1. Whakarongo e koutou e nga iwi o taku Hahi, kua hoatu ki a koutou te kingitanga—whakarongo koutou, kia rongo hoki ki a ia nana nei i whakatakoto te turanga o te whenua, nana i hanga nga rangi me nga mano o reira, nana ano hoki i hanga nga mea katoa e ora nei, e haereere ana, e whiwhi tinana nei ano hoki.

2. Me tenei ano, ko taku kupu tenei, whakarongo ki taku reo kei rokohanga mai koutou e te mate; kei pahemo ke hoki te raumati i te haora e kore ai koutou o whai-whakaaro, a ka mutu te kotinga, a kore ake o koutou wairua e ora.

3. Whakarongo ki a ia, ko ia nei to koutou takawaenga ki te Matua, ko ia ano hoki e tohe tonu ana mo koutou i tona aroaro,

4. Me te mea ano, e Pa, nana, tirohia nga mamaetanga, me te matenga rawatanga ona kaore nei kia mahi noa i te hara, a ko ia nei tera i ahuareka nei koe; nana, te toto o tau Tama i whakahekea nei—te toto ona i homai nei e koe kia whai-kororia ai koe;

5. No reira, e Pa, tohungia enei oku teina e whakapono nei ki toku ingoa, kia haere mai ai ratou ki a au, me te whiwhi ano ki te oranga-tonutanga.

6. Whakarongo e koutou, e te hunga o taku Hahi, me koutou e nga kaumatua, whakarongo katoa mai, whakarongo ki toku reo i te mea e karanga ana i tenei ra, a kaua e whakapakeketia o koutou ngakau,

7. No te mea he pono taku e mea atu nei ki a koutou, ko ahau te Arepa me te Omeka, te timatanga me te whakamutunga, te marama me te ora o te ao—he maramatanga e tiaho ana i roto i te pouritanga, a kihai te pouritanga i matau ki a ia.

8. I haere mai ahau ki oku, a kihai oku i manako mai ki a au; otira te hunga katoa i manako mai ki a au, i hoatu e ahau ki a ratou he mana ki te mahi i nga merekara maha, hei mea ano hoki e riro mai ai ratou hei tama ma te Atua, ae ra, ki te hunga i whakapono ki toku ingoa i hoatu e ahau he mana e whiwhi ai ratou ki te oranga-tonutanga.

9. No kona hoki i tukua atu ai e ahau taku kawenata mau tonu ki te ao, kia ai hei whakamarama mo te ao, hei kara ano hoki ki toku iwi, a ko nga Tauiwi, me rapu atu ki reira, kia ai ano hoki ia hei karere ki mua i toku mata ki te whakapai i te huarahi i mua i a au;

10. No reira, haere mai koutou ki a ia, a ka whakariterite tahi ahau ki te tangata e haere ana mai, pera me taku ki nga tangata i nga ra o nehe, a ko reira whakaaturia ai te kaha o aku whakariteritenga ki a koutou,

11. No reira, whakarongo katoa mai koutou, a maku e whakakite taua mea ki a koutou, ara toku matauranga—te matauranga ona e kiia nei ko te Atua o Enoka, ratou ko ona teina,

12. Ko ratou nei he mea wehe atu i te whenua, a naku ano i tango ake ratou ki a au—he pa kua rahuitia kia tae mai ra ano te ra o te tika—te ra i hiahiatia ai e nga tangata tapu katoa kia kite ratou, a kaore ratou i kite i te hua o te kino, me nga whakarihariha katoa;

13. Me te whakaae ano ratou he tauhou, he manene ratou i runga i te whenua;

14. Otira i whiwhi ratou ki te kupu whakaari taihoa ka kitea e ratou, me te matakitaki atu ano i roto i te kikokiko.

15. No reira, whakarongo a ka whiriwhiri ngatahi tatou, a ka korero, ka poropiti ki a koutou ka pera me taku i mea ai ki nga tangata i nga ra o mua;

16. A ka marama rawa taku whakaatu i taua mea, ka rite ki taku whakaaturanga ki aku akonga, i te wa i tu ai ahau i mua i a ratou i roto ano i te tinana, me te korero atu ano ki a ratou, me te mea, i te mea kua inoi mai koutou ki a au, he aha nga tohu o toku haerenga mai i te ra e haere mai ai ahau i roto i toku kororia i roto i nga kapua o te rangi he mea e tutuki ai nga kupu whakaari i meatia e ahau ki o koutou matua,

17. No te mea i runga i ta koutou titiro iho, rite tonu ki te noho whare-herehere te roa o okoutou wairua e noho wehe mai ana i o koutou tinana, na reira ka whakaatu ahau ki a koutou i te ahua o te putanga mai o te ra o te hokonga me te ra hoki o te whakahokinga o Iharaira e noho marara nei.

