Ko ngā Kawenata me ngā
Whakahaunga

1. Whakarongo e nga iwi o toku Hahi, e ai ta te reo Ona e noho nei i runga rawa, e tau iho nei tana titiro ki runga ki nga tangata katoa, ae ra, he pono taku e mea nei, whakarongo e nga iwi o tawhiti, me koutou hoki e noho ana i runga i nga motu o te moana, whakarongo ngatahi mai koutou.

2. No te mea he pono, ki nga tangata katoa te reo o te Ariki, a e kore tetahi e mawhiti atu, kahore hoki he kanohi e kore e kite, kahore he taringa e kore e rongo, he ngakau ranei e kore e ngotoa.

3. A ko te hunga tutu ka werohia ki te pouritanga nui, no te mea ka panuitia atu a ratou mahi tutu i runga i nga tuanui o nga whare, a ka hurahia a ratou mahi ngaro.

4. A ki nga iwi katoa te reo whakatupato, he mea ma nga mangai o aku akonga, kua whiriwhiria nei e ahau i enei nga ra whakamutunga.

5. A ka haere atu ratou, e kore hoki ratou e whakawarea e tetahi, no te mea naku, na te Ariki ratou i tono.

6. Nana, ko toku mana tenei, me te mana hoki o aku pononga, me te mata-korero ki te pukapuka o aku whakahaunga, kua hoatu nei e ahau ki a ratou kia panuitia atu ki a koutou, e te hunga e noho ana i runga i te mata o te whenua.

7. No reira e wehi, e wiri e nga iwi, no te mea ka rite katoa taku, ta te Ariki i whakahau i roto i a ratou.

8. A he pono taku e mea nei ki a koutou, ko ratou e haere, e kawe atu i enei rongo ki nga iwi e nohoia nei te whenua, kua whakawhiwhia ki te mana he hiiri i te hunga whakapono-kore me te hunga tutu, i runga i te whenua, i roto ano i te rangi.

9. Ae ra, he pono, hei hiiri i a ratou mo te ra e ringihia noatia ai e te Atua tona riri ki runga ki te hunga kino;

10. Mo te ra hoki e haere mai ai te Ariki ki te hoatu utu ki tena, ki tena o nga tangata kia rite ki ana mahi, ki te mehua hoki ki ia tangata, ki ia tangata kia rite ki te mehua i mehuatia ai e ia ki ana hoa tangata.

11. No reira he mea ki nga topito o te whenua te reo o te Ariki, kia rongo ai nga tangata katoa e pai ana.

12. Kia takatu koutou, kia takatu mo nga mea era e haere mai; kua tata hoki te Ariki;

13. A kua mura te riri o te Ariki, a kua whakamakuria tana hoari i te rangi, a ka taka ki runga ki nga iwi o te ao.

14. A ka whakakitea te ringaringa o te Ariki; ka puta mai hoki te ra e hatepea atu ai i roto i toku iwi nga tangata e kore nei e rongo ki te reo o te Ariki ki te reo ranei o ana pononga, e kore ranei e ngohengohe ki nga kupu a nga poropiti me nga Apotoro;

15. No te mea kua kotiti atu ratou i oku whakaritenga tikanga, kua takahia e ratou taku kawenata mau tonu;

16. Kahore ratou e rapu i te Ariki kia whakapumautia ai tona tika, engari e haere ana tena tangata, tena tangata i tona ara ake, e whai ana hoki i te ahua o tona atua ake, kei te ahua o te ao tona nei ritenga, a ko tona whakapumautanga he whakapumautanga whakapakoko, e tawhitotia ana a ka ngaro i roto i a Papurona; ae ra ko Papurona te nui, tera e horo.

17. No reira ko ahau ko te Ariki, e matau ana ki nga aitua e huaki ai ki runga ki te hunga o te whenua, kua karanga ki taku pononga ki a Hohepa Mete, tamaiti, a kua korero iho ki a ia i te rangi, kua hoatu hoki he whakahaunga ki a ia.

