1. Ko ahau te Arepa me te Omeka, ko te Karaiti te Ariki; ae ra ko ahau ano ia, te timatanga me te whakamutunga, te Kai-hoko o te ao.

2. Kua whakaritea e au a kua oti hoki i a au ta to Matua i hiahia ai mo te taha ki a au, nana nei hoki ahau—a kua mahia tenei kia riro ai nga mea katoa ki raro i a au—

3. Kei a au hoki nga mana katoa, tae noa ki te whakangaromanga i a Hatana me ana mahi a te mutunga o te ao, a te ra nui whakamutunga o te whakawakanga, e whakataua ai e ahau ki nga tangata o te whenua, e whakawa ai i tena tangata, i tena tangata kia rite ki ana mahi, me ana meatanga i mea ai ia.

4. A he pono, me tino ripeneta nga tangata katoa, me mamae ranei, no te mea ko ahau ko te Atua, kaore oku mutunga;

5. No reira, e kore ahau e whakakore i nga whakawa e whakataua ai e ahau, erangi ka puta atu he aue, he tangihanga, he uhunga me te teteatanga o nga niho, ae ra, ki te hunga e kitea ana ki toku ringa maui;

6. He ahakoa ra, kaore i tuhituhia, kaore he mutunga o tenei whakamamaetanga, erangi kua oti te tuhituhi, he mamaetanga mutunga-kore.

7. A tenei hoki kua oti te tuhituhi, he whakawakanga mutunga-kore, no reira marama atu tenei i o era atu karaipiture, kia mahi ai ia ki runga ki nga ngakau o nga tamariki a te tangata hei whakakororia i toku ingoa;

8. No reira ka whakamaramatia atu e ahau ki a koe tenei mea ngaro, e tika ana hoki kia mohio koe kia pera me aku Apotoro.

9. Ka korero atu ahau ki a koutou kua whiriwhiria nei i roto i tenei mea, ano he kotahi; kia uru mai ai koutou ki toku okiokinga.

10. No te mea, nana, ko te mea ngaro a te Atua, pehea ra te nui ? No te mea he mutunga-kore ahau, a ko te whiunga e hoatu ai e toku ringa, he whiunga mutunga-kore, no te mea ko mutunga-kore toku ingoa: No reira—

11. Ko ta te Atua whiunga he whiunga mutungakore.

12. He whiunga mutunga-kore ta te Atua whiunga.

13. Na reira, ka whakahau atu ahau i a koe kia ripeneta, a kia puritia nga whakahaunga kua riro na i a koe he mea na te ringa o taku pononga o Hohepa Mete, tamaiti, i roto i toku ingoa;

14. A he mea na toku mana kaha rawa i whiwhi ai koe ki aua mea;

15. Na reira ka whakahau atu ahau i a koe kia ripeneta—ripeneta ra, kei patua koe e ahau ki te tokotoko o toku waha, a ki taku aritarita, ki taku riri hoki, a ko ou mamaetanga ka nanakia rawa—te matau hoki koe ki tona nanakia ! te matau ranei koe ki tetahi mea e rite ana te koi ! kaore hoki koe e matau ki te pakeke o tona mamae !

16. Ina nana, ko ahau ko te Atua, kua mamae i enei mamaetanga mo te katoa, kia kore ai ratou e mamae, me he mea ka ripeneta ratou,

17. Heoi ki te kore ratou e ripeneta, ka tino mamae ratou, ka pera me au,

18. Ko taua mamaetanga nei i mea i a au ano, i te Atua, te nui rawa o nga mea katoa kia oioi i te mamae, a kia heke te toto i nga putaputa katoa o toku tinana, a kia mamae ko te tinana raua ko te wairua: i mea hoki ahau kia kaua ahau e inu i te kapa kawa, kia kaua e mate—

19. He ahakoa ra, kia whakakororiatia te Matua, kua tangohia hoki e ahau a kua oti aku mea whakariterite ki nga tamariki a te tangata.

20. Na reira ka whakahau atu ano ahau ki a koe kia ripeneta, kei whakaititia koe e ahau ki toku mana kaha rawa, a kia whaki hoki koe i o hara, kei mamae koe i enei whiunga kua oti ake nei te korero e au, i pangia nei hoki koe e enei mamae i runga i te mehua iti rawa i te wa i tangohia ai e ahau toku wairua.

