1. Kia whakapaingia tou ingoa, e te Ariki, e te Atua o Iharaira, e tiaki nei koe i te kawenata me te whakaatu ano i au mahi tohu ki au pononga e haere nei i runga ano i te tika ki mua ki tou aroaro, me te katoa ano o o ratou ngakau;

2. Ko koe ra i whakahau nei i au pononga he whare mo tou ingoa ki tenei wahi (Katarana).

3. Na, kua kite inaianei e te Ariki, kua oti i au pononga i runga ano i au whakahau.

4. E inoi atu ana matou ki a kae, e te Matua Tapu, i roto ano i te ingoa o Ihu Karaiti, hua o tou uma, ko ia nei anake te ingoa e ora ai nga tamariki a te tangata, e inoi atu ana matou ki a koe e te Ariki, kia tangohia atu tenei whare, te mahi a o matou ringaringa a ou pononga, e kiia mai nei e koe kia hanga;

5. Kei te mohio koe i hanga e matou tenei whare i roto ano i nga taumahatanga; i roto ano hoki o matou rawa-koretanga kua hoatu nei e matou o matou taonga, ki te hanga whare mo tou ingoa, kia whai wahi ai te Tama a te tangata hei whakaaturanga ki ona iwi.

6. E ki nei koe i roto i au whakakitenga, i homai nei ki a matou, i karanga ai koe i a matou he hoa mou, i ki ai koe, “Karangatia he huihuinga mo koutou, penei i taku i whakahau atu nei ki a koutou;

7. Ko nga tangata katoa kahore e whakapono, ata rapua, akona tena me tena ki te kupu o te matauranga; ae, rapua i roto i nga pukapuka papai, nga kupu o te matauranga, rapua me te ako i runga ano i te ngakau whakapono.

8. Huia koutou; taka ano nga mea tika katoa, whakaturia he whare hei te karakia ano, hei whare ano hei noho-pukutanga, hei whare ano mo te whakapono, hei whare akoranga, hei whare mo te kororia, hei whare mo nga tikanga hei whare mo te Atua,

9. Kia tomo mai ai i roto ano i te ingoa o te Ariki, kia puta atu ai i roto ano i te ingoa o te Ariki, me a koutou oha katoa e oha ai koutou i roto ano i te ingoa o te Ariki, me te ara ano o koutou ringa ki te Runga Rawa.”

10. No reira, e te Matua Tapu, e inoi atu ana matou kia awhinatia matou, tou iwi, ki tou aroha i roto ano i to matou karangatanga kia hui i runga ano i te rangimarie, kia rite ai ki tau e honore ai, ki tau ano hoki e tino pai ai,

11. Hei te ahuatanga ano e rite ai matou ki mua i ou kanohi, kia riro mai ai i a matou nga whakariteritenga o nga kupu whakaari i homai nei e koe ki a matou, ki tou iwi, i roto ano i nga whakakitenga mai ki a matou;

12. Kia tau ai tou kororia ki runga i tou iwi, ki runga i tenei, tou whare e whakatapua atu nei e matou ki a koe, kia tino tapu ai, kia noho tonu ai tou tapunga i roto i tenei whare,

13. Kia meinga ano nga tangata katoa e tomo mai ana i te tatau o te whare o te Ariki, kia whakarongo ano ratou ki tou kaha e tahu ana, kia mohio ai ratou he mea ata whakatapu nau tenei whare, a nou ano tenei whare he wahi ano no tou tapunga.

14. Me tuku mai ano e koe, e te Matua Tapu, ko nga tangata katoa e whakawhetai ki a koe i roto i tenei whare, kia ahei ratou te akona ki nga kupu o te matauranga i roto i nga pukapuka tino papai, kia rapu ai ratou, kia ako ai ano hoki, i runga ano i te whakapono, i tau i mea mai ai;

15. Kia tupu ake ai ratou i roto i a koe, kia riro mai ai i a ratou te nuinga o te Wairua Tapu, kia hui ano ratou ki ta au ture, kia whakatautau ai ratou mo nga mea tika katoa e riro mai i a ratou;

16. Kia noho tonu ai tenei whare hei whare karakia, hei whare noho-pukutanga, hei whare mo te whakapono, hei whare mo te kororia, ara mo te Atua, hei whare ano mou;

17. Kia tomo mai ai tou iwi ki roto i tenei whare, i runga ano i te ingoa o te Ariki;

18. Kia puta atu ano ratou ki waho i runga ano i te ingoa o te Ariki;

19. Me o ratou oha ano hei roto i te ingoa o te Ariki, i nga ringa tapu ano, e ara ai ki te tino Runga Rawa;

20. Me kaua ano tetahi mea poke e whakaaetia kia uru mai ki roto i tou whare whakakino ai;

21. A ki te he tetahi o tou iwi me hohoro ano tona ripeneta, me te tahuri atu ki a koe, a kia whai painga ano ia ki mua i a koe, a kia ringihia ano ki a ia nga manaakitanga i kiia nei e koe ka peratia ki nga mea e whakapono ana ki a koe i roto ano i tou whare.

