1. Whakarongo ki te reo o te Ariki, o tou Atua, i a au ka korero atu nei ki a koe, e Ema Mete, e taku tamahine, no te mea he pono taku e mea atu nei ki a koe, ko te hunga katoa e tango ana ki taku Rongo-pai, he tama, he tamahine (naku) i roto i toku kingitanga.

2. E hoatu ana e ahau tetahi whakakitenga ki a koe mo tetahi mea e pai ana ki a au, a me he mea ka u tonu koe ki te whakapono me te haere ano i roto i nga huarahi o te poke-kore i toku aroaro, ka tiakina e ahau tou oranga, a ka whai wahi koe i roto i Hiona.

3. Nana, kua murua ou hara, a he wahine whiriwhiri koe, naku ano hoki koe i karanga.

4. Kaua e amuamu mo nga mea kahore ano kia kitea e koe, no te mea e puritia ana aua mea i a koe, i te ao ano hoki, a he matauranga tena i roto i a au mo tetahi wa e haere ake nei.

5. A ko te mahi a tou karangatanga kia riro koe hei kai-whakamarie mo taku pononga, mo Hohepa Mete, tamaiti, tau tahu, i roto i ona mamaetanga ki nga kupu whakahari, i roto i te wairua whakaiti.

6. A me haere tahi koe me ia i te wa o tona haerenga, a ko koe hei kai-tuhituhi mona, i te wa e kore ana he kai-tuhituhi mona, kia tonoa ai e ahau taku pononga, a Oriwa Kautere, ki nga wahi e hiahia ai ahau.

7. A ka whakaritea koe i raro i tona ringa ki te whakamarama i nga karaipiture, ki te tohutohu ano hoki i te Hahi, kia rite ki ta toku Wairua e hoatu ai ki a koe.

8. No te mea ka whakapa iho ia i ona ringaringa ki runga i a koe, a ka whiwhi koe ki te Wairua Tapu, a ko to wa me whakapau ki te tuhituhi, ki te ako ano hoki i nga mea maha.

9. A kahore he ritenga e wehi ai koe, no te mea ka tautoko tau tahu i a koe i roto i te Hahi, no te mea ko tona karangatanga tena kia mahi tonu ki a ratou, kia whakakitea ai nga mea katoa ki a ratou, nga mea e pai ai ahau, kia rite ki to ratou whakapono.

10. A he pono taku e mea atu nei ki a koe, me whakarere e koe nga mea o tenei ao, engari, rapua ko nga mea o te ao e pai ake ana.

11. A tera e hoatu mau e whiriwhiri etahi himene i roto i nga himene tapu, kia rite ki te mea ka hoatu ki a koe, he mea pai nei tera ki a au, kia ai he pera ki roto i taku Hahi.

12. No te mea, e ahuareka ana toku Wairua ki te waiata e haere ake ana i te ngakau, ae ra, ko te waiata a te hunga tika he inoi tena ki a au, a ka utua ki tetahi manaakitanga ki runga ki o ratou matenga.

13. No reira, kia ara ake tou ngakau, kia hari, kia mau hoki ki nga kawenata kua meinga na e koe.

14. Noho tonu i roto i te wairua o te ngakau papaku, me te ohiti ano, kei whakahi. Kia ahuareka tou wairua ki tau tahu, ki te kororia ano hoki tera e uhi mai ki runga ki a ia.

15. Puritia aku whakahaunga i nga wa katoa, a e whiwhi koe ki tetahi karauna o te tika. A ki te kahore koe e mea i tenei, e kore koe e tae ake ki te wahi kei reira nei ahau.

16. Na, he pono, he pono taku e mea atu nei ki a koe, ko taku reo tenei ki te katoa. Amine.