1. Whakarongo mai, E nga rangi, kia whai taringa E te whenua, kia hari hoki koutou, e nga tangata o te ao, he Atua ano te Ariki, a, kotahi ano te Kai-whakaora, ko ia anake:

2. He matauranga nui rawa tona, he miharo hoki ona ara; kahore hoki te tangata e ahei ana te mohio ki ana meatanga katoa;

3. E kore rawa e taka noa ana tikanga, kahore hoki tetahi e kaha ki te pupuri i tona ringa;

4. Kahore hoki ana rereketanga onamata, ake, ake tonu atu ranei, e kore hoki e memeha ona tau.

5. E penei ta te Ariki, ko ahau, ko te Ariki, e tohu atu ana, e aroha atu ana ki nga tangata e wehi mai nei ki a au, a, e pai ana ahau ki te whakahonore ki nga tangata e mahi nei ki a au, i runga i te tika me te pono taea noatia te mutunga;

6. Ma nga tangata pera te utu nui, he mea piraukore hoki to ratou kororia;

7. A ka whakakitea e ahau ki a ratou nga mea huna katoa, ae ra, nga mea huna katoa o toku kingitanga i nga ra onamata, a, i roto i nga whakatupuranga maha hoki e heke mai nei, ka whakakitea e ahau ki a ratou aku e pai ai ki nga mea huna o toku kingitanga;

8. Ae ra, ka mohio hoki ratou ki nga mea whakaharahara o te oranga-tonutanga, a ka whakakitea hoki ahau ki a ratou i nga mea era e puta mai ai me nga mea hoki o nga whakatupuranga maha;

9. A, e whakanuia ana to ratou matauranga, me to ratou mohiotanga, ka tutuki atu ano ki te rangi: a ka whakakahoretia atu ki mua i a ratou, te matauranga o te tangata mahara, a ko ta te tangata mohio ka whakakore atu ano hoki;

10. Ma toku Wairuu hoki ratou e whakamarama ai e ahau, na taku kaha hoki ia ka whakaaturia e ahau aku whakaaro puku ki a ratou, e rite ki taku e pai ai; ae ra, tae noa ki nga mea kahore ano kia kitea e te kanohi, i rongo ranei e te taringa, kahore ano kia tapoko noa ki roto ki te ngakau o te tangata.

11. Ko maua a Hohepa Mete, maua ko Hirini Rikitana i roto i te Wairua i te tekau-ma-ono o nga ra o Pepuere, i roto hoki i te tau o to tatou Ariki i te kotahi mano e waru rau e toru tekau ma rua,

12. Na, i mea ai o maua kanohi kia kite, me o maua ngakau kia marama, he mea ia na te kaha o te Wairua, e ahei ai maua te kite me te mohio hoki ki nga mea a te Atua—

13. Ae ra, ki nga mea onamata i mua atu i te hanganga o tenei ao, i whakarite ai i te Matua ma roto i tana Tamaiti Kotahi i noho ai hoki ia i te Matua i te timatanga ra ano,

14. Tenei maua te whakaatu nei i tenei whakaaturanga, ara, koia nei te raneatanga o te Rongo-pai o Ihu Karaiti ko ia hoki te Tama, i kite ai, i korerorero ai hoki maua me ia i roto i te kitenga o te rangi;

15. I a maua hoki e mea ana i te whakamaoritanga, koia nei kua oti e te Ariki te whiriwhiri hei mahi ma maua, i tae maua ki te rua tekau ma iwa o nga rarangi o te rima o nga upoko o Hoani, i whakaatn penei mai ki a mana;

16. He korero tenei mo te aranga ake o te hunga mate, mo ratou hoki era e rongo ki te reo o te Tama a te tangata, a ka puta mai hoki;

17. Ko nga tangata kua mahi i te tika mo ratou te aranga o te tika, a ko nga tangata kua mahi i te kino mo ratou te aranga o te hunga hara.