18. A inaianei kei te kite koutou i tenei temepara e tu nei ki Hiruharama, e karangatia na hoki e koutou ko te whare o te Atua, a e mea ana o koutou hoa riri e kore rawa tenei whare e whakahoroa iho.

19. Otira nana, ko taku kupu tenei ki a koutou, ka rite ki te tahae i te po te putanga mai o te whakangaromanga ki tenei whakatupuranga, a ka tukitukia tenei iwi, ka whakamararatia atu ano ki roto i nga iwi.

20. Na ko tenei temepara e kite nei koutou, taihoa ka whakahoroa iho, a e kore tetahi kamaka e mau ki runga i tetahi kamaka.

21. A meake nei puta mai ai te wa, e kore e pahemo tenei whakatupuranga o nga Hurai, engari kia matua tae rawa mai nga whakangaromanga mo ratou kua korerotia nei e ahau.

22. E mea ana koutou kei te mohio koutou kei te haere mai te mutunga o te ao; e mea ana hoki koutou kei te mohio koutou meake pahemo atu ai nga rangi me te whenua;

23. Na i roto i tenei, e tika ana ta koutou meatanga, no te mea ka pena ano hoki; otira ko enei mea katoa kua oti nei te korero atu ki a koutou e kore e pahemo kia tutuki katoa ra ano,

24. A ko tenei kua korero atu nei au mo Hiruharama, a ina puta mai taua ra, ko reira whakamararatia atu ai he morehu (o te iwi) ki roto i nga iwi katoa;

25. Otira meake tae mai te wa e kohikohia ai ratou, engari ka noho tonu ratou kia rite ra ano te wa o nga Tauiwi.

26. I taua ra ka rangona nga pakanga me nga rongo pakanga, me te ao katoa ka noho tumatatenga, ko reira hoki nga ngakau o nga tangata he ai i te mataku, me te mea ano ratou, kei te whakaroa a te Karaiti i tona haerenga mai, kia tae ra ano ki te mutunga o te ao.

27. Ko te aroha o nga tangata ka matoke haere, me te kino ka hua haere;

28. A ina tae mai nga wa o nga Tauiwi, ko reira huaki mai ai te maramatanga i roto i te hunga e noho ana i roto i te pouritanga, koia nei hoki te raneatanga o taku Rongo-pai;

29. Otira, e kore ratou e whakarongo, no te mea kaore o ratou matauranga ki te maramatanga, a ko o ratou ngakau e anga ke atu ana i a au, he mea na nga tikanga a te tangata;

30. A hei te wa o taua whakatupuranga ka tino tutuki ai nga wa o nga Tauiwi;

31. A tera etahi tangata o taua whakatupuranga e tu tonu, e kore ano e pahemo atu kia kite ra ano ratou i nga whiu; no te mea ka ngaro te whenua i te mate uruta;

32. Ko aku akonga ia ka tu tonu i nga wahi tapu, e kore ano e taea te whakakorikori: i roto ia i te hunga o te kino ka whakaara ake nga tangata i o ratou reo ka kohukohu i te Atua, a ka mate.

33. A ko reira nga ru-whenua puta mai ai ki te tini o te wahi, me nga mate uruta ano; he ahakoa ka whakamaro tonu nga tangata i o ratou ngakau ki a au, a ka mau ake ratou i te hoari, tetahi ki tetahi, ka whakamate tetahi i tetahi.

