1. Whakarongo, a kia rongo ki te reo o te Ariki, e koutou kua huihui tahi na e nga Tohunga Nui o toku Hahi, kua riro nei i a koutou te kingitanga me te mana.

2. No te mea, he pono e ai ta te Ariki, e tika ana i roto i ahau kia whakaritea tetahi pihopa mo koutou, ara i roto i a koutou mo te Hahi i roto i tenei wahi o te maara-waina o te Ariki.

3. A he pono kua whakaritea e koutou tenei mea i runga i te whakaaro nui, no te mea e hiahiatia ana e te Ariki i te ringaringa o nga tuari katoa kia whakaatu ratou i to ratou tuaritanga i roto i tenei wa, i roto hoki i te ao mutunga-kore.

4. No te mea ko ia e u ana, a e whai whakaaro ana i roto i tenei wa ka tau hei noho ki nga kainga kua whakaritea mo ratou e taku Matua.

5. He pono taku e mea atu nei ki a koutou, ko nga kaumatua o te Hahi i roto i tenei wahi o taku maarawaina ka whakaaturia to ratou tuaritanga ki te pihopa e whakaritea ai e ahau i roto i tenei wahi o taku maara-waina.

6. Ko enei mea ka tuhituhia kia hoatu ai ki te pihopa i Hiona.

7. A ko te mahi ma te pihopa ka mohiotia i runga i nga whakahaunga kua hoatu nei, i runga hoki i te reo o te huihuinga.

8. Na kati, he pono taku e mea atu nei ki a koutou, ko taku pononga ko Nuera K. Witini te tangata e whiriwhiria ai, e whakaritea ai ki tenei mana. Koia tenei ko te hiahia o te Ariki, to koutou Atua, to koutou Kai-hoko. Koia ano. Amine.

9. E penei ana te kupu a te Ariki hei tapiri atu ki te ture kua hoatu nei e whakaatu ana i te mahi ma te pihopa kua whakaritea nei mo te Hahi i roto i tenei wahi o te maara-waina.

10. Kia tiakina e ia to te Ariki whare takotoranga-taonga, kia tango hoki nga moni a te Hahi i roto i tenei wahi o te maara-waina.

11. Kia tango hoki i nga whakaaturanga a nga kaumatua, pera me te whakahaunga kua hoatu nei, a kia hoatu nga mea e matea ana ki nga mea e utu ana i ta ratou e whiwhi ai, i te mea e whai mea ana ratou hei utu.

12. Kia whakatapua ai hoki tenei hei painga mo te Hahi, mo te hunga rawa-kore, me te hunga e hapa ana.

13. A ko ia kahore ana mea hei utu ka tangohia te whakaaturanga, a ka hoatu ki te pihopa o Hiona, a mana e utu te nama i roto i a te Ariki e hoatu ki roto ki ona ringa.

14. A ma nga mahi a te hunga pono e mahi ai i roto i nga mea wairua, i roto i te hoatutanga o te Rongo-pai, me nga mea o te kingitanga ki te Hahi, ki te ao hoki, e utu te nama ki te pihopa i Hiona;

15. Penei ka tangohia i roto i te Hahi, no te mea i runga i te ture ko nga tangata katoa e haere ake ana ki Hiona, me whakatakoto a ratou mea katoa ki mua i te pihopa i Hiona.

16. A kati, he pono taku e mea atu nei ki a koutou, ko nga kaumatua katoa i roto i tenei wahi o te maarawaina me hoatu te whakaaturanga mo tana tuaritanga ki te pihopa i tenei wahi o te maara-waina,

17. Ma te whakaaturanga a te kai-whakawa, a te pihopa ranei i roto i tenei wahi o te maara-waina, ki te pihopa i Hiona, ka whakaaetia ai nga tangata katoa ka rite ai mo tetahi nohoanga, kia whakaaetia hoki he tuari whai whakaaro, he kai mahi pono hoki;

18. Ki te kore he whakaaturanga e kore ia e whakaaetia e te pihopa o Hiona.

19. A he pono taku e mea atu nei ki a koutou, ko nga kaumatua katoa e hoatu ana i a ratou whakaaturanga ki te pihopa o te Hahi i tenei wahi o te maara-waina, me tautoko e te peka, e nga peka ranei e mahi ana ia, he mea e whakaatu ai kei te tika a ia me ana mahi katoa.

20. Me tenei ano, ko aku pononga e whiriwhiria ana hei tuari mo nga pukapuka o taku Hahi, me titiro ratou ki te pihopa, ki nga pihopa ranei hei awhina i a ratou i roto i nga mea katoa,

21. Kia panuitia ai nga whakakitenga, kia tukua atu hoki ki nga pito o te whenua, kia whiwhi ai hoki ratou ki nga moni e rite ana hei painga mo te Hahi, i roto i nga mea katoa,

22. Kia tika ai hoki ratou i roto i nga mea katoa, a kia whakaaetia hei tuari whai-whakaaro.

23. A nana, he tauira tenei mo nga peka katoa o taku Hahi i roto i nga whenua katoa e whakaturia ai he peka. Na kati, ka whakamutua e ahau aku korero. Amine.

24. Kia ruarua nga kupu hei tapiri atu ki nga ture o te kingitanga mo nga mema o te Hahi, nga mea o ratou e whiriwhiria ana e te Wairua Ora kia haere ake ki Hiona, me nga mea e tukua ana kia haere ake ano ki Hiona,

25. Me mau ake e ratou tetahi whakaaturanga he mea na nga kaumatua tokotoru o te Hahi he whakaaturanga na te pihopa ranei,

26. Ki te kore, ko ia e haere ake ai ki te whenua o Hiona, e kore e whakaaetia hei tuari whai-whakaaro. He tauira hoki tenei. Amine.