18. He mea whakamiharo tenei ki a maua i homai hoki ia e te Wairua ki a mana;

19. I a maua e whakaaroaro ana ki enei, i meinga e te Ariki o maua kanohi kia kite i te maramatanga, e kanapa ana te kororia o te Ariki;

20. A i kite ano maua i te kororia o te Tama, kei te ringa matau o te Matua, i whiwhi hoki ki tona raneatanga;

21. A i kite hoki i nga anahera tapu, nga tangata hoki kua whakapaua nei i mua i tona torona e karakia ana ki te Atua raua ko te Reme, a ka koropiko hoki ratou ki a ia mo ake ake tonu atu.

22. Ko tenei, ahakoa ra he maha nga whakaaturanga kua oti noa te whakaatu mona, ko tenei te mutunga o nga whakaaturanga katoa te hoatu nei e maua mona, ara, kei te ora ia;

23. No te mea i kite maua i a ia, kei te ringa matau hoki o te Atua, i rongo hoki maua ki te reo e whakaatu mai ana ko ia anake te Tamaiti a te Matua i roto i te kikokiko,—

24. Nana hoki, na roto i a ia e tu nei nga ao, nana hoki i hanga, a ko nga iwi o te ao, nana hoki i hanga, a ko nga iwi o te ao nei kua oti te karanga he tamariki, he tamahine ki te Atua.

25. A tenei ano ta maua i kite ai, a whakaatu ai, ara, ko tetahi anahera, kua oti te whakamana i mua i te aroaro o te Atua, a i tutu ia ki te Tamaiti Kotahi i arohaina nei e te Matua—ko ia nei kei te uma o te Matua, a i peia atu taua anahera i te aroaro o te Atua me te Tama,

26. A i huaina ia ko te tangata o te Whakangaromanga, no ka tangi nga rangi ki a ia—ko te rua o nga ingoa mona ko Rutiwha, te tama o te ata.

27. Nana, ka kite maua kua taka ! kua taka ! ae ra, tetahi tama o te ata.

28. A i a maua i roto i te Wairua ka whakahaua mai maua e te Ariki kia tuhituhi te whakakitenga nei no ka kite maua i a Hatana, ko ia nei taua nakahi onamata—ara te rewera i tutu ai ia ki te Atua e mea ana kia riro i a ia te kingitanga o to tatou Atua raua ko tona Karaiti,

29. No reira e whawhai ana ia ki te Hunga Tapu a te Atua, kei te karapotitia hoki ratou e ia.

30. Na ka kite maua he whakakitenga mo nga whakamamaetanga o te hunga i whawhaitia nei a taea hoki ratou e ia, ka penei te reo o te Ariki ki a maua.

31. Ko ta te Ariki tenei i mea ai, mo te katoa e mohio ana ki toku kaha kua whiwhi tahi ai hoki ki tana kaha, a kua tukua e ratou ano kia taea e te kaha o te rewera, kua whakakahoretia hoki te pono e ratou, i whakamanamana ano hoki ki toku kaha—

32. Ko ratou nei nga tama a te whakangaromanga, naku e mea nei, he mea pai me i kahore ratou i whanau,

33. A he ipu ratou no te riri, kua oti nei te mea mo ratou, ara, nga whakamamae o te riri a te Atua, e whiwhi ngatahi ratou me te rewera ratou ko ana anahera mo ake tonu atu;

34. Mo ratou taku i ki ra, kahore he murunga-hara mo ratou i tenei ao, a te ao ranei e iieke mai nei,

35. Kua oti nei e ratou te whakakahore atu ki te Wairua Tapu, ahakoa ra kua whiwhi nei ki a ia—kua whakakahore atu ano hoki ki te Tamaiti Kotahi a te Matua—kua ripekatia houtia hoki ia e ratou nei ano, a ka meinga kia tawaia nuitia.

