1. Whakarongo ki te reo o Ihu Karaiti, ko ia nei to koutou Kai-whakaora, TE AHAU NUI RAWA, na tona ringaringa tohu tangata nei i rapu he utu mo o koutou hara;

2. Ka kohikohi hoki ia i tona iwi pera me te heihei e whakamine mai ana i ana pi ki raro i ona parirau, koia nei te hunga katoa e whakarongo mai ana ki toku reo, e whakaiti ana i a ratou i toku aroaro, me te karanga ake hoki ki a au i runga i te inoi kaha.

3. Nana, he pono, he pono taku e mea atu nei ki a koutou, kua whakarerea noatia iho a koutou hara i tenei wa, na kona, ka whakawhiwhia koutou ki enei mea; otira kia mahara kei hara ano, a ka pangia koutou e nga mate whawhati tata.

4. He pono taku e mea atu nei ki a koutou, he mea ata whiriwhiri mai koutou i roto i te ao, hei whakapuaki i taku Rongo-pai me te tangi ano te reo hari ano he reo tetere:

5. Kia ara ake o koutou ngakau kia koa, no te mea kei waenganui ahau i a koutou, a ko ahau hoki to koutou taka-waenga ki te Matua; a ko tenei tana e pai ai, ara, kia tukua atu te kingitanga ki a koutou;

6. Ko te mea hoki i tuhituhia, ko ta koutou e tono ai i runga i te whakapono, me te kotahi ano koutou i roto i te inoi pera me taku i whakahau atu ai, e whiwhi koutou;

7. Na, e karangatia ana koutou hei whakatutuki i te kohikohinga mai o taku hunga whiriwhiri, e rongo ana hoki taku hunga whiriwhiri ki toku reo, a e kore e whakapakeke i o ratou ngakau;

8. No reira, he ture tenei kua puta atu i te Matua, ara kia kohikohia mai ratou ki te wahi kotahi, ki runga ano i tenei whenua (Amerika), kia noho takatu ai o ratou ngakau, kia takatu ai hoki i roto i nga mea katoa mo te ra e tukua mai ai te whakapawera, me te whakangaromanga ki runga i te hunga kino:

9. Kua tata hoki te haora, me te ra ano ka tata e rite ai te ao mo te kotinga: a ko reira te hunga whakahi katoa, me ratou hoki e mahi nei i te kino, e rite ai ki te kakau witi, a e tahuna ratou e ahau, e ai ta te Ariki o nga Mano, he mea kia ngaro atu ai te kino i runga i te whenua;

10. Kua tata hoki te haora e rite ai te mea i korerotia e aku apotoro; no te mea ka rite ki ta ratou i whakapuaki ai te mea e puta mai;

11. E whakakite atu hoki au i a au ano i te rangi i roto i te kaha me te kororia nui, me nga mano katoa ano hoki o reira, a ka noho ratou i roto i te tika, me nga tangata i runga i te whenua kotahi mano nga tau, a kore ake te hunga kino e tu.

12. Me tenei ano, he pono, he pono taku e mea atu nei ki a koutou kua puta atu i roto i tetahi ture pumau, rite tonu ki ta te Matua i pai ai, kia meinga aku apotoro, te Tekau ma Rua i noho tahi nei me au i roto i taku mahi minita i Hiruharama, kia tu i toku ringa matau i te wa e haere mai ai ahau i roto i te pou ahi, ka oti ano ratou te whakakakahu ki nga kakahu o te tika, me nga karauna ano i runga i o ratou matenga, me te noho ano i roto i te kororia penei me au, ki te whakarite whakawa mo te whare katoa o Iharaira, ara te hunga katoa e aroha ana ki a au, me te pupuri i aku whakahaunga, a kaore etahi atu;

13. E tangi hoki te tetere, a e roa e kaha tona tangihanga, ka pera me te wa i runga i Maunga Hinai, a e ngaueue te whenua katoa, a ko reira ratou puta mai ai: ara, te hunga i mate i roto i a au, kia whakawhiwhia ki te karauna o te tika, kia whakakakahuria hoki, penei me au, kia noho tahi ai ki a au, kia kotahi ai matou.

14. Otira, nana, ko taku kupu tenei ki a koutou i mua atu o te taenga mai o tenei ra nui, ka whakapouritia te ra, ko te marama ka whakatoto, a ka takataka iho nga whetu i te rangi, a ko riga tohu i te rangi i runga, i te whenua hoki i raro, e nui ake i enei;

15. A ko reira e rangona ai te tangihanga me te auetanga i roto i te tini o te tangata;

16. A ko reira e tukua iho ai nga whatu hei whakamate i nga maara o te whenua;

17. A tenei ake ka puta te wa, i runga i te kino o te ao, ka rapu utu ahau i te hunga o te kino, no te mea e kore ratou e ripenata; kua purena hoki te kapa o taku riri; no te mea, nana, e kore oku toto e whakaora (horoi) i a ratou ki te kahore ratou e whakarongo mai ki a au.