34. Na, i taku, i ta te Ariki korerotanga i enei kupu ki aku akonga, ka pouri o ratou ngakau:

35. Katahi au ka mea ki a ratou, kaua e pouri, no te mea a te wa e tae mai ai enei mea, ka mohio koutou ko nga kupu whakaari i meatia ai ki a koutou, ko reira rite ai;

36. A hei te wa e tiaho ai tana maramatanga, ko reira taua mea rite ai ki a ratou, ano he kupu whakarite maku nei e korero atu ki a koutou:

37. Ka titiro atu koutou, nana, he rakau piki enei, me te matakitaki atu ano o koutou kanohi, a ina timata te pihi ake, me o ratou rau hoki e ngawari ana, ka mea koutou kua tata te raumati;

38. Waihoki ka pera ano i taua ra, ina kite ratou i enei mea, ka matau ratou kua tata te haora.

39. A ko reira tae mai ai te wa, ko ia e wehi ana ki a au, ka noho tatari atu kia tae mai te ra nui o te Ariki, ara ki nga tohu o te haerenga mai o te Tama a te tangata:

40. A ka kite ratou i nga tohu i nga mea whakamiharo, no te mea ka whakakitea mai ratou i nga rangi e tu iho nei, i roto ano hoki i te whenua i raro;

41. E kite hoki ratou i te toto, i te kapura, i te kohu paoa;

42. I mua atu i te taeriga mai o te ra o te Ariki; ka whakapouritia te ra, ka whakatoto te marama, me nga whetu ka takataka iho i te rangi;

43. Ka kohikohia mai ano te toenga ki tenei wahi,

44. Ka tatari ratou ki a au, nana, ka haere atu ahau; ka kite ratou i a au i roto i nga kapua o te rangi, kua oti te whakakakahu ki te mana, ki te kororia nui, ko nga anahera tapu katoa oku hoa; a ko ia e kore e tatari ki a au ka hatepea atu.

45. Otira, i mua atu i te taunga iho o te ringa o te Ariki, ka whakatangihia e tetahi anahera tana tetere, a ko te Hunga-tapu kua moe, ka maranga ake ki te whakatau i a au i roto i te kapua;

46. No reira, me he mea kua moe koutou i roto i te rangimarie, ka koa koutou, no te mea ka rite ki a koutou e kite nei i a au, e mohio nei hoki ki a au, waihoki ka pera ano ta koutou haerenga mai ki a au, a e ora o koutou wairua, a ko reira tutuki pai ai to koutou hokonga mai, ka puta ake hoki te Hunga-tapu i nga topito e wha o te whenua.

47. A hei reira tukua ai e te Ariki tona ringa kia tau iho ki runga i nga iwi,

48. A ka tu te waewae o te Ariki ki runga i tenei maunga, a ka pakaru ia (te maunga) i waenganui, ka wiri hoki te whenua, ka hurorirori, me nga rangi ano ka ngaueue.

49. Ka whakapuaki hoki te Ariki i tona reo, a ka rongo nga topito katoa o te whenua, ka tangi nga iwi o te whenua, a ko te hunga he kata ta ratou mahi, ka meinga kia kite i to ratou pohehetanga,

50. A ka huaki tata mai te mate ki te hunga whakatoi, te hunga whakahawea ia ka kainga e te kanura, a te hunga i noho tatari kia puta ake nga mea whakarihariha ka haua iho ki raro, ka maka ki te kapura.

51. A ko reira nga Hurai titiro mai ki a au, me te mea ano, he aha enei nawe i roto na i ou ringaringa, i ou waewae ?

52. Katahi ratou ka mohio ko te Ariki ahau; no te mea ka penei taku kupu ki a ratou, Ko nga nawe enei i mate ai ahau i roto i te whare o oku hoa. Ko ahau ano tera i whakairia ake ra. Ko Ihu ahau i ripekatia nei. Ko te Tama ahau a te Atua.

53. Ko reira ratou tangi ai mo o ratou hara; ka aue hoki ratou mo ratou i tukino i to ratou Kingi.

54. A ko reira ora ai nga iwi Atua-kore, me te hunga kaore i matau ki te ture ka whiwhi wahi ratou i roto i te aranga tuatahi; ko te wahi mana hoki ia mo ratou;

55. Ko Hatana, ka hereherea, he mea e kore ai ia e whai wahi ki roto i nga ngakau o nga tamariki a te tangata.

56. A i taua ra, i te wa e haere atu ai ahaii i roto i toku kororia, ka rite ai te kupu whakarite i korero ai ahau mo nga wahine kotahi tekau.

57. No te mea ko ratou, ko te hunga whai-whakaaro, kua whiwhi nei hoki ki te pono, kua mau hoki ki te Wairua Tapu hei kai-arahi mo ratou a kaore i taea te tinihanga. He pono taku e mea nei ki a koutou, e kore ratou e turakina iho ki raro, e maka ranei ki te kapura, engari ka tu tonu a taua ra.