36. Ko ratou enei ka haere ki roto ki te roto-ahi me te whanariki, i te rewera ratou ko ana anahera,

37. Heoi ano nga tangata e taea ana e te matenga—tuarua,

38. Ae ra, he pono ko ratou anake e kore e whakaorangia i nga wa o te Ariki e heke mai nei i muri i nga whakamamaetanga o tana riri;

39. Ko era atu katoa ka whakaputaina mai, he mea na te whakaaranga ake i te mate, ko ia nei te mea na te wikitoria me te kororia o te Reme, i patua nei ia, i noho hoki ia ki te uma o te Matua—mua atu i te hanganga o nga ao,

40. Na, ko tenei ia te Rongo-pai me te kupu hari i whakaaturia nei ki a maua e te reo i roto i nga rangi.

41. I haere mai ia ki te ao, ae ra ko Ihu, kia ripeka i a ia mo te ao, mana e waha i nga hara o te ao, mana hoki e whakatapu, e horoi i te ao i ona he katoa;

42. Kia whakaorangia katoa e ia, ara, te katoa kua hoatu nei e te Matua ki tona kaha, nana hoki i hanga.

43. E whakakororiatia ana te Matua e ia, e whakaorangia ana nga mahi katoa o ona ringa, engari kahore he oranga mo ratou nga tama o te whakangaromanga, ko ratou nei e whakakahore atu ana ki te Tama, kua oti nei e te Matua te whakakite ki a ratou;

44. No reira kahore he oranga mo ratou i roto i te hunga e whakaorangia nei e te Ariki, ka tukua ratou ki roto ki te mamaetanga mutunga-kore, he mea kahore ona mutunga, he mea hoki ia e mau tonu ana, kia kingi tahi me te rewera ratou ko ana anahera mo ake tonu atu, ki te wahi e kore ai e mate to ratou kutukutu, ki te kapura e kore e tineia, ma ratou nei tenei whakamamaetanga;

45. A, ko te tukunga iho, ki te mutunga o te wahi ranei a ratou whakamamaetanga ranei, kahore tetahi e mohio ana,

46. Kahore ano kia whakaaturia ia i mua, inaianei ranei, a, e kore hoki e whakakite mai ki te tangata a mua ake nei, heoi ki nga tangata anake e whiwhi ana ki aua mea:

47. Ahakoa ra, ko ahau, ko te Ariki e whakakite atu enei mea ma roto i te kitenga ki te tokomaha, otira e whakatutukitia tonutia ana;

48. No reira ko te mutunga, te whanui ranei, te tiketike me te hohonu ranei, nga pouritanga ranei, kahore e mohiotia ana e ratou, kahore hoki e mohiotia e tetahi tangata, engari ratou kira rite ai mo tenei whakawakanga.

49. A, ka rongo maua i te reo e mea ana; tuhituhia te whakakitenga, no ko tenei te mutunga o te kite i nga mamaetanga o te hunga-hara !

50. A tenei ano e whakaaturia ana e maua, no te mea i kite ai i rongo ai hoki maua, a ko tenei ia te whakaaturanga o te Rongo-pai o te Karaiti, ki a ratou nei ka puta mai ai i roto i te whakaoranga ake o te hunga-tika:

51. Ko ratou nei i tango i te whakaaturanga o Ihu, a whakapono ana ki tona ingoa me te rumaki ano, e rite ana ki tona tanumanga, kia tanumia ratou ki roto ki te wai i runga i tona ingoa kia rite ano ki te whakahaunga kua oti nei te homai e ia,

52. Ma te pupuri i nga whakahaunga ka horoia me te whakama i o ratou hara katoa, kia whiwhi hoki ki te Wairua Ora na te whakapakanga o nga ringaringa o te tangata kua whakaritea, kua hiritia hoki ki tenei mana,

53. Ko ratou nei kua taea e te whakapono kua oti nei hoki te hiiri e te Wairua Ora o te kupu whakaari, e whakahekea nei e te Matua ki runga ki te hunga katoa e tika ana, e pono ana.