22. E inoi atu ana matou ki a koe, e te Matua Tapu, kia haere atu au pononga ki waho o tenei whare, kia whauhia ki tou kaha, kia tau tonu tou ingoa ki runga i a ratou, kia noho ano ratou i waenganui o tou kororia, kia tiaki ano hoki au anahera i a ratou;

23. Kia whaki ai ratou i nga korero kororia nui, i te pono, puta noa nga pito o te whenua, kia mohio ai ratou nau enei mahi, a kua whatoro ano tou ringa ki te whakatutuki i au kupu i korerotia ai e nga mangai o au poropiti, mo enei mo nga ra whakamutunga.

24. E inoi atu ana matou ki a koe, e te Matua Tapu, kia whakataua tou iwi, nga mea ra hoki e whakapono nei ki a koe, kia puritia honoretia ano te ingoa hei tu i roto i tou whare nei, ki nga whakatupuranga katoa, a mo ake tonu atu,

25. Kia kaua rawa tetahi patu e kaha atu ki a ratou; ko ia e keri rua ai mo ratou kia taka ano ko ia ano ki roto;

26. Kia kaua ano nga ropu o nga mahi kikino e kaha atu, a e eke ki runga i tou iwi kua noho nei tou ingoa ki runga i a ratou i roto ano i tenei whare;

27. Ki te maranga mai ratou ki tou iwi, kia ngiha tou riri ki a ratou,

28. Ki te papaki ratou i tenei iwi, kia pakia ratou e koe, kia whawhai koe mo tou iwi, kia pera ano me tou whawhaitanga i mua, ara i nga wa o te whawhai, kia maunu mai ai ratou i roto i nga ringaringa o o ratou hoa-riri katoa.

29. E inoi atu ana matou ki a koe, e te Matua Tapu, kia whakararua, kia whakapohehetia, kia whakamatia nga tangata katoa e korero hon ana, i te whanui i te ao mo tou pononga, mo au pononga ranei, me he mea ratou ki te kore e ripeneta, ina kauwhautia atu te Rongo-pai o te oranga-tonutanga ki o ratou taringa,

30. Kia whakakorea katoatia a ratou mahi, a kia tahia hoki e te nganga, e tau whakaritenga ano hoki i tou riri e tukua ai e koe ki a ratou, kia mutu ai te teka me te horihori ki tou iwi;

31. Kei te mohio koe, e te Ariki, kei te hara-kore au pononga i mua i tou aroaro mo te whakaatu ra hoki i tou ingoa i pangia ai ratou e enei rarunga;

32. No reira, ka mea atu matou i te tino whakaotinga ki raro i tenei ioka;

33. Unuhia atu, e te Ariki, unuhia atu i nga kaki o au pononga, ara ki tou kaha, kia ara ai matou ki te mahi i au mahi i waenganui i tenei whakatupuranga.

34. E Ihowa, kia aroha koe ki tenei iwi, i te mea kua hara katoa te tangata murua atu nga hara o tou iwi, tukua atu era kia whakangaromia ake tonu atu.

35. Tukua te whakawahinga o ou pononga kia hiiritia ki runga i a ratou ki nga kaha i ahu mai i runga;

36. Tukua ano hoki ki runga i a ratou, kia pera me tau whakakinga i a ratou i te ra o Petekoha, tukua ano hoki te homaitanga o nga reo ke kia ringihia ki runga i tau iwi, kia reo rua ano hoki penei me te arero ahi, tae noa ki tona whakamaoritanga,

37. Whakakia ano hoki tou whare ki tou kororia, penei me te hau kaha.

38. Maka ki runga i ou pononga te tino tikanga o te kawenata, kia haere ratou ki te kauwhau i tau kupu, kia hiiritia ake e ratou te ture, kia whakaritea e ratou nga ngakau o ou Hunga Tapu mo tau whakawakanga e tukua mai nei e koe, i roto i tau riri, ki te hunga e noho ana i runga i te mata o te whenua, mo o ratou hara, kia kore ai tou iwi e hemo i nga ra o te mamaetanga.

