1. E te Atua ! kei hea ra koe ? A kei hea te arai e uhi na i tou wahi ngaro ?

2. Kia pehea te roa o tou ringa e pepeke ana, a me to kanohi, ae ra, to kanohi ma, e titiro mai ana i nga rangi mutunga-kore ki nga he o to iwi, a me o pononga, a ka rongo tou taringa i a ratou tangi.

3. Ae ra, e te Ariki, kia pehea te roa e pehia hetia ana ratou i enei he, i mua o te ngohengohetanga mai o to ngakau ki a ratou, a ka uru atu ai te aroha ki roto ki ou whakaaro mo ratou ?

4. E te Ariki, e te Atua Kaha Rawa, Kai-hanga o te rangi, me te whenua, me nga wai, me nga mea katoa i roto nei i a ratou, nona nei te kaha me te mana kei runga i te rewera, me te pouri, me te rangatiratanga pouri o Heiora ! Torona mai tou ringa; kia titiro mai tou mata; kia hapainga ake tou whare; me tuku tou wahi ngaro kia kaua e roa atu e araitia ana; kia ngohengohe mai tou ngakau, a kia puta te aroha a ou whakaaro ki a matou;

5. Me tuku kia mura te riri ki o matou hoa-riri; i runga i te riri o tou ngakau, ma to hoari ka whakarere noa atu ai i o matou heanga.

6. Kia mahara ki o Hunga Tapu e whakamamaetia nei, e to matou Atua ! A ka hari o pononga i runga i tou ingoa mo ake tonu atu.

7. E taku tama, kia tau te rangimarie ki tou wairua; ko tou rarunga me ou whakamamaetanga tera pea mo te wa poto noa;

8. Otira, ki te manawanui koe, ka whakateiteitia ake koe ki runga; ka whai kaha koe ki runga ake i ou hoa-riri;

9. Era ou hoa e piri tonu ki a koe, a era ano ratou e mihi atu ki a koe, me te aroha o nga ngakau, me nga ringaringa aroha;

10. Kahore ano koe kia pera noa i a Hopa; kahore ou hoa e tautohetohe ana ki a koe, kahore hoki e whakapae ana ki a koe mo te hara, pera me ta ratou ki a Hopa;

11. A ko nga hunga e whakapae ana ki a koe mo te hara, kia kangaia to ratou whakaaro, a era o a ratou hiahia e rewa atu pera me te huka ma e rewa nei i mua i nga hihi wera o te ra e haere ake ana;

12. A hui atu hoki ki tenei, ara kua mauria mai e te Atua ki tona ringa me te hiiri, hei tini i nga wa me nga takiwa, a hei whakapohe i o ratou ngakau kia kore ai ratou e matau ki ana mahi whakamiharo; kia matauria ai ano hoki ratou e ia, a kia whakaritea ai ano ratou ki ta ratou ake mahi;

13. No te mea kua kino ano hoki o ratou ngakau, a nga mea e hiahiatia nei e ratou kia meatia ki runga ki etahi, me te aroha hei mea e mate ai era atu, era e tino kino atu to ratou whiwhinga ki aua mea;

14. A raru noa hoki ratou, ina tapahia atu o ratou hiahia;

15. E kore e maha nga tau mai ano i taua wa ka hatepea atu ratou me a ratou uri i raro o te rangi, a e ki ana te Atua, kahore rawa tetahi o ratou e mahue hei tu ki te taha o te taiepa.

16. Kia kanga nga hunga e hapai ana i te rereke ki aku hunga whiriwhiri, ko te kupu tenei a te Atua, a ka karanga ratou, kua hara ratou, i te mea kahore nei ratou i hara i mua i toku aroaro, te kupu tenei a te Atua, engari kua meatia e ratou te mea e rite ana ki te titiro a oku kanohi, ara te mea i whakahaua atu e ahau ki a ratou;

17. Engari ko nga hunga e karanga ana he hara, e karanga ana i taua mea no te mea he pononga ratou na te hara, a ko ratou ake nga tamariki o te kore e whakarongo;

18. A ko nga hunga e kanga he ana ki aku pononga, hei mea e hari atu ai ratou i a ratou ki roto i te hereherenga, me te mate:

19. Ano te nui o te pouri mo ratou; no te mea kua tukinotia e ratou aku tamariki ririki, era ratou e tapahia atu ki waho o nga tikanga o toku whare;

20. E kore e ki a ratou kete, a ka pakaru o ratou whare me a ratou whare kararehe, a ka tirohia kinotia ratou e nga hunga e whakaaro pai ana mo ratou.

21. A e kore ratou e tika kia whiwhi i te Tohungatanga tae atu ki a ratou uri i muri i a ratou, mai i tetahi whakatupuranga ki tetahi whakatupuranga.

22. He mea tino pai rawa atu mo ratou me he mea i whakatarewarewatia he kohatu miira ki o ratou kaki, a kia toromi ai ratou ki te rire o te moana.

23. Ano te nui o te pouri mo te hunga e tukino ana i toku iwi, me te pei atu, me te kohuru, me te korero kino ki a ratou, te kupu tenei a te Atua o nga mano; te whakatupuranga kino e kore rawa e puta i te kanga o te reinga.

24. Titiro, kei te kite oku kanohi me te mohio ki a ratou mahi katoa, a kei a au e pupuri ana te whakawakanga tere i te wa e rite ana mo ratou katoa.

