1. Whakarongo kia rongo hoki, E koutou e taku iwi, e ia ta te Ariki ta to koutou Atua, e koutou e ahuareka ana ahau ki te manaaki ki nga manaakitanga nui rawa, e koutou e whakarongo mai nei ki a au; ko koutou ia e kore nei e whakarongo mai ki a au, a e ki na hoki kua mohio ki toku ingoa, ka kangaa e ahau ki nga kanga tino taumaha rawa.

2. Whakarongo e nga kaumatua o taku Hahi, kua karangatia nei e ahau; nana, ka hoatu e au he whakahaunga ki a koutou, kia huihui koutou kia whakaae ki taku kupu,

3. A ma ta koutou inoi ka whiwhi koutou ki taku ture, kia mohio ai koutou ki te whakahaere i taku Hahi, kia tika ai nga mea katoa ki toku aroaro.

4. A ko ahau to koutou Kai-whakahaere a toku taenga mai; a nana, ka hohoro toku haerenga mai, a kia tupato koutou kia puritia ai taku ture.

5. Ko ia e whiwhi ana, e whakarite ana i taku ture, ko taku pononga ano tera; a ko te tangata e mea ana kei te whiwhi ki taku ture, a kahore e whakarite i taua ture, e hara taua tangata i taku akonga, a ka panaia atu ia i waenganui i a koutou:

6. Na te mea kahore e tika ana kia hoatu nga mea a nga tamariki o te kingitanga ki te hunga kaore nei e tika, ki nga kuri ranei, kia panga atu ranei nga peara ki te aroaro o nga poaka.

7. A tenei hoki e tika ana kia hanga tetahi whare mo taku pononga, mo Hohepa Mete, tamaiti, hei nohoanga mona, hei wahi hoki mo tana mahi whakamaori.

8. Me tenei ano, e tika ana kia noho taku pononga, a Hirini Rikitana, kia rite ki tana e pai ai, i te mea ka pupuri ia i aku whakahaunga.

9. Na, kua karangatia e au taku pononga, a Eruera Patariti, a kua hoatu hoki he whakahaunga, kia whakaturia hoki ia i runga i te pooti o te Hahi, kia whakapangia hoki ia hei pihopa ki te Hahi, kia mahue hoki i a ia ona taonga hokohoko, me te whakapau ano i tana wa katoa i roto i nga mahi o te Hahi;

10. Me te whakarite hoki i nga mea katoa kia rite ki nga mea e hoatu ai ki a ia i roto i aku ture.

11. A i penei ai ia, ta te mea kei te ma tona ngakau ki mua i a au, a e rite ana ia ki a Natanira onamata, kaore nei he tinihanga i roto i a ia.

12. Kua hoatu enei kupu ki a koutou, a kei te ma ratou i mua i a au, na reira kia tupato ta koutou pupuri i aua kupu, no te mea ka tau te utu mo enei kupu ki runga i o koutou wairua a te ra whakawa; Ae ra, koia ano tenei. Amine.