou te mana ki runga i nga wahanga e wha o te whenua, ki te whakaora, ki te whakamate ranei; koia tenei te hunga kei a ratou nei te Rongo-pai mau tonu hei hoatutanga ki nga iwi katoa, ki nga hapu, ki nga reo, ki nga huihuinga tangata; kei a ratou ano te mana e tutakina ai nga rangi, e hiiritia ake ai ranei ki te ora, ki te maka atu ranei ki nga wahi o te pouritanga.

9. P.—He aha te tikanga o te anahera i haere ake ra i te rawhiti, i te 7 o nga upoko o nga Whakakitenga, te 2 o nga rarangi ?

Wha.—Ko te tikanga o te anahera i haere ake i te rawhiti, ko ia tera te anahera i hoatu nei ki a ia te hiiri o te Atua ora, ki runga i nga hapu kotahi tekau ma rua o Iharaira; no konei e karanga ana ia ki nga anahera tokowha, kei a ratou nei te Rongo-pai mau tonu me te mea ano, kaua e whiua te whenua ki te mate, kaua hoki te moana, kaua ano nga rakau, kia hiiritia ra ano e matou nga pononga a to matou Atua ki o ratou rae; a ki te ngohengohe koutou ki te tango i tenei, ko Iraia tenei ko tana haere mai hoki kohikohi i nga hapu o Iharaira ki te whakahoki ano i nga mea katoa.

10. P.—Ko ahea te wa e rite ai nga mea e korerotia nei i roto i tenei upoko ?

Wha.—Ka rite enei mea i te mano tau tuaono; ara i te wa e wahia ai te hiiri tuaono.

11. P.—He aha te tikanga o te hiiritanga o nga mano kotahi rau e wha tekau ma wha o roto i nga hapu katoa o Iharaira; tekau ma rua mano o tena hapu, o tena hapu ?

Wha.—Kia mohio tatou ko te hunga kua oti te hiiri he tohunga nui ratou, kua oti te whakarite mo tenei tikanga tapu a te Atua hei kai-mahi mo te Rongo-pai mau tonu; no te mea ko ratou he mea whakarite mai no nga iwi katoa, no nga hapu, no nga reo, no nga huihuinga tangata, he mea na nga anahera kua hoatu nei te mana ki a ratou ki runga ake i nga iwi o te ao nei, kia riro mai ai te hunga tokomaha ki te Hahi a te matamua.

12. P.—He aha te tikanga o te tangihanga o nga tetere e korerotia nei i te 8 o nga upoko o nga Whakakitenga ?

Wha.—Kia mohio tatou i te mea e ono nga ra i hanga ai te ao e te Atua. A no te whitu o nga ra ka mutu tana mahi; ka whakatapua hoki taua mahi. A, no reira ano i hanga ake ai te tangata i te puehu o te whenua; waihoki hei te timatanga o te mano tau tuawhitu ka whakatapua e te Ariki, e te Atua te whenua. Ka mutu ai ano te mahi whakaora ino te tangata; ka whakawakia ai hoki nga mea katoa. A, hei taua wa ano ka whakahokia ai nga mea katoa ki o ratou ahua o mua, haunga ano nga mea, kihai nei i meinga e ia ki raro i tona mana. A, te wa e hiiritia ai e ia nga mea katoa kia tae ki te mutunga o nga mea katoa. A, ko te wa e tangi ai nga tetere a nga anahera e whitu, ko reira te timatanga me te otinga o tana mahi; ara te timatanga o te mano tau tuawhitu;—ko te whakapainga tera o te huarahi i mua atu i tona haerenga mai.

13. P.—Ko ahea rite ai nga mea kua tuhituhia i roto i te 9 o nga upoko o nga Whakakitenga ?

Wha.—Ko ena mea ka rite i muri mai o te wahanga o te hiiri tuawhitu; i mua ake hoki i te haerenga mai o te Karaiti.

14. P.—He aha te tikanga o te pukapuka iti i kainga ra e Hoani, e korerotia ra i te 10 o nga upoko o nga Whakakitenga ?

Wha.—Kia mohio tatou ko tena he mihana, he ture hoki ki a ia kia kohikohia nga hapu o Iharaira; nana ko Iraia tenei; mona te mea ka oti te tuhituhi e haere mai ano ki te whakahoki i nga mea katoa.

15. P.—He aha te tikanga o nga kai-whakaatu, e rua, i roto i te 11 o nga upoko o nga Whakakitenga ?

Wha.—Ko nga poropiti ena e rua e whakaarahia ake a nga ra whakamutunga mo te iwi o nga Hurai; ara a te wa e whakahokia mai ai nga mea katoa; hei poropiti atu hoki ki nga Hurai i muri mai i to ratou kohikohinga mai ki te wahi kotahi; i ta ratou hanganga ano hoki i Hiruharama, i roto i te whenua o o ratou matua.