1. He pono taku e mea atu nei ki a koutou e aku hoa, e korero atu ana ahau ki a koutou ma toku ake reo, ara te reo o toku Wairua, kia ahei ai i a au te whakaatu atu i oku whakaaro mo te taha ki o koutou teina i roto i te whenua o Hiona, te tokomaha o ratou e whakaiti pono ana, e rapu marie ana ki te ako i te matauranga, me te kimi i te pono.

2. He pono, he pono taku e mea atu nei ki a koutou, ka koa nga pera, no te mea ka riro i a ratou, no te mea ko ahau, ko te Ariki, he whakaatu i te ngohengohe ki te hunga mahaki, ki runga katoa ano i te hunga e pai ai ahau, ina whakatutuki ahau a te wa e kawea mai ai ratou ki te whakawakanga.

3. Nana, taku kupu ki a koutou mo te taha ki te kura i roto i Hiona, ko ahau, te Ariki, e tino koa ana ahau ki tenei kia whai kura i roto i Hiona, mo taku pononga ano hoki mo Pare P. Parata, mo tona u i roto i a ahau;

4. A ki te mea ka mahi tonu ia me te u i roto i a au; me u tonu ia ki te mahi i runga i nga kura i roto i te whenua o Hiona, a tae noa ki te wa e hoatu ai e au etahi atu whakahaunga;

5. A ko reira ahau manaaki ai i a ia ki nga manaakitanga huhua, o te korero karaipiture, me nga mea ngaro o te mohiotanga mo nga whakapainga haeretanga o nga kura, o te Hahi hoki i roto i Hiona;

6. A mo te taha ki te toenga o nga kura, ko ahau, te Ariki, e pai ana kia ngohengohe, tera noa ake ra te hunga e tika nei te whakawhiua, engari ma o ratou mahi e mohiotia ai.

7. Kua takoto te toki i runga i te pakiaka o nga rakau, a ko nga rakau katoa e kore e whakaputa mai i nga hua pai, e haua iho e maka ki roto i te ahi; ko ahau, te Ariki nana i whakapuaki tenei.

8. He pono taku e mea nei ki a koutou katoa i waenganui i a ratou kua mohio ki o ratou ngakau e pono ana, a kua maru, me o ratou wairua kua iro, a e hiahia ana kia mau ki o ratou kawenatatanga he mea na te whakahere tapu; ae, ko nga whakahere katoa i whakahaua ai e ahau, e te Ariki, kua manakohia e ahau,

9. No te mea ko ahau, te Ariki, ka mea nei i a ratou kia whakaputa mai i nga rakau whai hua i whakatokia nei ki te whenua pai he mea na te awa nanu kore, e hua ana i nga hua ataahua.

10. He pono taku e mea atu nei ki a koutou, koia ko taku whakaaro kia hanga he whare ki a au i roto i te whenua o Hiona, kia rite ki te tauira kua hoatu na e ahau ki a koutou;

11. Ae ra, kia hohoro te hanga, he mea na te whakatekau a taku iwi.

12. Nana, koia tenei te whakatekau me te patunga tapu i meinga e ahau, e te Ariki, i hiahiatia ra i o ratou ringaringa, koia tena, kia ai he whare e hanga ai ki a au mo te whakaoranga o Hiona.

13. Hei wahi e hoatu ai nga ohaoha ma nga Hunga Tapu katoa, hei wahi e tohutohungia ai mo te katoa e karangatia ai ki te mahi minita i roto i a ratou karangatanga maha me o ratou apihatanga,

14. Kia tino tuturu ai to ratou mohiotanga ki ta ratou minitatanga—i roto i te whakaaroaro, me te ritenga, me te akoranga—i roto i nga mea katoa e rite ana ki te kingitanga o te Atua i runga i te whenua, ko nga kii o taua kingitanga kua hoatu ki runga ki a koutou.

15. A ki te mea ka hanga e toku iwi he whare ki a au i runga i te ingoa o te Ariki, a ka kore e tuku i tetahi mea poke kia haere mai ki roto kia kore ai e whakapokea, ka tau iho toku kororia i runga i a ia;

16. Ae, me toku nohoanga kei reira, no te mea ka tomo ahau ki roto, a te hunga ngakau ma katoa e haere mai ai ki roto e kite i te Atua;

17. Engari ki te mea ka whakapokea, e kore rawa ahau e haere ki roto me toku kororia e kore e tae ki reira, no te mea e kore ahau e tomo ki roto i nga temepara tapu-kore.

18. Na, aianei, nana, ki te mahia e Hiona tenei mea ka kake haere ia, ka horapa haere ia, ka tupu hei kororia, hei nui, hei whakahara,

19. Ko nga iwi o te whenua ka whakahonore ki a ia me te ki ano, He pono ko Hiona te pa o to tatou Atua, he pono e kore a Hiona e hinga, e kore ano e nekehia atu i tona wahi, no te mea kei reira te Atua, me te ringa o te Atua kei reira,

20. A kua oti ia he mea na tona kaha me tona nui, koia ra tona whakaoranga me tona pourewa tiketike;

21. No reira, he pono, ko te kupu tenei a te Ariki, meinga a Hiona kia koa, no te mea ko Hiona tenei, ko te ngakau ma; no reira meinga a Hiona kia hari, i te mea e tangi ana te hunga tutu;

22. No te mea, nana, titiro te whiunga ka puta wawe mai ki runga i te hunga atua-kore, ano he awhiowhio, ko wai e mawhiti i a ia.

23. Ko te whiunga a te Ariki ka taha atu i te po, i te ao, ko te papatanga hei whakawehi i nga iwi katoa; a ko reira e tatari, a kia tae mai ra ano te Ariki;

24. Ko te riri o te Ariki e tahu ana ki o ratou whakarihariha, me a ratou mahi kino katoa.

25. Ahakoa ra ko Hiona e mawhiti ki te mea ka u ki te mahi i nga mea i whakahaua ai e te Atua ki a ia,

26. Engari ki te kore ia e mahi i nga mea i whakahaua ai e au ki a ia, ka torotoro ahau i a ia e rite ana ki ana mahi katoa me te mamae e pa ai, me te mate uruta, me te hoari whakamamaetanga, me te kainga ahi;

27. No konei ra, tukua tenei kia panuitia wawetia ki roto i o ratou taringa, ko ahau, ko te Ariki kua manakohia a ratou homaitanga, a ki te mea ka hara kore tonu ia kahore rawa tetahi o enei mea e pa mai ki runga i a ia,

28. A ka manaaki ahau i a ia ki nga manaakitanga, me te tatakirau i nga manaakitanga ki runga i a ia, ki runga ki ona whakatupuranga mo ake, ake, e ai ta te Ariki, ta tou Atua. Amine.