1. Whakarongo, a kia rongo koe ki te reo e pumau ana no te mau tonu ki te mau tonu, te AHAU NUI RAWA, ko Ihu Karaiti,

2. Te marama me te ora o te ao; he maramatanga e tiaho ana i roto i te pouritanga, a te matauria e te pouritanga.

3. Te mea ano i haere mai i te wehe-rua o nga wa ki taku ake ano, a kihai taku ake ano i manako mai ki a au.

4. Otira kua hoatu e ahau he mana ki te hunga katoa i manako mai ki a au, kia riro ratou he tama maku, a pena ano taku e mea ai ki te hunga katoa tera e manako mai ki a au, he mana kia riro ratou he tama maku.

5. A he pono, he pono, ko taku kupu tenei ki a koe, ko te tangata e manako nei ki taku Rongo-pai, ka manako mai ano hoki ia ki a au; a ko te tangata kaore nei e manako ki taku Rongo-pai, kaore hoki ana manako mai ki a au.

6. A ko taku Rongo-pai tenei: ko te ripenetatanga me te rumakanga ki te wai, a ko reira ka puta mai te rumakanga ki te kapura me te Wairua Tapu; ae ra, te Kai-whakamarie, te mea e whakaatu nei i nga mea katoa, e whakaako nei i nga mea rangimarie o te kingitanga.

7. A, nana, ko taku e mea nei ki a koe, e taku pononga, e Hemi, kua titiro ahau ki runga i au mahi, a e tino mohiotia ana koe e au:

8. A he pono ko taku kupu tenei ki a koe, kei te tika to ngakau ki a au inaianei, a nana, kua hoatu e au nga manaakitanga nui ki runga ki to matenga:

9. Ahakoa ra he nui te pouri kua kitea na e koe, no te mea he maha au whakaparahakotanga ki a au, he mea na te whakapehapeha me nga raruraru o te ao;

10. Otira kua tae mai nga ra o tou whakaoranga ki te mea e pai ana koe kia whakarongo ki toku reo e mea ana ki a koe, whakatika, kia rumakina, kia horoia atu o hara, e karanga ki toku ingoa, a ka whiwhi koe ki toku Wairua, me tetahi manaakitanga nui atu i tetahi atu manaakitanga kua mohiotia na e koe.

11. A ki te mea koe i tenei mea, kua rite koe i a au mo tetahi mahi nui atu. Ka kauwhautia e koe te raneatanga o taku Rongo-pai kua tukua atu e au i enei nga ra whakamutunga; te kawenata kua tukua mai nei e ahau ki te whakaora i taku iwi, o te whare o Iharaira.

12. A tenei ake te wa ka tau iho te mana ki runga ki a koe; ka nui hoki to whakapono, a ka noho tahi au me koe, ka haere hoki au i mua i tou aroaro.

13. Kua karangatia koe kia mahi i roto i toku maara waina, ki te hanga hoki i taku Hahi, kia whakaputa hoki i toku Hiona, kia hari ai, kia tupu ai i runga i nga pukepuke.

14. Nana, he pono, he pono, taku e mea nei ki a koe, kaore koe e karangatia ana kia haere ki roto ki nga whenua i te rawhiti erangi e karangatia ana koe kia haere ki te Ohaio.

15. Kua pupuri ahau i tetahi manaakitanga kaore nei e mohiotia ana i waenganui i nga tamariki a te tangata, a ka ringihia taua manaakitanga ki runga i o ratou matenga, ki te huihui ratou ki Ohaio, a ka haere atu nga tangata i reira ki roto i nga whenua katoa.

16. Nana, he pono, he pono, ko taku kupu tenei ki a koe, kei te karanga mai ki a au te iwi o Ohaio, i runga i te whakapono nui, he whakaaro na ratou tera au e pupuri i toku ringa i roto i te whakawakanga ki runga i nga iwi katoa, otiia te taea e au te whakakahore i taku kupu:

17. No reira, e mahi i runga i te whakapaunga o to kaha, a me karanga i etahi kai-mahi whai-whakapono, ki roto i toku maara waina kia tapatapahia ai mo te wa whakamutunga.

18. A ki te mea ka ripeneta ratou, ka manako hoki ki te raneatanga o taku Rongo-pai, a ka whakatapua, tera au e pupuri i taku ringa i runga i te whakawakanga:

19. No reira, haere, e karanga ana i runga i te reo kaha, e mea ana, kua tata te kingitanga o te rangi; e karanga ana, Ohana ! kia whakapaingia te ingoa o te Atua o Runga Rawa.

20. Haere koe, me te rumaki ano ki te wai, me te whakapai ano i te ara i mua i a au, mo te wa e haere mai ai ahau;

21. No te mea, kua tata te wa; kahore tetahi tangata e mohio ki te ra, ki te haora ranei; otira he pono ka haere mai ia.

22. A ko ia e manako ana ki enei mea, ka manako mai hoki ia ki a au, a ka huihuia mai ratou ki a au i tenei oranga me tera oranga ano hoki.

23. A me tenei ano, me whakapa e koe o ringa ki runga ki te hunga katoa e rumakina ana e koe ki te wai, a ka whiwhi ratou ki te homaitanga o te Wairua Tapu, a ka titiro atu ratou ki nga tohu o toku haerenga mai, a ka mohio ratou ki a au.

24. Nana, ka hohoro toku haerenga mai; Ae ra, koia ano. Amine.