Wahanga 33
He whakakitenga i homai ma roto i a Hohepa te Matakite, ki a Etara Teia raua ko Notarapa Tuiti, i Wheieta, i a Oketopa, 1830.
1. Nana, ko taku kupu tenei ki a korua e aku pononga e Etara raua ko Notarapa, whakapuaretia o korua taringa kia rongo hoki ki te reo o te Ariki, o to korua Atua, e tere nei, e kaha tana kupu, koi atu i te hoari matarua, a wehea noatia nga ponapona me te hinuwheua, te ngakau me te wairua; a e ahei ana ia te kite i nga whakaaro me nga hiahia o te ngakau.
2. He pono, he pono taku e mea nei ki a korua, kua oti korua te karanga ki te whakaara i o korua reo ano ko te tangihanga o te tetere, ki te whakapuaki i taku Rongo-pai ki tetahi whakatupuranga kaki maro, parori ke.
3. No te mea, nana, kua ma te maara, kua rite mo te kotinga: A ko te tekau ma tahi o nga haora tenei, ko te wa whakamutunga hoki e karangatia ai e ahau nga kai-mahi ki roto ki toku maara-waina.
4. Kua kino katoa taku maara-waina ia wahi, a, kaore he hunga e mea ana i te pai, haunga etahi ruarua nei; a he maha nga huarahi i he ai ratou, he mea na nga mahi tohunga, e kino ana hoki o ratou hinengaro katoa.
5. A he pono, he pono taku e mea atu nei ki a korua, ko tenei Hahi kua karangatia mai e ahau i roto i te koraha.
6. Waihoki ka kohikohia mai e ahau aku i whiriwhiri ai i nga pito e wha o te ao; ae ra, te hunga katoa e whakapono ana ki a au me te whakarongo ano ki toku reo.
7. Ae ra, he pono, he pono taku e mea nei ki a korua, kua ma te maara, kua rite mo te kotinga: no reira kia aki iho korua i a korua toronaihi, kokoti ai i runga i te whakapaunga o o korua kaha, o o korua hinengaro, o o korua marohirohi.
8. Whakatuwheratia o korua mangai a ka whakakia, a ka rite korua ki a Niwhai onamata, i haere mai nei i Hiruharama i roto i te koraha.
9. Ae ra, hamama o korua mangai a kaua e arai i nga kupu, a ka taumaha o korua tuara i nga paihere, no te mea nana, kei a korua tonu au.
10. Ae ra, hamama o korua mangai a ka whakakia, ka mea—Ripeneta ra, ripeneta, whakapai hoki i te huarahi o te Ariki, whakatikaia hoki ona ara; no te mea kua tata te kingitanga o te rangi;
11. Ae ra, ripeneta kia rumakina, tena tangata, tena tangata o koutou, hei muru i o koutou hara; ae ra, kia rumakina koutou ki te wai, a ko reira puta ai te rumakanga ki te kapura, o te Wairua Tapu.
12. Nana, he pono, he pono taku e mea nei ki a korua, ko taku Rongo-pai tenei, kia mahara hoki, me whai-whakapono ratou ki a au, ki te kore e kore ratou e taea te whakaora:
13. A ka hanga ahau i taku Hahi ki runga ki tenei kamaka; ae ra, kua oti hoki korua te hanga ki runga ki tenei kamaka, a ki te u tonu korua, e kore nga kuwaha o te reinga e whai kaha ki runga ki a korua;
14. A me mahara hoki korua ki te pupuri i nga tikanga me nga kawenata o te Hahi;
15. A ko te hunga e whai-whakapono ana, me whakau ratou e korua ki roto i taku Hahi ki te whakapakanga o nga ringaringa, a maku e hoatu te homaitanga o te Wairua Tapu ki runga ki a ratou.
16. Kua hoatu hoki e ahau te Pukapuka o Moromona me nga Karaipiture Tapu ki a koutou hei whakaako i a korua; A ko te mana o toku Wairua hei whakahauora i nga mea katoa:
17. No reira kia u ki te pono, kia inoi tonu, me a korua rama e pai ana, a ka ana, kia whai hoki he hinu ki a korua, kia tino rite ai korua a te taenga mai o te Tane-Marena-hou:
18. No te mea, nana, he pono, he pono taku e mea nei ki a korua, ka hohoro taku haerenga mai. Ae ra, koia ano tenei. Amine.