1. Ko taku pononga, ko Orihana Haiti, he mea karanga na nga tikanga i whakaritea ai ia, hei kai kauwhau mo te Rongo-pai mau tonu, he meatanga ano ia na te Wairua o te Atua ora, hei kauwhau ki tenei iwi ki tera iwi, ki tenei whenua ki tetahi atu whenua, i roto i nga whakaminenga o te hunga hara, i roto i o ratou whare karakia me te korero ngatahi ano, me te whakamarama i nga Karaipiture katoa.

2. Nana, titiro, ko te tauira tenei ki te hunga katoa kua whakaritea ki tenei Tohungatanga, kua oti nei ratou te karanga kia haere ki te kauwhau.

3. Koia tenei taua tauira kia korero ratou rite tonu ki ta te Wairua Tapu i whakamahara ai ki a ratou,

4. Na, ahakoa he aha ta ratou e whakapuaki ai e rite ana ki ta te Wairua Tapu e whakamahara ai, ka meinga hei karaipiture, ka meinga ano ko ta te Ariki i pai ai ko to te Ariki hinengaro, ko te kupu a te Ariki, ko te reo o te Ariki, ko te kaha ano o te Atua hei whakaora:

5. Nana, ko te kupu oati tenei a te Ariki ki a koutou, e aku pononga;

6. No reira, kia maia, kaua e wehi, no te mea ko ahau ko te Ariki kei a koutou tonu, ka tu tonu ano ahau i to koutou taha. Ma koutou ia e whakaatu moku mo Ihu Karaiti, penei na ko ahau te Tama a te Atua ora tonu, ko ahau ano ia i mua, inaianei, a haere ake nei.

7. Na ko te kupu tenei a te Ariki ki a koe, ki taku pononga, ki a Orihana Haiti, ki taku pononga ano ki a Ruka Teonihana, ki taku pononga ki a Raimana Teonihana, ki taku pononga ki a Wiremu E. Makarerini, ki nga kaumatua katoa ano hoki e u ana te whakapono i roto i taku Hahi.

8. Haere koutou ki te ao katoa, kauwhautia te Rongo-pai ki nga tangata katoa, me te mahi ano i runga i te mana kua hoatu e ahau ki a koutou, me te rumaki i runga i te ingoa o te Matua, o te Tama, o te Wairua Tapu;

9. Ko ia e whakapono ana, a ka oti te rumaki, ka whakaorangia, na, te tangata e kore e whakapono ka meinga kia mate;

10. Ko ia ano e whakapono ana, ka whai ngatahi nga tohu i a ia rite tonu ki te mea kua oti te tuhituhi;

11. A ka meinga koutou kia mohio ki nga tohu o nga wa, ki nga tohu o te haerenga mai o te Tama a te tangata;

12. A ko te hunga katoa e pai ai te Matua ki te whakaatu atu (ki a koutou) ka hoatu ki a koutou te mana hei hiiri ake i a ratou ki te oranga-tonutanga. Amine.

13. Na mo nga mea e hoatu ana hei tapiri mo nga kawenata me nga ture, koia tenei aua mea:—

14. Meake nei ina tae mai te wa e pai ai te Ariki, ka whakaritea ano etahi atu hei pihopa mo te Hahi, hei minita pera ano me te mea tuatahi;

15. No reira, ko ratou e tau ana ka meinga hei Tohunga Nui, a ma te Tumuakitanga Tuatahi i roto i te Tohungatanga o Merekihereke ratou e whakarite, ki te mea e hara ratou i nga tino uri o Arona.

16. A me he mea he tino uri ratou no Arona, ko te ture no ratou te pihopatanga, ki te mea ko ratou nga matamua i roto i nga tama o Arona;

17. No te matamua hoki te Tumuakitanga i runga i tenei tohungatanga (pihopatanga) me nga kii, ara, te mana i roto ano i taua tohungatanga.

18. Na ki te ritenga o te ture e kore tetahi tangata e whai mana ki tenei karangatanga, he mea e riro ai i a ia nga kii o tenei tohungatanga, ki te mea e hara ia i te uri ake, i te matamua hoki a Arona.

