1. Whakarongo mai ki a au e ai ta te Ariki, ta tou Atua, a ka korero tenei ahau ki taku pononga ki a Eruera Patariti, me te hoatu i etahi tohutohu ki a ia, no te mea he mea tika kia tohutohutia ai ki nga mea hei whakakotahitanga i tenei iwi;

2. No te mea he mea tika kia whakakotahitia ratou kia rite ki aku ture, ki te kore, ka hatepea atu ratou;

3. No reira ma taku pononga, ma Eruera Patariti ratou ko te hunga kua whiriwhiria e ia, e ahuareka ana hoki ahau ki a ratou, ma ratou e whakarite nga wahanga ma tenei iwi, kia rite ma tena tangata, ma tena tangata ki te nui o tana whanau, ki te ahua hoki o to ratou oranga, kia rite ano hoki ki a ratou i mate ai, i hapa ai.

4. A me he mea ka oti te whakarite te wahanga ma te tangata, ma taku pononga ma Eruera Patariti e hoatu ki a ia tetahi tuhituhinga hei tino here i tana wahanga ki a ia, kia whiwhi ai ia ki taua mea, ae ra hoki ki tenei mana ki tenei whenua ano hoki I roto i te Hahi, a kia tae ra ano ki te wa e hara ai ia e kore ai e tau mo roto i te Hahi e ai ki ta te reo o te Hahi, rite tonu ki ta nga ture me nga kawenata o te Hahi;

5. A me he mea ia ka taka ki te hara, ka kore ano e tau mo roto i te Hahi, e kore ia e whai kereme ki te wahanga i tukua ai e ia ki te pihopa hei oranga mo te hunga rawa-kore o taku Hahi, no reira e kore e hoki ki a ia tana i tuku ai, heoi te mea e whai kereme ai ia ko te wahanga i tititia ki a ia.

6. A kia penei te u o te mahinga i nga mea katoa, kia rite ki ta nga ture o te whenua.

7. A ko te wahanga ma tenei iwi, ata whakaritea ano ma ratou;

8. A ko te moni i toe iho ki te iwi nei, me whakatu tetahi tangata hei kai-whakahaere mo tenei iwi, ka mau ki te moni hei tango kai, hei tango kakahu, kia rite ki nga mea e matea ana e tenei iwi.

9. Na kia tika te mahi a tena tangata, a tena tangata, kia riterite ano ratou puta noa te iwi katoa, (ara kaua etahi e rangatira ake i etahi), kia riterite ano te whiwhi, kia kotahi ai koutou, kia pera me taku i whakahau ai ki a koutou.

10. A ko nga mea ma tenei iwi kaua e mauria ka hoatu ki te hunga o tetahi atu hahi (peka o te Hahi);

11. No reira me he mea ka tango tetahi atu peka i te moni a tenei peka, me utu e ratou te moni a tenei peka, kia rite ki ta ratou i whakarite ai;

12. Ko tenei meatanga ma te Pihopa, ma te kai-whakahaere ranei, e whakaritea ai e te reo o te peka.

13. Me tenei ano, ma te pihopa e whakatu tetahi toa mo tenei peka, a ko nga mea katoa, ahakoa moni, ahakoa ranei he kai, e nuku atu ana i te mea i tika ma tenei iwi, me waiho i roto i nga ringaringa o te pihopa.

14. A me pare ake e ia tetahi wahi hei oranga mona, hei oranga hoki mo tana whanau, ara i te mea e tu ana ia i tera mahi.

15. A ko tenei meatanga, he whakaaetanga naku kia whakakotahi tenei iwi i a ratou kia rite ki aku ture;

16. Ka whakatapua e ahau tenei whenua mo ratou mo tetahi wa poto, kia whakaritea ra ano e ahau, e te Ariki, tetahi atu wahi mo ratou, a ko reira ratou whakahaua ai kia puta atu i konei;

17. Ko te haora me te ra e kore e whakaaturia ki a ratou, no reira me mahi ratou i runga i tenei whenua, ano he noho ta ratou mo nga tau maha, a ka meinga tena hei painga ki a ratou.

18. Nana, he tauira tena ki taku pononga, ki a Eruera Patariti, i roto i era atu kainga, i roto hoki i nga peka katoa.

19. A ko ia e kitea ana he tuari pono, he tuari tika, whai-whakaaro hoki, ka uru ki te hari o tona Ariki, ka whiwhi hoki ki te oranga-tonutanga.

20. He pono taku e mea atu nei ki a koutou, ko Ihu Karaiti ahau, ka hohoro hoki te haere mai, i te haora e kore ai koutou e whakaaro. Ae ra hoki, koia ano. Amine.