21. Ka whakahau atu ahau i a koe kia kaua koe e kauwhau i tetahi mea ke atu i te ripenetatanga, kaua hoki e whakaaturia enei mea ki te ao kia tae mai ra ano te wa tika ki toku whakaaro mohio.

22. No te mea kaore ratou e ahei te kai miti inaianei, engari te miraka, no reira kaua ratou e mohio ki enei mea kei mate ratou.

23. Maku koe e ako, a me whakarongo mai ki aku kupu, me haere i roto i te papakutanga o toku Wairua, a ka whai marietanga koe i roto i a au.

24. Ko Ihu Karaiti ahau; I haere mai hoki ahau i runga i ta te Matua i pai ai, a kei te mahi ahau i tana i pai ai.

25. Na, ka whakahau atu ano ahau i a koe, kaua koe e hiahia ki te wahine a tou hoa, kaua hoki e whai ki te patu i tou hoa.

26. Na, ka whakahau atu ano au ki a koe, kia kaua hoki koe e hiahia ki ou ake taonga, erangi me hoatu noa hei utu mo te tanga o te Pukapuka a Moromona, kei reira te pono me te kupu a te Atua.

27. Koia nei taku kupu ki nga tauiwi, kia tere ai taku kupu te haere atu ki nga Hurai, he morehu hoki nga Ramana na ratou, kia whakapono ai ratou ki te Rongo-pai, a kia kaua ai e titiro atu ki te haerenga mai o tetahi Mihaia, kua tae noa mai hoki ia.

28. A tenei ahau te whakahau nei ano i a koe kia inoi-a-mangai, kia pera ano i roto i tou ngakau, ae ra, i te aroaro o te ao, kia pera hoki i roto i te wahi ngaro, i te wahi matanui, kia pera ano i te wahi kore tangata.

29. A me whakapuaki e koe te rongo whakahari, ae ra, whakaaturia atu i runga i nga maunga, i runga hoki i nga wahi teitei katoa, ki waenganui i nga iwi katoa e whakaaetia ai koe kia kite.

30. Na, me tino mea tenei e koe i runga i te tino ngakau mahaki me te whakawhirinaki ki a au, kaua hoki e taunu atu ki nga kai-taunu.

31. Kaua koe e korero mo nga tikanga, (ara, mo nga whakaaro), erangi me whakapuaki e koe te ripenetatanga me te whakapono ki te Kai-whakaora, me te murunga hara hoki ma roto i te rumakanga me te kapura, ae ra, me te Wairua Tapu.

32. Nana, he whakahaunga tino nui tenei, ara, te whakahaunga whakamutunga e hoatu ai e ahau ki a koe mo tenei mea, he ranea hoki tenei mo tou haere, i tenei ra, i tenei ra, a tae noa ki te mutunga o tou oranga.

33. A he whakamamaetanga tou, me he mea ka whakakore koe ki enei whakahaunga, ae ra, tae noa atu ki tou whakangaromanga atu me ou taonga.

34. Hoatu tetahi wahi o ou rawa, ae ra, tetahi wahi o ou whenua, ara, te katoa haunga ano he oranga mo tou whanau.

35. Utua te nama i whakarite nei koe ki te kaiperehi, wetekina koe e koe ano i te ponongatanga.

36. Whakarerea atu tou whare me tou kainga, haunga i nga wa e hiahia ai koe kia kite i tau whanau

37. Me korero noa atu koe ki te katoa: ae ra, me kauwhau, me whakahauhau, whakapuakina te pono, ae ra, kia kaha te hamama, me te karanga ano i runga i te koa, e mea ana—Ohana ! Ohana ! kia whakapaingia te ingoa o tou Ariki, o tou Atua.

38. Me inoi tonu, a ka ringihia iho e ahau toku Wairua ki runga i a koe, a ka hira nga manaakitanga mou; ae ra, ka nui atu i nga taonga o te whenua me na ka riro i a koe, me te ahua pirau o aua mea.

39. Nana, e ahei ana ranei koe te korero i tenei, me te kore e koa, me te whakaoho ake ano i tou ngakau ki runga i te nui o te hari ?

40. E ahei ana ranei koe te omaoma noa ano he kai arahi matapo ?

41. Kaore ranei koe e whakapapaku i a koe me te mahaki, me te whakatika hoki i tou haere i mua i a au i runga i te matauranga ? Ae ra, haere mai ki a au ki tou Kai-whakaora. Amine.