25. No te mea tera ano te wa kua whakaritea mo nga tangata katoa e rite ana ki ana mahi.

26. Ka hoatu e te Atua ki a koutou te Hunga Tapu e tona Wairua Ora, te matauranga, ae ra, ma te homaitanga puku a te Wairua Ora, kahore ano nei kia whakakitea mai i te ao, engari inaianei;

27. Koia te mea i whanga i tumanako tonu ai o tatou matua kia whakakitea mai i nga wa whakamutunga nei, te mea i whakaaria ki o ratou ngakau e nga anahera, e pupuri ana, e tiaki ana mo te tutukitanga i to ratou kororia.

28. Kei te haere mai te wa, kei taua wa e kore tetahi mea e puritia mai ahakoa ra kotahi Atua, a he maha ranei nga Atua, ka whakaaria katoatia mai aua mea;

29. Nga torona katoa, me nga rangatiratanga, nga kingitanga me nga mana, era e whakakitea mai, a ka riro i nga hunga katoa e u tonu i runga i te kaha ki te Rongo-pai o Ihu Karaiti.

30. A me he mea tera nga wahi kua rite i nga rangi, a i nga moana; a i te whenua maroke, a i te ra, i te marama, a i nga whetu.

31. Nga wa katoa a o ratou huringa; ko nga ra katoa kua whakaritea, nga marama, nga tau, a me o ratou kororia katoa, nga ture, a me nga wa i whakaritea, era e whakakitea mai i nga ra o te whakaaetanga o te whakatutukitanga o nga wa.

32. E rite ana ki te mea kua whakaritea i waenganui i te Kaunihera a te Atua Ora-tonu o era atu Atua katoa, i mua atu o tenei ao, ko te tikanga kia tiakina tae noa ki te mutunga a ko te mutunga tera, kei reira e uru ai nga tangata katoa ki tona nohoanga mutungakore, a tae atu ki tona nohoanga tuturu.

33. Pehea te roa o nga wai ngarungaru e paruparu ana ? He aha te mana e kaha ki te pupuri i nga rangi? Me he mea e taea e te tangata te whakamaro atu tona ringa ki te pupuri i te Awa o Mihuri i tona rerenga, a ki te whakatahuri ranei kia rere whakarunga, a hei whakararuraru i te riringa iho a te Matua Kaha Rawa i te matauranga i te rangi ki runga i nga matenga o nga Hunga Tapu o nga Ra o Muri nei.

34. Titiro, he maha nga mea i karangatia, a he ruarua e whiriwhiria, a he aha te take i kore ai ratou e whiriwhiria ?

35. No te mea ko a ratou ngakau i pau katoa te whakaaro ki nga mea o tenei ao, a me te hiahia kia whiwhi i nga honore o nga tangata, a kahore ratou e ako i tenei whakaakotanga kotahi.

36. Ko nga mana o te Tohungatanga kahore e wehe ana, engari e hui tonu atu ana ki nga mana o te rangi, a ko nga mana o te rangi e kore e taea te whakahaere, e kore hoki te whatoro atu, engari ma runga anake i nga tikanga o te pono.

37. Ta te mea kia whakataua ia ki runga ki a matou, e pono ana; otira me he mea ka whakaaro tatou ki te huna i o tatou hara, a ki te whakapai i a tatou whakaaro whakahi, to tatou whakaaro noa, a ki te mea ranei kia whakahaeretia ai, a te mana nui, a te pananga atu ki runga i nga wairua o nga tamariki a nga tangata, i tehea ahuatanga o te pono-kore, nana, ka tango nga rangi i a ratou; ka pouri te Wairua o te Ariki; a i te mea kua tangohia, Amine ki te Tohungatanga, a te mana ranei o taua tangata.

38. Titiro, i mua i tona mohiotanga, kua mahue ia ki a ia ano ka whana ki nga koikoi; ki te tukino i te Hunga Tapu, a ki te whawhai atu ki te Atua.

39. Kua matau matou, na tetahi mohiotanga whakapouri, ara te ahuatanga me te whakahaere tata ana a nga tangata katoa, ko to ratou whiwhinga tonutanga ki tetahi mana iti nei, e ai ta ratou whakaaro, ka tere ta ratou timata ki te whakahaere he.

40. No reira he maha e karangatia, a he ruarua e whiriwhiria.

41. Kahore he kaha, he mana ranei e taea te pupuri i te mana o te Tohungatanga, heoi ano ma te pumau tonu i roto i nga whakamamaetanga roa, ara kia rangimarie me te whakaiti, a me te aroha kahore nei e mutu;

42. Ara kia aroha, a kia ma te ngakau, ma reira nei e tino kaha atu ai te rahinga o te wairua, ki te kahore e whakapai ahua, a ki te kahore he tinihanga.

43. Ki te korerotia kinotia, kia hohoro, ina tohutohutia e te Wairua Tapu, a no reira ka whakaatu hoki i muri iho e nuku haere ana te aroha ki a ia, ko ia nei i korerotia kinotia e koe, ki te kahore ka mohio ia he hoa-riri koe ki a ia;

44. Ka mohio ia kua kaha atu to whakapono i te taura o te mate.

45. Tukuna ra kia ki ou whakaaro i te aroha ki nga tangata katoa, a tae atu ki te whare o te whakapono, a me tuku ma te pai haere tonu e whakaatu ou whakaaro, ma reira ka kaha haere ai to whakapono i te aroaro o te Atua, a ka maringi tonu mai te whakaakoranga a te Tohungatanga ki runga ki tou wairua penei me te haukura o te rangi.

46. Ko te Wairua Tapu hei hoa haere tahi mou, a me tou hepeta, he hepeta no te tika, no te pono kahore e whakarereke, a me tu tou rangatiratanga hei rangatiratanga pumau tonu, a kahore hoki e meinga kia tono atu, mana noa e rere mai ki a koe mo ake tonu atu.