58. A ka hoatu te whenua he kainga mo ratou, a ka tini haere ratou, ka riro hoki ratou he iwi kaha, a ko a ratou tamariki ka tupu ake ki te oranga, kaore ano he hara.

59. Ka noho ano te Ariki i roto i a ratou; ko tona kororia ka tau iho ki runga i a ratou, a ko ia ka riro hei Kingi, hei kai-hoatu ture mo ratou.

60. Nana, ko taku kupu tenei ki a koutou, e kore e hoatu ki a koutou te roanga atu o tenei upoko hei mohiotanga mo koutou, engari kia whakamaoritia ra ano te Kawenata Hou, hei reira hoki mohiotia ai enei mea katoa;

61. Ko tenei, ka hoatu e ahau ki a koutou he mana ki te whakamaori i taua mea, kia noho takatu ai koutou mo nga mea tera e puta mai;

62. He pono taku e mea atu nei ki a koutou, meake nei ka puta nga mea nunui ki a koutou;

63. E rongo hoki koutou ki nga pakanga i roto i nga whenua ke, otira, nana, ko taku kupu tenei ki a koutou, kei te tata mai ratou, ara kei o koutou kuwaha tonu, a e kore e maha nga tau ka rongo koutou ko nga whawhai, kua tae mai ki o koutou whenua ake.

64. Na reira ahau, te Ariki, i mea ai, puta mai koutou i roto i nga whenua o te tai-rawhiti, huihuia mai koutou, nga kaumatua o taku Hahi; haere atu koutou ki roto i nga whenua i te tai-hauauru, karanga atu ki nga tangata whenua kia ripeneta, a ki te mea ka ripeneta ratou, hanga ake nga whare karakia ki a au;

65. Whakawhaititia o koutou taonga, i runga i te tapatahi o te ngakau, me o koutou whakaaro he mea e taea ai e koutou te hoko mai he wahi mo koutou meake nei nga ra ka whakaritea mo koutou,

66. A ka huaina ia ko te Hiruharama Hou, he kainga e tau ai te rangimarie, he pa e okioki ai, he wahi e ora ai te Hunga-tapu o te Atua i runga rawa;

67. Ka noho ano te kororia o te Ariki ki reira, me te wehi ano o te Ariki ka tau ki reira, ina hoki ra ko te hunga o te hara e kore e tae atu ki reira, a ka huaina ia ko Hiona.

68. A meake tae mai te wa, ko nga tangata katoa i roto i te hunga hara, e kore e hapai patu ki tona hoa, me rere atu ki Hiona kia ora ai.

69. Ko reira kohikohia ai ki reira etahi, o roto i tena iwi, i tena iwi i raro i te rangi; a ko ratou anake te iwi e kore e pakanga tetahi ki tetahi.

70. Ka penei hoki te kupu a te hunga e noho ana i roto i te kino. Kaua tatou e haere ki te whawhai ki Hiona, no te mea ko te hunga o Hiona whakamataku ana to ratou ahua; no reira e kore tatou e tu.

71. Engari ko te hunga o te tika ka kohikohia mai i roto i nga iwi katoa, me te haere ano ki Hiona, waiata ana i nga waiata o te haringa-mutunga-kore.

72. Kati, ko taku kupu tenei ki a koutou, kaua enei mea e tukua kia puta atu ki te ao, engari kia taea ra ano te wa e tika ai i roto i a au, he mea e oti ai tenei mahi i a koutou i roto i te tirohanga kanohitanga mai a te iwi, i roto ano hoki i ta te hoa riri tirohanga mai, kia kore ai ratou e matau ki a koutou mahi a taea noatia te wa e oti ai te mea i whakahaua atu e ahau;

73. Kia tae rawa ake ki te wa e mohio ai ratou ki taua mea, ka whiriwhiri o ratou ngakau i enei mea;

74. No te mea, a te wa e puta mai ai te Ariki, tona ahua ki a ratou he mea whakawehi rawa, kia ngaro ai ratou i te wehi a ka tu mai ratou i tawhiti me te wiri ano;

75. A ka tau te wehi ki nga iwi katoa, he mea na te wehi o te Ariki me te mana ano o tona kaha. Ae ra, koia ano tenei. Amine.