1. Na nana, he mea na tau, e taku pononga e Oriwa Kautere, i hiahia ai kia matau i a au, ka hoatu nei enei kupu e ahau ki a koe.

2. Nana, kua whakakitea atu e ahau ki a koe i roto i nga wa maha, he mea na taku Wairua, ko nga mea kua oti na i a koe te tuhituhi he pono; no reira e mohio ana koe e pono ana aua mea;

3. A ki te mea e mohio ana koe e pono ana aua mea, nana, ka hoatu e ahau he whakahaunga ki a koe, me whakawhirinaki ki aua mea kua oti te tuhituhi;

4. Kei roto nei hoki i aua mea nga mea katoa kua tuhituhia mo te turanga o taku Hahi, me taku Rongo-pai, me taku kamaka;

5. No reira ki te hangaia ake e koe taku Hahi ki runga ki te turanga o taku Rongo-pai me toku kamaka e kore rawa koe e taea e nga kuwaha o te reinga.

6. Nana, kei te pakari haere te ao i roto i te kino, no konei ano i tika ai kia whakaohokia ake nga tamariki a te tangata ki te ripenetatanga, ara, nga tauiwi me te whare ano hoki o Iharaira:

7. No reira, i te mea kua oti koe te rumaki he mea na nga ringa o taku pononga o Hohepa Mete, tamaiti, rite tonu ki taku i whakahau ai ki a ia, kua tutuki i a ia te mea i whakahaua e ahau ki a ia.

8. Na, aua e miharo moku i karanga i a ia ki taku ake tikanga, he tikanga e mohiotia ana i roto i a au; no reira ki te u ia ki te pupuri i aku whakahaunga, ka manaakitia ia ki te oranga-tonutanga, a ko Hohepa tona ingoa

9. Na, e Oriwa Kautere, ka korero atu ahau ki a koe, ki a Rawiri Witima ano hoki, i runga i te whakahaunga; no te mea nana, e whakahau ana ahau t nga tangata katoa i nga wahi katoa kia ripeneta, a ka korero atu ahau ki a korua, ka pera ano me taku ki taku apotoro ki a Paora, i te mea hoki kua karangatia korua ki taua karangatanga ano i karangatia ai ia.

10. Kia mahara, e nui ana te utu o nga wairua ki ta te Atua titiro.

11. No te mea, nana, ko te Ariki, ko to korua Kaihoko i whakamamaetia, i mate i roto i te kikokiko; no reira i mamae ia i te mamae o nga tangata katoa, kia ripeneta ai nga tangata katoa kia haere mai ki a ia.

12. A kua ara ake ano ia i te mate, kia kumea mai ai e ia nga tangata katoa ki a ia, i runga i te whakaritenga o te ripenetatanga.

13. A, ano te nui o tona hari mo te wairua e ripeneta ana.

14. No reira kua karangatia korua ki te karanga i te ripenetatanga ki tenei iwi.

15. Na, ki te mea ka mahi korua i roto i o korua ra katoa e karanga ana i te ripeneta ki tenei iwi, a ka haria mai te wairua kotahi ki a au, ina pehea te nui o te hari mo korua me ia i roto i te kingitanga o toku Matua?

16. Na, me he mea he nui to korua hari mo te wairua kotahi e haria mai ai ki a au ki roto ki te kingitanga o toku Matua, pehea te nui o to korua hari me he mea ka haria mai e korua nga wairua maha ki a au?

17. Nana, kei to korua aroaro taku Rongo-pai, taku kamaka, me taku whakaoranga.

18. Inoi atu ki te Matua i runga i toku ingoa, i runga i te whakapono e whakapono ana ka riro mai i a korua, a ka whiwhi korua ki te Wairua Tapu, e hura nei ia i nga mea katoa e tika mo nga tamariki a te tangata.

19. A me he mea kaore o korua whakapono, o korua tumanako, o korua aroha, e kore e taea e korua tetahi mea.

20. Kaua e tautohetohe ki tetahi Hahi, erangi ia ki ta te rewera.

21. Tangohia ake ki runga i a korua te ingoa o te Karaiti, whakapuakina hoki te pono i runga i te whaiwhakaaro nui.

22. A ko te hunga katoa e ripeneta ana, a ka rumakina i roto i toku ingoa, koia nei a Ihu Karaiti, me te u tonu tae noa ki te mutunga, ka whakaorangia.

