1. Whakarongo e koutou e te hunga e whakaae ana ki toku ingoa, e ai ta te Ariki, ta to koutou Atua, no te mea nana, e murua ana toku riri ki te hunga tutu, a e mohio ratou ki toku ringa i te ra e tae atu ai, i te ra hoki o te riri ki runga i nga iwi katoa.

2. A ko te tangata e kore e mau ki tona ripeka me te aru i a au, me te pupuri ano i aku whakahaunga, e kore e whakaorangia.

3. Nana, ko ahau ko te Ariki, ka whakahau, a ko te tangata e kore e whakarongo mai, ka hatepea atu ina rite toku wa, a i muri i taku whakahaunga i te mea kua takahia taua whakahaunga;

4. No reira, ko ahau ko te Ariki, ka whakakore (ano i taua whakahaunga) rite tonu ki taku e pai ai; a ka rapua he utu i runga i nga matenga i te hunga tutu, e ai ta te Ariki;

5. No reira, ka whakakorea te whakahaunga i hoatu ki aku pononga, ki a Tamati B. Maahi raua ko Etera Teia, a ka hoatu e ahau he whakahaunga hou ki toku pononga ki a Tamati, he mea e hohoro ai tona haerenga ki te whenua o Mihuri, a me haere a Hera J. Kiriwhini hei hoa mona;

6. No te mea, nana, ka whakakorea e ahau te whakahaunga i hoatu ki aku pononga ki a Hera J. Kiriwhini raua ko Nuera Naiti, he mea na te kaki maro o taku iwi e noho ana i Tamihana, me o ratou tututanga;

7. No reira ko taku pononga ko Nuera Naiti me noho tahi ki a ratou, a ko te hunga katoa e ahei ana ki te haere, ko ratou nei he hunga whakaiti i mua i a au, me arahi e ia ki te whenua kua whakaritea e ahau.

8. Me tenei ano, he pono taku e mea atu nei ki a koutou, ko taku pononga ko Etera Teia me ripeneta mo tona whakapehapeha, mo tona kaiponu hoki, a me whakarongo ia ki te whakahaunga tuatahi i hoatu e ahau ki a ia, he mea mo te whenua kei reira ia e noho ana;

9. A me he mea ka meatia e ia tenei, i te mea kaore ano kia wehewehea te whenua, ka mau tonu te whakaritenga kia haere ia ki te whenua o Mihuri;

10. Ki te kore me hoki atu ano te moni i utua ai e ia, a me puta atu ia i taua wahi, a me tapahi ia ki waho o te Hahi, e ai ta te Ariki, ta te Atua o nga mano;

11. Na ahakoa ko te rangi, ko te whenua e pahemo, ko enei kupu ia e kore e pahemo, engari ka rite katoa.

12. A me he mea ka riro ma taku pononga, ma Hohepa Mete, tamaiti, e utu te moni; nana, maku, ma te Ariki, e utu atu ano ki a ia i te whenua o Mihuri, he mea e utua katoa ai ano te hunga katoa e tae mai ana ki a ia, rite tonu ki ta ratou e mea ai,

13. No te mea, rite tonu ki a ratou mahi, to ratou whiwhinga, ara ka whakawhiwhia ratou ki nga whenua hei kainga tupu mo ratou.

14. Nana, ko te kupu tenei a te Ariki ki tona iwi, he maha nga mea hei mahinga, hei ripenetatanga ma koutou, no te mea nana, ko o koutou hara kua tae ake ki a au, a kaore e whakarerea noatia iho, no te mea e whai ana koutou i a koutou ake whakaakoranga.

15. A ko o koutou ngakau kaore e makona ana. Kaore ano koutou e whakarongo ki te pono, engari e manawareka ana ki nga mea he.

16. Aue te mate mo koutou, e te hunga whai-taonga, kaore nei e hoatu i o koutou taonga ki te hunga rawakore, e pirau hoki o koutou wairua i o koutou taonga: a ka penei ta koutou tangi i te ra e tae atu ai, o te whakawakanga, o te riri hoki—Kua hore te wa o te kotinga, kua mutu te raumati, a ko toku wairua kaore ano kia whakaorangia !

17. Aue te mate mo koutou, e te hunga rawakore, te hunga kaore nei o koutou ngakau kia maru, o koutou wairua kia ripeneta, o koutou takapu kia ki, o koutou ringaringa ano kaore e puritia ana i te mau poka noa i nga mea o era atu tangata, o koutou kanohi e ki tonu ana i te apo, he hunga hoki koutou kaore e mahi ko o koutou ringa ake ano !

18. Engari ka koa te hunga rawakore ngakau ma, no ratou nei nga ngakau maru, me nga wairua iro, e kite hoki ratou i te kingitanga o te Atua e haere mai ana, me te kaha me te kororia nui ki to ratou whakaoranga, e riro hoki i a ratou te momonatanga o te whenua.

19. No te mea nana, ka haere mai te Ariki, me te whakarite utu ano, a ko reira utua ai e ia nga tangata katoa, a ka koa te hunga rawakore;

20. A ka riro i o ratou whakatupuranga te whenua, i tetahi whakatupuranga ki tetahi whakatupuranga, ake ake ake. A ka mutu i konei taku korero ki a koutou. Ae ra, koia ano. Amine.