1. He pono ta te Ariki e mea atu nei ki a koe, ki taku pononga e Hohepa Mete, tamaiti, me koe ano hoki e taku pononga, e Hirini Rikitana, me taku pononga ano hoki e Hairama Mete, me o koutou kaunihera, me nga mea tera e whakaritea a muri atu;

2. Me taku pononga ano hoki a Eruera Patariti, me ona kaunihera;

3. Me aku pononga pono ano hoki, no te Hai Kaunihera nei ratou o toku Hahi i Hiona (tera nei e karangatia) ki nga kaumatua ano hoki o te iwi o toku Hahi o Ihu Karaiti o te Hunga Tapu o nga Ra o Muri nei, e noho marara i runga i te mata o te ao katoa;

4. No te mea ko taku Hahi tera e karangatia i nga ra whakmutunga, ara te Hahi o Ihu Karaiti o te Hunga Tapu o nga Ra o Muri nei.

5. He pono taku e mea atu nei ki a koutou katoa, whakatika me te kanapa ano, a ko to koutou marama hei kara ki nga iwi,

6. Mo te huihuinga tahitanga ki runga i te whenua o Hiona, ki runga ki ona Takiwa, hei pa tuwatawata, hei whakarurunga i te marangai, me te riri ina ringihia atu, he nanu-kore ki runga i te whenua katoa.

7. Waiho te pa, Wha Weta, hei tapu hei whenua e whakatapua ana ki a au, a tera e karangatia ko te tino tapu no te mea ko te whenua e tu ana koe i runga he tapu;

8. No reira ahau i whakahau ai ki a koe kia hanga he whare ki a au, mo te huihuinga tahitanga o oku Hunga Tapu, kia koropiko ai ratou ki a au;

9. A me whakarite he timatanga mo tenei mahi, me te kaupapa, a kia rite nga mahi i tenei raumati e heke mai nei;

10. A me waiho te timatanga i te 4 o nga ra o Hurae e heke iho nei, na, atu i taua taima tukua toku iwi kia mahi marie ki te hanga whare ki toku ingoa;

11. A i te tau kotahi atu i tenei ra tukua ratou kia timata ano te whakatakoto i te kaupapa o toku whare.

12. Kei reira ratou tukua ai a taua wa kia mahi, a tae noa ki te mutunga i te pou o te kokonga, a tae noa ki te tuanui, a kia kore ra ano tetahi mea kia takoto noa kahore nei kia oti.

13. He pono taku e mea atu nei ki a koe, aua rawa taku pononga a Hohepa, taku pononga ranei a Hirini, taku pononga ranei a Hairama, e uru ki roto i te nama mo te hanganga whare ki toku ingoa;

14. Engari hanga he whare ki toku ingoa kia rite ki te tauira e whakaaturia atu ai ki a ratou.

15. A ki te mea toku iwi ka kore e hanga kia rite ki te tauira era nei e whakaaturia e ahau ki to ratou Tumuakitanga, e kore rawa ahau e tango i a ia i o ratou ringaringa;

16. Engari me he mea toku iwi ki te hanga kia rite ki te tauira i whakaaturia atu ai e ahau ki to ratou Tumuakitanga, ara ki taku pononga ki a Hohepa me ana kaunihera, katahi au ka tango i a ia i nga ringaringa o toku iwi;

17. He pono taku e mea atu nei ki a koe, taku whakaaro koia tenoi, ko te pa Wha Weta e hanga wawe ma te huihuinga atu o oku Hunga Tapu,

18. Me era atu whenua ano hoki kia whakaritea hei Takiwa i roto i nga wahi e taiawhio ana, e whakakitea atu ai ki taku pononga ki a Hohepa, i tenei wa, i tenei wa;

19. No te mea, nana, ka noho ahau ki a ia, a maku ia e whakatapu i te aroaro o te iwi, no te mea ko ia taku i hoatu ai nga kii o tenei kingitanga me tenei minitatanga. Koia ano. Amine.