1. Na, he pono taku e mea atu nei ki a koutou, ki oku hoa, ka hoatu e ahau ki a koutou tetahi whakahaunga, koia tenei, me timata ta koutou whakatakoto, ta koutou hanga hoki ki konei, ki te whenua o Katarana nei, i te timatanga me te kaupapa o te pa o te Takiwa (Stake) o Hiona, timata ai i toku whare;

2. Nana, kia rite ta koutou hanga ki te tauira kua hoatu e ahau ki a koutou.

3. Na, ko te wahanga tuatahi i te pito whaka-tetonga me whakatapu tena ki a au hei turanga whare mo te Tumuakitanga, mo nga mahi o te Tumuakitanga, ara hei wahi e hoatu ai nga whakakitenga, hei wahi hoki tera mo nga mahi minita o te Tumuakitanga, ara mo nga mea katoa e pa ana ki te Hahi, ki te kingitanga.

4. He pono taku e mea atu nei ki a koutou, ko taua whare me hanga kia rima tekau ma rima puutu te whanui, kia ono tekau ma rima puutu te roa, ara to roto wahi;

5. Me hanga he marae mo raro, he marae ano mo runga, kia rite tonu ki te tauira meake ka hoatu ki a koutou;

6. A me kawa taua whare ki te Ariki, timata i tona kaupapa, pera me te ritenga o te Tohungatanga, kia rite ki te tauira meake ka hoatu ki a koutou:

7. Ko taua whare me tapu katoa ki te Ariki mo nga mahi o te Tumuakitanga.

8. Kaua tetahi mea poke e tukua e koutou kia tomo ki roto ki taua whare; ka tau hoki toku kororia ki reira, toku mata ano ka kitea ki reira;

9. Otira ki te tomo tetahi mea poke ki reira, e kore toku kororia e tau ki reira, me toku mata e kore e kitea ki reira.

10. Me tenei ano, he pono taku e mea atu nei ki a koutou, ko te wahanga tuarua e takoto atu ana ki te pito whaka-te-tonga, me whakatapu ki a au hei hanganga i tetahi whare ki a au, hei perehitanga i te whakamaoritanga o aku karaipiture me era atu mea katoa e whakahaua ai koutou e ahau;

11. A me hanga kia rima tekau ma rima puutu te whanui, kia ono tekau ma rima puutu te roa, ara te marae o roto; a me hanga he marae mo raro, he marae hoki mo runga;

12. Ko tenei whare me whakatapu katoa atu ki te Ariki, timata i tona kaupapa mo te mahi perehi, mo nga mahi katoa e whakahaua ai koutou e ahau, kia tapu rawa, kia kaua e whakapokea, kia rite ki te tauira mo nga mea katoa taihoa ka hoatu ki a koutou.

13. Ko te wahanga tuatoru mo taku pononga, mo Hairama Mete.

14. Ko te wahanga tuatahi me te wahanga tuarua e takoto ana ki te pito raki mo aku pononga, mo Renara Kahuna raua ko Iarere Kaata,

15. Kia ahei ai ratou ki te whakaoti i te mahi kua whakaritea e ahau mo ratou, ara kia tu ratou hei komiti mo te hanganga i oku whare, kia rite ki te whakahaunga kua hoatu e ahau, e te Ariki, e te Atua, ki a koutou.

16. Ko enei whare e rua kaua e hanga i tenei wa, kia hoatu ra ano ia he whakahaunga kia peratia.

17. Kati nei nga whakahaunga e hoatu e ahau ki a koutou i tenei wa. Amine.