23. Nana ko Ihu Karaiti te ingoa i homai e te Matua, a kaore ke atu he ingoa e ora ai te tangata.

24. Mo konei kua takoto te tikanga kia tangohia ake e nga tangata katoa te ingoa i homai ai e te Matua ki runga ki a ratou, no te mea ka karangatia ratou i roto i taua ingoa a te ra whakamutunga;

25. No reira, ki te kahore ratou e mohio ki te ingoa e karangatia ai ratou, e kore rawa ratou e whai wahi i roto i te kingitanga o toku Matua.

26. Nana, tera atu etahi kua karangatia ki te whakapuaki i taku Rongo-pai, ki nga tauiwi me nga Hurai;

27. Ae ra, te Tekau ma Rua, a ko te Tekau ma Rua hei akonga maku a ka tango ratou i toku ingoa ki runga ki a ratou; a ko te Tekau ma Rua te hunga ka hiahia nei ki te tango ki runga i a ratou i toku ingoa i runga i te tino ngakau u;

28. Na, ki te mea ka hiahia ratou ki te tango i toku ingoa ki runga i a ratou, i runga i te tino ngakau u kua karangatia ratou kia haere atu ki roto ki te ao ki te kauwhau i taku Rongo-pai ki nga tangata katoa;

29. Ko ratou hoki te hunga kua whakaritea e au hei rumaki i roto i toku ingoa, e rite ana ki tena kua oti nei te tuhituhi;

30. Na kei a korua tena kua oti nei te tuhituhi kei o korua aroaro, no reira me mahi korua kia rite ki nga kupu kua oti nei te tuhituhi.

31. Na ka korero atu ahau ki a koutou e te Tekau ma Rua—Nana, e ranea ana toku aroha noa mo koutou: me tino hangai ta koutou haere i toku aroaro, kaua hoki e hara.

32. Nana, ko koutou te hunga kua whakapakia e ahau, hei kai-whakapa i nga piriti me nga kai-whakaako; hei whakapuaki hoki i taku Rongo-pai e rite ana ki te mana o te Wairua Tapu i roto na i a koutou, e rite ana ano hoki ki nga karangatanga me nga homaitanga a te Atua ki nga tangata:

33. A naku, na Ihu Karaiti, na to koutou Ariki me to koutou Atua i korero tenei.

34. Ko enei korero e hara i te mea na nga tangata, na te tangata ranei, erangi naku; no reira me whaka atu e koutou naku enei korero, e hara i te tangata;

35. No te mea, noku te reo e korero atu nei i enei mea ki a koutou, no te mea he mea hoatu e toku Wairua ki a koutou, a ma runga i toku mana ka ahei ai i a koutou te korero i aua mea tetahi ki tetahi, me i kore hoki toku mana, kua kore aua mea e riro i a koutou;

36. No reira e ahei ana i a koutou te whakaatu kua rongo koutou i toku reo, a e mohio ana koutou ki aku kupu.

37. A tenei, nana, ka hoatu e ahau ki a korua e Oriwa Kautere me Rawiri Witima ano hoki, me rapu atu e korua te Tekau ma Rua, no ratou nei nga hiahia kua korerotia nei e au.

38. A ma o ratou hiahia me a ratou mahi, e mohio ai korua ki a ratou.

39. A ina kitea ratou e korua, me whakaatu enei mea e korua ki a ratou;

40. A me tapapa iho korua ka koropiko ai ki te Matua i runga i toku ingoa;

41. Me kauwhau hoki korua ki te ao, mea atu, me tino ripeneta koutou kia rumakina hoki i runga i te ingoa o Ihu Karaiti;

42. No te mea ko nga tangata katoa me tino ripeneta, kia rumakina hoki, e hara i te mea ko nga tane anake, erangi ko nga wahine me nga tamariki kua tae nei o ratou tau ki nga tau e mohio ai ratou ki te pai, ki te kino.

43. Na a muri ake o te rironga o tenei i a korua, me tino pupuri e korua aku whakahaunga i roto i nga mea katoa;

44. A ma o korua ringaringa ka mahia e ahau he mahi whakamiharo i waenganui i nga tamariki a te tangata, hei whakamohio i te tini ki o ratou hara, kia haere mai ai ratou ki te ripenetatanga, kia haere mai ano hoki ratou ki roto ki te kingitanga o toku Matua;

45. No reira, ko nga manaakitanga e hoatu e ahau ki a korua kei runga noa ake i nga mea katoa.

46. A i muri o te rironga o tenei i a korua, ki te kore korua e pupuri i aku whakahaunga, e kore korua e whakaorangia ki roto i te kingitanga o toku Matua.

47. Nana, naku na Ihu Karaiti, na to koutou Ariki me to koutou Atua, me to koutou Kai-whakaora i korero tenei i runga i toku Wairua. Amine.