1. He pono, e ai ta te Ariki e mea nei ki a koutou e aku pononga, mo te kupu whakarite o te witi me nga taru kino.

2. Na, he pono taku e mea nei, te maara ko te ao; a, nga apotoro ko nga kai-rui i nga purapura;

3. A, i te mea kua moe ratou, te kai-whakatoi nui i te Hahi, te tangata taka, te wahine puremu, ara a Papurona, ko ia e mea ana nga iwi katoa kia inu i tona kaapa, i roto hoki i nga ngakau te hoa-riri, ara a Hatana e noho ana hei kingi, nana, ko ia te rui nei i nga taru kino, no reira e koaoaotia ana te witi e nga taru kino, me te whiu ano hoki i te Hahi ki roto i te koraha.

4. Nana, kei nga ra whakamutunga, ae ra, ko aianei ano, i te mea e timata ana te Ariki ki te whakaputa mai te kupu, a e pihi ake ana te rau e ngawari ana.

5. Na, he pono taku e mea atu nei ki a koutou, e karanga ana nga anahera ki te Ariki i te ao, i te po, e noho tatari ana kia tonoa atu hei kokoti i nga maara.

6. Heoi, i mea atu te Ariki ki a ratou kia kaua e hutia ake nga taru kino i te mea e ngawari ana te rau (he pono hoki kei te ngoikore to koutou whakapono) kei whakakinongia e koutou te witi.

7. No reira tukua te witi me te taru kino kia tupu tahi ake, kia tino rite ra ano te kotinga, ko reira matua kohikohi ai te witi i roto i nga taru kino; a i muri i te kohikohinga i te witi, nana ra ! e paihere ana nga taru kino i roto i nga puranga, a, e waiho ana te maara kia tahuna,

8. No reira, e ai ta te Ariki ki a koutou kua whiwhi nei ki te Tohungatanga i ahu mai ma roto i te kawai o o koutou matua,

9. No te mea mo koutou ia nga taonga ki ta te kikokiko, kua huna nei i te ao, me te Karaiti i roto i te Atua:

10. No konei to koutou oranga me te Tohungatanga, a e tika ana hoki kia mau tonu i roto i a koutou me o koutou kawainga tae noa ki te whakahokinga o nga mea katoa i korerotia ai e nga mangai o nga poropiti tapu i te timatanga ra ano o te ao.

11. No reira ka koa koutou ki te u tonu ki taku tikanga hei maramatanga ki nga Tauiwi, ma tenei Tohungatanga ka mea hei kai-whakaora mo taku iwi mo Iharaira, kua korero mai te Ariki. Amine.