54. Ko ratou nei hoki te hunga o te Hahi o te matamua.

55. Ko ratou nga mea i hoatu ai e te Matua nga mea katoa ki o ratou ringaringa—

56. Ko ratou nei hoki e tu nei hei Tohunga, hei Kingi, kua whiwhi hoki ratou ki tona raneatanga me tona kororia,

57. He tohunga hoki ratou no te Runga Rawa i runga i te ritenga o Merekihereke, ko ia hoki i runga i te ritenga o Enoka, ko ia ano hoki i runga i te ritenga o te Tama Kotahi;

58. No reira e ai ta te tuhituhinga he Atua ratou, ae ra, ko nga tama a te Atua—

59. No reira, ma ratou nga mea katoa, ahakoa ora, mate ranei, nga mea o naianei, nga mea era e puta mai ranei, ko te katoa ma ratou, a ko ratou na te Karaiti, a ko te Karaiti ia na te Atua;

60. A ka taea katoatia nga mea e ratou;

61. Na tenei ano, kaua e tukua te tangata kia whaikororia i roto i te tangata, engari me whai-kororia ia i roto i te Atua, mana nei hoki e riro ai nga hoa riri katoa ki raro i ona waewae—

62. A ka noho hoki te hunga tika ki te aroaro o te Atua raua ko tona Karaiti mo ake, ake tonu atu.

63. Ko ratou nei hoki ka haere me ia a tona haerenga mai i runga i nga kapua o te rangi hei kingi i runga i te whenua, i runga hoki i ona iwi.

64. Ko ratou nei hoki enei ka whiwhi nei ki te whakaaranga tuatahi.

65. Ko ratou nei hoki enei ka puta mai i roto i te whakaaranga o te hunga-tika.

66. Ko ratou nga mea e haere mai nei ki Maunga Hiona, ki te pa o te Atua ora, ki te wahi o te rangi, ko ia te tino wahi tapu o te katoa.

67. Ko ratou hoki enei e tutaki nei ki tetahi ropu tini o nga anahera, ki te huihuinga nui me te Hahi o Enoka, o te matamua hoki.

68. Ko ratou hoki enei kua oti nei te tuhituhi o ratou ingoa ki te rangi, kei reira hoki te Atua raua ko te Karaiti hei kai-whakawa mo te katoa.

69. Ko ratou hoki enei te hunga tika kua oti te whakatika ma roto i a Ihu ko ia nei te takawaenga o te kawenata hou, nona hoki tenei tino whakamarietanga i whakarite ai he mea ia na te whakahekenga o ona ake toto.

70. Ko ratou hoki enei he tinana Whatu-kura (celestial) o ratou, ko tona rite ki te kororia o te ra, ae ra ko te kororia o te Atua, koia te tino kororia runga ake i te katoa, kua oti nei hoki te tuhituhi, ko te ra i te kikorangi he mea whakarite ki taua kororia.

71. A tenei ano, ka kite maua i te ao Rangi-Tu-Haha (terrestrial). Nana, ko enei ratou no te ao Rangi-Tu-Haha, ko tona kororia e noka ke ana i te Hahi o te matamua, mo ratou hoki kua whiwhi nei ki te raneatanga o te Matua. E rite ana ia ki te pokanga ketanga o te kororia o te marama i to te ra i te kikorangi.

72. Na, ko ratou enei i mate i roto i te ture katoa.

73. Ae ra hoki nga wairua-tangata i noho ai i te whare herehere i mua, i tae atu ano hoki te Tama ki reira, a kauwhautia te Rongo-pai ki a ratou hei whakaheanga hoki ratou, kia pera me to te tangata i te kikokiko.

74. Kihai hoki ratou i tango i te whakaaturanga o Ihu, i a ratou e ora ana i te kikokiko, engari i tango ia i muri mai.

75. Ko nga tangata whai-honore enei o te ao, heoi i whakamatapotia ai ratou e nga mahi tinihanga o nga tangata.

76. Ko ratou enei ka whiwhi nei ki tona kororia, heoi kahore ki te katoa.

77. Ko ratou enei ka noho ki te aroaro o te Tama, engari kahore i te raneatanga o te Matua.

78. No reira he tinana Poutireao (terrestrial) o ratou, kaore i te tinana Whatu-kura (celestial), a ko te rereketanga tenei i roto i nga kororia, ko te marama rereke ano i to te ra.