18. A kua hoatu he whakahaunga hoki ki etahi atu, kia kauwhau atu ratou i enei mea ki te ao; a ko enei mea katoa kia whakatutukitia ai a nga poropiti i tuhituhi ai;

19. Ka puta mai nga mea ngoikore o te ao hei turaki i nga marohirohi me nga mea kaha, kia kore ai te tangata e tohutohu i tona hoa tangata, kia kore ai hoki ia e whakawhirinaki atu ki te ringaringa kikokiko.

20. Engari ia, kia korero ia tangata, ia tangata i runga i te ingoa o te Atua te Ariki, koia te Kai-whakaora o te ao;

21. Kia horapa ai hoki te whakapono i runga i te ao;

22. Kia whakapumautia ai toku kawenata mau tonu;

23. Kia kauwhautia ai ano hoki te raneatanga o toku Rongo-pai e nga mea ngoikore me nga mea mahaki ki nga topito o te ao; ki te aroaro hoki o nga kingi me nga kai whakahaere tikanga.

24. Nana, ko te Atua ahau, a naku i korero: naku enei whakahaunga, he mea hoatu ki aku pononga i roto i to ratou ngoikoretanga, ki te ritenga o to ratou reo, kia tae ai ratou ki te matauranga.

25. A ki te mea ka kotiti ratou ka matauria:

26. A ki te mea ka rapu matauranga ka whakaakona ratou:

27. A ki te mea i hara ratou ka riria, kia ripeneta ai ratou:

28. A ki te mea ka whakaiti ratou ka whakakahangia a ka manaakitia ratou no runga, ka whiwhi ki te mohiotanga i tena wa, i tena wa:

29. A i muri mai i te rironga mai o te tuhituhinga o nga Niwhai, ae ra, ko taku pononga ko Hohepa Mete, tamaiti, ma te kaha o te Ariki, i runga i ta te Atua mahi tohu, ka whai mana ai ki te whakamaori i te Pukapuka a Moromona;

30. A ki a ratou hoki i hoatu ai enei whakahaunga, ka whai mana hei whakatakoto i te turanga o tenei Hahi, me te whakaputa mai hoki i a ia i roto i te wahi ngaro i roto hoki i te pouritanga, koia anake hoki te Hahi pono, te mea ora i runga i te mata o te whenua katoa, te mea hoki e paingia ana e ahau e te Ariki; he korero tenei ki te tokomaha o te Hahi, e hara i te korero tatakitahi ki tena, ki tena.

31. No te mea e kore ahau te Ariki e titiro ki te hara ahakoa iti rawa, me te whakaae ano;

32. He ahakoa ko ia e ripeneta ana me te whakarite ano i nga whakahaunga a te Ariki ka murua ona hara;

33. A ko ia e kore e ripeneta ka tangohia i a ia te maramatanga kua riro noa nei i a ia, no te mea e kore toku wairua e totohe tonu ki te tangata e ai ta te Ariki o nga Mano.

34. A tenei ano, he pono taku e mea nei ki a koutou, e nga tangata o te whenua ko ahau te Ariki e pai ana kia whakakitea enei mea ki nga kikokiko katoa,

35. No te mea kahore aku whakapai kanohi, a ko taku e pai nei ko nga tangata katoa kia matau, ka hohoro te putanga mai o te ra; kore ano i tae noa mai te haora, engari kua tata, e tangohia ai te rongo mau i te whenua, a ka whai mana te rewera ki runga ki tona kingitanga ake;

36. A ka whai mana hoki te Ariki ki runga ki ana Hunga Tapu a ka kingi ia i waenganui i a ratou, ka heke iho ki te whakarite whakawa ki runga ki a Itumea, ara ki runga ki te ao.

37. Whakatakina enei whakahaunga no te mea he tika, he pono, a ko nga poropititanga me nga kupu whakaari o roto ka whakatutukitia katoatia.

38. Ko taku ta te Ariki i korero ai, naku i korero, a kahore he peheatanga atu ahakoa nga rangi me te whenua e pahemo, e kore taku kupu e pahemo, engari ka whakatutukitia katoatia, ahakoa na toku reo ake, na te reo ranei o aku pononga, he rite tahi.

39. No te mea, nana, ko te Ariki ko ia te Atua, a ko te Wairua te kai-whakaatu, a he pono te whakaaturanga, a tuturu tonu te pono aka ake ake. Amine.