1. A ka tangohia te arai i o maua hinengaro, ka whakatuwheratia ano hoki nga kanohi o o maua mohiotanga.

2. Ka kite i te Ariki e tu ana i runga i te paparewa, i mua i a maua, i raro i ona waewae tetahi mahi whakamiharo, koura para-kore tonu, rite kei te ngarehu wera.

3. Ona kanohi ano he mura ahi, ona huruhuru ma tonu ano he hukarere, tona mata whiti tonu kei runga atu i te maramatanga o te ra, tona reo ano ko te harurutanga o nga wai maha, ko te reo o Ihowa e mea ana—

4. Ko ahau te tuatahi me te mutunga, ko ahau ano e ora nei, i mate ano ahau, ko ahau to korua kai whakaatu ki te Matua.

5. Nana, ko o korua hara kua murua i a korua, kua ma korua i mua i toku aroaro, no reira kia ara ake o korua matenga e koa hoki,

6. Tukua ano nga ngakau o o korua teina kia koa, me nga ngakau ano hoki o toku iwi katoa kia koa, na ratou tenei whare i hanga ki toku ingoa i runga i to ratou kaha.

7. No te mea, nana, kua manakotia e ahau tenei whare, ko toku ingoa ka noho ki roto, a ka whakakite ahau i a au ki toku iwi i runga i te rangimarie i roto i tenei whare,

8. Ae, ka puta atu ahau ki aku pononga, ka korero atu ki a ratou ma toku ake reo, ki te mea taku iwi ka pupuri i aku whakahaunga, me te kore e whakapoke i tenei whare tapu,

9. Ae, nga ngakau o nga mano me nga tekau mano ka nui te hari i roto i nga manaakitanga e ringihia atu ki waho, me nga manaakitanga e manaaki ai aku pononga i roto i tenei whare;

10. A ko te rongo o tenei whare ka horapa atu ki te nuku o nga whenua, a koia tenei te timatanga o nga manaakitanga e ringihi atu ai ki runga ki nga matenga o toku iwi, koia ano tenei. Amine.

11. I muri i te mutunga o tenei whakakitenga, ka tuwhera ano nga rangi ki a maua, ko Mohi ka puta mai ki mua i a maua, a ka homai ki a maua nga kii o te kohikohinga o Iharaira mai i nga pito e wha o te whenua, me te arahanga mai i nga hapu kotahi tekau mai i te whenua o te nota.

12. I muri o tenei, ka puta a Iraia (Elias), ka homai te wa o te Rongo-pai o Aperahama, i mea ra, ma roto i a maua me o maua uri, me nga whakatupuranga katoa i muri i a maua ka manaakitia ai.

13. I muri i tenei whakakitenga ka puta ano tetahi atu whakakitenga kororia ki runga i a maua, ko Iraia (Elijah) poropiti i tangohia ake nei ki te rangi, kihai hoki i rongo i te mate, tu ana ki mua i a maua, mea ana—

14. Nana, kua tae mai te kinga o te wa i korerotia nei e te mangai o Maraki, i mea ai kia matua tonoa mai ia (a Iraia) i mua o te ra nui, o te ra whakamataku o te Ariki e haere mai ai,

15. Ki te whakatahuri atu i nga ngakau o nga papa ki nga tamariki, o nga tamariki ki nga papa, ki te kore ka patua iho te whenua katoa ki te kanga.

16. No reira nga kii o tenei tikanga ka hoatu ki o korua ringaringa, ma reira nei korua e mohio ai ki te ra nui, ra whakamataku o te Ariki e tata ana ano kei o koutou tatau.