79. Ko ratou enei kahore e tino toa ana ki te whakaaturanga mo Ihu; no reira e kore ratou e whiwhi ki te karauna kei runga i te kingitanga a to tatou Atua.

80. Heoi ano ta te whakakitenga mo te ao Rangi-Tu-Haha (terrestrial) i kite ai maua; i whakahaua mai ai hoki e te Ariki kia tuhituhia, i a maua ano i roto i te Wairua.

81. A, ka kite ano maua i te kororia o te Rangi-nui (telestial), ko ia nei te kororia iti rawa; ae ra te poka ketanga o te kororia o nga whetu i to te kororia o te marama i te kikorangi.

82. No reira ratou kihai i tango i te Rongo-pai o te Karaiti, i te whakaaturanga ranei o Ihu.

83. Ko ratou nga mea kaore i whakakahore ki te Wairua Ora.

84. Ko ratou enei e maka iho nei ki te reinga.

85. Ko tenei ia, kahore he whakahokonga mo ratou i te rewera kia tae mai ra ano te whakaaranga mutunga ake, kia tino whakaoti ra ano te Ariki, ko ia nei te Karaiti, te Reme hoki i tona mahi.

86. Ko ratou enei e kore e whiwhi ki tona raneatanga i roto i te ao ora-tonu; engari ia na nga mini tatanga a te Rangi-Tu-Haha (terrestrial) ka whiwhi ai ratou ki te Wairua Ora;

87. Ma te Rangi-Tu-Haha (terrestrial) e whiwhi ki nga minitatanga o nga tangata o Tikitiki-O-Rangi (celesital);

88. Ma te Rangi-nui (telestial) e whiwhi ano hoki, he mea ia na nga anahera minita, kua whakaritea hei wairua minita mo ratou, ka whiwhi hoki ai ratou ki ta oranga-tonutanga.

89. A pera ta maua i kite ai ki te kororia o te Ranginui (telestial) i roto i te whakakitenga o te rangi, e kore e taea te whakaaro.

90. Kahore ano he tangata kia matau noa, ko ta te Atua tangata anake i pai ai kia whakakitea atu.

91. A penei ana ta maua i kite i te kororia o te Rangi-Tu-Haha (terrestrial), tera noa ake tona nui i to te Rangi-nui (telestial), ae ra, i roto i te kororia, i te mana, i te kaha me te rangatiratanga.

92. A penei hoki ta maua i kite i te kororia o to te Tikitiki-O-Rangi (celestial), he nui ake ia i nga mea katoa—kei reira hoki te Atua, te Matua e kingi ana i runga i tona torona mo ake, ake tonu atu.

93. Kei mua hoki i tona torona nga mea katoa e tuohu ana i runga i te mahakitanga me te hoatu ano ki a ia te kororia mo ake, ake, ake.

94. Ko ratou e noho nei ki tona aroaro no te hahi o te matamua, a e kite ano ratou me ratou e kitea ana, a e mohio ana ratou me ratou e mohiotia ana, me te whiwhi ano tona raneatanga me tona aroha noa;

95. E meinga hoki ratou kia rite ki a ia te mana, me te kaha, me te rangatiratanga.

96. Ko te kororia o to te Tikitiki-O-Rangi (celesital) he kotahi ia pera me te kororia o te ra he kotahi.

97. Ko te kororia o to te Rangi-Tu-Haha (terrestrial) he kotahi ia pera me te kororia o te marama he kotahi.

98. Ko te kororia o to te Rangi-nui (telestial) he kotahi ia pera me te kororia o to nga whetu he kotahi, a, i te mea e poka ke ana te kororia o tetahi whetu i tetahi whetu, waihoki e peratia ana te koropia o tetahi i tetahi i roto i te kororia o te ao Rangi-nui (telestial);

99. Ko ratou enei e kiia nei no Paora, no Aporo, no Kipa ano hoki.

100. Ko ratou enei e kiia nei e ratou, ko ratou no tetahi tangata a ko etahi no tetahi atu—ko etahi na te Karaiti, ko etahi na Hoani, ko etahi na Mohi, ko etahi na Iraia, ko etahi na Iheha, ko etahi na Ihaia, ko etahi na Enoka;

101. Heoi, kihai ratou i tango i te Rongo-pai, i te whakaaturanga a Ihu, a nga poropiti ranei, a te kawenata mau tonu ranei.