39. Ahakoa ko te kainga e tomo ai au pononga, kia tango nga tangata o taua kainga i a ratou kupu, kia tau ano tou rangimarie me tau whakaoranga ki taua kainga, kia kohikohia mai ai e ratou nga hunga tika o taua kainga, kia haere mai ai ratou ki Hiona, ki ona Takiwa rahei, ki te wahi i tohungia ai e koe, me te waiata i nga waiata o te haringa-mutunga-kore;

40. Kia tae ra ano ki te mutunga o tenei, ka whakaeke ai i tou whakawakanga ki taua kainga.

41. Ahakoa ko te kainga e tomo ai au pononga, a ki te kore ratou e whakarongo mai ki nga kupu o au pononga, e kiia atu ai ratou e au pononga kia tupato i nga mate o tenei whakatupuranga, tukua ki taua kainga nga whakararunga i korerotia ra e nga mangai o au poropiti;

42. Unuhia mai, e Ihowa, e tonoa atu nei e matou, kia unuhia mai au pononga i roto i a ratou ringa, horoia ano hoki ratou i roto i o ratou toto.

43. E te Ariki, kahore noa matou i te koa ki nga whakakinonga a te tangata ! Kei te pai ano o ratou wairua i tou aroaro;

44. Kia rite ano au kupu; awhinatia au pononga ki te ki, kia awhinatia ano ratou e tou aroha noa, kei tau ano i pai ai, e te Ariki, e hara i te mea kei ta matou.

45. Kei te mohio ano matou e korerotia kinotia ana nga mea kino e nga mangai o au poropiti, i roto i nga ra whakamutunga—kia ringihia atu e koe tau whakawakanga, i runga ano i te mehua-kore;

46. No reira, e te Ariki, unuhia mai tou iwi i roto i te kino; meatia au pononga kia hiiritia ake te ture, whakaungia ano nga kupu, kia noho rite ai ratou a te ra o te tahunga.

47. E inoi atu ana matou ki a koe, e te Matua Tapu, kia mahara koe ki nga tangata nana nei i a mai (na te hunga e noho ana i te Takiwa o Tiakihana, i Mihuri) i to ratou whenua tupu, kia unuhia e koe, e te Ariki, tenei ioka o te mate e mau ra i runga i a ratou.

48. Kei te mohio koe, e te Ariki, kei te akina ratou e nga mate i te kino o nga tangata, e rewa nei o ratou manawa i te aroha ki a ratou, no te mea kua whakataumahatia ratou ki te kino.

49. E te Ariki, kia pehea ano te roa o tenei iwi e pangia ana e tenei taumahatanga, me te tae atu ki ou taringa nga tangi o a ratou mea harakore, a titi ake ano o ratou toto hei whakaaturanga i tou aroaro, kia kaua ano koe e whakaaturia tou kaha hei painga mo ratou ?

50. Tohungia, e te Ariki, tera nohoanga kino nana nei au pononga, ara tou iwi i a mai, kia mutu ratou ki te whakakino, kia ripeneta ratou i o ratou hara, me he mea ra e kitea he ripeneta;

51. Engari ki te kore, meatia tou ringa, e te Ariki, whakaorangia tou iwi kua tohungia nei e koe he Hiona ki a ratou !

52. Ki te kore rawa ra hoki, me kaua te take a tou iwi e kore te tae ki tou aroaro, kia ngiha tou riri ki a ratou, kia ngaro haere ratou, katoa atu nga pakiaka me nga peka i raro i te rangi;

53. Engari ki te ripeneta ratou, me aroha koe, me whakahuri ke tou riri, ina titiro iho koe ki nga mata o au i whakawahi ai.

54. Tohungia, e te Ariki, nga iwi katoa o te whenua, tohungia ano nga kai whakahaere tikanga o to matou whenua, tukua ano nga mea nunui kia kaua e raru, ara, te hanganga o nga ture o to matou whenua e o matou matua, kia mau a ake tonu atu;

55. Kia mahara koe ki nga kingi, piriniha, nga mea rangatira me nga mea nunui o te whenua, me nga iwi katoa, me nga hahi katoa, nga rawa-kore katoa, me nga mea e mamaetia ana i runga i te whenua,

56. Kia ngawari o ratou ngakau, ina haere atu au pononga i tou whare, e Ihowa, ki te whakaki i tou ingoa, kia ngaro ai o ratou kino i te tika, kia tirohia rawatia ai tou iwi e te katoa,

57. Kia mohio ai nga pito katoa o te ao kua rongo matou au pononga i tou reo, a nau matou i tuku mai,

58. Kia riro mai ai i roto i a ratou, i au pononga i nga uri o Hakopa, i nga mea tika hei hanga he kainga tapu ki tou ingoa, pera me tau i whakahau ai.

59. E tono atu tenei matou kia tohungia e koe ki Hiona era atu Takiwa, i ko atu o tenei kua oti nei te tohu e koe, kia hui ai tou iwi i runga i te kaha me te rangatira, kia horiputia ai au mahi e te tika.