18. No reira ka tonoa atu e ahau, e te Ariki, e te Atua, nga rango ki runga i te mata o te whenua, a e mau ratou ki o reira tangata, a e kainga o ratou kikokiko, a na reira ka ki ratou i te iro;

19. A ko o ratou arero ka puritia kia kore ai ratou e kohukohu ki a au; a ko o ratou kikokiko ka ngahorohoro i o ratou wheua, ko o ratou kanohi ka takataka mai i o ratou puare:

20. A hei reira puta mai ai te wa e kainga ai ratou e nga kararehe o te ngahere, e nga manu hoki o te rangi.

21. A ko reira kainga ai e te ahi taua hahi nui whakarihariha, koia nei hoki te wahine puremu o te whenua katoa, kia hinga ai ki raro, rite tonu ki te mea i whakapuakina e te mangai o Ehekiere, poropiti, nana nei i korero mo enei mea i te mea kaore ano kia puta mai, engari e ora ana ahau, taihoa ka puta mai, no te mea e kore nga whakarihariha e whai turanga.

22. Me tenei ano, he pono, he pono taku e mea atu nei ki a koutou, ina tae ki te mutunga o nga tau kotahi mano e timata ai ano nga tangata te whakakahore i to ratou Atua, ko reira tohungia ai e ahau te ao mo tetahi wa poto;

23. A ko reira puta mai ai te mutunga, a ko te rangi me te whenua e kainga, e pahemo atu hoki, a hei reira puta mai ai he rangi hou, he whenua hou,

24. No te mea, ka pahemo atu nga mea tahito katoa, a ka hou nga mea katoa, ara te rangi me te whenua, a me o reira mea katoa hoki, nga tangata, nga kararehe, nga manu o te rangi me nga ika o te moana;

25. A e kore e ngaro tetahi huruhuru, tetahi otaota ranei, no te mea, he mahinga hoki ia na toku ringa.

26. Otira, nana, he pono taku e mea atu nei ki a koutou, i mua atu i te pahemotanga o te ao, ka whakatangihia e Mikaera, e taku tino anahera, tana tetere; a ko reira te hunga mate katoa oho ake ai, no te mea ka whakatuwheratia o ratou urupa, a ko reira ratou puta mai ai; ae ra, te katoa.

27. A ka huihuia te hunga tika ki toku ringa matau, mo ratou te oranga-tonutanga; a ko te hunga kino, i toku ringa maui, ka whakama ahau ki te ki, naku ratou i te aroaro o te Matua;

28. No reira ka penei taku kupu ki a ratou—Mawehe atu i ahau, e te hunga kua kanga, ki te ahi e ka tonu ana mo ake tonu atu, kua oti noa ake nei mo te rewera ratou ko ana anahera.

29. A i tenei wa, nana, ko taku kupu tenei ki a koutou, kahore ano kia whakapuakina e ahau, ara, e toku mangai ake, tera ratou e hoki mai ano, no te mea e kore ratou e tae ake ki te wahi kei reira ahau, kaore hoki he kaha i a ratou;

30. Otira kia mahara ko aku whakaritenga whakawa katoa, kaore e whakaaturia ana ki te tangata: engari ka rite tonu ki nga kupu e puta atu ana i toku mangai, waihoki ka pera ano to ratou whakatutukitanga, kia meinga ai o mua ki muri, me o muri ki mua i roto o nga mea katoa i hangaia e ahau i runga i te kupu o toku mana koia nei te mana o toku Wairua;

31. Na runga hoki i te mana o toku Wairua i taea ai ratou e ahau te hanga; ae ra, nga mea katoa, nga mea wairua me nga mea maori:

32. Tuatahi; nga mea wairua—tuarua, nga mea maori, koia nei te timatanga o taku mahi; me tenei ano tuatahi, nga mea maori—a tuarua, nga mea wairua, koia hoki te whakaotinga o taku mahi:

33. E korero atu ana ahau ki a koutou kia marama ai koutou i runga i to te tangata maramatanga, otira, ki a au, kaore he mutunga o aku mahi, kaore hoki he timatanga; otira e hoatu ana tenei ki a koutou, he mea kia marama ai koutou, no te mea na koutou tenei i tono mai i a au, me te noho ano koutou i roto i whakaaro kotahi.

34. No reira, he pono taku e mea atu nei ki a koutou, nga mea katoa ki a au he mea wairua, a kaore ano he wa kia hoatu e ahau tetahi ture ki a koutou koia he mea maori; ki tetahi tangata ranei, ki nga tamariki ranei a te tangata, ki a Arama ranei, to koutou matua, i hanga nei e ahau.

