1. E kore nga mahi, nga takotoranga tikanga me nga whakatakoto whakaaro o te Atua e taea te arai, e kore hoki e whakakorea atu;

2. Ina hoki, e kore te Atua e haere i nga ara kopikopiko, e kore ia e peka ki matau, ki maui ranei, e kore hoki ia e poka ke i tana i korero ai, no reira tika tonu ona ara, a ko tona huarahi kotahi tonu te porowhita.

3. Kia mahara, kia mahara, e hara te mahi a te Atua e whakakorea, engari ia a te tangata mahi.

4. Ahakoa whiwhi te tangata ki nga whakakitenga maha, me te whai mana hoki hei mea i nga mahi nunui, he ahakoa ki te whakapehapeha ia i roto i tona ake kaha me te whakaparahako ki nga tohutohu a te Atua, a ka whai atu i nga tokonga o tona ngakau ake, me nga hiahia whaka-te-kikokiko, era ia e taka a ka tau te rapunga utu o te Atua tika ki runga ki a ia.

5. Nana, kua tukuna atu enei mea (nga papa) ki a koe, a, ano te uaua o ou whakahaunga; a kia mahara ano ki nga kupu whakaari i whakaaria ra ki a koe, ki te kore e takahia e koe;

6. A nana, ano te maha o au takahanga i nga whakahaunga me nga ture a te Atua, a kua haere koe i runga i nga kukumetanga a te tangata:

7. Ta te mea, na, ahakoa ka whakakorea e te tangata nga tohutohu a te Atua, me te whakahawea ki ana kupu, ko te mea tika mou, kaua e nui atu to wehi i te tangata i to wehi ki te Atua.

8. Otira penei, me i mau tonu koe ki te pono, kua torona mai e ia tona ringa, a kua tiakina koe, kua karoa atu i a koe nga pere muramura katoa a te hoa riri; a kua noho ia i a koe i nga takiwa raruraru katoa.

9. Nana, ko Hohepe koe, a i whiriwhiria koe hei mea i te mahi a te Ariki; otira na te mahi he, ki te kore koe e ohiti ka hinga koe.

10. Otira kia mahara he tohu tangata te Atua; no reira, ripeneta ki tau i mea ai e rereke ana i te whakahaunga kua hoatu e ahau ki a koe, a he mea whiriwhiri tonu koe, a kua karangatia ano ki te mahi.

11. Ki te kahore koe e mea i tenei, ka tukua koe, a ka rite ki era atu tangata a kore ake tou mana.

12. A i a koe ka tuku atu i nga mea, a hoatu ai e te Atua he mana, he maramatanga ki a koe, hei whakamaori, i tukua atu e koe he mea tapu ki roto ki nga ringa o tetahi tangata kino.

13. Kua whakakorea nei e ia nga tohutohu a te Atua, a kua takahia nga whakaaringa tapu rawa i whakaaria ai ki te aroaro a te Atua, a kua whakawhirinaki atu ki ona whakaaro mohio ake, a kua whakapehapeha hoki i roto i ona whakaaro ake.

14. A ko te take tenei i ngaro ai i a koe ou manaakitanga mo tetahi wa.

15. Ta te mea kua whakaaetia e koe kia takahia nga tohutohu a tou kai-tohutohu, no te timatanga ra ano.

16. He ahakoa ra, ka horapa atu taku mahi, i te mea hoki pua puta mai ki te ao, he matauranga mo tetahi Kai-whakaora na roto i te whakaaturanga o nga Hurai, waihoki ka puta mai he matauranga mo tetahi Kai-whakaora ki toku iwi.

17. A ki nga Niwhai ratou ko nga Hakopa, ko nga Hohepa me nga Horama, ma roto i te whakaaturanga o o ratou matua.

18. A ka matauria tenei whakaaturanga e nga Ramana ratou ko nga Remuere me nga Ihimaira, kua heke nei ratou i roto i te whakapono-kore, he mea na te tutu o o ratou matua, i tukua nei e te Ariki ma ratou (ma nga Ramana) o ratou tuakana nga Niwhai e whakamoti, he mea na a ratou mahi tutu me a ratou mahi whakarihariha.

19. A mo tenei take ano i tiakina ai enei papa kei runga nei enei tuhituhinga, kia tutuki ai nga kupu taurangi a te Ariki, i whakaaria ai e ia ki tana iwi;

20. A kia tae ai nga Ramana ki te matauranga ki o ratou matua, a kia mohio ai ano hoki ratou ki nga kupu whakaari a te Ariki, a kia whakapono ai ratou ki te Rongo-pai me te okioki ano ki runga ki nga painga o Ihu Karaiti, a kia whakakororiatia ai i runga i te whakapono ki tona ingoa, a kia whakaorangia ai ratou ma roto i to ratou ripenetatanga. Amine.