19. Otira i te mea e whai mana ana te Tohunga Nui o roto i te Tohungatanga o Merekihereke ki te mahi i roto i nga turanga katoa o raro iho i tona, ka whai mana ia ki te mahi i nga mahi o roto i te turanga o te pihopa, ki te mea e kore e kitea tetahi uri tuturu o Arona, ki te mea hoki ka karangatia ia, ka wehea, ka whakaritea hoki mo taua mana i raro i nga ringaringa o te Tumuakitanga Tuatahi o te Tohungatanga o Merekihereke.

20. A ko te uri tuturu o Arona, ma tenei Tumuakitanga ano e whiriwhiri, e titiro me he mea e tau ana mo taua karangatanga, ma ratou e whakawahi, e whakarite hoki i raro i nga ringaringa o tenei Tumuakitanga, ki te kore, kahore ratou i te whai mana ki te whakarite i nga mahi o to ratou karangatanga;

21. Otira, i te mea e tuturu ana te tikanga kei te whai mana ratou ki te tohungatanga e heke iho nei i te Matua ki te tama, na kona ka ahei ratou ki te tono kia whakawahia ratou, me he mea ka taea e ratou te korero pono o ratou whakapapa, ki te mohio ranei ratou ki aua mea he mea na te whakakitenga mai a te Ariki i raro i nga ringaringa o te Tumuakitanga kua whakahuatia ake nei i runga.

22. Me tenei ano, kaua tetahi pihopa, tetahi Tohunga Nui ranei e wehea nei mo tenei mana minita, e whakawakia, e whakataua ranei ki a ia tetahi he mo tetahi hara, engari ki te aroaro anake i te Tumuakitanga Tuatahi o te Hahi;

23. A me he mea ka kitea ia kua hara i te aroaro o tenei Tumuakitanga, he mea na tetahi whakaaturanga e kore nei e taea te whakahe, me whakatau te he ki a ia.

24. A me he mea ka ripeneta ia me muru tana, me pera me ta nga kawenata me nga ture o te Hahi.

25. Me tenei ano, me he mea he tamariki a nga matua i Hiona, i roto ranei i etahi o ona takiwa kua oti te whakatu, a kahore e ako i a ratou kia matau ki te whakaakoranga o te ripeneta, o te whakapono hoki ki a te Karaiti te Tama a te Atua ora, ki te rumakanga, me te hoatutanga o te Wairua Tapu, he mea na te whakapakanga o nga ringaringa, i te mea ka waru nga tau, ka tau tena he ki runga i nga matenga o nga matua.

26. No te mea ko tenei ka meinga hei ture ki nga tangata katoa e noho ana i Hiona, i roto ranei i etahi o ona takiwa kua oti te whakatu;

27. A ko a ratou tamariki me rumaki hei murunga atu i o ratou hara ina taka te waru o o ratou tau, me te whiwhi ano ki te whakapakanga ringaringa.

28. Me ako ano ratou i a ratou tamariki ki te inoi, ki te haere tika hoki i te aroaro o te Ariki.

29. Nga tangata katoa e noho ana i Hiona me pupuri ano e ratou te ra Hapati kia tapu.

30. Me tenei ano, nga tangata katoa e noho ana i Hiona, ara te hunga kua whakaritea hei mahi, kia mahara ki a koutou mahi i roto i te tino pono, no te mea ka mahara ano te Ariki ki te tangata mangere.

31. Nana, ko ahau, ko te Ariki, kahore i te tino ahuareka ki te hunga e noho ana i Hiona, no te mea kei roto i a ratou etahi hunga mangere, a ko a ratou tamariki kei te tupu ake i roto i te hara. Kahore hoki ratou i te ata rapu marie i nga taonga kahore nei he mutunga, engari ko o ratou kanohi e ki tonu ana i te apo.

32. Ko nga mea penei kahore e tika kia toetu, engari me pei atu i roto i a ratou; na kona ma taku pononga ma Oriwa Kautere e mau enei kupu ki te whenua o Hiona.

33. A ka hoatu e ahau tenei ture ki a ratou, ko te tangata e kore e inoi i te aroaro o te Ariki i te wa e tika ana kia pera, me hoatu he whakamaharatanga mona ki te kai-whakawa o toku iwi.

34. Na e pono ana, e he-kore ana enei kupu, no reira kaua e takahia, kaua ano e whakarereketia.

35. Nana, ko ahau te Arepa me te Omeka, a ka hohoro taku haera atu. Amine.