35. Nana, naku ake ano i whakaae kia riro ano ia hei kai-whakahaere tikanga mona ake ano; a naku ano nga ture i hoatu ki a ia, otiia kaore he ture mo tenei wa ake ano kia hoatu ki a ia, no te mea ko aku ture he mea wairua; e hara ratou (nga ture) i te mea no nga whakaaro kikokiko, no te ngakau maori ranei.

36. A i te mea ka oti a Arama te whakawai e te rewera, no te mea, nana, ko te rewera no mua i a Arama, i tutu hoki ia (te rewera) ki a au, e mea ana, Homai ki a au tou honore, koia nei toku kaha: a i taea ano e ia te whakatahuri ke atu i a au te wahi tuatoru o nga mano o te rangi, no te mea i tukua ki a ratou te tikanga whakahaere ma ratou ake ano;

37. A whakataka iho ana ratou, a koia nei te rewera me ana anahera.

38. Nana, kua oti te kainga te whakarite mo ratou no te timatanga iho ra ano, ko taua kainga nei ko te reinga:

39. Na, he mea tika ano kia whakawaia e te rewera nga tamariki a te tangata, ki te kore hoki e pera, e kore e ahei i a ratou te whakahaere tikanga ki runga i a ratou ano, no te mea ki te kore rawa ratou e whiwhi ki te kawa, e kore ratou e matau ki te reka.

40. No reira ka whakawaia a Arama e te rewera, a kainga ake e ia te hua o te rakau i kiia ai kia kaua e kainga, a takahia ana e ia te ture, na kona i riro ai ia ki raro i te tikanga a te rewera, ara nana i tuku i a ia kia whakamatautauria.

41. No reira, naku, na te Ariki, na te Atua i mea kia peia atu ia ki waho o te kaari o Ereni, i toku aroaro hoki, ara na tana takahanga i taku ture, na kona hoki ko tona rite kua mate tona wairua, koia nei hoki te matenga tuatahi, ara, ko taua mate ano te mate o te wairua, meake nei kiia ai ki runga i te hunga kino, hei te wa e korero ai ahau—Mawehe atu e koutou kua oti te kanga.

42. Otira, nana, ko taku kupu tenei ki a koutou, naku, na te Ariki, na te Atua, tenei mea i whakaae ki a Arama, ki ana uri hoki, ara kia kaua ratou e mate rawa, i te wa e mate ai te tinana, engari kia matua tonoa atu ra ano e ahau, e te Ariki, e te Atua, nga anahera, hei whakapuaki ki a ratou te ripenetatanga me te hokonga mai, ma roto hoki i te whakapono ki te ingoa o taku Tama kotahi.

43. Na kona i whakaritea ai e ahau, e te Ariki, e te Atua, nga ra hei ripenetatanga mo te tangata; ara hei te wa e mate ai te tinana, tera ka whakaarahia ake ia hei mea mate kore mo te oranga-tonutanga, koia te hunga katoa tera e whakapono;

44. A ko te hunga e kore e whakapono, mo te mate mutunga-kore; no te mea hoki kaore ratou e taea te hoko mai i te takanga o o ratou wairua, no te mea e kore ratou e ripeneta;

45. A nui ake hoki to ratou aroha ki te pouritanga i to ratou ki te maramatanga, a ko a ratou mahi he kino, a e utua ratou ki te utu o a ratou mahi e te mea i whakarongo ai ratou.

46. Otira, nana, ko taku kupu tenei ki a koutou, ko nga tamariki nonohi kua oti noa atu te hoko mai i te oroko-hanganga mai ra ano o te ao, ma roto i taku Tama Kotahi:

47. No reira, kaore e ahei i a ratou te hara, kaore hoki he kaha i hoatu ki a Hatana hei whakawai i a ratou, kia tae ra ano ki te wa e mohio ai ratou ki a ratou mahi i mua i toku aroaro;

48. He tikanga hoki tenei kua hoatu ki a ratou (ki nga tamariki) koia hoki taku e pai ai, rite tonu ki te mea e ahuareka ana ki a au, kia ai taua tikanga hei putanga mai mo nga mea nunui i nga ringa o o ratou matua.

49. Me tenei ano, ko taku kupu tenei ki a koutou, kaore ano ranei ahau kia whakahau i te hunga kua whiwhi ki te matauranga, kia ripeneta ?

50. A ko ia kaore ona matauranga me waiho kia meatia e au te mea kua oti te tuhituhi. A inaianei, kati nei nga mea hei whakapuakanga maku ki a koutou i tenei wa. Amine.