102. Ae ra, ko te mutunga tenei, ko ratou katoa enei e kore e whakakohikohia ai ratou pera me te kohikohinga i te Hunga Tapu; e kore hoki e kahakina ake ratou ki te hahi o te matamua, kia tangohia ki roto ki te kapua ranei.

103. Ko ratou hoki enei e kiia nei he kai-korero teka, he hunga makutu, he hunga puremu, a ko te tangata hoki e aroha ana ki te teka e mahi ana hoki.

104. Ko ratou enei ano hoki e whiwhi nei ki te riri o te Atua i runga i te whenua.

105. Ko ratou hoki enei e whiwhi nei ki te utu o te ahi mau tonu.

106. Ko ratou enei e maka iho ana ki te reinga a whakamamaetia ana ratou e te riri a te Atua Kaha Rawa, kia tutuki ra ano te taima e pehi iho ai te Karaiti i nga hoa riri katoa ki raro i ona waewae, a tino whakaoti ai hoki tana mahi,

107. Ko reira tukua atu ai e ia te kingitanga, me te hoatu ano hoki ia ki te Matua, e koha kore ana, ka mea—kua taea e ahau, kua takahia hoki te takahanga waina e toku kotahi ano, ae ra, ko te takahanga waina o te aritarita o te riri o te Atua Kaha Rawa.

108. Ko reira karaunatia ia ki te karauna o tona kororia, kia noho hoki ki runga ki te torona o tona kaha, e kingi ai mo ake, ake, tonu atu.

109. Na, ka kite maua i te kororia me nga tangata o te ao Rangi-nui (telestial), ano ko nga whetu i te kikorangi o te rangi, me te onepu i te tahatai.

110. A ka rongo ki te reo o te Ariki, e mea ana—ko enei katoa ka meinga kia piko katoa nga turi, a e whakaae nga arero katoa ki a ia e noho nei ki runga ki te torona mo ake, ake tonu atu;

111. Ka whakaritea te whakawa mo ratou kia rite ki a ratou mahi, a ka whiwhi nga tangata katoa ki tona utu e tika nei mo ana mahi ake, ki tona ake rangatiratanga i roto i nga whare nui kua oti te whakarite,

112. A ka meinga ratou hei pononga ma te Atua o Runga Rawa, heoi, ko te wahi e noho ai te Atua raua ko te Karaiti, e kore ratou e tae, i roto ranei i nga ao mutunga-kore.

113. Ko te mutunga tenei o te whakakitenga i kite ai maua, koia nei hoki i whakahaua mai maua kia tuhituhia, i a maua i roto ano i te Wairua.

114. Heoi, he nui, he miharo hoki nga mahi o te Ariki, nga mea huna hoki o tona kingitanga i whakakitea mai ki a maua, kahore e mohiotia i te nui o te kororia, o te kaha, o te rangatiratanga ano hoki,

115. Koia nei i whakahaua ai maua e ia, kia kore maua e tuhituhi i a maua i roto i te Wairua, kahore ano hoki e tika kia whakanuakina e te tangata;

116. Kahore hoki he kaha o te tangata e ahei ai ia te whakapuaki i enei mea, ma te Wairua Ora anake e whakawhiwhia ana e te Atua, e whakakite, e whakamohio ki te hunga e aroha atu ana ki a ia, me te tahi ano ratou i a ratou kino i mua i tona aroaro;

117. E tukua atu ana te tikanga e ia ki a ratou hei kitenga, hei mohiotanga ma ratou ano;

118. Na te kaha me te whakakitenga a te Wairua, i a ratou i te kikokiko, e ahei ai ratou te hi ki tona aroaro i roto i te ao kororia.

119. Kia hoatu hoki ki te Atua raua ko te Reme te kororia, te honore me te rangatiratanga mo ake, ake tonu atu. Amine.