60. Ko enei kupu, e te Ariki, kua whakapuakina nei e matou i tou aroaro, ara mo nga whakakitenga me nga ture i homai nei e koe ki a matou, kua whakatuturutia nei ki nga Tauiwi;

61. Engari kei te mohio ano koe e tino aroha ana koe ki nga tamariki o Hakopa, kua tohatohangia nei ki runga i nga maunga, mo te wa roa, i roto i te rangi ao kapua me te pouri;

62. No reira matou i tono atu ai kia tohungia nga tamariki a Hakopa, taua Hiruharama i tenei haora kia timata te whakaorangia,

63. Kia whakatakangia atu te ioka o te ponongatanga i te whare o Rawiri,

64. Me nga tamariki o Hura kia timata te hoki ki te whenua i homai nei e koe ki a Aperahama, ki to ratou matua;

65. Kia meatia nga rerenga o Hakopa, i kanga nei ratou a i pakia nei, mo o ratou hara, kia whakakohia mai a ratou huarahi rereke ki te Rongo-pai mau tonu,

66. Kia whakataka ai a ratou patu whakaheke toto, kia mutu ai ta ratou whawhai;

67. Kia tae mai ai ki te mohiotanga, ki te tika o nga rerenga o Iharaira i tohatohangia nei ki nga pito o te ao, kia whakapono ki te Mihaia, kia whakaorangia ai, kia hari ai i mua i a koe.

68. E te Ariki, kia mahara koe ki tou pononga, ki a Hohepa Mete, tamaiti, me ona tukinotanga, ki tona kawenatatanga ki a Ihowa, ki tona oatitanga ki a koe, e te Atua Kaha Rawa o Hakopa, me nga whakahau i hoatu ai e koe ki a ia, i mahi nei ia i tau i runga i te tika.

69. E te Ariki, tohungia tana wahine me ana tamariki, kia whakanekehia ake ratou ki tou aroaro, kia tiakina ratou e tou ringa atawhai;

70. Tohungia ano hoki a ratou hoa tata, kia pakaru ai o ratou kuaretanga, kia tahia e peneitia me te waipuke, kia tahuri ai ratou kia whakaorangia ngatahitia me Iharaira, kia mohio ai ko koe tonu te Atua.

71. Kia mahara koe, e te Ariki, ki nga tumuaki, ara ki nga tumuaki katoa o tau Hahi, kia whakateiteitia ake ratou e tou ringa matau, me a ratou whanau, me a ratou hoa tata, kia noho tonu ai o ratou ingoa, kia noho ai hei whakamaharatanga mo ake tonu atu, atu o tenei whakatupuranga ki tena whakatupuranga.

72. Kia mahara koe, e te Ariki, ki tau Hahi katoa, ki a ratou whanau katoa, me o ratou hoa tata katoa, me o ratou mea katoa e pangia ana e te mamae, e te mate, katoa atu me nga rawa-kore me nga ngakau humarie o te whenua, kia tau ai te kingitanga i hanga noatia nei e koe, kia noho ai hei maunga nui, kia ki ano te ao katoa;

73. Kia puta mai ai tau Hahi ki waho o te koraha, o te pouri, kia tiaho pera me te marama, kia marama me te ra, kia pera te kino me nga hoia e mau kara ana,

74. Kia whakakakahuria pena me te marena a taua ra e whakapuaretia ai e koe nga rangi, e whakahekea ai nga maunga i tou aroaro, me nga hopua kia whakateiteitia ake, nga wahi raorao kia whakamaeneenengia; kia whakakia te ao ki tou kororia,

75. A te wa e tangi te tetere mo te hunga mate kia mau ake matou i te kapua, kia tutaki ki a koe, kia noho tonu ai matou ki te Ariki,

76. Kia ma ai o matou kakahu, kia whakakahuria ai matou ki te tika, me te rau rakau i o matou ringaringa, me o matou matenga ki te karauna o te kororia, kia kotia ai hei te hari-mutunga-kore mo o matou rarunga.

77. E te Ariki, e te Atua Kaha Rawa, kia whakarongo iho koe ki ta matou e tono atu nei, me mutu iho ano e koe i te rangi, i tou kainga tapu, i te wahi e noho ai koe i runga i tou torona, i te kororia, i te honore, i te kaha i te rangatiratanga, ki te tika, ki te aroha, me te whakakinga, a ake tonu atu.

78. Whakarongo mai, whakarongo mai ki a matou, e te Ariki, utua mai enei tono, a kia tangohia ki a koe te whakatapunga o tenei whare, te mahi a o matou ringa, kua whakaturia ki tou ingoa !

79. Me tenei Hahi ano, kia mau ai tou ingoa ki runga ki a ia; a kia awhinatia matou e te kaha o tou Wairua, kia tangi tahi o matou reo me nga anahera nui e noho tata ana ki tou torona, me nga waiata whakamoemiti. Hohana ki te Atua me te Reme;

80. Kia kakahuria au i whiriwhiri e te oranga, a kia waiata ai au Hunga Tapu he waiata koa. Amine, a Amine.