1. A ki ta matou whakaaro hei whiriwhiri mau te ahuatanga o te huihui a nga Hunga Tapu katoa i te whakaaro mo nga mea katoa, a me nga whakamamaetanga me nga korero kino e meatia ana mo ratou e nga tangata o tenei takiwa;

2. A, hui atu hoki ki nga mea katoa, a me te rahi ano o nga mate i whiwhi ki a ratou, mo te taha ki nga whakaaro tae atu hoki ki nga mate o te tinana, a hui atu hoki ki nga tino taonga;

3. A, hui atu hoki ki nga ingoa o nga tangata katoa i mahi tahi nei i ta ratou mahi kino, ara, nga mea i whiwhi ratou, a kitea ana e ratou:

4. Engari pea, tera e taea te whiriwhiri tetahi komiti hei kimi i enei mea; me te tuhituhi ano i nga korero me te haina ano, a hui atu hoki ki te huihuinga o nga rongo whakakino e panuitia haeretia atu ra,

5. A nga mea katoa i roto i nga pukapuka tae atu ki nga hitori (histories) whakakino katoa kua oti nei te tuhituhi, a tae atu ki nga mea e tuhituhia ana, a tae atu ki te huihuinga o nga mahi kino katoa, tae atu ki te mutunga mai o nga mahi kino, kohuru e mahia ana ki runga ki tenei iwi,

6. Hei mea kia kore ai e whakaatutia e tatou ki te ao katoa, engari kia hoatu ai aua mea ki nga kai whakahaere o te kawanatanga i to ratou whakaaturanga pohehe, kino hoki, no te mea ko te wa whakamutunga tenei kia whakawhiwhia mai nei ki a tatou e to tatou Matua i te rangi, i mua atu i to tatou whai wahitanga ki te kupu whakaari, mana nei ia e mea kia haere mai i tona wahi ngaro, a kia kore ai hoki he take ma te iwi katoa i mua i tana tukunga mai i te kaha o tona ringa kaha.

7. He tino mahi nui tenei he mahi ma tatou ki te Atua, me nga anahera, ma ratou nei tatou e whakaturia ai, a hui atu hoki ki a tatou ano, ki a tatou wahine, me nga tamariki, kua meinga nei ratou kia koropiko iho, me te mamae o te ngakau, me te pouri, me te raruraru, i raro i te ringaringa whakamate o te kohuru, tukino, e akina ana, e tautokona ana e te kaha o taua wairua nana nei i kaha rawa ai te mau nga tukunga iho a nga matua, na ratou nei i waiho ake nga titotito ki roto ki nga ngakau o nga tamariki, a ki ana te ao i te raruraru, a nuku haere ana te kaha o te tupu, a inaianei ko te tino putake o nga mea pirau katoa, a kei te ngurunguru te ao katoa i raro i te taumahatanga o tona hara.

8. He ioka rino, he tauhere kaha, ko ratou nga tino herehere ringaringa, me nga mekameka waewae o te reinga.

9. No reira he mahi tenei ma tatou, e hara i te mea ki a tatou ake wahine, me nga tamariki, engari ki nga pouaru me nga mea matua kore, ko o ratou tane nei me o ratou papa kua kohurutia i raro i tona ringaringa rino;

10. No reira nei nga mahi pouri, pango, e rahi ana hei whakangaueue i te reinga ake, a me te tu noa i runga i te wehi me te koma, a ma nga ringaringa o te tino wairua kino e whakangaueue, e whakamate.

11. A, he mahi tenei ma tatou ki te whakatupuranga katoa e tupu mai ana, a tae atu ki nga mea katoa he ma te ngakau;

12. (No te mea he maha nga mea kei te ao i waenganui i nga hapu katoa, i nga huihuinga tangata, me nga iwi katoa, ko ratou nei e pohehe ana i nga mahi tinihanga a nga tangata, ko ratou nei e tatari ana kia tinihangatia, a ko ratou nei kahore e whiwhi ana ki te pono, no te mea kahore e mohio ana ki te wahi e kitea ai);

13. No reira kia kaha tatou ki te whakaputa mai ki te maramatanga nga mea ngaro o te pouritanga, e mohiotia nei e tatou i reira; a e tino pono ana hoki te whakaatutanga mai i te rangi.

14. Ko enei mea me whakaaro i runga i te whakaaro tino nui.

15. Kaua e tukua kia whakaaro tetahi tangata i aua mea he itiiti; no te mea tera he nui te mea e takoto mai ana mo a mua, mo te Hunga Tapu, koia nei e tatari ana ki enei mea.

16. E mohio ana koutou e nga teina, e tika ana te kaipuke tino rahi rawa i te wa pupuhi, ina mahi tahi me te hau me nga ngaru.

17. No reira e aku teina aroha, kia harakoa kia meatia nga mea katoa e taea e tatou, a kia tu rangimarie ai tatou me te tino tumanako kia kite i te whakaoranga a te Atua, a ma tona ringa e whakakite mai.